تازيون خبرون

Daily Archives: November 19, 2014

ملڪ تي ڇانيل ڪارا ڪڪر جلد ٽري ويندا : نواز شريف

اسلام آباد (بيورو) وزيراعظم نواز شريف چيو آهي ته چين پاڪستان ۾ 5 4 ارب ڊالر جي سرمائيداري ڪري رهيو آهي جنهن سان پاڪستان ۾ توانائي جي بحران جو مڪمل خاتمو ٿي ويندو ۽ پاڪستان ترقي جي راهه تي هلي پوندو، جرمني ۽ چيني سرمائيدارن جو پاڪستان تي اعتماد بحال ٿيو آهي ۽ اهي پاڪستان ۾ سرمائيداري لاءِ تيار آهن، غير ملڪي سرمائيداري سان نوجوانن کي روزگار جا موقعا ملندا ۽ ملڪ تي ڇانيل ڪارا ڪَڪر جلد ٽري ويندا. هو وزيراعظم هائوس ۾ جمعيت علماءِ اسلام (ف) جي سربراهه مولانا فضل الرحمان سان ملاقات ۾ ڳالهائي رهيو هو. ملاقات ۾ گڏيل دلچسپي جي معاملن ۽ ملڪي سياسي صورتحال تي ويچار ونڊيا ويا. ان دوران مولانا فضل الرحمان وزيراعظم نواز شريف جي اڳواڻي تي ڀرپور اعتماد جو اظهار ڪندي سندس پاڪستان جي معاشي استحڪام لاءِ ڪيل هاڻوڪي دورن ۽ ڪوششن جي واکاڻ ڪئي. ملاقات ۾ مولانا فضل الرحمان وزيراعظم کي مڪمل سهڪار جي خاطري ڏياري، ٻنهي اڳواڻن اتر وزيرستان مان آپريشن ضرب عضب سبب لڏي آيل آءِ ڊي پيز جي معاملي تي به ڳالهايو. مولانا فضل الرحمان وزيراعظم کي گذريل ڏينهن ٿيل جرڳي جي فيصلن بابت آگاهه ڪيو ۽ چيو ته قبائلي اڳواڻ جلد پنهنجي گهرن ۾ واپس موٽڻ چاهين ٿا، آءِ ڊي پيز ملڪ لاءِ قرباني ڏئي رهيا آهن، آءِ ڊي پيز جي پُرامن ۽ جلد واپسي کي يقيني بڻايو وڃي.

 

ٿر ۾ موت جو رقص جاري، وڌيڪ 10 حياتيون ڳڙڪائي ويو

ٿرپارڪر (نمائندو) ڏڪاريل ڏيهه ٿَـر ۾ موت جو رقص جاري آهي، خوراڪ جــِي کوٽ ۽ علاج جون بهتر سهولتون نه هئڻ سبب وڌيڪ ستن ٻارڙن جَي فوت ٿيڻ بعد گذريل ڏهاڙَي فوت ٿيل ٻاڙرن جو انگ 10 ٿي ويو، جڏهن ته ڏيڍ مهيني دوران فوتگين جو تعداد 112 تائين پهچي ويو آهي. ٿـَر ۾ خوراڪ جــِي کوٽ ۽ علاج جون بهتر سهولتون نه هجڻ ڪري معصوم ٻارڙن جي فوت ٿيڻ جو سلسلو تيزي سان جاري آهي. عمرڪوٽ جِي سول اسپتال ۾ غذائي کوٽ جو شڪار 6 ورهين جو هيرا لعل ولد عالم ڀيل فوت ٿي ويو. ڇاڇري تعلقي ۾ وڌيڪ 6 ٻارڙا غذائي کوٽ جي ڪري موت جي منهن ۾ هليا ويا، جن ۾ شهناز، مهناز، سهراب، اميدان،بيبي ۽ قربان شامل آهن. مٺيءَ جي سول اسپتال ۾ خوراڪ جي کوٽ سبب 24 ڏينهن جي معصوم ٻارڙي روزينا فوت ٿي وئي. ڏيپلي ۽ ڇاڇري ۾ ڏڪار متاثر چئن مهينن جي فرزانا ۽ هڪ مهيني جي قربان راهمون دم ڌڻي حوالي ڪيو. ٿر ۾ اڄ وڌيڪ 10 ٻارڙن جي فوت ٿيڻ کانپوءِ 49 ڏينهن دوران 102 ٻارن سميت فوتين جو تعداد وڌي 112 ٿي ويو آهي. ڏڪاريل ڏيهه ۾ ايڏي ويڌن باوجود سنڌ سرڪار سڀ صحيح آهي وارو راڳ آلاپي رهي آهي.

 

تحريڪ انصاف مڇرائڻ جوڳيون تقريرون ڪرڻ لاءِ شيخ رشيد کي کليل ڇوٽ ڏئي رکي آهي، پرويز رشيد

اسلام آباد (بيورو) سُڌ سماءَ جي وفاقي وزير سينيٽر پرويز رشيد چيو آهي ته تحريڪ انصاف مڇرائڻ جوڳيون تقريرون ڪرڻ لاءِ شيخ رشيد کي کليل ڇوٽ ڏئي رکي آهي. پنهنجي هڪ انٽرويو ۾ هن تحريڪ انصاف کي چيو ته اها پاڻ پنهنجي مفاد ۾ ائين ڪرڻ کان پاسو ڪري. وفاقي وزير چيو ته تحريڪ انصاف جي سربراهه عمران خان کي عدالت ۾ پيش ٿيڻ گهرجي ڇوته سندس پارٽي انصاف جي نالي تي قائم ٿي هئي. هن چيو ته حڪومت جو ان معاملي سان ڪو سروڪار ناهي ۽ هاڻ عدالت پاڻ رستو ڳوليندي . پرويز رشيد چيو ته پي ٽي وي تي حملي جي فوٽيج سڀني ڏٺي آهي پرپوءِ جيڪڏهن تحريڪ انصاف سمجهي ٿي ته ڪيس جعلي آهي ته پوءِ ان کي عدالت وڃڻ گهرجي.

 

آرمي چيف سان آمريڪي سينٽرل ڪمانڊ جي سربراهه جي ملاقات، پاڪ فوج جي دهشتگردي خلاف پرعزم جنگ جي تعريف

راولپنڊي (م.ڊ) آمريڪي سينٽرل ڪمانڊ جي سربراهه جنرل لائيڊ آسٽن پاڪ فوج جي دهشتگردي جي خلاف پرعزم جنگ کي ساراهيندي دهشتگردي خلاف جنگ ۾ پاڪ فوج جي عزم پيشاوراڻي صلاحيت ۽ ڪاميابي تي خراج تحسين پيش ڪيو آءِ ايس پي آر جي ڊائريڪٽر جنرل ميجر جنرل عاصم باجوا مطابق فلوريڊا ۾ سينيٽ ڪام هيڊ ڪوارٽرز ۾بري فوج جي سربراهه جنرل راحيل شريف سان ڳالهائيندي سينيٽ ڪام جي ڪماندر دهشتگردي خلاف جنگ ۾ پاڪ فوج جي عزم پيشاوراڻي صلاحيت ۽ ڪاميابي کي خراج تحسين پيش ڪيو هن چيو ته آمريڪي جنرل پاڪستان جي جاري آپريشن ضرب عضب تي اطمينان جو اظهار به ڪيو. جنرل راحيل شريف علائقائي سلامتي پاڪستان ۽ افغانستان جي فوجي لاڳاپن ۾ بهتري بابت پاڪستان جو موقف پيش ڪيو ڪنٽرول لائين تي ڀارتي جارحيت جو معاملو به بحث هيٺ آيو.

 

آبادي ۾ واڌ جي چئلينج سان منهن ڏيڻ لاءِ قومي ايمرجنسي جي ضرورت آهي: صدر ممنون حسين

اسلام آباد (بيورو) صدر مملڪت ممنون حسين چيو آهي ته آبادي ۾ واڌ جي چئلينج سان منهن ڏيڻ لاءِ قومي ايمرجنسي جي ضرورت آهي، آبادي جي چئلينج سان منهن ڏيڻ لاءِ جنگي بنيادن تي قدم کڻڻا پوندا، پاڪستان کي فيملي پلاننگ پروگرام ۾ سرمائيداري جي ضرورت آهي، صوبا فيملي پلاننگ پروگرام ۾ سروسز لاءِ فنڊ فراهم ڪن، حڪومت ملڪ کي ترقي جي شاهراهه تي گامزن ڪرڻ لاءِ پُرعزم آهي، ملڪ ۾ امن و استحڪام لاءِ اعليٰ معيارِ زندگي ضروري آهي، امنو استحڪام لاءِ نئين نسل کي برابر موقعا ۽ انصاف جي فراهمي ضروري آهي. پاڪستان پاپوليشن ايسوسيئيشن جي 5 1 هين سالانا ريسرچ ڪانفرنس کي خطاب ڪندي هن وڌيڪ چيو ته پيدائش جي شرح ۾ واڌ سان مائرن جي موت جي شرح پريشان ڪندڙ حد تائين وڌي وئي آهي. سرڪاري ادارن تي عوام جو اعتماد بحال ڪرڻ لاءِ خود احتسابي جو نظام رائج ڪيو وڃي، آبادي تي ڪنٽرول لاءِ بنگلاديش ماڊل رائج ڪيو وڃڻ گهرجي.

 

ڪنهن به سونامي کان ڊڄڻ جي ضرورت ناهي:شرجيل ميمڻ

ڪراچي (اسٽاف رپورٽر) سنڌ جي اطلاعات واري صوبائي وزير شرجيل ميمڻ چيو آهي ته تحريڪ انصاف کي لاڙڪاڻي ۾ جلسي جي اجازت ڏني وئي آهي،کين ڪنهن به سونامي کان ڊڄڻ جي ضرورت ناهي. سنڌ اسيمبلي ٻاهران ميڊيا سان ڳالهائيندي اطلاعات واري وزير شرجيل ميمڻ چيو ته مهذب ماڻهو عمران خان ۽ شيخ رشيد جهڙي زبان استعمال ناهن ڪندا،جمهوريت جو اهو مطلب ناهي ته سياسي اڳواڻن کي گاريون ڏنيون وڃن. هن چيو ته لاڙڪاڻي ۾ تحريڪ انصاف کي جلسي جي اجازت ڏني وئي آهي پر عمران خان کي پنهنجي زبان تي ڪنٽرول ڪرڻ گهرجي. شرجيل ميمڻ چيو ته پرويز مشرف جي دور ۾ عمران خان جي ڪراچي اچڻ تي پابندي هئي پر هــُو اهڙي سوچ نه ٿا رکن،سڀني کي ملڪ ۾ ڪٿي به جلسو ڪرڻ جو حق آهي. هن چيو ته عمران خان اڄ تائين طالبان کي دهشتگرد قرار ناهي ڏنو ڇاڪاڻ ته اهي پي ٽي آءِ سربراهه جا قومي هيروز آهن. شرجيل ميمڻ وڌيڪ چيو ته عمران خان ته زهريٰ شاهد جي قتل جو ڪيس داخل ڪرائڻ لاءِ به تيار نه هو،پوليس زهريٰ شاهد جي قاتلن کي گرفتار ڪيو پر پي تي آءِ سربراهه اڄ تائين اهو پڇڻ جي زحمت به ناهي ڪئي ته قاتل ڪير آهن.

 

دهشتگردي خلاف جنگ ۾ پاڪستان جي قربانين جو اعتراف نه پيو ڪيو وڃي: چوڌري نثار

اسلام آباد (بيورو) وفاقي گهرو وزير چوڌري نثار علي سان برطانوي وزيراعظم جي دهشتگرديٽوڙ بابت خاص نمائندي ڪلويس مٿ بيڪر ملاقات ڪئي،گهرو وزير جو چوڻ آهي ته دهشتگردي خلاف جنگ ۾ عالمي سطح تي پاڪستان جي قربانين جو اعتراف نه ڪيو پيو وڃي. اسلام آباد ۾ برطانوي وزيراعظم جي دهشتگردي ٽوڙ بابت خاص نمائندي ڪلويس مٿ بيڪر ۽ برطانوي هاءِ ڪمشنر فلپ بارٽن ،گهرو وزير چوڌري نثار سان ملاقات ڪئي. ملاقات ۾ دهشتگردي جي خاتمي بابت غور ويچار ڪيو ويو. برطانوي وزيراعظم جي دهشتگردي ٽوڙ بابت خاص نمائندي ڪلويس مٿ بيڪر چيو ته برطانيه دهشتگري جي خاتمي لاءِ پاڪستان جي مدد ڪرڻ لاءِ تيار آهي. گهرو وزير چوڌري نثار علي ان موقعي تي چيو ته ملڪ ۾ امن جي بحالي پهرين ترجيح آهي. چوڌري نثار علي جو چوڻ هو ته عالمي سطح تي پاڪستان جي قربانين جو اعتراف ڪرڻ گهرجي.

 

هندن سان ٿيندڙ زيادتين ۽ ڏهرڪي ۾ نينگري انجلي جي مبينا اغوا خلاف مذمتي ٺهراءُ منظور

ڪراچي (اسٽاف رپورٽر) سنڌ اسيمبليءَ هندن سان ٿيندڙ زيادتين ۽ ڏهرڪي ۾ نينگري انجلي جي مبينا اغوا خلاف مذمتي ٺهراءُ منظور ڪري ورتو، جڏهن ته اجلاس دوران انجلي جي واقعي تي پير پاڳاري جو نالو کڄڻ تي هنگامو به ٿيو. سنڌ اسيمبليءَ جو اجلاس اسپيڪر آغا سراج دراني جي صدارت هيٺ ٿيو. اجلاس دوران هندن سان ٿيندڙ زيادتين ۽ ڏهرڪي ۾ نينگري انجلي جي مبينا اغوا خلاف فنڪشنل ليگ جي ميمبر نند ڪمار ٺهراءُ پيش ڪيو جيڪو اتفاٰق راءِ سان منظور ڪيو ويو. ٺهراءَ ۾ چيو ويو آهي ته انجلي جي مبينا اغوا، زبردستي شادي ۽ مذهب جي تبديلي ۾ ملوث ماڻهن کي گرفتار ڪيو وڃي. اسيمبلي ميمبرن، انجلي جي بازياب ڪرائي کيس والدين حوالي ڪرڻ جو به مطالبو ڪيو. ٺهراءَ تي بحث ۾ حصو وٺندي پ پ اميدوار احمد علي پتافي چيو ته اقليتن جي مدد بدران هر سياسي جماعت پنهنجي سياست چمڪائي رهي آهي، اقليتن کي جيڪڏهن مسئلو حل ڪرڻو آهي ته نڪاح ڪرائيندڙ حر جماعت جو خليفو آهي. ان دوران پير پاڳاري جو نالو کڄڻ تي هنگامو ٿيو، جنهن بعد اسپيڪر سمورا لفظ حذف ڪري ڇڏيا. صوبائي وزير منظور وساڻ چيو ته سنڌ ۾ رهندڙ سنڌي هندن سان زيادتيون افسوسناڪ آهن، اڳوڻي آمر جنرل ضياءَ جي دور ۾ هندن سان زيادتين جو سلسلو شروع ٿيو. منظور وساڻ چيو ته هندن سان زيادتي سنڌ ۽ ملڪ خلاف سازش آهي، انجلي واقعي جي جاچ لاءِ اڻ ڌري ڪميٽي جوڙي وڃي. مڪيش ڪمار چاولا چيو ته انجلي کي حڪومت بازياب ڪرايو ۽ متاثر خاندان جي داد رسي ڪئي، پ پ حڪومت اقليتن جي تحفظ لاءِ جيڪي قدم کنيا ڪنهن ٻي حڪومت نه کنيا آهن. صوبائي وزير نثار کهڙي چيو ته ڏهرڪي واقعي جي آڙ ۾ حڪومت کي نشانو بڻائڻ جي ڪوشش ڪئي وئي. نثار کهڙي چيو ته رنڪل ڪماري جي واقعي ۾ ملوث سياسي اڳواڻن کي پ پ ٽڪيٽ نه ڏني هئي، سياستدانن تي ته تنقيد ڪئي ويندي آهي، ان نڪاح ڪندڙ مولوي جو نالو ڇو نه ورتو وڃي جيڪو ڄم واري سرٽيفڪيٽ کانسواءِ نڪاح پڙهائيندو آهي. صوبائي وزير مراد علي شاهه چيو ته آئين ۾ اقليتن جي حقن جي تحفظ جي ضمانت ڏني وئي آهي ۽ حقن جو تحفظ پ پ جو منشور آهي. هن چيو ته ڏياري جي موقعي تي سنڌ حڪومت سرڪاري کاتن ۾ ڪم ڪندڙ هندو ملازمن کي ايڊوانس سيلري ڏني. مراد علي شاهه چيو ته آسو ٻائي کي بلاول ڀٽو زرداري جي هدايت تي بينظير ڀٽو شيلڊ ڏني وئي. فنڪشنل ليگ ميمبر نند ڪمار چيو ته 12 ورهين جي نينگري انجلي جي بازيابي لاءِ قدم نه کڻڻ افسوسناڪ آهي. متحده ميمبر فيصل سبزواري چيو ته ننڍي عمر جي شادي خلاف قانون سازي اسيمبلي جو جرئت منداڻو قدم آهي. هن چيو ته اقليتن سان زيادتي تي هڪ اڳوڻي ايم پي اي ڀارت هجرت ڪئي، جبري شادي ۽ مذهب مٽائڻ جهڙن واقعن سان بدنامي اسلام جي ٿيندي آهي. متحده ميمبر فيصل سبزواري مطالبو ڪيو ته انجلي جهڙن واقعن جي روڪٿام لاءِ اسپيشل ڪميٽي جوڙي وڃي. ارم خالد چيو ته انجلي عدالت ۾ بيان ڏنو آهي ته هن پسند جي شادي ڪئي آهي ۽ ايس ايس پي جي رپورٽ ۾ به ساڳو ئي بيان آهي. ارم خالد چيو ته انجلي کي عدالتي حڪم ۽ والدين جي خواهش تي ڪراچي دارالامان موڪليو ويو آهي. لعل چند اڪراڻي چيو ته انجلي کي اغوا ڪيو ويو هو، حڪومت بازياب ڪرايو، هاڻي عدالت فيصلو ڪندي. هن چيو ته هــُو مذهبن جو احترام ڪن ٿا، مذهب مٽائڻ تي اعتراض ناهي پر ننڍي عمر جي ڇوڪريءَ سان زبردستي شادي درست عمل ناهي. هن چيو ته ڪوٽ راڌا ڪشن واقعي تي به افسوس ٿيو آهي، پنجاب حڪومت اڃا تائين انصاف فراهم ناهي ڪيو. ارم عظيم چيو ته چائلڊ ميريج قانونن تحت ننڍي ٻارڙيءَ سان شادي ڪرائيندڙن کي سزا ملڻ گهــُرجي. سندس چوڻ هو ته عدالتن کي ٻارڙين کي دارالامان موڪلڻ بدران انصاف ڪرڻ گهـُرجي، ڪنهن کي زبردستي مسلمان ڪري شادي ڪرڻ انصاف ناهي. کٽو مل جيوڻ چيو ته اقليتن خلاف ڪارروائيون ٿي رهيون آهن، سنڌ ۽ پنجاب ۾ ننڍي عمر جي 15 ڇوڪرين جو مذهب مٽائي شادي ڪرائي وئي. متحده ميمبر محمد حسين چيو ته عورتن سان ٿيندڙ زيادتين جي ڪيسن ۾ اضافو ٿي رهيو آهي، بي بس گهراڻن جي عورتن سان زياديتن جو سلسلو افسوسناڪ آهي. نادر مگسي چيو ته انجلي جو معاملو اسلامي تعليم خلاف آهي، ننڍي عمر جي ٻارڙي خوف سبب بيان ڏئي رهي آهي، حڪومت کي اهڙي ريت جي معاملن کي روڪڻ لاءِ قدم کڻڻ گهرجن. ان کان اڳ اپوزيشن ليڊر شهريار مهر چيو ته ٿر جي معاملي تي اڃا تائين پارلياماني ڪميٽي قائم نه ٿي سگهي آهي. شهريار مهر چيو ته ٿر جي صورتحال انتهائي سنگين آهي، فوري قدم کڻڻ جي ضرورت آهي. اسپيڪر آغا سراج دراني چيو ته اجلاس کانپوءِ ٿر جي صورتحال تي پارلياماني ڪميٽي جوڙي ويندي. اجلاس دوران صحافين جي معاملن تي بحث دوران اطلاعات واري صوبائي وزير شرجيل انعام ميمڻ چيو ته اليڪٽرانڪ ميڊيا جا مالڪ ڪيمرائن سان گڏ صحافين جي به انشورنس ڪرائين. شرجيل ميمڻ ايوان کي آگاهي ڏني ته سال 2000ع کان 2014ع تائين 3 ڪروڙ هڪ لک 45 هزار رپين کان وڌيڪ اشتهار جاري ڪيا ويا ۽ اطلاعات کاتي 14 سئو 75 صحافين کي ايڪريڊيشن ڪارڊ جاري ڪيا. هن چيو ته صحافي يا ادارن جي درخواست تي سڪيورٽي فراهم ڪئي ويندي، سڄي سنڌ ۾ رجسٽرڊ پريس ڪلبن جو انگ 258 آهي ۽ سڀ کان وڌيڪ پريس ڪلبس خيرپور ضلعي ۾ آهن جن جو انگ 41 آهي. شرجيل ميمڻ چيو ته جن صحافين جي مالي امداد ڪئي وئي انهن جي نالن جي لسٽ گهــُرڻ مناسب ناهي، دهشتگردي جو نشانو بڻجندڙ ۽ لاڏاڻو ڪري ويل صحافين جي پوئنرن جي مالي مدد ڪئي ويندي آهي. هن چيو ته گورنمينٽ جو ڪو به ملازم پنهنجي کاتي جي اجازت کانسواءِ صحافت نه ٿو ڪري سگهي.

 

شهريار مهر ۽ سندس والد آمرن جي پيداوار آهن:آغا سراج دراني

ڪراچي (اسٽاف رپورٽر) سنڌ اسيمبليءَ جي اسپيڪر آغا سراج دراني، اپوزيشن ليڊر شهريار مهر ۽ سندس والد کي چونڊ وڙهڻ جو چئلينج ڪندي چيو آهي ته هو آمرن جي پيداوار آهن. سنڌ اسيمبلي ٻاهران ميڊيا سان ڳالهائيندي آغا سراج دراني چيو ته شهريار مهر اپوزيشن ليڊر سيٽ وڃائڻ جي ڊپ کان وائڙائپ جو شڪارآهي ۽ مٿس بي بنياد الزام پڻ لڳائي رهيو آهي. هن چيو ته جنهن شخص جي بلاول ڀٽو زرداريءَ سان تصوير ڏيکاري وئي اهو ماضيءَ ۾ اپوزيشن ليڊر جي دستاربندي ڪندو رهيو آهي، ان بابت وڊيوز جلد منظر عام تي آندي ويندي. آغا سراج دراني چيو ته ٿر جي صورتحال واقعي درست ناهي،حڪومت کي گهرجي ته ان معاملي جي جاچ ڪرائي ۽ ٿر جي ماڻهن کي سهولتون ڏنيون وڃن. هن چيو ته ٻارڙن جي فوت ٿيڻ وارن واقعن کي روڪڻ لاءِ صحت کاتي جي ماهرن سان رابطا ڪيا وڃن ته جيئن اصل ڪارڻن جو پتو لڳائي سگهجي ته فوتگين جو سلسلو ڇو نه ٿو رُڪجي. اسپيڪر آغا سراج دراني چيو ته ٿر بابت جلد پارلياماني ڪميٽي جوڙي ويندي،جنهن ۾ سمورين پارٽين جو هڪ هڪ نمائندو شامل ڪيو ويندو.

 

سپريم ڪورٽ وزيراعظم کي نااهل قرار ڏيڻ لاءِ چار درخواستون خارج ڪري ڇڏيون

اسلام آباد (بيورو) سپريم ڪورٽ وزيراعظم نواز شريف کي نااهل قرار ڏيڻ لاءِ 1997ع ۾ داخل ڪرايل چئن درخواستن کي اڻ اثرائتو قرار ڏئي خارج ڪري ڇڏيو. چيف جسٽس ناصر المــُلڪ جي سربراهي ۾ ٽه رڪني بينچ، وزيراعظم نواز شريف جي نااهلي ۽ 14 هين آئيني ترميم خلاف درخواستن تي ٻڌڻي ڪئي. بابر اعواڻ، منظور قادر، وڪيل محاذ ۽ مولوي اقبال حيدر طرفان درخواستون 1997ع ۾ داخل ڪيون ويون هيون. چيف جسٽس، وزيراعظم نواز شريف جي نااهلي ۽ 14 هين آئيني ترميم خلاف درخواستون اڻ اثرائتيون قرار ڏئي خارج ڪري ڇڏيون.