تازيون خبرون

Daily Archives: November 15, 2014

ڊپ وچان جج دهشتگردي جا ڪيس نه پيا هلائن، ڊنل جج استعيفيٰ ڏين: شرجيل ميمڻ

ڪراچي (اسٽاف رپورٽر) سنڌ سرڪار،ڪراچي ۾ بدامني ۽ ٽارگيٽ ڪلنگ تي مڪمل طور ضابطو نه اچڻ جو ذميوار عدليه کي قرار ڏئي ڇڏيو،شرجيل ميمڻ،پوليس ۽ رينجرز جي ڪارروائي کي بهتر قرار ڏيندي چيو آهي ته دهشتگردي ٽوڙ عدالتن جا جج ڊپ وچان 95 سيڪڙو ڪيسن جي ٻڌڻي ئي نه ٿا ڪن. صوبائي وزير شرجيل انعام ميمڻ ڪراچي ۾ ٽارگيٽڊ آپريشن جا تفصيل سنڌ اسيمبليءَ جي ايوان ۾ پيش ڪيا. هن رينجرز ۽ پوليس جي ڪارڪردگيءَ کي اطمينان جوڳو قرار ڏيندي چيو ته دهشتگردي ٽوڙ عدالتن جا جج سمورين سهولتن باوجود ڊپ وچان ٽارگيٽ ڪلنگ توڙي بدامني جي ٻين واقعن جا 95 سيڪڙو ڪيس نه ٿا هلائين. هن دهشتگردي ٽوڙ عدالتن جي ججن کي گذارش ڪئي ته ڏوهارين کي سزا ڏني وڃي،ٻي صورت ۾ ڊنل جج استعيفيٰ ڏئي گهر هليا وڃن. صوبائي وزير شرجيل ميمڻ چيو ته ڪراچي آپريشن ۾ پوليس ۽ رينجرز جي بهتر ڪارڪردگي سبب ٽارگيٽ ڪلنگ جي واقعن ۾ 80 سيڪڙو گهٽتائي آئي آهي، اڳ روزانو 20، 20 لاش ڪرندا هئا پر هاڻي صورتحال مختلف آهي. شرجيل انعام ميمڻ ٽارگيٽڊ آپريشن جا تفصيل ٻڌائيندي چيو ته آپريشن دوران 14 سئو کان وڌيڪ مقابلا ٿيا،77 ڏوهاري ٽولن جو خاتمو آيو ۽ 242 دهشتگردن کي گرفتار ڪيو ويو. شرجيل ميمڻ ٻڌايو ته مختلف ڪارروائين ۾ اغوا جي وارداتن ۾ ملوث ڏوهاري ماريا ويا ۽ سوين ڪلوگرام ڌماڪيدار مادي سميت آپگهاتي جيڪيٽس به برآمد ٿيون. هن چيو ته ڪراچي آپريشن ۾ ڪنهن خاص پارٽيءَ جي ماڻهن خلاف ڪارروائي جي هدايت ناهي ڪئي وئي،شهر ۾ پابندي مڙهيل تنظيمن جو نيٽ ورڪ موجود آهي،جن جي خاتمي لاءِ ڪارروائيون جاري آهن. شرجيل ميمڻ چيو ته ٽارگيٽڊ ڪارروائين جي ردعمل ۾ پوليس تي حملا ٿي رهيا آهن، سڀ کان وڌيڪ قربانيون ڏيندڙ سنڌ پوليس تي تنقيد جو ڪوبه جواز ناهي. هن چيو ته ڏوهن ۾ غير قانوني سمون استعمال ٿي رهيون آهن،جن جي بندش لاءِ وفاقي حڪومت کي تجويز ڏني هئي پر ان تي اڃا تائين عمل ناهي ڪيو ويو، جڏهن ته وزيراعظم نواز شريف ۽ گهرو وزير چوڌري نثار طرفان جيڪي واعدا ڪيا ويا اهي به پورا نه ڪيا ويا آهن. اطلاعات واري صوبائي وزير شرجيل ميمڻ چيو ته سنڌ سرڪار جي ڪوششن سبب صوبي جي ٻين شهرن ۾ به ڏوهن ۾ گهٽتائي آئي آهي.

 

عمران خان جي گرفتاري وارنٽ تي پوليس عمل ڪري: پرويز رشيد

اسلام آباد (بيورو) سڌ سماءُ واري وفاقي وزير پرويز رشيد چيو آهي ته عمران خان جي گرفتاري وارنٽ تي پوليس کي عمل ڪرڻ گهــُرجي ۽ اميد آهي ته انصاف جو عملبردار عمران به عدالتن ۾ پيش ٿيندو. اسلام آباد ۾ ميڊيا سان ڳالهائيندي پرويز رشيد چيو ته قوم کي سبز باغ ڏيکاريندڙ عمران خان سڀ ڪجهه وساري ڇڏيو آهي. هن چيو ته عمران خان پي ٽي وي ۽ سرڪاري ادارن تي حملن لاءِ ماڻهن کي ڀڙڪايو. پرويز رشيد چيو ته الزام خان کانپوءِ هاڻي هڪ ڀولا خان به سامهون اچي ويو آهي. هن چيو ته عمران خان جي گرفتاري وارنٽ تي پوليس کي عمل ڪرڻ گهرجي ۽ اميد آهي ته انصاف جو علمبردار عدالتن ۾ پيش ٿيندو. وفاقي وزير چيو ته صبح جو ڀــُليل عمران خان جيڪڏهن گهر واپس آيو ته هــُو کيس ڀاڪر پائيندا. وزيراعظم جي برطانوي دوري بابت پرويز رشيد جو چوڻ هو ته لنڊن ۾ نواز شريف ڪنهن هوٽل ۾ نه پر پنهنجي پٽ جي گهر ۾ ترسيو.

 

افغان صدر اشرف غني جي جــِي ايڇ ڪيو آمد، گارڊ آف آنر پيش، آرمي چيف سان به ملاقات

راولپنڊي (بيورو) پاڪستان ۽ افغانستان جا ٻه طرفا لاڳاپا تاريخي اڳڀرائي ڏانهن وڌي رهيا آهن، افغان صدر اشرف غني جــِي ايڇ ڪيو راولپنڊي پهچي آرمي چيف جنرل راحيل شريف سان ملاقات ڪري مختلف معاملن تي ڳالهيون ڪيون. افغان صدر اشرف غني جي ايڇ ڪيو راولپنڊي پهتو،جتي پاڪ فوج جي جوانن کيس گارڊ آف آنر پيش ڪيو. جــِي ايڇ ڪيو جي دوري دوران افغان صدر اشرف غني پاڪ فوج جي شهيدن يادگار تي حاضري پڻ ڀري. اشرف غني، پاڪ فوج جي سربراهه جنرل راحيل شريف سان ملاقات پڻ ڪئي، جنهن دوران مختلف معاملن تي ڳالهيون ڪيون ويون. افغان صدر اشرف غني دوري دوران صدر ممنون حسين ۽ وزيراعظم نواز شريف سان پڻ ملاقاتون ڪندو. صدر ممنون حسين، افغان صدر جي مان ۾ آجياڻي جي تقريب به منعقد ڪندو، جڏهن ته وزيراعظم نواز شريف سان اشرف غني مانجهاندي تي ملاقات ڪندو. افغانستان جو صدر اشرف غني اعليٰ سطحي وفد سان گڏ ٻن ڏينهن جي سرڪاري دوري تي اسلام آباد پهتو، جتي پرڏيهي صلاحڪار سرتاج عزيز سندس استقبال ڪيو.

 

سرڪاري ۽ نيم سرڪاري ادارن ۾ اعليٰ عهدن تي ڪميشن ذريعي مقرري جي شرط ختم

اسلام آباد (بيورو) سپريم ڪورٽ سرڪاري ادارن جي سربراهن جي مقرري متعلق 3   آڪٽوبر تي محفوظ ڪيل فيصلو ٻڌائي ڇڏيو، عدالت عظميٰ سرڪاري ۽ نيم سرڪاري ادارن ۾ اعليٰ عهدن تي ڪميشن ذريعي مقرري جي شرط ختم ڪندي اٽارني جنرل کي حڪم ڏنو ته تمام خودمختيار، نيم خودمختيار ادارن ۽ ڪارپوريشنز ۾ سربراهن جي مقرري جي حوالي سان 0 1 ڊسمبر تائين رپورٽ پيش ڪئي وڃي. جسٽس اعجاز احمد چوڌري سرڪاري ادارن جي سربراهن جي مقرري متعلق 3   آڪٽوبر تي محفوظ ڪيل فيصلو ٻڌائي ڇڏيو. عدالت سرڪاري ادارن جي سربراهن جي مقرري لاءِ ڪميشن جي شرط ختم ڪندي وفاقي حڪومت کي ڊسمبر جي پڄاڻي تائين قانون ۽ قاعدن موجب مقرريون مڪمل ڪرڻ جي اجازت ڏئي ڇڏي. اٽارني جنرل کي ابتدائي رپورٽ 0 1 ڊسمبر تائين جمع ڪرائڻ جي هدايت ڪئي وئي آهي. فيصلي ۾ چيو ويو آهي ته ڪارپوريشنز، خودمختيار ۽ نيم سرڪاري ادارن جي سربراهن جي مقرري حڪومت جو اختيار آهي. فيصلو خواجا آصف ڪيس جي فيصلي تي وفاقي حڪومت طرفان داخل نظرثاني درخواست تي ڏنو ويو. خواجا آصف پيپلزپارٽي دور ۾ ڪارپوريشنز ۽ سرڪاري ادارن جي مقرري تي اعتراض ڪيو هو جنهن تي سپريم ڪورٽ 2 2 نيم سرڪاري ادارن ۽ 3 3 ڪارپوريشنز جي سربراهن متعلق فيصلو 3 1 0 2 ع ۾ ڏنو هو. عدالت نظرثاني درخواست تي فيصلي ۾ قرار ڏنو ته هاڻ مقررين تي ڪا پابندي لڳل ناهي رهي.

 

ايس ايس پي عصمت الله جوڻيجپ ڪيس: عمران خان ۽ ڊاڪٽر طاهر القادري اشتهاري قرار

راولپنڊي (بيورو) راولپنڊيءَ جي دهشتگردي ٽوڙ عدالت، ايس ايس پي عصمت الله جوڻيجي تي تشدد واري ڪيس ۾ پي ٽي آءِ چيئرمين عمران خان ۽ عوامي تحريڪ جي سربراهه طاهر القادري کي اشتهاري قرار ڏئي ڇڏيو. راولپنڊي جي دهشتگردي ٽوڙ عدالت جي جج جسٽس ڪوثر عباس زيدي، ايس ايس پي آپريشنز اسلام آباد عصمت الله جوڻيجي کي ڌرڻي دوران زخمي ڪرڻ واري ڪيس جي ٻڌڻي ڪئي. ڪيس ۾ نامزد عمران خان ۽ طاهر القادريءَ جي غير حاضري تي عدالت ڪاوڙ جو اظهار ڪيو ۽ کين اشتهاري قرار ڏيندي ايندڙ ٻڌڻي تي گرفتار ڪري پيش ڪرڻ جو حڪم به ڏنو. واضح رهي ته ساڳي ئي عدالت موٽر وي هنگامي واري ڪيس ۾ ڊاڪٽر طاهر القادري کي اڳ ئي اشتهاري قرار ڏئي چڪي آهي

 

نثار کهڙو سنڌ ۾ بند اسڪول کولرائڻ لاءِ اسيمبلي ميمبر کان مدد گهري ورتي

ڪراچي (اسٽاف رپورٽر) سنڌ جي تعليم جي سينيئر وزير نثاراحمد کهڙو چيو آهي ته صوبي ۾ بند اسڪول کولڻ لاءِ اسيمبلي ميمبر تعاون ڪن سوشل ميڊيا تعليم کاتي جي گهڻي مدد ڪري رهيو آهي جيڪا ڳالهه واکاڻ جوڳي آهي هو جمعي تي سنڌ اسيمبلي ۾ ايم ڪيو ايم جي ميمبر عائشه خاتون جي توجهه ڏياريو نوٽيس تي بيان ڏيئي رهيو هو هن چيو ته جهڏو ۾ 100 نه پر 58 اسڪول بند آهن جن جي ڪري هزارين نه پر سوين ٻارڙن جي تعليم متاثر ٿي رهي آهي حڪومت بند اسڪول کولڻ لاءِ هنگامي بنيادن تي قدم کڻي رهي آهي مسلم ليگ فنڪشنل جي پارليماني ليڊر نندڪمار جي توجهه ڏياريو نوٽيس تي ڊاڪٽر سڪندر مينڌرو چيو ته عمرڪوٽ ۾ ٻن ڀائرن هيرالال ۽ اشوڪ جي قتل جو هڪ جوابدار مارجي چڪو آهي ۽ ٻين کي گرفتار ڪرڻ لاءِ قدم کنيا پيا وڃن متاثر خاندان جي ماڻهن سنڌ جي وڏي وزير سان ملاقات ڪئي هئي ان جي چوڻ ثناءُ الله عباسي جي جڳهه خالد شيخ کي انڪوائري آفيسر مقرر ڪيو ويو هو.

 

ملير : ۾ پوليس ۽ دهشتگردن وچ ۾ مقابلو، پابندي مڙهيل تنظيم جي ڪمانڊر سميت 7 دهشتگرد مارجي ويا

ملير(ڊ ر) ملير جي علائقي شير پائو ڪالوني ۾ پوليس ۽ دهشتگردن ۾ مقابلو، پابندي مڙهيل تنظيم جي ڪمانڊر سميت 7 دهشتگرد مارجي ويا. دهشتگردن وٽان وڏي تعداد ۾ هٿيار، دستي بم، ۽ دهشتگردي ۾ استعمال ٿيندڙ مادو هٿ. مارجي ويل دهشتگردن مان ٽن جي سڃاڻپ مسباح، ڪمال عرف ڪٽي ۽ شاه فيصل طور ٿي، جڏهن ته چئن جي سڃاڻپ نه ٿي سگهي آهي. مارجي ويل دهشتگرد ڪراچي ۾ پوليس ۽ رينجرز تي حملن سميت عام شهرين تي قتل، ڦر، ڌاڙا، اغوا ۾ ملوث هئا. ايس ايس پي ملير رائو انوار. خبر موجب ملير جي علائقي قائد آباد ٿاڻي جي حد شير پائو ڪالوني جي سواتي محلي ۾ دهشتگردن جي اطلاع تي ملير ضلعي جي سمورن ٿاڻن جي پوليس، ايس ايس پي ملير، رائو انوار جي اڳواڻي ۾ ٽارگيٽيڊ آپريشن ڪيو ته پوليس ۽ دهشتگردن ۾ فائرنگ جي ڏي وٺ ٿي. جنهن ۾ 7 دهشتگرد مارجي ويا. ايس ايس پي ملير رائو انوار صحافين کي ٻڌايو ته دهشتگردن جي اطلاع تي سواتي محلي ۾ هڪ گهر تي ڇاپو هنيو ته دهشتگردن پوليس کي ڏسي فائرنگ ڪئي. پوليس جي جوابي فائرنگ ۾ 7 دهشتگرد مارجي ويا آهن. جن وٽان وڏي تعداد ۾ هٿيار، گولا بارود، دستي بم ۽ دهشتگردي ۾ استعمال ٿيندڙ مادو هٿ ڪيو ويو آهي. هن چيو ته مارجي ويل دهشتگردن جو تعلق پابندي مڙهيل تنظيم تحريڪ طالبان سان آهي، مارجي ويل دهشتگردن ۾ مسباح، ڪمال عرف ڪٽي ۽ شاهه فيصل شامل آهن. جڏهن ته چئن دهشتگردن جي سڃاڻپ نه ٿي سگهي آهي. ايس ايس پي ملير رائو انوار موجب مارجي ويل دهشتگرد مسباح تحريڪ طالبان ڪراچي جو ڪمانڊر هو. هن وڌيڪ چيو ته مارجي ويل دهشتگرد ڪراچي ۾ پوليس، رينجرز ۽ عام شهرين تي حملن ۾ ملوث هئا. جڏهن ته ٽارگيٽ ڪلنگ، ڦر ڌاڙا ۽ اغوا جي وارداتن ۾ پڻ ملوث هئا. ايس ايس پي ملير رائو انوار وڌيڪ چيو ته ملير ضلعي کي دهشتگردن کان پاڪ بنائڻ جو عزم ڪيو آهي، جيستائين هڪ به دهشتگرد موجود آهي آپريشن جاري رهندو. دهشتگردن جي خاتمي تائين ڪاروائيون جاري رهنديون. هن چيو ته آپريشن جي رد عمل سبب پوليس تي حملا ٿي رهيا آهن. پر پوليس جي جوانن جا حوصلا بلند آهن. دهشتگردن جي بزدلاڻين ڪاروائين کان ڊڄڻ وارا نه آهيون. سندن پاڙ پٽي دم پٽينداسين. ٻئي طرف مارجي ويل دهشتگردن جا لاش قائد آباد ٿاڻي تي آندا ويا، جتان ضروري ڪاروائي بعد لاش جناح اسپتال اماڻيا ويا. جتي پوسٽ مارٽم بعد لاش سرد خاني ۾ رکيا ويا آهن. جڏهن ته رات دير سان پوليس جي مدعيت ۾ ڪيس داخل ڪيو ويو.

 

امن امان جي استحڪام لاءِ سمورين سياسي جمهوري قوتن کي گڏجي ڪم ڪرڻو پوندو:  منظور وساڻ

ڪراچي (اسٽاف رپورٽر)  سنڌ جي جيلن، معدنيات ۽ معدني ترقي واري صوبائي وزير منظور وساڻ اڄ سنڌ اسيمبلي اجلاس ۾ امن امان جي حوالي سان تقرير ڪندي چيو ته صوبي ۾ امن امان جي استحڪام ۽ بهتري لاءِ سمورين سياسي جمهوري قوتن کي گڏجي ڪم ڪرڻو پوندو، ڇو ته ان ۾ ئي قوم ۽ ملڪ جي بهتري آهي. هن چيو ته صوبي ۾ امن امان جي استحڪام لاءِ اسان جي حڪومت پوليس فورس کي نون ريڪروٽمينٽ سان گڏوگڏ جديد اوزار ۽ تربيت فراهم ۽ پوليس فورس جي پگهارن ۾ اضافو ڪيو آهي. ان کان علاوه پوليس شهيدن لاءِ امدادي رقم ۾ اضافو ڪيو ويو آهي. هن چيو ته جيلن ۾ اصلاح ڪئي پئي وڃي. دهشتگردي جي خطرن کي منهن ڏيڻ لاءِ ڪراچي، حيدرآباد ۽ سکر جيلن جي آسپاس بم پروف آرسي سي ڀتيون تعمير ڪيون پيون وڃن، جڏهن ته قيدين کي جيل مينوئل مطابق سهولتون ۽ خوراڪ جي فراهمي کي به يقيني بڻايو ويو آهي. هن چيو ته اسان جي اپائن سان امن امان ۾ بهتري آئي آهي. صوبائي وزير منظور وساڻ چيو ته پاڪستان پيپلز پارٽي هميشه مفاهمت ۽ گڏجي ڪم ڪرڻ جي پاليسي اختيار ڪئي آهي. اسان جو حال ۽ ماضي گواهه آهي ته هميشه جمهوري قوتن سان مشاورت ۽ مفاهمت کي فروغ ڏنو. هن چيو ته پاڪستان ۾ جنهن جماعت کي سڀ کان وڌيڪ سياسي عدم استحڪام جو شڪار بڻائڻ جي ڪوشش ڪئي وئي اها پاڪستان پيپلز پارٽي آهي. 1990 جي عام چونڊن ۾ پاڪستان ۾ پي پي پي خلاف ريڪارڊ ڌانڌلي ڪئي وئي ايستائين سنڌ ۾ به اسان کي هارايو ويو. هن چيو ته سکر، گهوٽڪي ۽ خيرپور مان ڌانڌلي ذريعي پيپلز پارٽي جي نمائندن کي هارايو  ويو صرف منهنجي هڪ صوبائي اسيمبلي جي سيٽ محفوظ رهي، حالانڪه سڀني کي خبر آهي ته جيڪڏهن پيپلز پارٽي خلاف ڌانڌلي نه ڪئي وڃي ها ته پوري ملڪ ۾ اسان جون سيٽون وڌيڪ هجن ها. هن چيو ته آمريت جي دور ۾ اسان کي بلدياتي سيٽن کان به وڏي پيماني تي ڌانڌلي ذريعي جائز نمائندگي کان محروم ڪيو ويو. صوبائي وزير چيو ته پي پي پي غريبن، پورهيتن ۽ هارين جي پارٽي آهي، جاگيردار ۽ وڏيرا ٻين جماعتن ۾ ويٺا آهن ۽ هميشه آمرن ۽ آمريت جي جهولي ۾ ويهندا ۽ پلندا رهيا آهن. هن چيو ته پي پي هميشه ملڪ جي ترقي ۽ تعمير لاءِ اسٽيڪ هولڊرز کي گڏ کڻي هلڻ جي پاليسي اختيار ڪئي آهي. هن وقت وطن عزيز جن مسئلن ۾ ڦاٿل آهي انهن ۾ مفاهمت ۽ مشاورت جي پاليسي ذريعي ملڪ جي ترقي ۽ خوشحالي ممڪن آهي.

 

اتر وزيرستان ۾ جيٽ جهازن جي بمباري، 30 دهشتگرد مارجي ويا

اُتروزيرستان (مانيٽرنگ ڊيسڪ) اتر وزيرستان ۾ سڪيورٽي فورسز پاران جيٽ جهازن جــِي بمباريءَ ۾ وڌيڪ 30 دهشتگرد مارجي ويا، آءِ ايس پي آر موجب مارجي ويل دهشتگردن ۾ پرڏيهي به شامل آهن. آءِ ايس پي آر موجب پاڪ فوج جو اتر وزيرستان ۾ دهشتگردن خلاف ضرب عضب آپريشن ڪاميابيءَ سان جاري آهي. دتا خيل واري علائقي ۾ پاڪ فوج پاران دهشتگردن جي ٺڪاڻن تي جيٽ جهازن ذريعي بمباري ڪئي وئي. آءِ ايس پي آر موجب بمباري ۾ 30 دهشتگرد مارجي ويا جن ۾ پرڏيهي به شامل آهن. واضح رهي ته پاڪ فوج پاران هلندڙ سال جون کان وٺي اتر وزيرستان ۾ ضرب عضب نالي دهشتگردن خلاف آپريشن جاري آهي جنهن ۾ هن وقت تائين وڏي انگ ۾ دهشتگرد مارجي ويا چڪا آهن

 

هالا لڳ ڳوٺ کي باهه 3 معصوم ٻار سڙي فوت، لاش سڃاڻپ کان ٻاهر

هالا(رپورٽر) هالا جي ڳوٺ اڇي مسجد ڀرسان هاري جي ڪکاون گهرن کي باهه لڳڻ سبب ٻن مهينن جو معصوم نينگر ۽ ٻه معصوم نياڻيون سڙي فوت، ڦٽين جي چونڊي تي ويل سندس گهر ڀاتين جي غير موجودگي ۾ لڳل باهه ڪکاون گهرن کي ساڙي رک ڪري ڇڏيو، لاش سڃاڻپ کان ٻاهر.خبر موجب هالا ڀرسان ڳوٺ اڇي مسجد وٽ واقع مقامي زميندار عبدالڪريم کوسي جي زرعي زمين ۾ هارپي جي لاءِ ڪکاوان گهر ٺاهي ويٺل هاري ڏاڏو خاصخيلي جي گهر جي لوڙهي کي اچانڪ باهه لڳڻ سبب جهوپڙي ۾ ويٺل سندس ٽن ٻارڙن جنهن ۾ ٻن مهينن جي کيرپياڪ نينگرڪانڊيرو، ٽن سالن نياڻي حاڪم زادي  ۽ پنجن سالن جي ثمينه سڙي فوت ٿي ويا، واقعي بابت تفصيل ٻڌايئندي معصوم ٻارڙن جي پيءُ ڏاڏي خاصخيلي ٻڌايو ته ٻارڙن جي ماءُ ڀر واري زرعي زمين ۾ ڦٽين جو چونڊو ڪري رهي هئي جڏهن ته آئون زمين ۾ ڪم ڪار ڪري رهيو هوس ته اچانڪ گهر جي لوڙهي کي باهه لڳڻ سبب سموري ڪکائين گهر کي باهه وڪوڙي وئي اسان جي پهچڻ کان اڳ سمورو گهر سڙي رک ٿي ويو جنهن ۾ منهنجا ٽئي ٻار سڙي فوت ٿي ويا.