تازيون خبرون

Daily Archives: November 14, 2014

توانائي بحران چئلينج آهي، ڌرڻي وارا ڌرڻن بدران ساٿ ڏين: نواز شريف

لنڊن (م.ڊ) وزيراعظم ميان نواز شريف پاڪستان تحريڪ انصاف کي ڌرڻو ڇڏي ملڪي ترقي لاءِ حڪومت سان گڏجي ڪم ڪرڻ جي دعوت ڏيندي چيو آهي ته ڌرڻي وارا سوچين ته ان سان فائدو ڪنهن کي ٿيندو، سڀني کي گڏجي ملڪ جي ترقي جي راهه ۾ رڪاوٽ بڻجڻ بدران توانائي بحران جي خاتمي لاءِ ڪم ڪريون، ڌرڻي ذريعي اسان جي حڪومت کي ڊي ريل ڪرڻ لاءِ نه پر پاڪستان ۽ جمهوريت کي ڊي ريل ڪرڻ جي سازش ڪئي وئي پر هاڻ اونداها پاڇا ٽري ويا آهن ۽ هاڻ پاڪستان روشنين ڏانهن وڌي رهيو آهي، ڌرڻي وارن کي هاڻ معلوم ٿي ويو هوندو ته سندن ملڪ کي جڪڙي رکڻ جي ڪوشش ناڪام ٿي وئي آهي، مشڪل فيصلا ڪيا، مشڪل فيصلن جا مثبت نتيجا نڪري رهيا آهن، قوم جو هر ماڻهو ڪردار ادا ڪري ته پاڪستان ۾ انقلاب اچي سگهي ٿو، جيڪڏهن ڪم ڪيو وڃي ۽ ڪم ڪرڻ ڏنو وڃي ته ملڪ مان بيروزگاري، غربت ۽ توانائي جي بحران جو خاتمو ٿي سگهي ٿو، جيڪڏهن اسان جي حڪومت جي ڪم جي نتيجي ۾ سٺو پاڪستان بڻجي ٿو ته اڳين حڪومتن کي ان جو فائدو ٿيندو، چين ۽ جرمني پاڪستان ۾ توانائي جي شعبن ۾ دلچسپي ڏيکاري آهي. هو پاڪستان برطانيا توانائي سرمائيداري ڪانفرنس کي خطاب ۽ بعد ۾ ميڊيا سان ڳالهائي رهيو هو. ڪانفرنس کي خطاب ۾ هن چيو ته خانگي شعبي جي سرمائيداري ئي پائيدار ترقي جي ضامن آهي، حڪومت سنڀاليندي ئي اسان کي بحران ورثي ۾ مليا، پرپوءِ اسان مشڪل فيصلا ڪيا جن جا مثبت نتيجا نڪري رهيا آهن، اسان معيشت جو منهن سڌو ڪري ڇڏيو. هن چيو ته برطانيا ۾ توانائي ڪانفرنس جو ٿيڻ خوشيءَ جهڙي ڳالهه آهي، توانائي سرمائيداري ڪانفرنس سان سرمائيدارن ۽ ماهرن کي ويجهو اچڻ جو موقعو مليو، ڪانفرنس جو مقصد هڪٻئي جي تجربن ۽ مهارتن مان لاڀ حاصل ڪرڻ آهي، اسان ترقي يافتا ملڪن جي تجربن مان به لاڀ حاصل ڪنداسين، ڪانفرنس توانائي بحران سان منهن ڏيڻ لاءِ مفيد ثابت ٿيندي. نواز شريف چيو ته چين طرفان توانائي منصوبن ۾ دلچسپي مثالي آهي. وزيراعظم نواز شريف ان کان پهريان پاڪ برطانيا توانائي ڪانفرنس ۾ شرڪت ڪئي، ڪانفرنس کي خطاب ڪندي وزيراعظم نواز شريف چيو ته برطانيا طرفان توانائي ڪانفرنس جو ڪرائڻ خوشي جهڙي ڳالهه آهي، ڪانفرنس ۾ بجلي جي پيداوار ۽ پهچ واري نظام تي بحث ٿيندو. وزيراعظم چيو ته اسان جو عزم آهي ته حڪومت جو ڪردار منتظم بدران سهولتڪار ٿئي، اسان جي جي ڊي پي گروٿ سٺي آهي، اسان ڪاميابي سان مهانگائي ۽ غير ضروري خرچ تي ضابطو آندو، اسٽاڪ مارڪيٽ دنيا جي سٺي مارڪيٽن مان آهي، يقين آهي ته ڪانفرنس نهايت مفيد ٿيندي. وزيراعظم چيو ته اسان جي حڪومت ملڪ جي ڀڄ ڊڪ سنڀاليندي ئي معيشت کي صحيح پاسي تي آندو، اسان تجارتي گهاٽي کي 8 مان گهٽائي هڪ سال ۾ 6 تي آندو، اقتصادي ترقي جي شرح هن وقت 1 .4 سيڪڙو آهي، هلندڙ سال 5 سيڪڙو تائين وڌڻ جي اميد آهي، اسان مشڪل فيصلا ڪيا جنهن جا مثبت نتجا نڪتا، توانائي ۽ مواصلاتي ڍانچو صنعتي ۽ سماجي ترقي لاءِ بنيادي حيثيت رکي ٿو، مسئلن جو حل گڏجي ڳولڻ جي ضرورت آهي، خانگائڻ واري شعبي ۾ ماهرن جي راءِ مددگار هوندي، اسان جو عزم آهي ته پاڪستان کي توانائي جي بحران مان ڪڍون. ڪانفرنس کي خطاب ڪندي برطانوي وزير چيو ته وزيراعظم نواز شريف کي توانائي ڪانفرنس ۾ ڀليڪار چوان ٿو، برطانيا قابل تجديد ڪاروائي تي ڌيان ڏئي رهيو آهي، پاڪستان ترقي ڪري رهيو آهي، برطانيا پاڪستان سان سهڪار ڪندو، پاڪستان جي صنعتي شعبي کي ترقي وٺرائڻ لاءِ توانائي جي ضرورت آهي، جنهن لاءِ برطانيا پاڪستان جي مدد لاءِ هر ممڪن ڪوشش ڪندو.

 

سپريم ڪورٽ وفاقي حڪومت کي ڏنل ڊيد لائين ۾ واڌڪري ڇڏي

اسلام آباد (بيورو) سپريم ڪورٽ چيف اليڪشن ڪمشنر جي مقرري لاءِ وفاقي حڪومت کي 4 2 نومبر تائين آخري مهلت ڏيندي حڪم جاري ڪيو آهي ته جيڪڏهن حڪومت 4 2 نومبر تائين چيف اليڪشن ڪمشنر جي مقرري نه ڪئي ته وقتي چيف اليڪشن ڪمشنر جسٽس انور ظهير جمالي جي نامزدگي پاڻمرادو ختم ٿي ويندي جنهن لاءِ ڪنهن نوٽيفڪيشن جي ضرورت نه آهي، عدالت حڪومت جي هڪ مهيني جي مهلت واري درخواست رد ڪري مقرري لاءِ وڌيڪ 0 1 ڏينهن جي مهلت ڏئي ڇڏي. فاضل بئنچ رمارڪس ڏنا آهن ته جيڪڏهن چيف اليڪشن ڪمشنر جي مقرري جو عمل پهرين شروع ڪيو ويو هجيها ته هيستائين مڪمل به ٿي چڪو هجي ها، عدالت پهرين به حڪومت کي ڪافي وقت ڏئي چڪي آهي، جيڪڏهن حڪومت کي وڌيڪ وقت ڏنو وڃي ته ائين نه ٿئي جو وزيراعظم وري پرڏيهي دوري تي هجي ۽ مقرري جو عمل نه ٿي سگهي پوءِ ڇا ٿيندو؟. خميس ڏينهن چيف جسٽس ناصرالملڪ جي سربراهي ۾ 3 رڪني بئنچ چيف اليڪشن ڪمشنر جي مقرري متعلق ڪيس جي ٻڌڻي ڪئي. اٽارني جنرل سلمان اسلم بٽ عدالت کي ٻڌايو ته وزيراعظم نواز شريف ۽ مخالف ڌُر جي اڳواڻ خورشيد شاهه وچ ۾ مشاورت بعد 3 نالن تي حتمي اتفاق ڪيو ويو هو. پر بدقسمتيءَ سان جن شخصيتن جا نالا حتمي ڪيا ويا انهن مان 2 ماڻهن ان عمل جو حصو بڻجڻ کان انڪار ڪري ڇڏيو. اٽارني جنرل عدالت کي ٻڌايو ته وزيراعظم کي طئي ٿيل دوري تي ٻاهرين ملڪ وڃڻو پئجي ويو، جڏهن ته مخالف ڌُر جو اڳواڻ به طبي موڪل تي لنڊن ۾ موجود آهي، جنهن تي چيف جسٽس ناصرالملڪ رمارڪس ڏنا ته اوهان اهو عمل پهرين شروع ڪيو هجي ها ته هيستائين مڪمل به ٿي چڪو هجي ها. ان موقعي تي جسٽس دوست محمد خان چيو ته عدالت پهرين به حڪومت کي ڪافي وقت ڏئي چڪي آهي، جيڪڏهن حڪومت کي وڌيڪ وقت ڏنو وڃي ته اهو نه ٿئي جو وزيراعظم جا وڌيڪ پرڏيهي دوران هجن ۽ مقرري جو عمل نه ٿي سگهي پوءِ ڇا ٿيندو؟ جنهن تي اٽارني جنرل چيو ته هاڻ ائين نه ٿيندو. اٽارني جنرل موقف اختيار ڪيو ته حڪومت چيف اليڪشن ڪمشنر جي مقرري لاءِ مخلصاڻا ڪوششون ڪري رهي آهي. هن عدالت کي اپيل ڪئي ته چيف اليڪشن ڪمشنر جي مقرري لاءِ وڌيڪ وقت ڏنو وڃي، جنهن تي عدالت اٽارني جنرل جي اپيل تي حڪومت کي 4 2   نومبر تائين جي مهلت ڏيندي چيو ته اوهان ان عمل کي مڪمل ڪري وٺو، اهو نه ٿئي جو وزيراعظم وري دوري تي هليو وڃي. اٽارني جنرل عدالت کي خاطري ڏياري ته 4 2 نومبر تائين چيف اليڪشن ڪمشنر جي مقرري ٿي ويندي. جنهن تي چيف جسٽس آرڊر جاري ڪندي چيو ته جيڪڏهن 4 2 نومبر تائين چيف اليڪشن ڪمشنر جي مقرري نه ٿي ته وقتي چيف اليڪشن ڪمشنر جي نامزدگي پاڻمرادو ختم ٿي ويندي ۽ سپريم ڪورٽ پنهنجو جج واپس وٺي ڇڏيندي. بعد ۾ ڪيس جي ٻڌڻي 4 2 نومبر تائين ملتوي ڪئي وئي.

 

وزيراعظم ملڪي ضرورت آهر پرڏيهي دورا پيو ڪري: پرويز رشيد

اسلام آباد (بيورو) سُڌ سماءَ جي وفاقي وزير سينيٽر پرويز رشيد چيو آهي ته وزيراعظم ملڪي ضرورت آهر پرڏيهي دورا ڪري رهيو آهي، وزيراعظم جي چين، جرمني ۽ برطانيا جي دورن سان توانائي جي شعبي ۾ سرمائيداري کي ترغيب ڏيڻ ۾ مدد ملندي. پنهنجي انٽرويو ۾ هن چيو ته پرڏيهي سرمائيداري جي نتيجي ۾ اقتصادي سرگرمين ۾ بهتري ايندي، روزگار جا موقعا پيدا ٿيندا ۽ مهانگائي گهٽبي. وفاقي وزير چيو ته وزيراعظم ملڪي ضرورت آهر پرڏيهي دورا ڪري رهيو آهي. هن چيو ته پاڪستان کي سستي بجلي جي سخت ضرورت آهي، جڏهن ته پنهنجي هڪ بيان ۾ سُڌ سماءَ جي وفاقي وزير چيو ته وزيراعظم نواز شريف قومي تعمير سازي جي ڪوشش ڪري رهيو آهي پر بدقسمتي سان تحريڪ انصاف جو سربراهه پنهنجي تقريرن ذريعي ماڻهن کي مڇرائي رهيو آهي. هن چيو ته الله تعاليٰ نواز شريف کي عزت ۽ شهريت نوازي رهيو آهي پر عمران خان کي ان جي مرتبي سان حسد آهي. سُڌ سماءَ وزير چيو ته آڪسفورڊ يونيورسٽي جي فارغ التحصيل عمران خان کي کپي ته ماڻهن کي عدليا خلاف نه ڀڙڪائي ۽ ملڪ کي انتشار ڏانهن نه وٺي وڃي. پرويز رشيد چيو ته عمران خان صرف حڪومت تي تنقيد ڪري رهيو آهي ۽ ان جي بجلي منصوبن، موٽروي ۽ ميٽرو بس جهڙي ترقياتي ڪمن کي نظرانداز ڪري رهيو آهي.

 

پاڪستان ڀارت سميت سڀني پاڙيسري ملڪن سان دوستاڻا لاڳاپا هموار ڪرڻ ۾ گهري دلچسپي رکي ٿو: صدر

اسلام آباد – 13 نومبر (اي پي پي) صدر ممنون حسين چيو آهي ته پاڪستان ڀارت سميت سڀني پاڙيسري ملڪن سان دوستاڻا لاڳاپا هموار ڪرڻ ۾ گهري دلچسپي رکي ٿو، حڪومت جي پرڏيهي پاليسي جو هڪ اهم مقصد اقتصادي بحالي ۽ پائيدار ترقي حاصل ڪرڻ آهي. هن اها ڳالهه پرڏيهي لاڳاپن بابت ڪراچي ڪائونسل (ڪي سي ايف آر) جي وفد سان خميس ڏينهن هتي ايوان صدر ۾ ڳالهه ٻولهه ڪندي چئي. صدر چيو ته پاڪستان سڀني پاڙيسري ملڪن خاص طور افغانستان، ايران ۽ ڀارت سان دوستاڻي لاڳاپن کي فروغ ڏيڻ ۾ دلچسپي رکندو آهي. هن چيو ته پاڪستان دهشتگردي کان بري طرح متاثر ٿيو آهي ۽ هو انهن ملڪن سان گڏجي ان مسئلي کي حل ڪرڻ چاهي ٿو. صدر چيو ته پاڪستان افغانستان ۾ حڪومت جي پرامن تبديلي جي آجيان ڪئي آهي ۽ نئين حڪومت سان گڏ سڀني معاملن تي گڏجي ڪم ڪرڻ جو خواهشمند آهي، ورڪنگ بائونڊري ۽ لائين آف ڪنٽرول تي ڀارت پاران مسلسل سيز فائر جي خلاف ورزين جو حوالو ڏيندي صدر اوڀر سرحد تي صورتحال معمول تي آڻڻ لاءِ اميد جو اظهار ڪيو جنهن سان ٻنهي ملڪن جي وچ ۾ خوشگوار لاڳاپا هموار ڪرڻ ۾ مدد ملندي. صدر چيو ته پاڪستان ڀارت سان سٺا لاڳاپا چاهيندو آهي ۽ وزيراعظم ڀارتي وزيراعظم جي حلف برداري جي تقريب ۾ شرڪت ڪري اڳڀرائي ڪئي. صدر چيو ته پاڪستان جي پرڏيهي پاليسي جو بنيادي ستون قائداعظم جو اهو فرمان “ اندروني امن ۽ ٻاهرين امن” آهي، ان مقصد کي حاصل ڪرڻ جي لاءِ جوڙيل سياسي ۽ عسڪري حڪمت عملي جي ذريعي ۽ ٻين ملڪن جي معاملن ۾ عدم مداخلت جي پاليسي جي پيروي ڪندي پاڪستان جي سلامتي جي تحفظ ۽ دهشتگردي جي خاتمي لاءِ قدم کنيا ويا آهن. صدر ممنون حسين چيو ته حڪومت جي پرڏيهي پاليسي جو هڪ اهم مقصد ٽن اهم ترجيحن جي سرگرمي سان پيروي ڪندي اقتصادي بحالي ۽ پائيدار ترقي کي حاصل ڪرڻ آهي. جنهن ۾ سيڙپڪاري ۽ واپار کي سگهه ڏيڻ، توانائي جي بحران کي حل ڪرڻ ۽ انتهاپسندي ۽ دهشتگردي کي منهن ڏيڻ شامل آهن. صدر چيو ته حڪومت جي ڪاروباري ۽ سيڙپڪاري دوست پاليسيون ملڪ ۾ غير ملڪي سيڙپڪاري جي لاءِ پرڪشش مراعتون پيش ڪن ٿيون. صدر چيو ته پاڪستان دهشتگردي کي هميشه هميشه جي لاءِ ختم ڪرڻ جي لاءِ پرعزم آهي ۽ ان دهشتگردي ۽ انتهاپسندي جي خلاف جنگ ۾ انساني ۽ مادي نقصانن جي لحاظ کان بيشمار قربانيون ڏنيون آهن. هن دهشتگردي جي لعنت کي پاڙ کان پٽڻ جي لاءِ ڪامياب ضرب عضب آپريشن جي باري ۾ به وفد کي آگاهه ڪيو. هن پرڏيهي لاڳاپن بابت ڪراچي ڪائونسل ڪي سي ايف آر جي قيام کانپوءِ پاڪستان ۽ ٻين ملڪن سان لاڳاپن کي مضبوط بنائڻ جي لاءِ ڪوششن کي ساراهيو. صدر چيو ته پرڏيهي پاليسي ٿنڪ ٽينڪس جي اهميت وڌندي پئي وڃي. ڇاڪاڻ جو هاڻي حڪومتن جو ماهرن جي راءِ تي ڀاڙڻ وڌي رهيو آهي ۽ ان قسم جي ادارن جي راءِ پرڏيهي پاليسي کي جوڙڻ ۽ ان تي عملدرآمد ۾ اهم ڪردار ادا ڪندي آهي. صدر ممنون حسين پرڏيهي لاڳاپن بابت ڪراچي ڪائونسل جي ٻارهين سالگرهه تي وفد کي مبارڪباد ڏيندي پاڪستان ۽ ٻين ملڪن جي وچ ۾ سفارتي لاڳاپن کي وڌيڪ مستحڪم بڻائڻ جي لاءِ ان جي ڪوششن جي لاءِ نيڪ خواهشن جو اظهار ڪيو. ڪي سي ايف آر جي وفد ۾ ٻين کانسواءِ ارجنٽائن جي سفير (سفارتي ڪور جي ڊين ۽ ڊين آف آمريڪا) روڊولفو مارٽن سراويا، قزاخستان جي سفير (ڊين آف وستي ايشيا) بخت بيگ شبار بائيوف، بحرين جي سفير (ڊين آف عرب گروپ) محمد ابراهيم عبدالقادر، يونان جي سفير (ڊين آف يورپ) پيٽروس ميورائيڊس، الجيريا جي سفير (ڊين آف آفريقن گروپ) احمد بينفلس، سريلنڪا جي هاءِ ڪمشنر (ڊين آف ڏکڻ ايشيا) جي لاٿ ويرا ڪوڊي، يورپي يونين جي سفير (ڊين آف يورپي يونين) لارس گنا رويگمارڪ، آسٽريليا جي هاءِ ڪمشنر پيٽر هائيوارڊ، ٿائيلينڊ جي سفير (وقتي ڊين آسيان ملڪ) ڊوم وٽ جارنسن، پرڏيهي لاڳاپن بابت ڪراچي ڪائونسل جو سيڪريٽري جنرل احسن مختيار زبيري شامل هئا.

 

وزيراعظم نريندر مودي کي ملاقات لاءِ ڪوبه خط ناهي لکيو: پرڏيهي ترجمان

اسلام آباد(بيورو) پرڏيهي وزارت جي ترجمان تسنيل اسلم چيو آهي ته وزيراعظم نواز شريف ڀارتي وزيراعظم نريندر مودي کي کٽمنڊو ۾ ملاقات لاءِ ڪوبه خط ناهي لکيو ان حوالي سان سمورا اطلاع بي بنياد آهن، ترجمان ٻڌايو ته افغان صدر اشرف غني اڄ کان پاڪستان جو ٻن ڏينهن جو دورو ڪندو، اسلام آباد هفتيوار بريفنگ ۾ پرڏيهي ترجمان ٻڌايو ته افغان صدر اڄ اعليٰ سطحي وفد سان گڏ اسلام آباد پهچندو دوري ۾ ٻنهي ملڪن کي وڌيڪ ويجهو اچڻ جو موقعو ملندو عالمي دهشتگرد تنظيمداعش جي پاڪستان ۾ سرگرمين بابت پڇيل سوال جي جواب ۾ ترجمان چيو ته آءِ ايس آءِ ايس جي حوالي سان ڪنهن به ملڪ رابطو ناهي ڪيو ان حوالي سان گهرو وزير جو بيان به موجود آهي، پاڪستان هر طرح جي دهشتگردي جي خلاف آهي، تسنيم اسلم جو چوڻ هو ته وزيراعظم جو چين جو دورو تمام گهڻو ڪامياب رهيو جنهن ۾ اهم منصوبن تي صحيحون ڪيون ويون هن چيو ته پاڪستان جو دشمن چين جو دشمن جڏهن ته چين جو دشمن پاڪستان جو دشمن آهي، سرحدون ڪنهن ٻئي ملڪ خلاف استعمال ٿيڻ نه ڏينداسين ٻين ملڪن کان به اهڙي ئي اميد رکون ٿا.

 

سول اسپتال عمر ڪوٽ ۾ 60 ٻارن سميت 84 ماڻهو مرڻ جو انڪشاف

عمرڪوٽ(رپورٽر) ميڊيا جي اک کان ڏور ڳوٺن ۽ صحت مرڪزن ۾ موت جي شرح ڇرڪائيندڙ ٿي سگهي ٿي. ٿرپاڪر جي 15 لک آبادي 60 لک چوپايو مال جڏهن ته عمرڪوٽ جي 2 لک آبادي ۽ 10 لک چوپايو مال جي گذر جو ذريعو برساتن تي آهي، ٿر واسين جو ڪک پن، ان پاڻي، شاديون مراديون، ميلا ملاکڙا ۽ مختلف تهوار ملهائڻ ۽ ان جي معيشت جو دارو مدار برساتن تي آهي. پر ٿر ۾ ڪجهه عرصي کان هر ٽئين سال ڏڪار ۽ هر ڏهين سال ڪارو ڏڪار پوي ٿو، جنهن جي ڪري ٿرپاڪر جي 40 سيڪڙو ۽ عمرڪوٽ جي 20 سيڪڙو آبادي لڏپلاڻ ڪري بئراجي علائقن جو رخ ڪري ٿي، اهو اڙانگو سفر جتي ٿرين جو معيشت جو واحد ذريعو چوپايو مال متاثر ڪري ٿو ته اتي تعليم جي ميدان ۾ سڀ کان پٺتي رهيل  خطي جي ٻارڙن جي تعليم به متاثر ٿئي ٿي. ٿر جو مال وچڙندڙ بيمارين ساڻ ڪري بئراجي علائقن ۾ موجود مال کي پڻ اها ساڳئي بيماري تحفي ۾ ڏي ٿو. جنهن کان بچڻ لاءِ ٽڪن جو ڪوبه رواج ناهي. هڪ ٻيو الميو عورتن ۾ تعليم نه هجڻ ڪري ننڍي عمر ۾ شاديون، وقفي بنا ٻارن جي پيدائش، حمل کان وٺي ٻارن جي ڄم ۽ ان کان پوءِ ايندڙ درپيش مسئلن تي ڌيان نه ڏيڻ ڪري ۽ حاملا عورتن ۽ کير پياريندڙ عورتن کي متوازن غذا نه ملڻ ڪري۽ذڪر ڪيل سمورن سببن ڪري ٻار ۽ ماءُ ڪمزور رهن ٿا. انڪري اهي آساني سان بيمارين جو شڪار ٿي وڃن ٿا. رهيل ڪثر صحت جي اڻ پورين سهولتن، بي ڌياني، ڪميشن جي لالچ ۾ ڪاسائي بڻيل ڊاڪٽر پوري ڪريو ڇڏين ۽ سوني تي سهاڳو اسان جا چونڊيل نمائيندا ۽ حڪومت آهن جيڪي حقيقتن کان اکيون ڦيريندي دفاع واري مورچي تي بيهيو رهن. هنن همراهن تي افسوس انهي ڪري سگهجي ٿو ته همراه خود کي قانون ساز سمجهڻ بجاءِ ترقياتي اسڪيمن جا ٺيڪيدار سمجهن ٿا. مسئلن جي حل جي لاءِ منصوبا تڏهن جڙي سگهندا جڏهن اسان وٽ انگ اکر موجود هوندا، پر اسان وٽ نه آدمشاري ٿئي ٿي نه وري مال شماري. مارچ جي مهيني کان وٺي اڄ تائين ضلع ٿرپارڪر ۾ صرف سول اسپتال مٺي ۾ 470 ٻار موت جو راڪاس ڳڙڪائي چڪو آهي. جڏهن ته صرف سول اسپتال عمرڪوٽ ۾ ٽن مهينن دوران 84 ماڻهن جي ساهه جو سڳو ٽٽي ويو جن ۾ 60 اهي ٻارڙا هئا جن ته اڃا دنيا ڏٺي به ڪونه هئي. صحت کاتي پاران جاري ڪيل رپورٽ ۾ مرڻ جا ڪارڻ پيدائش وقت گهٽ وزن، سيکڙو دائين پاران ويم دوران ناڙو سهي نه موڙڻ، پوري آڪسيجن فراهم نه ٿيڻ، ٻار ٻڏل هئڻ، کاڌي جي کوٽ، جهٽڪن جي بيماري، پيچيش، نمونيا ۽ ٻيا مختلف سبب ڄاڻايا آهن.  اهي انگ اکر تڏهن ڪاغذن مان ٻاهر نڪتا جڏهن سيشن جج سول اسپتال پهچي سموري معاملي بابت پڇاڻو ڪيو.

 

سنڌ حڪومت جي اُها ئي ڪارڪردگي رهي ته سڄو صوبو ٿر بڻجي ويندو: پيرپاڳارو

ڪراچي (اسٽاف رپورٽر) مسلم ليگ فنڪشنل جي سربراهه پيرپاڳاري چيو آهي ته جيڪڏهن سنڌ حڪومت جي اُها ئي ڪارڪردگي رهي ته سڄو صوبو ٿر بڻجي ويندوجڏهن ته وڏي وزير جي پنهنجي ضلعي جي صورتحال اُها آهي ته هر شخص سج لهڻ کان پهرين منزل تي پهچڻ جي ڪوشش ڪري ٿو ۽ جيڪو به پوليس آفيسر ڏوهارين خلاف ڪارروائي ڪري ٿو اُن کي تبديل ڪيو وڃي ٿو. ڪراچي ۾ ايم ڪيو ايم جي ڊپٽي ڪنوينر ڊاڪٽر خالد مقبول صديقي جي سربراهي ۾ ايم ڪيو ايم جي وفد پيرپاڳاريسان ملاقات ڪئي جنهن ۾ صوبي جي معاملن ۽ خاص طور تي ٿر جي صورتحال تي تفصيلي خيالن جي ڏي وٺ ڪئي وئي ملاقات کانپوءِ ميڊيا سان ڳالهائيندي خالد مقبول صديقي جو چوڻ هو ته ايم ڪيو ايم مسلم ليگ فنڪشنل سان ڪافي گهرا لاڳاپا آهن، ٻنهي پارٽين جو موقف هڪ ئي آهي. پيرپاڳاري سان ملاقات جو مقصد ٿر جي صورتحال تي خيالن جي ڏي وٺ ڪرڻي هئي. وڏو وزير چوي ٿو ته ٿر جي صورتحال ايترين سنگين آهي ته انسان ڪجهه نٿو ڪري سگهي هاڻي الله ئي ڪجهه ڪندو. هن چيوته ٿر جي معاملي تي سنڌ حڪومت مجرماڻي غفلت ڪئي آهي ۽ اون سبب جانيون ضايع ٿي رهيون آهن. خالد مقبول صديقي جو چوڻ هو ته صوبي ۾ جهڙي ريت ڦرلٽ جاري آهي جهڙا فيصلا ڪيا پيا وڃن اُن مان لڳي ٿو ته پيپلزپارٽي سڄي سنڌ ۾ ٿر جهڙي صورتحال پيدا ڪرڻ جو عزم ڪيو اهي، گذريل ڏينهن صوبائي حڪومت مٺي ۾ جنهن شان ۽ شوڪت جو مظاهرو ڪيو اُهو ٿر واسين جي زخمن تي لوڻ ٻرڪڻ جي برابر آهي. هن چيو ته ايم ڪيو ايم ۽ مسلم ليگ فنڪشنل گڏجي سنڌ جي ٻهراڙي ۽ شهري عوام وچ ۾ غلط فهميون ختم ڪرڻ جي ڪوشش ڪنديون ۽ صوبي جي ترقي لاءِ گڏجي ڪم ڪنداسين.

 

چونڊ ڌانڌلي جي جاچ لاءِ عدالتي ڪميشن جي تشڪيل جي تجويز مڪمل نيڪ نيتي تي ٻڌل آهي: عمران خان

اسلام آباد (بيورو) پاڪستان تحريڪ انصاف جي سربرهه عمران خان چيو آهي ته چونڊ ڌانڌلي جي  جاچ لاءِ عدالتي ڪميشن جي تشڪيل جي تجويز مڪمل نيڪ نيتي تي ٻڌل آهي اسان نوازشريف کي موقعو ڏنو آهي ته هو پاڻ کي بيگناهه ثابت ڪري اسان کي معلوم آهي ته ڌانڌلي جي جاچ ۾ ڇا آڏو اچڻ وارو آهي پر 30 نومبر کان پوءِ هن حڪومت جي خلاف جيڪو ڪنداسين اهو پرامن هوندو خانگي نيوز چينل کي انٽرويو ۾ عمران خان چيو ته پي ٽي وي تي حملي جو الزام مون تي لڳائڻ منهنجي لاءِ ايئن ئي آهي جيئن مون تي مينهن چوري ڪرڻ جو الزام عائد ڪيو وڃي منهنجو هن حملي سان ڪوئي تعلق نه اهي حي الزام اصل ۾ حڪومت جي ڪمزوري جي عڪاسي ڪري ٿو.

 

پاڪستان جو وچولي فاصلي تائين مار ڪندڙ بيلسٽڪ ميزائل شاهين ٽو ”حتف 6 “ جو ڪامياب تجربو

راولپنڊي (م.د) پاڪستان درمياني فاصلي تائين مار ڪندڙ بيلسٽڪ ميزائل شاهين ٽو ”حتف 6 “ جو ڪامياب تجربو ڪري ورتو، حتف 6 جوهري ۽ روايتي هٿيار کڻي وڃڻ جي صلاحيت رکي ٿو، شاهين ٽو بحيره عرب ۾ 0 0 1 سيڪڙو هدف کي صحيح نشان لڳايو، ميزائل 0 0 5 1 ڪلو ميٽر تائين هدف جو نشانو بڻائي سگهي ٿو، صدر مملڪت ممنون حسين، وزيراعظم نواز شريف، آرمي چيف جنرل راحيل شريف سميت عسڪري قيادت شاهين ٽو جي ڪامياب تجربي تي واڌايون ڏنيون ۽ پاڪ فوج جي قدمن کي ساراهيو. پاڪ فوج جي سُڌ سماءَ واري شعبي آءِ ايس پي آر موجب پاڪستان وچٿري فاصلي تائين مار ڪندڙ بيلسٽڪ ميزائل شاهين ٽو ”حتف 6 “ جو ڪامياب تجربو ڪيو آهي، تجربو بحيره عرب ۾ ڪيو ويو. ان موقعي تي ڊائريڪٽر جنرل اسٽريٽجڪ پلان ڊويزن ليفٽيننٽ جنرل زبير محمود حيات، ڪمانڊر آرمي اسٽريٽجڪ فورسز ڪمانڊ ليفٽيننٽ جنرل عبيدالله خان، نيسڪا چيئرمين محمد عرفان برني، سينئر آفيسر اسٽريٽجڪ فورسز، سائنسدانن ۽ انجنيئرز به موجود هئا. ڊائريڪٽر جنرل اسٽريٽجڪ پلان ڊويزن ليفٽيننٽ جنرل زبير محمود حيات خان شاهين ٽو جي ڪامياب تجربي جو مشاهدو ڪيو ۽ ان موقعي تي هڪ ٻيو سنگ ميل پار ڪرڻ تي سائنسدانن ۽ عسڪري قيادت کي واڌايون ڏنيون. بيلسٽڪ ميزائل شاهين ٽو حتف 6 جوهري ۽ روايتي هٿيار کڻي وڃڻ جي صلاحيت رکي ٿو. شاهين ٽو جي ڪامياب تجربي تي صدر مملڪت ممنون حسين، وزيراعظم نواز شريف، آرمي چيف جنرل راحيل شريف سميت عسڪري قيادت سائنسدانن ۽ انجنيئرز کي واڌايون ڏنيون ۽ پاڪ فوج جي قدمن کي ساراهيو.

 

 

ڪراچي: فائرنگ جي واقعن ۾ 2 ڄڻا قتل، 2 ٽارگيٽ ڪلر به ماريا ويا، 2 گرفتار

ڪراچي (اسٽاف رپورٽر) ڪراچي جي مختلف علائقن ۾ فائرنگ جي واقعن ۾ 2 ڄڻا مارجي ويا آهن، جڏهن ته لياري ۾ رينجرز مقابلي بعد ٻن ٽارگيٽ ڪلرز کي مارڻ جي دعويٰ ڪئي آهي. پوليس موجب اورنگي ٽائون جي علائقي گلشن ضياءُ مان لاش هٿ آيو جنهن کي گوليون هڻي قتل ڪيو ويو جڏهن ته مقتول جي سڃاڻپ نه ٿي سگهي آهي. نارٿ ڪراچي ۾ اڻ ڄاتل هٿياربندن جي فائرنگ ۾ 40 ورهين جو همراهه مارجي ويو. ٻئي طرف لياري ۾ رينجرز مقابلي دوران 31 ماڻهن جي قتل ۾ ملوث حفيظ ۽ حمزه عرف امريڪن مارجي ويا. ذريعن موجب موسيٰ لين واري علائقي ۾ رينجرز گشت ڪري رهي هئي ته گينگ وار جي جوابدارن مٿن حملو ڪيو، جنهن دوران رينجرز جي فائرنگ ۾ گينگ وار جا 2 جوابدار مارجي ويا، جن جي سڃاڻپ حفيظ ۽ حمزه حسن عرف حمزه امريڪن طور ٿي آهي. مارجي ويل ٻنهي جوابدارن جو تعلق لياري گينگ وار جي شيراز ڪامريڊ گروپ سان هو. رينجرز دعويٰ ڪئي آهي ته مارجي ويل ٻئي جوابدار خطرناڪ ڏوهاري هئا، جيڪي 31 قتل ڪيسن ۾ ملوث هئا، سندن قبضي مان هٿيار پڻ هٿ ڪيا ويا آهن. هوڏانهن شاهراهه نورجهان وٽ شهرين کان ڦرلٽ ڪندڙ هڪ ڏوهاري کي پوليس مقابلي دوران گرفتار ڪرڻ جي دعويٰ ڪئي آهي.