تازيون خبرون

Daily Archives: November 11, 2014

خيرپور لڳ هيانءُ ڏاريندڙ واقعو، 60 ماڻهو اجل جو شڪار، قيامت صغريٰ جا منظر

خيرپور (ڊ ر)خيرپور ڀرسان خوفناڪ حادثو، مسافر ڪوچ ۽ ٽريلر ۾ آمهون سامهون ٽڪر، معصوم ٻارڙن ۽ عورتن سميت 60 مسافر فوت، ويهن کان وڌيڪ زخمي، اسپتال داخل، اسپتالن ۾ ايمرجنسي لاڳو، سوڳ ۾ ٺيڙهي شهر ۽ ڀرپاسي جا علائقا بند. تفصيل مطابق خيرپور ڀرسان قومي شاهراهه ٺيڙهي باءِ پاس تي اڱاري ڏينهن اسر ڌاران سوات کان ڪراچي ويندڙ تيز رفتار مسافر ڪوچ ۽ ٽرالر وچ ۾ آمهون سامهون ٽڪر ٿي پيو. جنهن جي نتيجي ۾ ٻئي گاڏيون تباهه ٿي ويون ۽ مسافر ڪوچ کي باهه لڳي ويئي. ٻنهي گاڏين جي ٽڪر سبب حادثي وقت زوردار ڌماڪو ٿيو. جنهن جو آواز ٻڌي ڀرپاسي جا سوين ڳوٺاڻا حادثي واري هنڌ پهچي ويا ۽ پوليس کي اطلاع ڪري ڇڏيو. اطلاع تي پوليس جي وڏي انگ، موٽر وي پوليس اهلڪارن الخدمت فائونڊيشن جي رضاڪارن، ايدهي جي رضاڪارن ٻين ڳوٺاڻن جي مدد سان حادثي ۾ فوت ٿي ويلن ۽ زخمين کي سول اسپتال خيرپور ۽ سول اسپتال سکر ڏانهن اماڻيو ويو. حادثي ۾ ڪوچ ڊرائيور حيدر علي، ٽرالر ڊرائيور جميل احمد ۽ مسافر سوات ۽ ڀرپاسي جا رهواسي مسمات شبنم زال راشد 35 ساله، مسمات شبانه بيگم ڌيءَ محمد صديق 8 ساله، مسمات ذاهدان زال فيروز 40 ساله، مسمات حضرت بيبي 35 ساله، مسمات انيلا 35 ساله، مسمات امان بيبي 10 ساله، مسمات سلميٰ، مسمات صاحبزادي، مسمات اميرزادي، نعمان 10 ساله، نور وحيد، محمد يونس، محمد سميع، محمد يونس 18 ساله، عبدالودود 35 ساله، نيڪ محمد، ناصر علي 35 ساله، وقاص ولد احسان 5 ساله، سهراب ولد مير جان، اڪبر زاده ولد شير زاده، صاحبزاده ولد شيرين زاده 35 ساله، مذمل ولد شاه رخ، ناهيد خان ولد شيرين خان مير ياور، تشڪيل احمد، آدم شير، محمد نعمان، يونس، آدم شير سميت 57 مسافر فوت ٿي ويا. جڏهن ته ويهن کان وڌيڪ زخمي ٿي پيا. جن جي حالت ڳڻتي جوڳي ٻڌائي پيئي وڃي. حادثي جي اطلاع تي سکر، خيرپور ۽ ڀرپاسي جي اسپتالن ۾ ايمرجنسي لاڳو ڪري حادثي واري هنڌ ايمبولينس اماڻيون ويون جن پڻ حادثي ۾ فوت ٿي ويلن ۽ زخمين کي ڀرپاسي جي اسپتالن ۾ پهچائيو ۽ فائر برگيڊ جون ڏاڏيون اماڻي باهه تي ڪنٽرول ڪيو ويو. وزير اعليٰ سنڌ سيد قائم علي شاهه، ڪمشنر سکر محمد عباس بلوچ، ڊپٽي ڪمشنر منور علي مٺياڻي، ايس ايس پي خيرپور ناصر آفتاب ۽ ٻين عملدارن حادثي واري هنڌ جو معائنو ڪيو ۽ اسپتالن ۾ پهچي زخمين جي عيادت ڪئي ۽ فوتين جي لاشن کي وارثن تائين پهچائڻ ۽ طبي امداد جي ڪمن جي نگراني ڪئي.حادثي جي اطلاع تي خيرپور شهر توڙي ٺيڙهي، ٻٻرلوءِ، ڪرم آباد، پير مڱيو، وارث ڳنڀير ۽ ٻين علائقن ۾ سوڳ واري صورتحال ڇانئجي ويئي.سنڌ جي وڏي وزير سيد قائم علي شاهه حادثي تي افسوس جو اظهار ڪندي زخمين کي ڀرپور طبي امداد ڏيڻ جي هدايت ڪئي آهي. وڏي وزير ڊي آءِ جــِي سکر کي هدايت ڪئي آهي ته حادثي جي جاچ ڪري ذميوارن جو تعين ڪيو وڃي. صدر ممنون حسين، ايم ڪيو ايم سربراهه الطاف حسين، ايم اين اي نواب وساڻ ۽ ٻين پڻ ٺيڙهي حادثي تي ڏک جو اظهار ڪيو آهي.

 

پاڪستان ۾ سيڙپڪاري لاءِ ماحول نهايت سازگار آهي: نواز شريف

برلن (م.ڊ) جرمن چانسلر انجيلا مرڪل اعلان ڪيو آهي ته جرمني پاڪستان ۽ يورپي يونين وچ ۾ آزاداڻي تجارت جي مڪمل حمايت ڪري ٿي ۽ امن جي خاطر ٿيندڙ ڪوششن ۾ پاڪستان جي مڪمل حمايت ڪري ٿو جڏهن ته افغانستان ۾ ڇڪتاڻ واري صورتحال جي خاتمي ۽ ڀارت سان دوستاڻن تعلقن جو خواهشمند آهي جرمني پاڪستان ۾ توانائي جي شغبي ۾ سرمائيداري ڪندو ۽ ان حوالي سان هڪ خصوصي فورم قائم ڪيو ويندو وزيراعظم نواز شريف به جرمن چانسلر کي پاڪستان جي دوري جي دعوت ڏني وزيراعظم نواز شريف ۽ جرمن چانسلر انجيلا مرڪل وچ ۾ ملاقات کانپوءِ خصوصي گڏيل پريس ڪانفرنسمنعقد ڪئي وئي جنهن دوران جرمن چانسلر چيو ته پاڪستان سان دوستاڻا تعلق رهيا آهن ۽ انهن تعلقن کي وڌيڪ مستحڪم ڪرڻ چاهيون ٿا ۽ ان حوالي سان وزيراعظم نواز شريف سان مفيد ڳالهه ٻولهه ٿي آهي هن چيو ته ڪيترن ئي معاملن تي پاڪستان کي مدد ڪرڻ گهرجي ته جيئن اسان جا تعلق هڪ نئين دور ۾ داخل ٿي سگهن اسان پاڪستان ۾ انرجي سيڪٽر ۾ سرمائيداري ڪرڻ چاهيون ٿا ۽ ان لاءِ خصوصي فورم جو قيام عمل ۾ آندو ويندو جڏهن ته يورپي يونين ۽ پاڪستان ۾ آزاداڻي تجارت جي به مڪل حمايت ڪنداسين. ٻي طرف وزيراعظم محمد نوازشريف چيو آهي ته پاڪستان ۾ سيڙپڪاري لاءِ ماحول وڏو سازگار آهي پاڪستان ۾ ڪاروبار ڄمائڻ ۾ ڪنهن قسم جي پريشاني يا ڏکيائي کي منهن ڏيڻو نه پوندو پرڏيهي سيڙپڪار پنهنجو منافعو واپس کڻي وڃي سگهن ٿا اهليت ۽ شفافيت حڪومت جو طور طريقو آهي جرمن سيڙپڪارن جي سيڙپڪاري سان ٻطرفو واپار به وڌندو ديامير ڀاشا ڊيم ۽ داسو مان اٽڪل 9 هزار ميگاوات بجلي پيدا ٿيندي پاڪستان تي جي ايس پي پلس جو ڌرجو ڏيڻ لاءِ جرمني جي حڪومت جي تعاون جا ٿورائتا اهيون افغانستان جي نئين قيادت سن ويجها لاڳاپا ۽ رابطا قائم ٿيا آهن ايران ۽ چين سان پنهنجا لاڳاپا علائقائي سلامتي ۽ ترقي لاءِ مضبوط ڪري رهيا آهيون اسان کي خطي جو مستقبل روشن آهي برلن ۾ انويسٽمينٽ فورم کي خطاب ڪندي وزيراعظم چيو ته پاڪستان ۾ نجڪاري ۽ سيڙپڪاري جو عمل نه صرف صاف ۽ شفاف پر عالمي ۽ بهترين معيار مطابق ٿيندو هن چيو ته پاڪستان جو شڪار دنيا جي سڀ کان وڌيڪ سيڙپڪار دوست ملڪن ۾ ٿئي ٿو هتي سمورن شعبن ۾ پرڏيهي سيڙپڪاري جا موقعا موجود آهن جن مان پرڏيهي سيڙپڪار فائدو وٺي سگهن ٿا توانائي جوشعبو اسان جي سڀ کان وڏي ترجيحي آهي اسان جي ان طرف سڀ کان وڌيڪ توجهه آهي جرمني کان پاڪستان ۽ يورپي يونين وچ ۾ آزاد واپار جي معاهدي لاءِ تعاون جاخواهشمند آهيون پاڪستان تي سيڙپڪارن جو اعتماد وڌيو آهي ايندڙ سالن ۾ پاڪستان ترقي ڏانهن تيزي سان وڌندو وزيراعظم نوازشريف چيو ته اسان 100 سيڪڙو فارن اونرشپ جي اجازت ڏيون ٿا ۽ منافعو، ڊيوڊنٽس ۽ ٻين فنڊن کي واسطيدار ملڪ جي ڪرنسي ۾ ٻاهر کڻي وڃڻ جي ڪائي حد مقرر ناهي ڪئي ويئي. هن چيو ته پاڪستان جي خواهش آهي ته توانائي انفرااسٽريڪچر ڊيولپمينٽ فوڊ فارماسوٽيڪل ڪيميڪل انجنيئرنگ زراعت تي منحصر انڊسري مائننگ تيل ۽ گئس جي تلاش جي شعبي ۾ پرڏيهي براهه راست سيڙپڪاري ۾ اضافو ٿئي هن چيو ته مون کي هن تاريخي شهر ۾ به ۽ مشهور ڪاروباري شخصيتن جي اجتماع کي خطاب جو موقعو ملڻ وڏي خوشي آهي هن چيو ته پاڪستان جا جرمني سان خاص لاڳاپا آهن.

 

آرمي چيف جنرل راحيل شريف جو آءِ ايس آءِ هيڊڪوارٽر جو دورو

راولپنڊي (م.ڊ) چيف آف آرمي اسٽاف جنرل راحيل شريف اڱاري ڏينهن انٽر سروسز انٽيليجنس (آءِ ايس آءِ) هيڊڪوارٽر جو دورو ڪيو. آءِ ايس آءِ جي هيڊڪوارٽر پهچڻ تي آءِ ايس آءِ جي سربراهه ليفٽيننٽ جنرل رضوان اختر آرمي چيف جو استقبال ڪيو. ان موقعي تي آرمي چيف کي ملڪ جي اندروني ۽ ٻاهرين سلامتي جي صورتحال بابت بريفنگ پڻ ڏني وئي. آرمي چيف ملڪ جي قومي سلامتي بابت آءِ ايس آءِ جي ڪردار جي واکاڻ ڪئي ۽ ان جي آفيسرن ۽ جوانن جي قربانين جي پڻ تعريف ڪئي.

 

ڏسڻو پوندو نادره کان تصديق نه ٿيندڙ ووٽن جا نتيجا ڪهڙا نڪرندا: چيف جسٽس

اسلام آباد (بيورو) عام چونڊن ۾ آڱوٺن جي نشانن جي تصديق جي معاملي تي چيف جسٽس ناصرالملڪ چيو آهي ته ڏسڻو پوندو ته نادره کان تصديق نه ٿيندڙ ووٽن جا نتيجا ڇا هوندا اڱاري تي چيف جسٽس ناصرالملڪ جي سربراهي ۾ ٽه رڪني بئچ آڱوٺن جي نشانن جي تصديق متعلق ڪيس جي ٻڌڻي ڪئي. عدالت چيو ته عدالتي حڪم تي اهي ڪيس گڏ ڪري ٻڌڻي لاءِ مقرر ڪيو ويو انهن ۾ مختلف نوعيت جا ڪيس آهن جن جون ڪئٽيگريز ٺاهڻيون آهن جسٽس چيو ته عدالت کي ڏسڻوپوندو ته نادره کان تصديق نه ٿيندڙ ووٽن جا نتيجا ڇا هوندا. ڪيس جي ٻڌڻي ڊسمبر جي ٻئي هفتي تائين ملتوي ڪئي ويئي.

 

صدر ممنون حسين سان ڊي جي آءِ ايس آءِ جي ملاقات، صدر جون ذميواريون سنڀالڻ تي واڌايون

اسلام آباد (بيورو) صدر ممنون حسين سان ڊي جي آءِ ايس آءِ ليفٽيننٽ جنرل رضوان اختر ملاقات ڪئي جنهن ۾ پيشاورانه ۽ گڏيل دلچسپي جي معاملن تي خيالن جي ڏي وٺ ڪئي ويئي ذريعن موجب صدر ليفٽيننٽ جنرل رضواناختر تي نيون ذميواريون سنڀالڻ تي واڌايون ڏيندي ليفٽيننٽ جنرل رضوان اختر جي پيشاورانه صلاحيتن جي تعريف ڪئي ان موقعي تي صدر چيو ته آئين ۽ قانون جي حڪمراني ۾ هن ملڪ جي ڪاميابي آهي اسان کي ملڪ جي خدمت ڪرڻي آهي اسان سڀني جو گڏيل مفاد آهي هن چيو ته ملڪ جي ترقي ۽ استحڪام اسان سڀني جو گڏيل منشور آهي.

 

جڊيشل ڪميشن ۾ ڪنهن ايجنسي جو نمائندو نٿو ويهي سگهي: خورشيد شاهه

لنڊن (م.ڊ) قومي اسيمبلي ۾ مخالف ڌر اڳواڻ خورشيد شاهه واضح ڪيو آهي ته جڊيشل ڪميشن ۾ ڪنهن ايجنسي جو نمائندو نٿو ويهي سگهي سپريم ڪورٽ جي جج سان جاچ آفيسر ويهي ته عدليه قانون ۽ آئين جي ڇا پوزيشن وڃي رهندي ميڊيا سان ڳالهائيندي سيد خورشيد شاهه چيو ته جڊيشل ڪميشن ۾ ڪنهن ايجنسي جو نمائندو نٿو ويهي سگهي عمران خان جي ان مطالبي سان سندس سياسي شعور جو اندازو لڳائي سگهجي ٿو چيف اليڪشن ڪمشنر لاءِ ٻيهر سياسي جماعتن سان رابطا ڪندس خورشيد شاهه چيو ته ڌرڻو هڪ سياست آهي عمران خان کي اها ڳالهه اسان ٻڌائي رهيا آهيون ته اها ئي جمهوريت آهي ان کي ڊي ريل نه ڪيو وڃي جيڪڏهن آمريت هجي ها ته عمران خان کي شايد گهر کان نڪرڻ نه ڏنو وڃي ها.

 

خيبر ايجنسي ۽ اورڪزئي ايجنسي ۾ فورسز جي ڪارروائي، 24 ويڙهاڪ مارجي ويا

خيبر ايجنسي (مانيٽرنگ ڊيسڪ) خيبر ايجنسي ۽ اورڪزئي ايجنسي جي علائقن ۾ جهڙپن ۽ فورسز جي ڪارروائي ۾ 24 ويڙهاڪ مارجي ويا، 11 کان وڌيڪ زخمي ٿي پيا، 6 اهلڪار به زخمي ٿي پيا، باجوڙ ايجنسي ۾ بم ڌماڪي ۾ 2 ليويز اهلڪار شهيد ٿي ويا، تيمر گرا ۾ 3 سئو ڪلو ڌماڪي دار مواد ناڪام بڻايو ويو. خيبر ايجنسي جي تيرا وادي جي اڪا خيل علائقي ۾ سيڪيورٽي فورسز ۽ دهشتگردن جي وچ ۾ جهڙپ ۾ 9 دهشتگرد مارجي ويا ۽ 11 زخمي ٿي پيا، ڪيترائي دهشتگرد فرار ٿي وڃڻ ۾ ڪامياب ٿي ويا. ٻئي طرف اورڪزئي ايجنسي ۾ فورسز دهشتگردن جو چيڪ پوسٽ تي حملو ناڪام بڻائي ڇڏيو، سيڪيورٽي فورسز جي جوابي ڪارروائي ۾ 15 دهشتگرد مارجي ويا. باجوڙ ايجنسي ۾ بم ڌماڪي ۾ 2 ليويز اهلڪار شهيد ٿي ويا ۽ ڪيترائي زخمي ٿي پيا جن کي فوري طور خار اسپتال منتقل ڪيو ويو. هوڏانهن لوئر دير جي علائقي تيمر گرا ۾ 3 سئو ڪلو ڌماڪي دار مواد ناڪام بڻايو ويو، سرڪاري ذريعن جو چوڻ آهي ته ڌماڪي دار مواد روڊ ڪناري لڳايو ويو هيو، ڌماڪي کانپوءِ سيڪيورٽي فورسز علائقي کي گهيري هيٺ آڻي ڇڏيو. خيبر ايجنسيءَ ۾ آپريشن خيبر ون ڪاميابيءَ سان جاري آهي، آپريشن جي شروعات کان هن وقت تائين هم ڪمانڊرن سميت هڪ سئو 35 دهشتگرد ماريا ويا ۽ اڍائي سئو جي لڳ ڀڳ دهشتگردن کي گرفتار ڪيو ويو. عسڪري ذريعن موجب خيبر ايجنسي ۾ جاري آپريشن خيبر ون ۾ اڳڀرائي ٿي رهي آهي. آپريشن جي شروعات کان هن وقت تائين سڪيورٽي فورسز جي ڪارروائين ۾ اهم ڪمانڊرن سميت هڪ سئو 35 دهشتگرد مارجي ويا ۽ سندن ڪيترائي ٿاڪ به تباهه ٿي ويا. سڪيورٽي ذريعن موجب خيبر ايجنسي ۾ دهشتگردن خلاف گهيرو تنگ ڪيو ويو آهي. آپريشن جي شروعات کان هن وقت تائين 250 دهشتگردن جي لڳ ڀڳ دهشتگردن کي گرفتار به ڪيو ويو آهي.

 

ٿر جو معاملو انتهائي سنجيده آهي، مخالف ڌر پوائنٽ اسڪورنگ نه ڪري: شرجيل ميمڻ

ڪراچي(اسٽاف رپورٽر)) اطلاعات ۽ بلديات واري وزير شرجيل انعام ميمڻ چيو آهي ته ٿر جو معاملو تمام گهڻو سنجيده آهي، مخالف ڌر جماعتون ان تي پوائنٽ اسڪورننگ ڪري رهيون آهن. اسان هن ايوان جي سمورن ميمبرن کي دعوت ڏيون ٿا ته هو پاڻ هلي ڏسن ته حڪومت ڪهڙا ڪهڙا ڪم ڪيا آهن. پيپلز پارٽي جي حڪومت جي احتساب جي ڳالهه ڪندڙ ماضي ۾ انهن جي حڪومتن جو احتساب ڇو نٿو ڪيو وڃي، جن ٿر لاءِ ڪجهه نه ڪيو. گذريل 6 سالن دوران پي پي پي جي حڪومت ٿرپارڪر لاءِ جيڪو ڪجهه ڪيو آهي گذريل 60 سالن ۾ ناهي ٿيو. هو اڱاري تي سنڌ اسيمبلي ۾ اپوزيشن ليڊر شهر يار مهر پاران پيش ڪيل قرارداد تي ڳالهائي رهيو هو. شرجيل انعام ميمڻ چيو ته ٿر جو معاملو تمام گهڻو سنجيده آهي. مخالف پوائنٽ اسڪورننگ جي ڪوشش به ڪئي. ٿرپارڪر جي تاريخ تي نظر وجهڻ گهرجي. هن چيو ته ٻهراڙين ۾ پکڙيل آباديون هونديون آهن. انهن کي سهولتن جي فراهمي تمام گهڻي مشمل هوندي آهي. ٿر انتهائي پوئتي پيل علائقو آهي، ان جا مسئلا شهرن جي ڀيٽ ۾ تمام گهڻا آهن. پکڙيل آبادي ۾ سموريون سهولتون پهچائڻ گهڻو مشڪل آهي. هن چيو ته ٿرپارڪر ۾ تمام گهڻا مسئلا آهن. هن چيو ته پيپلز پارٽي جي حڪومت گذريل 6 سالن دوران ڇا ڪيو ان جو احتساب ٿيڻ گهرجي. تاريخ ۾ سڀ کان وڌيڪ ڪم پ پ حڪومت ۾ ٿيا آهن. ان دوران 400 ڪلوميٽر رستا تعمير ٿيا، بجلي جي ڪنيڪشن پوئين سال ۾ جيترا ڏنا ويا پوري تاريخ ۾ اڳ ڪڏهن نه ڏنا ويا. هن چيو ته ٿرپارڪر جي ماڻهن جي معاشي حالت بدلڻ جي بنياد محترمه بينظير ڀٽو شهيد وڌي. ٿر ۽ ڪيٽي بندر ۾ ڪوئلي مان بجلي پيدا ڪرڻ جا معاهدا ڪيا جيڪي ميان نواز شريف اچي منسوخ ڪري ڇڏيا. اسان جي حڪومت ٻيهر اچي اها ئي مشق ڪندي. مقصد اهو هو ته ڪوئلي مان بجلي ٺاهي  وڃي ۽ 200 سالن تائين برآمد ڪري سگهجي. ان سان ماڻهن کي روزگار ملي ها ۽ انهن جي معاشي حالتون بدلجي وڃن ٿا. هن چيو ته اسان جي حڪومت آر او پلانٽس لڳايا. پي پي ٻه ڪم ڪيا جيڪي گذريل 50 سالن ۾ ٿر ۾ ناهن ٿيا. بينظير انڪم سپورٽ جا سڀ کان وڌيڪ ڪارڊ ضلعي ٿرپارڪر کي ڏنا ويا. جيڪڏهن حڪومت ٿر جا مسئلا حل ڪرڻ ۾ سنجيده نه هجي ها ته اتي تاريخي ترقياتي ڪم نه ٿين ها. 2013 جي چونڊن ۾ پيپلز پارٽي ٿرپارڪر جي ڇهن مان 5 سيٽون کٽيون آهن. هن چيو ته وزيراعليٰ سنڌ اڄ به ٿر ۾ آهي. اسان ڇهه سالن جي احتساب لاءِ تيار آهيون. هن چيو ته اسان سڀني ميمبرن کي دعوت ڏيون ٿا ته هو پاڻ هلي ڏسن ته حڪومت ڪهڙا ڪم ڪيا آهن. جيڪڏهن اسان جي ڪٿي غفلت نظر آئي ته هو اسان جو احتساب ڪن. هن چيو ته پاڪستان جي تاريخ ۾ پهريون ڀيرو سرحدي شهر ننگرپارڪر کي پاڻي جي پائيپ لائين فراهم ڪئي پئي وڃي. صرف پيپلز پارٽي جو احتساب ٿئي ٿو. ماضي ۾ انهن جي حڪومت جو احتساب ڇو نه ٿئي، جن ٿر لاءِ ڪجهه به ناهي ڪيو. اسان ٽن سالن تائين مسلسل ٿر ڊيزرٽ سفاري جو انعقاد ڪيو ته جيئن ٿر کي ترقي ملي. هن چيو ته ڪڻڪ جي ٻورين ۾ مٽي ملائيندڙ آفيسرن کي نه صرف معطل ڪيو بلڪ انهن کي گرفتار به ڪيو ويو آهي. هن چيو ته مسئلا آهن مسئلا صرف ٿر ۾ يا سنڌ ۾ ناهن بلڪ پوري پاڪستان ۾ آهن. فيصل آباد جي هڪ اسپتال ۾ سهولتون نه ملڻ سان 2013 ۾ هڪ هزار ٻار مري ويا، اها به افسوس ناڪ ڳالهه آهي سرڪاري اسپتالن جي حالت بهتر ناهي. اسان کي حالتن کي بهتر بڻائڻ لاءِ ڪوشش ڪرڻ گهرجي. حڪومت ڪوشش ڪري رهي آهي، جيڪي اسان سان گڏجي ڪم ڪرڻ چاهين ٿا اسان انهن کي ڀيلڪار چئون ٿا. گذريل 6 سالن ۾ پيپلز پارٽي ٿر لاءِ اهو ڪجهه ڪيو آهي، جيڪو گذريل 60 سالن ۾ ناهي ٿيو. وزيراعظم ٿر لاءِ جنهن امدادي رقم جو اعلان ڪيو هو اها اڃان تائين پوري رقم ناهي ملي. هن ڀيري وفاقي حڪومت ٿر جي مسئلي تي ڪجهه به ناهي ڪيو. هن چيو ته اسان جا نمائندا اڄ به ٿر جي ماڻهن جي خدمت ڪري رهيا آهن. فيصلو عوام کي ڪرڻو آهي هو ڪنهن کي ووٽ ڏين ٿا. اها به ماڻهن کي خبر پئجي ويندي.

 

 

سنڌ اسيمبلي ۾ خيرپور ٽريفڪ حادثي ٽي حڪومتي ۽ اپوزيشن ميمبرن جو ڏک جو اظهار ، روڊ جو ڪم فوري مڪمل ڪرڻ جو مطالبو

ڪراچي(اسٽاف رپورٽر) سنڌ اسيمبلي ۾ خيرپور ٽريفڪ حادثي ۾ ڏک ۽ افسوس جو اظهار ڪندي حڪومتي ۽ اپوزيشن ميمبرن وفاقي ۽ صوبائي حڪومت کي نيشنل هاءِ وي جو ترقياتي ڪم فوري مڪمل ڪرڻ جو مطالبو ڪيو آهي ۽ چيو ته قومي شاهراهه تي 50 ڪلوميٽر تي ايمرجنسي سينٽر قائم ڪيا وڃن اڱاري تي سنڌ اسيمبلي جي اجلاس اسپيڪر سنڌ اسيمبلي آعا سراج دراني جي صدارت۾ ٿيو قرآن پاڪ جي تلاوت ۽ نعت مقبول صلعم کان پوءِ خيرپور ٽريفڪ حادثي ۾ فوتين لاءِ دعا گهري ويئي ان موقعي تي سنڌ حڪومتي ۽ اپوزيشن ميمبرن خيرپور بس حادثي کي نهايت افسوسناڪ قرار ڏيندي متاثرين کي فوري معاوضو ڏيڻ ۽ زخمين کي علاج جي سهولت ڏيڻ جو مطالبو ڪيو صوبائي وزير ڄام مهتاب ڏهر چيو ته شروعاتي جاچ ۾ ڊرائيور جي غفلت جي خبر پئي آهي زخمين کي علاج جي سهولت ڏني پئي وڃي خواجه اظهارالحسن قومي شاهراهه تي ٿيل ٽريفڪ حادثو جو حوالو ڏيندي چيو ته روڊ سيفٽي لاءِ سنڌ اسيمبلي جي قرارداد تي عمل ناهي ٿيو اسپيڪر سنڌ اسيمبلي جي رولنگ تي شرجيل ميمڻ جو چوڻ هو ته چيف سيڪريٽري سنڌ کان قرارداد تي عملدرآمد لاءِ انتظامن بابت معلوم ڪيو ويندو مخالف ڌر اڳواڻ شهريار مهر ۽ ٻين اپوزيشن ميمبرن مطالبو ڪيو ته هاءِ وي جي اڏاوت فوري مڪمل ڪئي وڃي نصرت سحر عباسي چيو ته بس حادثي جو ڪمشنر سکر ٻن ڪلاڪن کان پوءِ نوٽيس ورتو ڊپٽي ڪمشنر خيرپور ستل هو ۽ ان بس حادثي جو ڪوئي نوٽيس ناهي ورتو.

 

ڪراچي جون حالتون ڪجهه بهتر آهن، پاڪستان ۾ داعش جو ڪو به وجود ناهي: چوڌري نثار

ڪراچي (اسٽاف رپورٽر) وفاقي گهرو وزير چوڌري نثار چيو آهي ته داعش جو پاڪستان ۾ ڪو به وجود ناهي، ڪراچي ۾ امن امان لاءِ اڃا وڌيڪ ڪم ڪرڻو پوندو. ڪراچي ۾ رينجرز جي بيسڪ ريڪورٽس ٽريننگ ڪورس جي 18 هين پاسنگ آئوٽ پريڊ ۾ شرڪت بعد ميڊيا سان ڳالهائيندي چوڌري نثار چيو ته ڏوهارين خلاف ڪراچي ۾ آپريشن جاري رهندو. هن چيو ته وزيراعظم نواز شريف امن امان جو جائزو وٺڻ لاءِ جلد ڪراچي ايندو ۽ اجلاس به گهــُرايو ويندو. داعش بابت ڳالهائيندي وفاقي گهرو وزير چوڌري نثار چيو ته پاڪستان ۾ داعش جو ڪو به وجود ناهي. ان کان اڳ پاسنگ آئوٽ پريڊ کي خطاب ڪندي چوڌري نثار چيو ته تقريب ۾ اعليٰ معيار جي پريڊ جو مظاهرو ڪرڻ تي هــُو رينجرز جي جوانن ۽ آفيسرن کي واڌايون ڏئي ٿو. هن چيو ته ملڪ ۾ امن قائم ڪرڻ ۾ رينجرز جو وڏو ڪردار آهي، ڪراچي ۾ 14 مهينن دوران 4 هزار کان وڌيڪ آپريشن ڪري ساڍا هزار کان وڌيڪ ڏوهارين کي گرفتار ڪيو ويوآهي. چوڌري نثار چيو ته ڪراچي ۾ دهشتگردي جي خاتمي لاءِ ڪردار ادا ڪرڻ تي سنڌ رينجرز ۽ اڳوڻي ڊي جي رينجرز رضوان اختر کي هــُو ڀيٽا پيش ڪري ٿو. گهرو وزير چوڌري نثار اميد ظاهر ڪئي ته رينجرز جو موجوده ڊائريڪٽر جنرل به آپريشن کي اهڙي ريت جاري رکندو.