تازيون خبرون

Daily Archives: November 9, 2014

عمران خان حڪومت سان ڳالهيون چاهي ٿو ته ڳالهين واري ڪميٽي جون هٿڪڙيون کولي: پرويز رشيد

لاهور(م.ڊ) اطلاعات واري وفاقي وزير پرويز رشيد چيو آهي ته سردار ذوالفقار کوسو کي مسلم ليگ ن هميشه عزت ۽ احترام ڏنو آهي ان لاءِ هو پنهنجي پٽ جي سياست ڪرڻ بجاءِ مسلم ليگ ن جي سياسي ڪري ته ان لاءِ بهتر ٿيندو، لاهور ۾ ميڊيا سان ڳالهائيندي هن جو چوڻ هو ته حڪومت طرفان ٺاهيل منصوبن سان بجلي بحرنا جو جلد خاتمو ممڪن هو جڏهن ته ڌرڻن سبب انهن جي وقت تي شروعات نه ٿي سگهي ان لاءِ هاڻ ملڪ ۾ بجلي جي کوٽ جا ذميواري ڌرڻا سياست تي اچي ٿي جنهن سبب انهن منصوبن ۾ نه صرف رڪاوٽُن آيون پر ملڪ وڏي پئماني تي مالي فائدن کان به محروم ٿيو، تحريڪ انصاف سان ڳالهين جو عمل حڪومت پاڻ ئي شروع ڪيو هو اسان پاران ان کي ختم نه ڪيو ويو پر عمران خان پاڻ پنهنجي ٽيم کي روڪي ڇڏيو هو، هو هڪ ڀيرو ٻيهر گذارش ڪري ٿو ته عمران خان پنهنجي ڳالهين واري ٽيم جي هٿن ۾ لڳل هٿڪڙي کولي انهن کي آزاد ڪري ته جيئن معاملا اڳتي وڌي سگهن عمران خان لاشن لاءِ ڌرڻي جي سياست شروع ڪئي هئي، لاش نه ملڻ تي هاڻ هو استعيفائن جي سياست ڪري رهيو آهي، مسلم ليگ ن جي اڳواڻ جو چوڻ هو ته چيف اليڪشن ڪمشنر جي مقرري لاءِ مختلف نالن تي غور ڪيو پيو وڃي جن مان هڪ نالي تي ملڪ جو سموريون سياسي پارٽيون متفق آهن، سياسي پارٽين وچ ۾ مشاورت جي نتيجي ۾ راڻا ڀڳوان داس جي نالي تي متفقه راءِ قائم ٿي هئي پر هن ان ذميواري کان جواب ڏئي ڇڏيو عمران خنا جهڙي طرح اهم ترين خدمتون سرانجام ڏيندڙن تي تنقيد ڪري ٿو اهو صحيح ناهي، شايد راڻا ڀڳوان داس طرفان انڪار جو سبب به اهو ئي آهي، وفاقي وزير وڌيڪ چيو ته ذوالفقار کوسو کي مسلم ليگ ن هميشه عزت ۽ احترام ڏنو آهي هن جي پنهنجي پٽ سبب سياست کي نقصان پهتو گذريل چونڊن ۾ ذوالفقار کوسو جي خاندان مان چونڊ وڙهندڙ فرد کي ڪامياب نه ملي سگهي هئي. هو پنهنجي پٽ سبب ايوانن مان ٻاهر نڪتو جڏهن ته مسلم ليگ ن ۽ نواز شريف سبب هو سينيٽ جو ميمبر بڻيو جيڪڏهن هو پنهنجي پٽ جي سياست ڪرڻ بجاءِ مسلم ليگ ن جي سياست ڪري ته هي ان لاءِ بهتر ٿيندو، غوث علي شاهه مسلم ليگ ن سنڌ جو صدر هو پر گذريل چونڊن ۾ سنڌ ۾ مسلم ليگ ن جي جيڪا ڪارڪردگي رهي ان تي ان کي پنهنجي ذميواري قبول ڪرڻ گهرجي. هن چيو ته عمران خان کي سياست جاري رکڻ لاءِ ڌرڻي واري هنڌ لاش گهربل هئا،جيڪي کيس نه مليا، جنهن بعد اسيمبلين مان استعيفائون ڏنيون ويون. سندس چوڻ هو ته چيف اليڪشن ڪمشنر جي مقرري لاءِ صلاح مشورا جاري آهن، جسٽس رٽائرڊ راڻا ڀڳوانداس جي نالي تي سموريون ڌريون متفق هيون پر هن انڪار ڪيو. سڌ سماءَ واري وفاقي وزير پاڪستان ۾ داعش جي موجودگي کان انڪار ڪندي چيو ته مقامي دهشتگرد آءِ ايس آءِ ايس جو نالو استعمال ڪري رهيا آهن، شرپسندن خلاف بنا ڪنهن فرق جي ڪارروائي جاري رکي ويندي. پرويز رشيد جو چوڻ هو ته ڪوٽ راڌا ڪشن سانحي جي ذميوارن کي سندن انجام تائين رسايو ويندو. سڌ سماءَ واري وفاقي وزير چيو ته سندن ايجنڊا عوام جي خدمت آهي، معاشي پاليسين سبب 10 نوجوانن کي روزگار مليو آهي. وفاقي وزير پرويز رشيد ان کان اڳ عظيم اسلامي شاعر علامه اقبال جي 137هين جنم ڏهاڙي جي موقعي تي بادشاهي مسجد لاهور پهچي سندس مزار تي حاضري ڀري گلن جي چادر چاڙهي دعا گهري. ان موقعي تي ميڊيا سان ڳالهائيندي وفاقي وزير چيو ته ٻين جي زندگين کي نقصان پهچائڻ جو ڪنهن کي به حق ناهي. هن چيو ته هو علامه اقبال جو عقيدتمند آهي،سندس شاعري واٽ جي لاٽ آهي. سڌ سماءَ واري وفاقي وزير چيو ته علامه اقبال جي شاعري ۾ حقيقي زندگي گذارڻ جو فلسفو سمايل آهي. پرويز رشيد وڌيڪ چيو ته تباهي ۽ ڏڦيڙ کي ڪنهن به ريت تسليم ڪري نه ٿو سگهجي، زندگين کي محفوظ بڻائڻ ئي اقبال جو مقصد هو.

 

ٿر ۾ ڏُڪار متاثرن جي مدد لاءِ وسان ناهي گٽايو، تنقيد اجائي آهي: وڏو وزير

حيدرآباد   (بيورو ) سنڌ جي وڏي وزير سيد قائم علي شاهه چيو آهي ته پاڪستان ۽ ايران جا مذهبي، اقتصادي، سماجي ۽ معاشي لاڳاپا تاريخي ۽ دوستاڻا رهيا آهن، ايران هر ڏکئي وقت ۾ پاڪستان جي مدد ڪئي ۽ اڄ ٻنهي ملڪن جي دوستي هڪ مثالي حيثيت رکي ٿي جنهن کي وڌيڪ مضبوط بنائڻ لاءِ پي پي پي ايران سان تاريخي معاهدا ڪري ڪيترائي منصوبا شروع ڪيا آهن، ته جئين ٻنهي پاڙيسري ملڪن جي عوام وچ ۾ وڌيڪ ويجهڙائي پيدا ڪري سگهجي. هن اهڙو اظهار اڄ ضلعي بدين جي تعلقي ٽنڊوباگو ۾ مير غلام محمد خان بهادر گورنمينٽ هاءِ اسڪول ٽنڊوباگو ۾ ايراني حڪومت جي اڌاري هائوسنگ فانڊيشن ايران طرفان تعمير ڪرايل ٻن بلاڪن جي افتتاحي تقريب کي خطاب ڪندي ڪيو.وڏي وڏير سيد قائم علي شاهه وڌيڪ چيو ته شهيد ذوالفقار علي ڀٽو پاڪستان ۽ ايران جي اهميت کي سمجهندي ايران سان ويجها ۽ دوستاڻا لاڳاپا قائم ڪيا جنهن کي وڌيڪ مضبوط شهيد محترمه بينظير ڀٽو پنهنجي دورِ اقتدار ۾ ڪيو هن چيو ته ان تسلسل کي قائم رکندي پي پي پي جي شريڪ چيئرمين آصف علي زرداري نه فقط ايران پر سمورن پاڙيسيري ملڪن سان ويجها لاڳاپا قائم ڪيا پر انهن سان تاريخي معاهدا ڪري ملڪ ۾ ترقي جي سفر جو آغاز ڪيو. ان چيو ته ايران عالمي پابندين باوجود پاڪستان جي هر ڏکئي وقت ۾ مدد ڪئي آهي ۽ عوام جي خدمت ڪئي آهي، جنهن جو زندا مثال بدين جهڙي پُٺ تي پيل علائقي ۾ هڪ تاريخي اسڪو جي اڏاوت ۽ ننڍو شهر ۾ هڪ جديد اسپتال قائم ڪرڻ آهي، جنهن تي اسان ايراني حڪومت جا ٿورائتا آهيون، سيد قائم علي شاهه مير غلام محمد ٽالپر کي خراجِ عقيدت پيش ڪندي چيو ته هن باشعور شخص هڪ صدي اڳ ٽنڊو باگو جهڙي شهر ۾ هڪ مثالي تعليمي اڌارو ۽ اسپتال قائم ڪئي جنهن سان گڏو گڏ هن موبائيل طبي ٽيمن جو تصور پڻ ڏنو جيڪا وقت جي اهم ضرورت پڻ هئي، هن ٻڌايو ته سنڌ حڪومت تعليم ۽ صحت جي شعبي تي وڌ کان وڌ ڌيان ڏئي رهي آهي ۽ انهن شعبن جي حساسيت کي نظر ۾ رکندي موجوده مالي سال ۾ رڪارڊ بجيٽ مختص ڪئي آهي هن چيو ته نه فقط ايترو پر پنهنجي نوجوان قائد بلاول ڀٽو زرداري جي خصوصي هدايتن تي صوبي اندر محدود وسيلن باوجود ترقياتي ڪمن جو ڄار وڇايو آهي، هن ٿر جي ڏُڪار واري صورتحال جي حوالي سان ڳالهندي چيو ته ٿر ۾ ڏُڪار متاثر جي مدد لاءِ پنهنجي وسان ڪين گهٽايو آهي ۽ متاثرن جي هر ممڪن مدد ڪئي وئي آهي تنهن باوجود مخالف صرف تنقيد ڪري رهيا آهن پر اهي ٿر ۾ اڃان تائين پنهنجي ڪا به ڪارڪردگي نه ڏيکاري سگهيا آهن، هن چيو ته اسان ڏهه ارب روپين جي خرچ سان بدين کان اسلام ڪوٽ تائين هڪ جديد روڊ پڻ تعميري ڪرايو آهي، پيئڻ جي صاف پاڻي، کاڌ خوراڪ سميت تعليم ۽ صحت جون بنيادي سهولتون مهيا ڪيون آهن، ان موقعي تي خطاب ڪندي ايران جي قونصل جرنل مهدي سبحاني چيو ته ايران عالمي پابندين باوجود هر ڏکئي وقت ۾ پاڪستان جي مدد ڪئي آهي ۽ قدرتي آفتن ۾ پاڪستان سان هر قدم تي گڌ رهي آهي، هن چيو 2010 ۽ 2011 جي تاريخي ٻوڏن سبب سنڌ اندر وڏي تباهي آهي جنهن بعد ايران پنهنجي سنڌي ڀائرن جي مدد لاءِ ڪيترائي منصوبا شروع ڪيا ۽ اڄوڪي تقريب پڻ ان سلسلي جي ڪڙي آهي، هن ٻڌايو ته سنڌ جي ٻين ضلعن جهڙوڪ خيرپور، ٺٽو ۽ شيهد بيظير آباد ۾ پڻ اهڙي نوعيت جا منصوبا جاري آهن ۽ ايندڙ سان انهن جو افتتاح ڪري مقامي انتظاميا حوالي ڪيا ويندا، هن چيو ته ايراني حڪومت جي مدد تي پاڪستاني عوام پڻ ڀرپور محبت واري موٽ ڏني آهي، هن چيو ته ڪيترن ئي سالن کان عالمي دٻاءُ باوجود ٻنهي ملڪن وچ ۾ دوستاڻا لاڳاپا قائم آهن، جيڪي مستقبل ۾ به جاري رهندا، هن چيو ته ٻنهي ملڪن جي ثقافت ۾ پڻ هڪ جهڙائي آهي تنهن ڪري ڪوبه دشمن ٻنهي ملڪن جي لاڳاپن کي خراب نٿو ڪري سگهي، ان موقعي ايم اين اي ۽ قومي اسيمبلي جي اڳوڻي اسپيڪر ڊاڪٽر فهميدا مرزا چيو ته ايران نه فقط پاڪستان جو پاڙيسري ملڪ آهي پر هن دوست ملڪ هجڻ جو ڪردار پڻ ادا ڪيو آهي، هن چيو ته پي پي پي دورِ اقتدار ۾ پاڪ ايران گئس پائيپ لائن جو تاريخي معاهدو ڪيو ويو جيڪا شهيد محترمه بينظير ڀٽو جي خواهش هئي ۽ سندس ئي دور ۾ هي منصوبو منظور ٿيو ته جئين ملڪ مان توانائي جي بحران جو خاتمو آندو وڃي، هن چيو ته هن وقت پوري خطي کي دهشتگردي، غربت ۽ تعليم جهڙا ساڳيا ئي مسئلا در پيش آهن هن جي حل لاءِ خطي جي سمورن ملڪن کي گڏيل طورتي ڪم ڪرڻو پوندو، هن چيو ته مير غلام محمد ٽالپر ان دور ۾ نياڻين جي تعليم لاءِ آواز اٿاريو ته جئين سنڌ جي عورت کي تعليم يافته بڻائي سگهجي ۽ هُو هڪ سچو انسان هو، فهميدا مرزا وڌيڪ چيو ته ڇاتي جي ڪينسر جي خاتمي لاءِ هڪ تنظيم جوڙي آهي ڇاڪاڻ ته هي بيماري سنڌ ۾ تيزي سان پکڙجي رهي آهي تنهن ڪري سنڌ حڪومت ان ڪم ۾ ساڻس سهڪار ڪري، هن چيو ته اسان اقتدار ۾ يا مخالف ڌُر ۾ ويهي ڪري عوام جي جنگ وڙهي ۽ ان جي خدمت ۾ پڻ جاري رهندي. ان کان اڄ وڏي وڏير ٽنڊوباگو آمد تي مير غلام محمد ٽالپر هاءَ اسڪول ۾ ايراني حڪومت طرفان تيار ڪيل صعادي ايجوڪيشن ڪمپليس جو افتتاح ڪيو ان موقعي تي کيس بريفنگ ڏيندي ٻڌايو ويو ته ٽنڊوباگو ۾ اسڪول ۽ ننڍي شهر ۾ اسپتال جو ڪم 15ڪروڙ جي خرچ سان مارچ 2013 ۾ شروع ڪيو ويو جيڪو نومبر 2014 ۾ مڪمل ٿيو، اسڪول ۾ 1344 اسڪوائر فٽ تي ٻه بلاڪ قائم ڪيا ويا آهن هڪ بلاڪ ۾ ٻه ليب ۽ ڪلاس روم ٺاهيا ويا آهن جڏهن ته ٻي بلاڪ ۾ 8 ڪلاسون ۽ هڪ وڏو آڊيٽوريم قائم ڪيو آهي. جڏهن ته ننڍو شهر ۾ 1151 اسڪوائر فٽ تي اسپتال، 340 اسڪوائر فٽ اسٽاف ڪواٽر، 950 اسڪوائر فٽ تي واڪ ٽرڪ ۽ 950 اسڪوائر فٽ تي گرين ايريا قائم ڪئي وئي آهي. ان موقعي تي کيس ٻڌايو ويو ته 2100 شاگرد هتي تعليم حاصل ڪري رهيا آهن جڏهن ته صرف 31 استاد مقرر آهن جنهن لاءِ وڌيڪ استاد مقرر ڪيا وڃن. ان موقعي ته قانون ۽ پالياماني معاملن وارو صوبائي وزير ڊاڪٽر سڪندر علي منڌرو، اڳوڻو صوبائي وزير ڊاڪٽر ذوالفقار علي مرزا، ايم پي ايز بئريسٽر حسنين مرزا، محمد نواز چانڊيو، بشير احمد هاليپوٽو، مير الله بخش ٽالپر، ايم اين اي سردار ڪمال خان چانگ، ڊويزنل ڪمشنر حيدرآباد سيد آصف حيدر شاهه، ڊپٽي ڪمشنر بدين محمد رفيق قريشي، ايراني عملدار آغا سُلطان شاهي، آغا احمدي ۽ ٻيا پڻ موجود هئا .

 

چيف اليڪشن ڪمشنر مقرري، خورشيد شاهه نصر اسلم زاهد تي اعتراض واري ڇڏيو

اسلام آباد (بيورو) قومي اسيمبلي ۾ اپوزيشن ليڊر سيد خورشيد شاهه ناصر اسلم زاهد جي نالي تي اعتراض واريندي چيو آهي ته سموريون سياسي پارٽيون رانا ڀڳوانداس کي چيف اليڪشن ڪمشنر لاءِ متفق آهن خانگي ٽي وي سان ڳالهائيندي خورشيد شاهه چيو ته ناصر اسلم زاهد سٺو ۽ ايماندار ماڻهو آهي تحريڪ انصاف جي خواهش آهي ته چيف اليڪشن ڪمشنر ناصر اسلم زاهد ٿئي جڏهن ته پيپلزپارٽي کي ڪجهه قانوني اعتراص اهن خورشيد شاهه چيو ته سپريم ڪورٽ 13 نومبر تائين چيف اليڪشن ڪمشنر جي مقرري جو حڪم ڏنو آهي جنهن تي مختلف اڳواڻن سان ڳالهايو سڀني رانا ڀڳوانداس جي نالي تي اتفاق ڪيو آهي. هڪ سوال جي جواب ۾ هن چيو ته ڊاڪٽر طاهرالقادري سان به معاملي تي ڳالهه ٻولهه ڪرڻ گهران ٿو جڏهن ته هو ملڪ کان ٻاهر ويل آهي چاهيان ٿو ته ڊاڪٽر قادري مون سان رابطو ڪري ته جيئن اسان سندس خيالن مان فائدو وٺي سگهون خورشيد شاهه چيو ته اپوزيشن اڳواڻ جي حيثيت سان هي منهنجي ذميواري آهي ته چيف اليڪشن ڪمشنر لاءِ ڪوئي نالو تجويز ڪرڻ کان اڳ سمورين اپوزيشن پارٽين سان مشاورت ڪريان. .

 

آرمي چيف ڏکڻ وزيرستان جي دوري ۾ سينٽرل ٽريڊ ڪوريڊور شاهراه جو افتتاح ڪري ڇڏيو

راولپنڊي (م.ڊ) پاڪ فوج جي سربراهه جنرل رحيل شريف چيو آهي ته فاٽا جي متاثر علائقن ۾ بحالي جو ڪم جاري رهندو آءِ ايس پي آر جي مطابق آرمي چيف جنرل راحيل شريف آچر تي ڏکڻ وزيرستان جي دوري ۾ سينٽرل ٽريڊ ڪوريڊور شاهه جو افتتاح ڪري ڇڏيو سينٽرل ٽريڊ ڪوريڊور پاڪستان ۽ افغانستان جي وچ ۾ اهم زميني رستو هوندو سينٽرل ٽريڊ ڪوريڊورفاٽا ۽ ڏکڻ خيبرپختونخواهه جي معيشت ۾ مددگار هوندو هن زميني رستي سان تجارت ۾ مدد ملندي افتتاح جي موقعي تي خطاب ڪندي آرمي چيف چيو ته آپريشن ضرب عضب منصوبي جي تحت ڪاميابي سان جاري آهي. متاثر علائقن جي بحالي جي قيام لاءِ حڪومت سان مشاورت کان پوءِ جامع منصوبو بڻايو ويو آهي انهن علائقن ۾ امن جو قيام ۽ استحڪام آندو ويندو. واضح رهي ته 700 ڪلوميٽر ڊگهو سينٽرل ٽريڊ مارڪ ڪوريڊور جو اڏاوت سان نه صرف علائقي ۾ واپار ۽ روزگار وڌندو پر هي رستو سفر جون بهترين سهولتون به فراهم ڪندو.

 

عمران خان سنڌ مان اين اي 207 تي بلاول ڀٽو جي مقابلي ۾ اليڪشن وڙهندو: رپورٽ

اسلام آباد(بيورو) پاڪستان تحريڪ انصاف جو چيئرمين عمران خان ايندڙ عام چونڊن ۾ چئن ئي صوبن مان قومي اسيمبلي جي اليڪشن وڙهندو اين اي 207 ۾ امڪاني طور تي عمران خان ۽ بلاول ڀٽو زرداري وچ ۾ مقابلو ٿيندو سنڌ ۾ ڀٽو خاندان جي وراثتي سيٽ اين اي 207 تان ممتاز ڀٽو ۽ شاهه محمود قريشي جي مدد سان عمران خان پيپلز پارٽي جو مقابلو ڪندو، رپورٽن مطابق عمران خان 21 نومبر تي لاڙڪاڻي ۾ تحريڪ انصاف جي جلسي ۾ ممتاز ڀٽو جي شموليت جو اعلان چاهي ٿو جنهن لاءِممتاز ڀٽو ويجهن ساٿين ۽ سياسي دوستن سان مشاورت ڪئي آهي رپورٽ مطابق ممتاز ڀٽو تحريڪ انصاف ۾ امڪاني شموليت جي موقعي تي عمران خان کي اليڪشن وڙهڻ جي باضابطه دعوت ڏيندو.

 

خيبر ايجنسي ۾ جيٽ جهازن جي بمباري، اهم ڪماڊر سميت 13 دهشتگرد مارجي ويا

راولپنڊي (م.ڊ) خيبر ايجنسي ۾ جيٽ جهازن جي بمباري ۾ 13 دهشتگرد مارجي ويا جڏهن ته سندس 16 ٿاڪن کي به تباهه ڪيو ويو، آءِ ايس پي آر موجب پاڪ فوج جي جيٽ جهازن خيبر ايجنسي جي اڪاخيل واري علائقي ۾ ڪارروائي دوران بمباري ڪئي جنهن جي نتيجي ۾ ٻن آپگهاتي حملا آورن سوڌو 13 دهشتگردن مارجي ويا ترجمان موجب مارجي ويل دهشتگردن ۾ سندن هڪ اهم ڪمانڊر به شامل آهي جيڪو آپگهاتي حملو ڪندڙن کي سکيا ڏيندو هو ڪارروائي ۾ دهشتگردن جي 16 ٿاڪن کي تباهه ڪري اتي پيل گولا بارود جو وڏو ذخيرو به ضايع ڪيو ويو آهي.

 

سنڌ ۾ پوليو روڪٿام مهم دورن حساس علائقن ۾ پوليس ڪمانڊوز مقرر ڪرڻ جو حڪم

ڪراچي (اسٽاف رپورٽر) آءِ جي سنڌ غلام حيدر جمالي صوبي ۾ پوليو روڪٿام مهم دوران حساس علائقن ۾ پوليس ڪمانڊوز مقرر ڪرڻ جو حڪم ڏيئي ڇڏيو آهي ذريعن موجب آءِ جي سنڌ غلام حيدر جمالي پوليس فيسرن کي 15 نومبر کان سڄي صوبي ۾ شروع ٿيندڙ پوليو مهم دوران سيڪيورٽي جا غير معمولي قدم کڻڻ جي هدايت ڪئي آهي ان حڪم ڏنو ته پوليس آفيسر، صوبائي صحت کاتي جا عملدار ۽ وزيراعليٰ سنڌ جي پوليو مانيٽرنگ ڪميٽي سان گڏجي جامع سيڪيورٽيپلان ترتيب ڏين ان کان علاوه حساس علائقن ۾ پوليس نفري سان گڏ پوليس ڪمانڊوز کي به مقرر ڪيو وڃي.

 

30 نومبر تائين انصاف نه مليو ته مسلم ليگ ن لاءِ حڪومت ڪرڻ مشڪل ٿي ويندو: عمران خان

اسلام آباد (بيورو) تحريڪ انصاف جي چيئرمين عمران خان چيو آهي ته 30 نومبر تائين ڌانڌلي بابت انصاف نه مليو ته ان کانپوءِ مسلم ليگ ن لاءِ حڪومت هلائڻ به مشڪل ٿي ويندي، رحيم يار خان روانگي کان پهريان ميڊيا سان ڳالهائيندي عمران خان چيو ته حڪومت ميرٽ جو قتل عام ڪري رکيو آهي هر جاءِ تي سفارشي ڀرتيون ڪيون ويون آهن اهم عهدن تي انهن جو پنهنجو خاندان قابض آهي، پرڏيهه ۾ ڪيل هر معاهدي ۾ ان جو خاندان ڪاروبار ڪري رهيو آهي بجلي جي پيداوار جو سڀ کان سستو ذريعو پاڻي آهي جيڪو خيبرپختونخواهه ۽ اترين علائقن ۾ وڏي مقدار ۾ آهي پر وزيراعظم چين ۾ خيبرپختونخواهه جي وزيراعليٰ بجاءِ پنهنجي ڀاءُ کي وٺي ويو ان ڳالهه جي خبر پوڻ گهرجي ته چين سان ڪيل هاڻوڪن معاهدن ۾ ڪهڙيون ڪمپنيون فائدو کڻنديون . حڪومت کان انتظامي معاملي نه ٿا هلي سگهن ۽ هو ان جو الزام تحريڪ انصاف مٿان لڳائي رهيا آهن، عمران خان وڌيڪ چيو ته ڪنهن کي غلط فهمي نه ٿيڻ گهرجي ته ڌرڻو ختم ٿي ويندو، اسان 3 مهينن کان ڌرڻي تي ويٺل آهيون ۽ اسنا کي انصاف نه مليو ته ايندڙ 3 سال به ڌرڻو جاري رهندو، موجوده بحران مان نڪرڻ لاءِ اسان حڪومت کي هڪ موقعو ڏئي رهيا آهيون ته 30 نومبر کان پهريان ڌانڌلي بابت معاملا حل ڪيا وڃن ان سلسلي ۾ هو رحيم يار خان جي جلسي ۾ مصالحتي فارمولو پيش ڪندو جيڪو ٻنهي پارٽين لاءِ عمل جي قابل هوندو ان فارمولي تحت به حڪوت ڪو قدم نه کنيو ته 30 نومبر تي اسان ان سلسلي ۾ هڪ نئين لائحه عمل جو اعلان ڪنداسين.

 

ماڊل ٽائون جي رتوڇاڻ ۾ القاعده يا طالبان نه پر رياستي مشينري ملوث هئي: ڊاڪٽر طاهرالقادري

اسلام آباد (بيورو) پاڪستان عوامي تحريڪ جي قائد ڊاڪٽر طاهرالقادري هيوسٽن ۾ منعقد ڪنويشن ۾ پاڪستاني ڪميونٽي کي خطاب ڪندي چيو ته ماڊل ٽائون جي رتوڇاڻ ۾ القاعده يا طالبان نه پر رياستي مشينري ملوث هئي ملڪ کپائي حڪومت هلائڻ ڪهڙو معاشي ويزن آهن پرائيويٽائيزيشن ڪميشن (ن) ليگ جي ورڪرن تي ٻڌل آهي دنيا جي ڪنهن ٻئي جمهوري ملڪ ۾ ان جو تصور به ناممڪن آهي (ن) ليگ اقتدار ۾ اچي پهريون ڪم قومي ادارن تي وڪرو لاءِ اشتهار لڳائڻ جو ڪم ڪري ٿي نوازشريف پنهنجي پهرين ٻن دورن ۾ 62 جي لڳ ڀڳ قومي ادارن کي وڪرو ڪيو هاڻي 38 جي لڳ ڀڳ قومي اثاثا کپائڻ جي رٿابندي ۾ مصروف آهي وزيراعظم عدالتي فيصلن کي پنهنجي هڪ آفيس آرڊر جي ذريعي هوا ۾ اڏائي رهيو آهي جتي ڪرپشن ۽ خانداني ڦرلٽ هجي اتي ڪوئي سيڙپڪاري ڪرڻ ڇو ايندو منهنجي اچڻ جي خبرن حڪمرانن جون ننڊون ڦٽائي ڇڏيون آهن ڪنوينشن ۾ آمريڪا ۾ رهندڙ مختلف شعبن سان تعلق رکندڙ مشهور شخصيتن وڏي انگ ۾ شرڪت ڪئي. ڊاڪٽر طاهرالقادري چيو ته حڪومتي ظلمن سبب عوام تنگ ٿي چڪو آهي پاڪستان کي غريب ۽ مڊل ڪلاس جو پاڪستان بنائڻ جي سياسي جنگ وڙهي رهيا آهيون 70 ڏينهن جي ڌرڻي ۾ عوام کي سندن آئيني حقن متعلق ڄاڻ ۽ احتجاج ڪرڻ جي جرئت ملي. پاڪستان جي هر شهر ۾ جلسا ۽ ڌرڻا هڻڻ جو شيڊول جوڙي ڇڏيو آهي گراس روٽ تي تنظيم سازي جو ڪم شروع آهي ظلم جو نظام ختم ڪرڻ لاءِ پاڪستان عوامي تحريڪ جي سياسي تشخص کي بحال ڪيو هن نيويارڪ کان پوءِ هيوسٽن ۾ پاڪستاني ڪميونٽي پاران ڀرپور شرڪت تي شڪريو ادا ڪيو هن چيو ته پرائيويٽائيزيشن جي آڙ ۾ ملڪ وڪرو ڪيو پيو وڃي. پارليمينٽ ڊفالٽرن سان ڀريل آهي ٻي صورت ۾ قومي ادارن کي پارليامينٽ کان ٻاهر ويهي وڪرو ڪرڻ جي منصوبابندي جي به ڪوئي جرئت نٿو ڪري سگهي. دنيا جي ٻين ملڪن ۾ به پرائيويٽائيزيشن ٿيندي آهي پر ان ۾ سياست يا خانداني دوستن جي شموليت جو ڪوئي تصور به نٿو ڪري سگهي. ڊاڪٽر طاهرالقادري 9 نومبر اقبال ڊي جي حوالي سان پنهنجي خاص پيغام ۾ چيو ته نوجوان علامه اقبال جي منظوم تخليق جو اهم موضوع هئا اقبال جا شاهين پاڪستان جي ترقي لاءِ اعليٰ تعليم ۽ جديد ٽيڪنالوجي حاصل ڪرڻ طرف توجهه ڏين پاڪستان عوامي تحريڪ اقتدار ۾ اچي هر سطح جي تعليمي نصاب ۾ اقباليات کي شامل ڪندي ۽ پاڪستان کي امن ۽ حقيقي جمهوريت جو تحفو ڏيندي.

 

اوڀر جي شاعر علامه اقبال جي اڄ 137 سالگرهه ملهائي وئي

اسلام آباد (اي پي پي) سڄي ملڪ ۾ شاعر مشرق، حڪيم الامت علامه محمد اقبال جو 137هون جنم ڏينهن قومي جوش جذبي سان ملهايو ويو. آچر ڏينهن ان سلسلي ۾ مختلف سياسي ۽ سماجي تنظيمن طرفان سيمينار ۽ تقريبون ٿيون جڏهن ته پاڪستان ٽيليويزن سميت اليڪٽرانڪ ميڊيا ان حوالي سان خاص پروگرام نشر ڪيا. پرنٽ ميڊيا ۾ علامه محمد اقبال جي زندگي، ڪردار ۽ پاڪستانجي قيام جي حوالي سان سندس جدوجهد جي تناظر ۾ خاص مضمون شايع ڪيا ويا. هوڏانهن سيالڪوٽ ۾ علامه اقبال جي جنم هنڌ ”اقبال منزل“ تي فاتحه خواني ڪئي وئي جنهن ۾ زندگيءَ جي مختلف شعبن سان تعلق رکندڙ ماڻهن شرڪت ڪئي. عظيم فلاسافر کي خراج عقيدت پيش ڪرڻ لاءِ اقبال منزل ۾ هڪ نمائش جو به اهتمام ڪيو ويو جنهن ۾ ناياب تصويرون، ڪتاب ۽ علامه اقبال جي ذاتي استعمال هيٺ رهندڙ شيون نمائش لاءِ رکيون ويون، جن ۾ سندس استعمال ۾ رهندڙ قلم ۽ مس پڻ رکي وئي. اقبال منزل تي نمائش ڏسندڙن جي رش رهي. سيالڪوٽ چيمبر آف ڪامرس، ريسڪيو 1122 ۽ سول ڊفينس گڏيل طور سندس سالگره جو ڪيڪ ڪاٽيو جنهن ۾ اهم شخصيتن ۽ صحافين سميت وڏي انگ ۾ ماڻهن شرڪت ڪئي.