تازيون خبرون

Daily Archives: October 29, 2014

دهشتگردن جو مڪمل خاتمو ڪنداسين، ڀارت کي مُنهن ٽوڙ جواب ڏنو پيو وڃي : پاڪ فوج

پشاور(م.ڊ) آءِ ايس پي آر جي ڊائريڪٽر جنرل ميجر جنرل عاصم سليم باجوا چيو آهي ته آپريشن ضرب عضب جا هدف حقيقي معنيٰ ۾ حاصل ڪرڻ لاءِ افغان حڪومت جو سهڪار اڻٽر آهي پر اهو سهڪار اڃا تائين اسان کي نه مليو آهي. اربع ڏينهن پشاور ۾ هڪ نيوز ڪانفرنس کي خطاب ڪندي ڊي جي آءِ ايس پي آر چيو ته آپريشن ضرب عضب شروع ڪرڻ کانپوءِ ٽي ٽي پي جي اعليٰ قيادت افغانستان جي صوبي ڪنڙ مان مسلسل پاڪستان ۾ ڪارروايون ڪري رهي آهي ۽ ان جي باوجود ته افغان حڪومت کي ان آپريشن جي حوالي سان اعتماد ۾ ورتو ويو هو، دهشتگردن جي خاتمي لاءِ افغان حڪومت طرفان پاڪستان سان ڪوبه سهڪار ناهي ڪيو ويو. هن چيو ته آپريشن ضرب عضب ۽ خيبر ون ڪاميابيءَ سان جاري آهن. اُتر وزيرستان جا سمورا اهم رستا ڪليئر ڪيا ويا آهن، جڏهن ته دته خيل کان اڳتي پاڪ فضائيه جا هوائي حملا جاري آهن. اُتر وزيرستان ۾ آپريشن کانپوءِ اهڙا اطلاع هئا ته دهشتگرد خيبر ايجنسي جي هڪ علائقي ۾ ٻيهر منظم ٿي سگهن ٿا، جنهن تي آپريشن خيبر ون شروع ڪيو ويو. هن چيو ته پاڪ فوج آپريشن ضرب عضب ۽ خيبر ون بنا ڪنهن فرق جي دهشتگردن جي مڪمل خاتمي ۽ گهربل نتيجا حاصل ٿيڻ تائين جاري رکندي. هن چيو ته قبائلي عوام آپريشنز جي حوالي سان پاڪ فوج سان پورو سهڪار ڪري رهيو آهي. صحافين جي سوالن جا جواب ڏيندي هن چيو ته محرم الحرام جي حوالي سان مؤثر سيڪيورٽي پلان جوڙيو ويو آهي ۽ پاڪ فوج جون 134 ڪمپنيون محرم الحرام ۾ خاص فرضن جي ادائيگيءَ لاءِ تيار آهن. هن چيو ته ڪجهه هنڌن تي فوجي جٿن جي مقرري ٿي چڪي آهي ۽ جتي جتي ضرورت هوندي اتي فوجي جٿا بنا ڪنهن دير جي پوزيشنون سنڀاليندا. هن چيو ته پاڪستان جي سرزمين ڪنهن به صورت ۾ دهشتگرديءَ لاءِ استعمال ٿيڻ نه ڏني ويندي ۽ دهشتگردن جو مڪمل خاتمو ڪيو ويندو. هڪ سوال تي هن چيو ته ٽي ٽي پي جي خان سيد سجنا گروپ سان ڳالهين لاءِ قبائلي جرڳي جي جوڙجڪ سرڪاري طور تي ناهي ٿي. هڪ ٻئي سوال جي جواب ۾ هن چيو ته پاڪ فوج جي انجنيئرنگ يونٽ ۽ ڊبليو ايف او اُتر وزيرستان ۾ نئين سر تعمير وارو عمل شروع ڪري ڇڏيو آهي. آءِ ڊي پيز جي واپسيءَ لاءِ منصوبا بندي پڻ ڪئي وئي آهي ۽ اسان جي خواهش آهي ته جڏهن متاثر واپس پنهنجن گهرن ڏانهن وڃن ته کين رهڻ لاءِ پهرين کان بهتر جاءِ ملي. هن چيو ته متاثرن جي واپسيءَ جي حوالي سان ڪو ٽائيم فريم نٿو ڏئي سگهجي. ڊي جي آءِ ايس پي آر ٻُڌايو ته آپريشن ضرب عضب دوران 132.5 ٽن بارودي مواد قبضي ۾ ورتو ويو آهي. ان کان علاوه 2 ملين کان وڌيڪ ايمونيشن رائونڊ ۽ 12 هزار 359 هٿيار به قبضي ۾ ورتي ويا آهن جيڪو خطرناڪ بارودي مواد هو اهو ضايع ڪيو ويو آهي، جڏهن ته جيڪو بارودي مواد محفوظ ٿي سگهيو ٿي ان کي محفوظ ڪيو ويو آهي. آپريشن ضرب عضب دوران 1100 کان وڌيڪ، جڏهن ته خيبر ون دوران 44 دهشتگرد مارجي ويا آهن. جڏهن ته 100 کان وڌيڪ دهشتگردن هٿيار ڦٽا ڪيا آهن. هن چيو ته سيڪيورٽي فورسز سوات واري صورتحال تي گهري نظر رکيو اچي. ٽارگيٽ ڪلنگ جي واقعن جي تناظر ۾ سرچ آپريشن جاري آهن ۽ سوات جي رهواسين جي سهڪار سان انهن واقعن ۾ ملوث عنصرن جو خاتمو ڪيو ويندو. هن چيو ته پاڪستاني علائقن ۾ افغان موبائل سمن جو استعمال افغان سرحد تي لڳل موبائل ٽاور جي ڪري ممڪن ٿي رهيو آهي، ان حوالي سان افغان حڪومت کي آگاهه ڪيو آهي. ضرورت ان ڳالهه جي آهي ته افغان حڪومت سرحدي علائقي ۾ لڳل موبائل ٽاورز کي هٽائي. هڪ سوال جي جواب ۾ هن چيو ته ڀارت طرفان سرحد جي ڀڃڪڙين جو مُنهن ٽوڙ جواب ڏنو پيو وڃي. هن ٻُڌايو ته سڄي ملڪ ۾ ڳجهي معلومات جي بنياد تي 2500 کان وڌيڪ آپريشنز هلندڙ آهن.

 

وزيراعظم سان جماعت اسلامي جي وفد جي ملاقات، پي ٽي آءِ جون استعيفائون منظور نه ڪرڻ جو مطالبو

اسلام آباد(بيورو) وزيراعظم ميان نواز شريف سان جماعت اسلامي جي وفد لياقت بلوچ جي سربراهي ۾ ملاقات ڪئي ملاقات ۾ پاڪستان تحريڪ انصاف جي ميمبرن طرفان ڏنل استعيفائن تي ڳالهه ٻولهه ڪئي وئي، وزيراعظم هائوس ۾ جماعت اسلامي جي وفد لياقت بلوچ جي سربراهي ۾ وزيراعظم سان ملاقات ڪئي ملاقات ۾ ملڪ جي سياسي صورتحال ۽ ڌرڻن بابت صورتحال غور ڪيو ويو ملاقات ۾ پاڪستان تحريڪ انصاف جي ميمبرن جي استعيفائن جو معاملو غور هيٺ آيو ان موقعي تي لياقت بلوچ جو چوڻ هو ته پاڪستان تحريڪ انصاف جون استعيفائون منظور نه ڪيون وڃن ڇو ته استعيفائن جي منظور سان ملڪ ۾ سياسي بحران وڌيڪ سنگين ٿي ويندو.

 

ايم ڪيو ايم جي وفد سان نون صوبن بابت ڪابه ڳالهه ناهي ٿي: پرويز رشيد

اسلام آباد(بيورو) وزيراعظم هائوس جي ترجمان واضح ڪيو آهي ته وزيراعظم جي ايم ڪيو ايم جي وفد سان نون صوبن بابت ڪابه ڳالهه ناهي ٿي ايم ڪيو ايم جي چار رڪني وفد گذريل ڏينهن خالد مقبول صديقي جي قيادت ۾ وزيراعظم نواز شريف سان ملاقات ڪئي هئي جڏهن ته ان ملاقات کانپوءِ ميڊيا جي ڪجهه حلقن ۾ هي خبرون سامهون آيون هيون ته ايم ڪيو ايم سنڌ ۾ مهاجر صوبو بڻائڻ لاءِ وزيراعظم کان حمايت گهري آهي جڏهن ته ان حوالي سان وزيراعظم هائوس جي ترجمان انهن خبرن جي ترديد ڪندي چيو آهي ته ايم ڪيو ايم وفد ۽ وزيراعظم وچ ۾ صوبن جي حوالي سان ڪابه ڳالهه ناهي ٿي، ٻئي طرف اطلاعات واري وفاقي وزير پرويز رشيد هڪ نجي ٽي وي سان ڳالهائيندي چيو آهي ته ايم ڪيو ايم جي ايجنڊي ۾ صرف چار نقطا هئا ۽ وفد صوبن جي حوالي سان يا ڪنهن به قسم جي سياسي ڳالهه ٻولهه نه ڪئي جڏهن ته وفد ڪراچي ۾ پاڻي جي مسئلي، لياري ايڪسپريس وي، سرڪلر ريلوي منصوبي ۾ دير تي ڳالهه ٻولهه ڪئي جڏهن ته اسان جو هميشه موقف رهيو آهي ته صوبن جو معاملو پيچيده معاملو آهي ان لاءِ ان تي هڪ ڪميشن هئڻ گهرجي جيڪا سمورن اسٽيڪ هولڊرز جي ڳالهه ۽ ان تي فيصلو ڪري.

 

حڪومت عالمي مارڪيٽ ۾ تيل جي قيمتن ۾ گهٽائي جو عوام کي فائدو ڏيڻ لاءِ تيل ۽ بجلي جون قيمتون گهٽائي: خورشيد شاهه

اسلام آباد (بيورو) قومي اسيمبلي ۾ مخالف ڌُر جي اڳواڻ سيد خورشيد شاهه حڪومت کان مطالبو ڪيو آهي ته عالمي مارڪيٽ ۾ تيل جي قيمتن ۾ رڪارڊ گهٽتائي جو فائدو عوام کي پهچائڻ لاءِ پيٽروليم مصنوعات ۽ بجلي جي قيمتن ۾ عالمي مارڪيٽ جي حساب سان گهٽتائي ڪئي وڃي، بجلي جي 5 6 سيڪڙو پيداوار تيل جي ذريعي آهي پر بجلي جي قيمتن ۾ ڏيڍ سال ۾ 5 3 سيڪڙو واڌ ڪئي وئي آهي، پيٽروليم مصنوعات جي قيمتن ۾ گهٽتائي نه هجڻ برابر ڪئي وئي، او جي ڊي سي ايل گذريل سال 4 2 1 ارب منعافو ڪمايو، حڪومت منعافو ڏيندڙ اداري کي ڇو وڪڻڻ چاهي ٿي، پاڪستان جي تاريخ ۾ پهريون ڀيرو اسٽيل مل بند ٿي وئي، 5 2 هزار خاندانن جي بيروزگار ٿيڻ جو خدشو پيدا ٿي ويو، حڪمران بيورو ڪريسي جا مشورا مڃڻ ڇڏي ڏين، ملڪي ترقي لاءِ آپوزيشن حڪومت جو ساٿ ڏيڻ لاءِ تيار آهي. هو قومي اسيمبلي ۾ اعتراضي نڪتي تي خطاب ڪري ر هيو هو. سيد خورشيد شاهه وڌيڪ چيو ته عالمي مارڪيٽ ۾ تيل جون قيمتون 6 3 ڊالر گهٽ ٿيون، ان باوجود بجلي جي قيمتن ۾ 6 2 سيڪڙو واڌ ٿي، 0 6 سيڪڙو کان وڌيڪ بجلي تيل مان پيدا ٿي رهي آهي، پوءِ تيل جي قيمت گهٽجڻ تي بجلي جي قيمت گهٽجڻ بدران وڌي ڇو رهي آهي؟ ڀارت سميت خطي جي تمام ملڪن ۾ بجلي جي قيمت پاڪستان کان گهٽ آهي، گذريل مهيني واپڊا وڌيڪ بلنگ ڪئي اها رقم به اڃا تائين عوام کي واپس ناهي ڪئي وئي، اهو عوامي نوعيت جو معاملو آهي، حڪومت ڌيان ڏئي، حڪومت گذريل عام چونڊن ۾ بجلي جي معاملي تي ڪاميابي حاصل ڪئي هئي، او جي ڊي سي ايل هن سال 4 2 1 ارب جو منعافو ڏنو، پوءِ ان کي ڇو وڪيو پيو وڃي، 2 7 سيڪڙو گئس سنڌ فراهم ڪري رهيو آهي، اسان خانگائڻ جي مخالفت ڪنداسين، پاڪستان تاريخ ۾ پهريون ڀيرو اسٽيل مل بند ٿي وئي آهي، 5 2 هزار خاندانن جي بيروزگار ٿيڻ جو خدشو آهي، اسٽيل مل جي بحالي لاءِ حڪومت امدادي پيڪيج جو اعلان ڪري، ان اداري کي بند ٿيڻ کان بچايو وڃي، کربن رپين جي زمين آهي ان جي خانگائڻ جي صورت ۾ ان زمين تي وفاق ۽ سنڌ ۾ نئون تڪرار پيدا ٿيندو، حڪومت بڻائڻ بعد حڪمرانن جي ترجيحات تبديل ٿي وئي آهي، حڪمران بيورو ڪريسي جي مشورن تي هلي رهي آهي، حڪومت مسئلا حل ڪرڻ جو پروگرام بڻائي، آپوزيشن ساٿ ڏيڻ لاءِ تيار آهي، ملڪ جي ترقي ۽ بهتري لاءِ اسان سڀني کي هڪ ٿي ڪم ڪرڻو پوندو، جمهوريت جي مستقبل تان ڪارا ڪَڪر ٽريا ناهن، هڪ ڀيرو وري حملو ٿي سگهي ٿو، حڪومت مخالف ڌُر کي گڏ وٺي هلي ان سان سندس اعتماد ۾ واڌ ٿيندي.

 

ڪور ڪمانڊر ڪراچي جي سيد قائم علي شاهه سان ملاقات

ڪراچي (اسٽاف رپورٽر) سنڌ جي وڏي وزير سيد قائم علي شاهه سان ڪور ڪمانڊر ڪراچي ليفٽيننٽ جنرل نويد مختار اربع ڏينهن چيف منسٽرهائوس ۾ ملاقات ڪئي. ملاقات ۾ گڏيل دلچسپي جي معاملن سان گڏوگڏ محرم الحرام جي حوالي سان سيڪيورٽي انتظامن ۽ امن امان جي مجموعي صورتحال بابت خيالن جي ڏي وٺ ڪئي وئي. ڪورڪمانڊر وڏي وزير کي محرم الحرام دوران پاڪ فوج پاران هر ممڪن سهڪار جي به خاطري ڪرائي.

 

 

نيلوفر طوفان کان بچڻ لاءِ سمورا احتياطي اپاءُ ورتا ويا آهن: شرجيل ميمڻ

ڪراچي(اسٽاف رپورٽر) اطلاعات واري صوبائي وزير شرجيل ميمڻ چيو آهي ته نيلوفر سامونڊي طوفان ڪراچي جي سامونڊي علائقن جي اٽڪل 250 ڪلوميٽر ويجهو لنگهندو تنهن ڪري ماڻهن کي گهرجي ته اهي سامونڊي علائقن جي ويجهو اچڻ جي ڪوشش نه ڪن طوفان جي حوالي سان ڪيل احتياطي تدبيرن بابت هن چيو ته عمارتن جي مالڪن ۽ ڪمپنين کي هدايت ڪئي وئي آهي ته اهي پنهنجي مشهوري لاءِ لڳايل وڏا بلبورڊ يڪدم هٽائي ڇڏين نه ته جيڪڏهن ڪو نقصان ٿيو ته پوءِ ان لاءِ اهي ڪمپنيون پاڻ ذميوار هونديون هن ٻڌايو ته اڃان تائين ته نيلوفر طوفان جو دٻاءُ گهٽ آهي پر تنهن هوندي به اسان ماڻهن کي صلاح ٿا ڏيون ته اهي اجايو گهرن مان نه نڪرن جڏهن ته مبارڪ وليج، ابراهيم حيدري ۽ ڪچين آبادين ۾ رهندڙن کي به چتاءُ ڏنو ويو آهي ته اهي ڪنهن محفوظ جاءِ تي منتقل ٿي وڃن ته جيئن کين ڪو گهڻو نقصان نه ٿي سگهي هن ٻڌايو ته اسپتالن ۾ ڊاڪٽرن ۽ دوائن جي موجودگي جي لاءِ به خاطر خواهه اپاءُ ورتا ويا آهن ۽ جمعي ڏينهن سمورن متاثر علائقن ۾ اسڪولن جي به موڪل ڪرائي وئي آهي.

 

بلاول منهنجي ڪابه ڳالهه نٿو مڃي: آصف زرداري جو انڪشاف

اسلام آباد(بيورو) اڳوڻي صدر ۽ پيپلز پارٽي جي شريڪ چيئرمين آصف علي زرداري پنهنجي پٽ ۽ پ پ چيئرمين بلاول ڀٽو زرداري سامهون بيوس ٿي ويو هن چيو ته بلاول منهنجي ڪابه ڳالهه نٿو مڃي، پيپلز پارٽي جي ذريعن مطابق آصف علي زرداري بلاول ڀٽو جي تقرير سبب سخت پريشان آهي بلاول ڀٽو پنهنجي تقرير ۾ ن ليگ، متحده قومي موومينٽ ۽ تحريڪ انصاف کي تنقيد جو نشانو بڻايو جنهن سبب پ پ ۽ متحده وچ ۾ سنڌ ۾ سخت ڇڪتاڻ پيدا ٿي، ذريعن مطابق پ پ جي ڪيترن ئي سينيئر اڳواڻن کان علاوه ڪجهه ويجهن دوستن ان صورتحال تي اڳوڻي صدر آصف زرداري جي ڳالهه ڪئي ته هو بلاول کي سمجهائي جنهن تي آصف زرداري چيو ته توهان کي خبر آهي ته نوجوان اولاد ڪٿي ٿو ٻڌي مون هن کي ڏاڍو سمجهايو پر هو نٿو مڃي.

 

مان هجان ها ته ڪڏهوڪو پي ٽي آءِ جون استعفائون منظور ڪري ڇڏيان ها: بلاول ڀٽو

ڪراچي(م.ڊ) پاڪستان پيپلز پارٽي جي چيئرمين بلاول ڀٽو زرداري چيو آهي ته هو قومي اسيمبلي جو اسپيڪر هجي ها ته ڪڏهوڪو استعيفائون منظور ڪري چڪو هجي ها ٽوئيٽر تي جاري ڪيل پيغام ۾ بلاول ڀٽو زرداري چيو ته “خوب پرده هي چلمن سي لگيبيٺي هين، صاف ڇپتي ڀي نهين سامني آتي ڀي نهين” ان کانپوءِ هڪ ٻئي پيغام ۾ هن چيو ته جيڪڏهن هو قومي اسيمبلي جو اسپيڪر هجي ها ته ڪڏهوڪو تحريڪ انصاف جي ميمبرن جون استعيفائون منظور ڪري چڪو هجان ها.

 

سنڌ ۾ خانه جنگي لاءِ راھ هموار ڪئي پئي وڃي: سنڌ بچايو ڪميٽي

نوابشاهه(ڊ.ر) سنڌ بچايو ڪاميٽي جو يڪجهتي ڊائلاگ پروگرام نوابشاھ پريس ڪلب جي لان ۾ سيد جلال محمود شاھ جي صدارت هيٺ ٿيو، هن خطاب ڪندي چيو ته سنڌ ۾ خانه جنگي لاءِ راھ هموار ڪئي پئي وڃي، روهاست جي ڳالھ ڪري سنڌ ۾ خون خرابو ڪرڻ چاهين ٿا، هن چيو ته ايم ڪيو ايم پيپلز پارٽي هڪ سڪي جا ٻه پاسا آهن، هن چيو ته ايم ڪيو ايم سياسي اڪيلائپ مان ٻاهر نڪرڻ لاءِ ورهاست جي ڳالھ ڪئي ۽ پ پ پ وارن مرسون مرسون سنڌ نه ڏيسون جي ڳالھ ڪريهڪ ٽڪراءُ واري صورتحال پيدا ڪئي آهي ۽ سنڌ جا ماڻهو هوشيار ٿين، سنڌ ۾ اردو ڳالهائيندڙ اسان جا ڀائر آهن اسان انهن جي حفاظت ڪنداسين ۽ اهي اسان جي حفاظت ڪندا باقي ايم ڪيو ايم وارن کي چئون ٿا ته تشدد جي سياست ڇڏي محبت ۽ امن واري سياست ڪيو، اسان کي هتي ويڙهايو پيو وڃي، ڪوبه سنڌ جو حلالي پٽ مشتعل نه ٿئي اهيا هڪ سياسي گيم تي وئي آهي ۽ اسان سنڌين کي سجاڳ ڪرڻ آئيا آهيون، ۽ اهي هوشيار ٿين پ پ پ جي نمائشي قومپرستي جي شڪل ۾ نعرا هڻڻ کان خبردار ٿين ، هن چيو ته ٽي وي پروگرامن تي بحٽ مباحثا ڪري نفرتون ڦهلايون پيون وڃن پر اسان چئون ٿا ته اچو ته نفرتن کي ناڪام ڪيون ۽ ڄاڻي واڻي نفرت جي باھ کي نه ڀڙڪايون، ميڊيا جا دوست ۽ ايڪنر پرسن ذميواري جو مظاهرو ڪن، انهيءَ موقعي تي پروفيسر مشتاق ميراڻي چيو ته اسان متحده ٿينداسين ته سنڌ بچندي، 1943 کان 1952 تائين جو هڪ تاريخي داڪومينٽ ٺاهي سنڌ ۾ ورهايو وڃي، اويڪيو پراپرڻي جو مسئلو سامهو اچي ويندو ۽ پوري پروپگندا سامهون اچي ويندي، جسقم جي ڪيهر انصاري چيو ته سنڌ جي ترقي لاءِ سنڌي مستقل رهندڙن کي گڏجي سازشين جو گڏجي مقابلو ڪرڻو پوندو، سنڌ سياسي مفادن ۽ حڪمرانن کان وڌيڪ عظيم آهي، سنڌ جي اردو آبادي کي پنهنجو حصو سمجهو ٿا ۽ ايم ڪيو ايم کي جدا نگاھ سان ڏسون ٿا.، سنڌ جي خوشحالي لاءِ ايماندار سياست جي حمايت ڪيون ٿا، ان موقعي تي ڪرم حسين وساڻ، سيد زين شاھ، مسلم ليگ فنڪشنل جي سيد زاهد شاھ، مسلم ليگ (ن) جي سيد غلام مصطفيٰ شاھ، پاڪستان تحريڪ انصاف جي قاضي نديم، قوم پرست پارٽي جو قمبر ڀٽي، جماعت اسلامي جي سرور احمد قريشي، جسقم آريسر جي اسلم خيرپوري ، فدا سنجراڻي، عزيز ڦل ۽ ٻين پڻ خطاب ڪيو.

 

ايم ڪيو ايم سربراهه فوج جي نگراني ۾ آدمشاري ڪرائڻ جو مطالبو ڪري ڇڏيو

ڪراچي (اسٽاف رپورٽر) ايم ڪيو ايم سربراهه الطاف حسين، فوج جي نگراني ۾ آدمشماري ڪرائڻ جو مطالبو ڪندي خبردار ڪيو آهي ته ظلم ۽ ناانصافيون نه روڪيون ويون ته عوامي رد عمل اچي سگهي ٿو. لنڊن مان ٽيليفون ذريعي ڪارڪنن کي خطاب ڪندي الطاف حسينچيو ته فوج جي نگرامي ۾ سڄي ملڪ اندر ٻيهر آدمشماري ڪرائي وڃي. متحده سربراهه چيو ته فوج ۽ ڳجهن ادارن جا سربراهه ظلم ۽ ناانصافيون روڪرائين، ٻي صورت ۾ عوامي رد عمل اچي سگهي ٿو. الطاف حسين چيو ته ننڍي چڻنگ وڏي جنگ کي جنم ڏئي سگهي ٿي، انڪري اسٽيبلشمينٽ ۽ سياسي توڙي مذهبي جماعتون سندس رد عمل تي واويلا ڪرڻ بدران ان معاملي تي سنجيدگي سان سوچين. هـُن چيو ته ڪجهه ماڻهن جو ايم ڪيو ايم سان سلوڪ بهتر ناهي، جنهن کي وڌيڪ برداشت نٿو ڪري سگهجي. الطاف حسين چيو ته اليڪشن ڪميشن کي عدالتي فيصلي موجب تڪبنديون ڪرڻ گهرجن. ايم ڪيو ايم سربراهه چيو ته جمهوريت جي مضبوطي لاءِ هو اپوزيشن جو ڪردار ادا ڪرڻ چاهين ٿا. الطاف حسين چيو ته جيڪڏهن انتظامي يونٽن تي اعتراض ڪيو پيو وڃي ته سنڌ کي ون ۽ ٽو ۾ ورهايو وڃي. متحده جي سربراهه آخر ۾ سنڌي ڳالهائيندڙ متحده جي ڪارڪنن کي تحفظ فراهم ڪرڻ جو پڻ مطالبو ڪيو.