تازيون خبرون

Daily Archives: October 28, 2014

ايم ڪيو ايم قومي اسيمبلي ۾ سنڌ جي ورهاڱي جو مطالبو ڪري ڇڏيو، هنگامو

ڪراچي (اسٽاف رپورٽر) ايم ڪيو ايم،‎قومي اسيمبلي ۾ به سنڌ جي ورهاڱي جو مطالبو ڪري ڇڏيو، ايم اين اي آصف حسينن جي نئين صوبي واري بيان تي پ پ ميمبرن ايوان ۾ سخت احتجاج ڪيو. قومي اسيمبلي جو اجلاس ڊپٽي اسپيڪر مرتضيٰ جاويد عباسي جي صدارت هيٺ شروع ٿيو. اجلاس ۾ ايم ڪيو ايم جي ميمبر آصف حسنين چيو ته سنڌ جي شهري علائقن ۾ محروميءَ جو احساس وڌي رهيو آهي،جنهنڪري اتي نئون صوبو هر حال ۾ ٺهندو. متحده ايم اين اي آصف حسنين چيو ته سنڌ ۾ حڪومت جي نالي تي ڦرلٽ ٿي ڪئي پئي وڃي،ڪرپشن عروج تي هئڻ سبب ٿر جي صورتحال تمام گهڻي خراب ٿي چڪي آهي،جڏهن ته ڪچي شراب جي وڪري سبب به ڪيتريون ئي انساني جانيون ضايع ٿي چڪيون آهن. قومي اسيمبلي جي ايوان ۾ ايم ڪيو ايم طرفان سنڌ ۾ نئين صوبي جي مطالبي تي پ پ ايم اين ايز سخت احتجاج ڪيو،جنهن دوران ٻنهي پارٽين جي ميمبرن ۾ سخت جملن جي ڏي وٺ ٿي. پ پ ايم اين اي شگفته جماڻي چيو ته ايم ڪيو ايم وارا نان اشو تي ڳالهائي رهيا آهن، سنڌ ۾ ڪنهن به نئين صوبي جي ضرورت ناهي ۽ نه وري هو سنڌ جو ورهاڱو ٿيڻ ڏيندا. ان موقعي تي ايم ڪيو ايم جي ايم اين اي آصف حسنين چيو ته جيڪڏهن ايوان ۾ کين ڳالهائڻ نه ڏنو ويندو ته پوءِ ٻيو ڪير به نه ڳالهائي سگهندو.

 

سپريم ڪورٽ سرڪاري ادارن جي سربراهن جي مقررين ۽ خالي پوسٽن بابت حڪومت کان 4 2 ڪلاڪن ۾ تفصيل گهري ورتي

اسلام آباد (بيورو) سپريم ڪورٽ ڪميشن ذريعي ٿيندڙ سرڪاري ادارن جي سربراهن جي مقررين ۽ خالي پوسٽن بابت حڪومت کان 4 2 ڪلاڪن ۾ تفصيل گهري ورتي. چيف جسٽس ناصر الملڪ جي سربراهي ۾ 3 رڪني بئنچ غلام رسول بنام فيڊريشن آف پاڪستان ڪيس جي ٻڌڻي ڪئي. ان موقعي تي اٽارني جنرل آف پاڪستان عدالت ۾ پيش ٿيو. چيف جسٽس اٽارني جنرل کان پڇو ته ڪميشن ذريعي ڪيترن ادارن ۾ مقرريون ڪيون ويون آهن ۽ ڪيترن ادارن جي سربراهن جون مقرريون ناهن ٿي سگهيون ان تي اٽارني جنرل ٻڌايو ته ڪجهه ادارن جي سربراهن جون مقرريون ڪيون ويون آهن جيڪي چيڪ ڪري ٻڌائي سگهجي ٿو ان لاءِ وقت ڏئي ڇڏيو، جسٽس امير هاني مسلم پڇو ته ٻڌايو وڃي ته مسابقتي ڪميشن جي جوڙجڪ ڪيئن ٿي ۽ ميمبرن ۾ ڪير ڪير شامل آهن ۽ ڪميشن ڪنهن جي حڪم تي جوڙي وئي آهي. اٽارني جنرل ٻڌايو ته فيڊرل ٽيڪس محتسب اهو هڪ ميمبر آهي شمس لاکو ۽ ڊاڪٽر اعجاز نبي ڪميشن جا ميمبر آهن اها ڪميشن سپريم ڪورٽ جي حڪم تي خواجا آصف ڪيس جي روشني ۾ جوڙي وئي آهي ۽ ان جو نوٽيفڪيشن اسٽيبلشمينٽ ڊويزن جاري ڪيو هو. اٽارني جنرل آرٽيڪل 0 4 2 اي ۽ آرٽيڪل 2 4 2 جو تذڪرو ڪندي چيو ته ٻنهي ۾ مقرري جو معيار مختلف آهي، 0 4 2 اي تحت اٿارٽيز کي مقررين لاءِ پروسيجر موجود آهي جنهن کي فالو ڪرڻ ضروري آهي جڏهن ته 2 4 2 آرٽيڪل ۾ مقرريون ايف پي ايس سي ذريعي ڪيون وڃن ٿيون، بعد ۾ عدالت ٻڌڻي اڄ اربع ڏينهن تائين ملتوي ڪندي اٽارني جنرل کان اهم ادارن جي سربراهن جي مقررين بابت تفصيل گهري آهي.

 

ايم ڪيو ايم جي وفد جي وزيراعظم سان ملاقات، مهاجر صوبو ٺاهڻ لاءِ حمايت گهري ورتي

اسلام آباد (بيورو) وزيراعظم نوازشريف چيو آهي ته سياسي جماعتن کي پنهنجا اختلاف بحث سان ئي ختم ڪرڻ گهرجن سنڌ جي ترقي لاءِ سموريون سياسي پارٽيون گڏجي ڪم ڪن اڱاري تي هتي ايم ڪيو ايم جي خالد مقبول صديقيجي سربراهي ۾ ڊاڪٽر فاروق ستار نسرين جليل ۽ عبدالرشيد گوڊيل تي ٻڌل متحده قومي موومينٽ جي چار رڪني وفد وزيراعظم نوازشريف سان ملاقات ڪئي ان موقعي تي پرويز رشيد ۽ خواجه سعد رفيق به موجود هئا ملاقات ۾ ملڪ ۾ امن امان خاص ڪري ڪراچي ۾ ٽارگيٽيڊ آپريشن ڪراچي سميت سنڌ جي شهري علائقن ۾ ترقياتي ڪمن جي صورتحال پيپلزپارٽي ۽ ايم ڪيو ايم وچ ۾ تازي ڇڪتاڻ ۽ ٻين معاملن تي تفصيلي ڳالهيون ڪيون ويون ان موقعي تي وزيراعظم چيو ته ڪراچي جا ترقياتي منصوبا ترجيحي بنيادن تي مڪمل ٿيندا سنڌ جي ترقي لاءِ سموريون سياسي پارٽيون گڏجي ڪم ڪن ملڪي ترقي ۽ عوامي ڀلا.ئي لاءِ اتفاق راءِ جمهوريت جو حسن آهي آئين سمورين جمهوري قوتن کي مناسب پليٽ فارم تي بحث ڪرڻ جي اجازت ڏي ٿو سياسي پارٽين کي پنهنجي اختلاف ڳالهه ٻولهه سان ئي ختم رڪڻ گهرجن گذريل ڪجهه مهينن دوران ملڪ ۾ جمهوريت جو بهترين مثال ڏسڻ ۾ آيو جمهوري قوتن ملڪ ۾ جمهوريت جي بالادستي لاءِ اتحاد جو مظاهرو ڪيو وزيراعظم ڪراچي جا اهم ترقياتي منصوبا مڪمل ڪرڻ لاءِ خواجه سعد رفيق ڊاڪٽر فاروق ستار آصف ڪرماني ۽ سينيئر بيورو ڪريٽس تي ٻڌل ڪميٽي قائم ڪرڻ جي به هدايت ڪئي هڪ خانگي ٽي وي رپورٽ موجب ايم ڪيو ايم مهاجر صوبو قائم ڪرڻ تي (ن) ليگ کان حمايت جو مطالبو ڪيو وفد جو چوڻ هو ته قومي اسيمبلي ۾ مهاجر صوبي لاءِ جمع قرارداد جي (ن) ليگ حمايت ڪري جواب ۾ وزيراعظم نوازشريف چيو ته نون صوبن جي ٺاهڻ لاءِ آئين ۾ طريقو موجود آهي مسلم ليگ (ن) ليگ ملڪ ۾ انتظامي بينادن تي نوان صوبا ٺاهڻ جي حامي آهي وزيراعظم نوازشريف چيو ته مهاجر صوبي جي معاملي تي حمايت ڪرڻ يا نه ڪرڻ جو فيصلو پارٽي سان مشاورت کان پوءِ ڪيو ويندو ذريعن موجب متحده جي وفد ملاقات ۾ ڪراچي آپريشن تي تحفظات کان وزيراعظم نوازشريف کي آگاهه ڪيو ۽ چيو ته ايم ڪيو ايم ڪراچي آپريشن جي حامي آهي جڏهن ته نشانو به بڻجي رهي آهي. حڪومتي ذريعن موجب ايم ڪيو ايم سنڌ حڪومت جي شڪايت ڪندي چيو ته هو عوام جون محروميون ختم ڪرڻ تي ڪوئي ڌيان نه پئي ڏئي.

 

ڌرڻن سبب معيشت کي پهتل نقصان جي ازالي لاءِ حڪومت بصيرت سان ڪم ڪري رهي آهي: پرويز رشيد

اسلام آباد (بيورو) سڌسماءَ جي وفاقي وزير سينيٽر پرويز رشيد چيو آهي ته احتجاجي ڌرڻن سبب گذريل ٽن مهينن ۾ معيشت کي پهتل نقصان جي ازالي لاءِ حڪومت بصيرت سان ڪم ڪري رهي آهي ته جيئن سيڙپڪارن جو اعتماد بحال ٿئي ۽ پاڪستان خوشحالي ۽ ترقي ڪري سگهي وزيراعظم نوازشريف 7 کان 9 نومبر تائين چين جو دورو ڪندو چيني صدر جي پاڪستان دوري ۾ جن رٿائن تي صحيحون ٿيڻيون هيون انهن تي صحيحون ڪندو سيڙپڪاري بورڊ جي چيئرمين اسماعيل متاح سان گڏ پريس ڪانفرنس کي خطاب ڪندي هن چيوت ه سيڙپڪاري بورڊ جي اهتمام هيٺ ايندڙ ڪانفرنس ۾ سڄي دنيا مان وڏي انگ ۾ سيڙپڪارن شرڪت ڪري موجوده حڪومت تي پنهنجي اعتماد جو اظهار ڪيو آهي وزيراعظم نوازشريف ڪانفرنس جو افتتاح ڪيو ۽ حڪومتي ترجيحن جي حوالي سان ملڪي ۽ پرڏيهي سيڙپڪارن کي آگاهه ڪيو انهن جي سوالن جا جواب ڏيئي کين مطمئن ڪيو سڌسماءَ جي وزير چيو ته مسلم ليگ (ن) جي حڪومت هميشه معيشت جي ڦيٿي کي گردش ۾ رکيو جنهن سان ملڪي ترقي ۽ خوشحالي جو رستو هموار ٿيو 14 آگسٽ 2014 تائين ملڪ ۾ معيشت ترقي ڏانهن وڃي رهي هئي رپ 14 آگسٽ کان پوءِ معيشت جي حوالي سان ماحول بهتر نه رهيو ۽ ان ۾ رڪاوٽ اچي ويئي خاص ڪري بجلي جا منصوبا ۽ چيني صدر جو پاڪستان جو دورو ملتوي ٿيڻ سان سيڙپڪاري متاثر ٿي پر وزيراعظم ان عزم جو اظهار ڪيو ته هو ٽن مهينن ۾ احتجاجي ڌرڻن سان معيشت کي جيڪو نقصان ٿيو آهي ان کي سنڀالي وٺندو.

 

سنڌ حڪومت نيلوفر طوفان کي نظر ۾ رکندي هاءِ الرٽ جاري ڪري ڇڏي آهي: شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته سنڌ حڪومت نيلوفر نالي متوقع سامونڊي طوفان کي نظر ۾ رکندي سمورا اڳواٽ انتظام ڪري ورتا آهن. لاڳاپيل ادارن جي عملي جون موڪلون به رد ڪيون ويون آهن. جڏهن ته ڪراچي سميت پوري سنڌ جي سامونڊي علائقن ۾ هاءِ الرٽ جاري ڪيو ويو آهي. اڱاري تي سنڌ اسيمبلي ۾ بيان ڏيندي شرجيل ميمڻ چيو ته نيلوفر نالي سامونڊي طوفان جي حوالي سان وزيراعليٰ سنڌ سمورن لاڳاپيل ادارن جي آفيسرن جو اجلاس به منعقد ڪيو آهي. سمورن ادارن کي هاءِ الرٽ ڪيو ويو آهي. هن چيو ته ڪراچي، ٺٽو، بدين کان ننگرپارڪر تائين انتظاميه کي الرٽ ڪري ڇڏيو آهي. لاڳاپيل ادارن جيعملي جون موڪلون به رد ڪيون ويون آهن. شرجيل انعام ميمڻ ايوان کي ٻڌايو ته سنڌ حڪومت موسميات کاتي سان مڪمل رابطي ۾ آهي. هن چيو ته سمنڊ ۾ ويندڙ سمورن مهاڻن کي به طوفان جي حوالي سان آگاهه ڪيو ويو آهي ۽ ميري ٽائيم سڪيورٽي ايجنسي جي معرفت سمنڊ ۾ موجود مهاڻن کي وائرليس ۽ ريڊيو ميسيج ذريعي ڪنارن تي اچڻ جا اعلان به ڪيا پيا وڃن. هن چيو ته ڪراچي ۾ ڪمشنر ۽ ايڊمنسٽريٽر ڪي ايم سي به سمورن لاڳاپيل ادارن سان رابطي ۾ آهي.

 

برطانوي وزيراعظم جو نواز شريف سان ٽيليفونڪ رابطو، نومبر ۾ افغانستان متعلق ڪانفرنس ۾ شرڪت جي دعوت

اسلام آباد (بيورو) برطانوي وزيراعظم ڊيوڊ ڪيمرون جو وزيراعظم نواز شريف سان ٽيليفون تي رابطو، نومبر ۾ افغانستان متعلق ڪانفرنس ۾ شرڪت جي دعوت، خطي جي صورتحال ۽ پاڪ برطانيا ناتن تي ويچاريو. تفصيل موجب برطانيا جي وزيراعظم ڊيوڊ ڪيمرون ٽيليفون تي وزيراعظم نواز شريف سان رابطو ڪيو ۽ گڏيل دلچسپي جي معاملن تي ويچاريو. ڊيوڊ ڪيمرون وزيراعظم نواز شريف کي نومبر جي ٽئين هفتي ۾ لنڊن ۾ افغانستان متعلق ٿيندڙ ڪانفرنس ۾ شرڪت جي دعوت ڏني. ڪانفرنس جي صدارت برطانوي وزيراعظم ڪندو، افغانستان جو صدر ڊاڪٽر اشرف غني ۽ ٻيا مندوبين شرڪت ڪندا. وزيراعظم نواز شريف جي ان ڪانفرنس ۾ شرڪت جي موقعي تي برطانوي وزيراعظم ۽ افغانستان جي صدر سان ملاقات ٿيندي جنهن ۾ افغانستان ۾ امن و استحڪام متعلق معاملن تي ڳالهه ٻولهه ٿيندي.

 

چيف اليڪشن ڪمشنر جي مقرري: اپوزيشن ليڊر سپريم ڪورٽ کان 3 مهينن جو وقت گهري ورتو

اسلام آباد(بيورو) مخالف ڌر جي اڳواڻ سيد خورشيد شاهه چيف اليڪشن ڪميشن جي مقرري لاءِ سپريم ڪورٽ کان ٽن مهينن جو وقت گهري ورتو آهي، اپوزيشن ليڊر چوڌري اعتزاز احسن ۽ رضا رباني جي مدد سان سپريم ڪورٽ ۾ آئيني درخواست جمع ڪرائي جنهن ۾ موقف اختيار ڪيو ته چيف اليڪشن ڪمشنر جو عهدو آئيني آهي جنهن لاءِ وزيراعظم نواز شريف سان مشورو ڪرڻو آهي جڏهن ته وزيراعظم نواز شريف چاهي ٿو ته مستقبل ۾ صاف ۽ شفاف چونڊن لاءِ اهڙي ماڻهو جيچونڊ ڪئي وڃي جنهن تي سموريون سياسي تنظيمون متفق هجن درخواست ۾ وڌيڪ چيو ويو ته وزيراعظم ۽ اپوزيشن ليڊر مقرري لاءِ نالن تي غور ڪري رهيا آهن جڏهن ته مقرري جي عمل ۾ قانونسازي جي قدمن تي عمل ڪرڻ تي غور ٿي رهيو آهي ۽ ضروري آهي ته بامقصد مشوري ۽ اتفاق راءِ سان چيف اليڪشن ڪمشنر کي مقرر ڪيو وڃي، ياد رهي ته سپريم ڪورٽ چيف اليڪشن ڪمشنر جي مقرري لاءِ 28 آڪٽوبر تائين ڊيڊلائين ڏني هئي جڏهن ته چيف جسٽس ناصر الملڪ جي سربراهي ۾ ڪيس جي ٻڌڻي 30 آڪٽوبر تي ٿيندي.

 

قومپرستن مهاجر صوبي جي مطالبي کي سنڌين ۽ مهاجرن کي ويڙهائڻ جي سازش قرار ڏئي ڇڏيو

سکر(بيورو) سنڌ جي قومپرست اڳواڻن مهاجر صوبي جي ايم ڪيو ايم جي مطالبي کي سنڌي ۽ اردو ڳالهائيندڙن وچ ۾ هڪ ڀيرو ٻيهر ويڙهائڻ جي سازش قرار ڏيندي چيو آهي ته هاڻي عوام پ پ ۽ ايم ڪيو ايم جي نوراڪشتي کي سمجهي ٿي، عوام اقتدار جي لالچين جي سازش کي ناڪام بڻائي ڇڏيندو، سکر پريس ڪلب ۾ سنڌ بچايو ڪميٽي طرفان سنڌ جي ورهاڱي واري سازش کي ناڪام بنائڻ لاءِ سنڌ ۾رهندڙ مختلف ٻوليون ڳالهائيندڙن کي گڏ ڪرڻ لاءِ سنڌ يڪجهتي ڪانفرنس ڪوٺائي وئي، ڪانفرنس ۾ شريڪ سڄاڻ ڌرين چيو آهي ته مهاجر صوبي جو مطالبو ايم ڪيو ايم ۽ پ پ جي ڳٺ جوڙ جو نتيجو آهي، ٻئي ڌريون اقتدار لاءِ سنڌي ۽ اردو ڳالهائيندڙن ۾ ويڙهاند جي سازش ڪري رهيون آهن، ڇاڪاڻ ته ٻئي ڌريون گذريل 9 ورهين جي اقتداري دور ۾ ڪرپشن ۽ بدعنواني کان سواءِ ڪجهه به ناهن ڪري سگهيون، ڪانفرنسکي خطاب ۽ ميڊيا سان ڳالهائيندي سنڌ بچايو ڪميٽي جي ڪنوينر سيد جلال محمود شاهه چيو آهي ته پيپلزپارٽي ۽ متحده وٽ سياست ڪرڻ لاءِ ڪجهه به ناهي بچيو، جنهن ڪري هنن عوام کي ويڙهائي ووٽ وٺڻ جي سازش جوڙي آهي پر هاڻي اردو ۽ سنڌي ڳالهائيندڙ سنڌي اهڙين سازشن کي سمجهن ٿا ۽ هو پاڻ ۾ ڪڏهن به نه وڙهندا، جلال محمود شاهه چيو ته پ پ سموري سنڌ کي تباهه ڪري ڇڏيو آهي، سموري سنڌ ۾ ڪٿي به ڪو روڊ ثابت ناهي، شهر گند جو ڍير بڻجي ويا آهن، اربين رپين جي ڪرپشن ڪئي وئي، جنهن ڪري هاڻي پ پ پ وارن روٽي ڪپرا ۽ مڪان وارو نعرو وڃائڻ بعد مرسون مرسون جي نعري جو سهارو وٺڻ گهري ٿي، جڏهن ته متحده هميشه ڪارڪنن کي ڏوهن ۾ ملوث ڪندي رهي، جنهن ڪري ڪراچي آپريشن دوران گرفتار ٿيلن ۾ وڌيڪ انگ متحده جي ڪارڪنن جو آهي، جنهن ڪري ئي ٻئي پارٽيون عوام کان همدردي حاصل ڪرڻ لاءِ نوراڪشتي ڪري رهيون آهن، هن چيو ته اردو ڳالهائيندڙ به سمجهي چڪا آهن ته ايم ڪيو ايم کين استعمال ڪرڻ گهري ٿي، جنهن ڪري هو ايم ڪيو ايم جي چئي ۾ ناهن رهيا، متحده ۽ پ پ ڪيتريون به سازشون ڪن پر سنڌي ۽ اردو ڳالهائيندڙ پاڻ ۾ ڀائر آهن ۽ ڀائر ئي رهندا. ڪانفرنس کي خطاب ۽ ميڊيا سان ڳالهائيندي جسقم جي مرڪزي سينيئر وائيس چيئرمين ڊاڪٽر نياز ڪالاڻي چيو ته الطاف حسين مهاجر صوبي جو مطالبو ڪري اردو ۽ سنڌي ڳالهائيندڙن ۾ ويڇا وجهي جهيڙا ڪرائڻ جي سازش ڪري رهيو آهي، پر هاڻي هو اهڙي سازش ۾ ناڪام ئي رهندو، نياز ڪالاڻي چيو ته اردو ڳالهائيندڙ به سنڌي ڳالهائيندڙن جيترا ئي سنڌي آهن، اهي ڌرتي سان پنهنجو رشتو مضبوط ڪن ۽ متحده جي سازشن کان پاڻ کي بچائن، هن جو چوڻ هو ته پ پ وارا مرسون مرسون جو نعرو سنڌ بچائڻ لاءِ نه پر اقتدار لاءِ هڻي رهيا آهن، عوامي جمهوري پارٽي جي اڳواڻ ڪرم حسين وساڻ چيو ته پ پ ۽ ايم ڪيو ايم پنهنجي ڪريل ساک بحال ڪرائڻ لاءِ نئين صوبي جي ڳالهه ۽ مرسون مرسون جا نعرا هڻي رهيا آهن، جنهن جو فائدو ٽين وقت وٺي رهي آهي، جنهن جي پاليسي ويڙهايو ۽ راڄ ڪريو آهي، جيئي سنڌ قومپرست پارٽي جي اڳواڻ قمر ڀٽي چيو ته سنڌ کي امن ۽ ترقي جي رستي تي وٺي وڃڻ لاءِ لازمي آهي ته سنڌين کي اقتدار تي قابض رهندڙ ٻنهي پارٽين کان آزاد ڪرائجي ۽ اهو فقط سنڌي ۽ اردو ڳالهائيندڙن جي اتحاد سان ئي ممڪن آهي. جيئي سنڌ قومي محاذ آريسر گروپ جي اڳواڻ اسلم خيرپوري چيو ته سنڌ اسيمبلي ۾ پ پ پاران پاس ڪيل ٺهرائن ۾ هڪ طرف سنڌ جي ورهاست جي مخالفت ڪئي وڃي ٿي ته ٻئي پاسي سنڌ جي دشمنن کي ورهاست جو غيرآئيني رستو پڻ ڏيکاريو وڃي ٿو، ڪانفرنس کي خطاب ڪندي نامياري صحافي لالا اسد پٺاڻ چيو آهي ته پاڻ کي فطري اتحادي چوندڙ پ پ ۽ ايم ڪيو ايم مڊٽرم چونڊن جي آسري تي هڪ ٻئي خلاف نوراڪشتي شروع ڪري ڇڏي آهي، جنهن ڪري 9 سال اقتدار ۾ ڀاڱي ڀائيوار رهڻ بعد هڪ ڌر مرسون مرسون ۽ ٻي ڌر مهاجر صوبي جا مطالبا ڪري رهي آهي، يڪجهتي ڪانفرنس کي سنڌ نيشنل موومينٽ جي اعجاز ساميٽيو، جيئي سنڌ محاذ جي صوفي حضور بخش، فنڪشنل ليگ جي صفيه بلوچ، نوازليگ جي سرور لطيف، تحريڪ انصاف جي ڊاڪٽر ربنواز ڪلوڙ، ناميارن صحافين شبير بيدار ڀٽو، ممتاز بخاري ۽ ٻين پڻ خطاب ڪيو.

 

سنڌ اسيمبلي ۾ ڪراچي ميرپورخاص ٽرين سروس بحال ڪرڻ ۽ ڪينسر جي سڃاڻپ جا سينٽر قائم ڪرڻ وارا ٺهراءَ منظور

ڪراچي (اسٽاف رپورٽر) سنڌ اسيمبلي جي اجلاس ۾ ڪراچي ميرپورخاص ٽرين سروس بحال ڪرڻ ۽ سنڌ جي سمورن ضلعن ۾ ڪينسر جي سڃاڻپ جا سينٽر قائم ڪرڻ وارا ٺهراءَ اتفاق راءِ سان منظور ڪيا ويا. اسپيڪر آغا سراج دراني جي صدارت هيٺ سنڌ اسيمبلي جي اجلاس ۾ مختلف معاملن تي بحث ڪيو ويو، فاروق دادا کي دهشتگرد ڪوٺڻ تي سندس بيوهه ايوان ۾ احتجاج ڪيو. متحده جي ايم پي اي شازيه فاروق اعتراض واري نقطي تي ڳالهائيندي چيو ته 1995 ۾ سندس مڙس فاروق دادا کي قتل ڪيو ويو، کيس گهران وٺي وڃي ماريو ويو ۽ ان وقت جي گهرو وزير کائنس معافي به ورتي هئي پر شرجيل ميمڻ ان کي دهشتگرد قرار ڏنو آهي جنهن تي سندس دل آزاري ٿي آهي. اسپيڪر آغا سراج دراني شازيه فاروق کي وڌيڪ ڳالهائڻ کان روڪي ڇڏيو، متحده جي ميمبر خواجه اظهار الحسن چيو ته شازيه فاروق جي مڙس کي قتل ڪيو ويو آهي هو ان تي سياسي پوائنٽ اسڪورنگ نه ٿا ڪن، سندس احساسن کي سمجهيو وڃي. اجلاس ۾ ڪراچي ميرپورخاص ٽرين سروس بحال ڪرڻ وارو ٺهراءُ منظور ڪيو ويو، ٺهراءَ ايم ڪيو ايم جي ميمبر ظفر احمد ڪمالي پيش ڪيو. پيپلز پارٽي جي ايم پي اي خيرالنساءَ عورتن جي ڇاتي جي ڪينسر جي سڃاڻپ لاءِ سڄي سنڌ ۾ مرڪز قائم ڪرڻ جو ٺهراءَ پيش ڪيو. ٺهراءَ ۾ خيرالنساءَ چيو ته ڇاتي جي ڪينسر جي سڃاڻپ نه ٿيڻ سبب وڏي تعداد ۾ عورتون موت جي منهن ۾ هليون وڃن ٿيون، ان لاءِ قدم کنيا وڃن. ايوان اهو ٺهراءُ اتفاق راءِ سان منظور ڪري ورتو، بعد ۾ اسپيڪر اجلاس 10 نومبر تائين ملتوي ڪري ڇڏيو.

 

ڪورڪمانڊر ڪراچي جي سنڌ جي گورنر سان ملاقات

ڪراچي (اسٽاف رپورٽر) ڪورڪمانڊر ڪراچيف ليفٽيننٽ جنرل نويد مختيار سنڌ جي گورنر ڊاڪٽر عشرت العباد خان سان ملاقات ڪئي آهي. ملاقات دوران مڪي صورتحال ۽ آپريشن ضرب عضب جي حوالي سان خيالن جي ڏي وٺ ڪئي وئي ۽ گڏيل دلچسپي جي معاملن تي ڳالهايو ويو. ڪورڪمانڊر ڪراچي ليفٽيننٽ جنرل نويد مختيار جو چوڻ هو ته قوم جيڪو اعتماد ڪيو پاڪ فوج اُن تي پورو لهندي، پاڪ فوج قوم کي ڪڏهن به مايوس نه ڪندي. سنڌ جي گورنر ڊاڪٽر عشرت العباد خان چيو ته پاڪ فوج جي جوانن جون شهادتون ملڪ لاءِ عظيم قرباني آهي، آپريشن ضرب عضب جي ردعمل کي منهن ڏيڻ لاءِ قانون لاڳو ڪندڙ ادارن جي ڪارڪردگي ساراهه جوڳي آهي.