تازيون خبرون

Daily Archives: October 27, 2014

ڌرڻا پوئتي رهجي ويندا پاڪستان اڳتي نڪري ويندو: وزير اعظم

اسلام آباد (بيورو) وزيراعظم محمد نوازشريف چيو آهي ته ڌرڻا پوئتي رهجي ويندا پاڪستان اڳتي نڪري ويندو ڌرڻن سان پاڪستاني معيشت کي ڪافي نقصان ٿيو اسان کي سياسي بردباري جو مظاهرو ڪرڻو پوندو هڪ جمهوري حڪومت ويئي ۽ ٻئي اقتدار ۾ آئي آهي روايت کي ختم نه ڪرڻ گهرجي ڌرڻن وارا اسان کي بيروزگاري ۽ دهشتگردي ختم ڪرڻ ڏين پاڪستان ترقي جي دڳ تي هلي رهيو آهي ٻيهر بدامني بدحالي ڏانهن ڌڪڻ جي ڪوشش نه ڪئي وڃي پنهنجي نجي شعبي کي ايل اين جي ۾ سيڙپڪاري جي دعوت ڏيئي ڇڏي آهي حڪومت جلد او جي ڊي سي ايل جا شيئر وڪرو ڪندي سيڙپڪاري ڪانفرنس سان پرڏيهي سيڙپڪاري ۾ مدد ملندي پرڏيهي سيڙپڪارن کي پاڪستان ۾ ڀليڪار چونداسين ۽ انهن کي سموريون سهولتون فراهم ڪيون وينديون سومر تي هتي ميڊيا سان ڳالهائيندي وزيراعظم چيو ته ڌرڻن جيڪري چيني صدر جو دورو ملتوي ٿيو جيڪڏهن ڌرڻن جي سياست نه ٿئي ها ته چيني صدر جو دورو ملتوي نه ٿئي ها پاڪستان کي ترقي يافته ملڪ بنائڻ واري سياست ٿيڻ گهرجي ڌرڻن جي ڪري چيني صدر جو دورو ملتوي ٿيڻ ڇا سٺو ڪم آهي وزيراعظم چيو ته موجوده حڪومت جي اقتدار جي اچڻ کان پوءِ ڪرپشن جو ڪوئي اسڪينڊل ناهي آيو ماضي ۾ روزانو ڪوئي نه ڪوئي اسڪينڊل آڏو ايندو هو.

سنڌ اسيمبلي جو اجلاس، پ پ ۽ ايم ڪيو ايم ميمبرن ۾ جهڙپون، ايوان مڇي مارڪيٽ بڻجي ويو, جيڪي به ٽارگيٽ ڪلر پڪڙيا آهن اهي واٽر بورڊ ۽ ڪي ايم سي جا ملازم آهن، شرجيل ميمڻ،

ڪراچي(اسٽاف رپورٽر) سنڌ اسيمبلي ۾ اڄ پيپلز پارٽي ۽ ايم ڪيو ايم جي ميمبرن وچ ۾ سخت لفظن جي ڏي وٺ ٿي ۽ ٻنهي هڪ ٻئي خلاف شيم شيم جا نعرا هنيا ان دوران آذان جو آواز به اچي ويو پر ٻنهي بس نه ڪئي ۽ هڪ ٻئي خلاف زوردار نموني ڳالهائيندا رهيا انهن ٻنهي ۾ زباني وات ورندي ان وقت شروع ٿي جڏهن پيپلز پارٽي جي اطلاعات واري وزير شرجيل ميمڻ مڪاني ادارن جي ڪارڪردگي تي ڳالهايو ۽ چيو ته آئون ڪراچي ۾ ڪهڙن ڪهڙن ٽارگيٽ ڪلرن جو نالو وٺان جو هن وقت تائين جيڪي ٽارگيٽ ڪلر پڪڙيا آهن انهن ۾ هڪ فاروق دادا ايم ڊي واٽر بورڊ جو ڊرائيور هو تنهن تي ايم ڪيو ايم جي خواجه اظهارالحسن ورندي ڏني ته آئون ايم ڪيو ايم جي انهن ماڻهن جا نالا ٻڌايان جن کي بيگناهه قتل ڪيو ويو آهي ان دوران ٻنهي ۾ زباني جهيڙو شروع ٿي ويو ايتري ۾ اذان اچڻ لڳي پر ٻنهي ان جو ڪوبه احترام نه ڪيو ۽ هڪ ٻئي خلاف زوردار نموني ڳالهائيندا رهيا. اسپيڪر آغا سراج دراني جي سمجهائڻ باوجود خواجه اظهار الحسن ۽ شرجيل ميمڻ هڪ ٻئي خلاف ڳالهائيندا رهيا جنهن کانپوءِ آخرڪار اسپيڪر ٻنهي جا مائيڪ ئي بند ڪرائي ڇڏيا. سنڌ جي اطلاعات ۽ بلديات واري وزير شرجيل ميمڻ چيو آهي ته افسوس ان ڳالهه جو آهي ته حڪومت نيڪ نيتي ڏيکاري رهي آهي ۽ ان تي ٻي طرف کان سياسي پوائنٽ اسڪورنگ ڪئي پئي وڃي. بلديات کاتو جڏهن کان پي پي پي وٽ آيو آهي تڏهن کان صورتحال بهتر ٿي آهي، نه ته سڀ ڄاڻن ٿا ته بلدياتي ادارن کي ڪنهن تباهه ڪيو آهي ۽ ڪنهن ”اوور ايمپلائمنٽ” ڪئي آهي. بلدياتي ادارن ۾ ڀرتين لاءِ ڊگريون يا قابليت کي نه ڏٺو ويندو هو. ٽارگيٽڊ آپريشن ۾ گرفتار ٿيندڙ گهڻو ڪري ٽارگيٽ ڪلرز جو تعلق واٽر بورڊ ۽ ڪي ايم سي سان آهي. بدنام زمانه دهشتگرد فاروق دادا ايم ڊي واٽر بورڊ جو ڊرائيور هو. حيدرآباد ۾ مسئلا ماضي کان هلندا پيا اچن. ڪنهن هڪ دور تي پورو ملبو نه وڌو وڃي. اتي مشرف دور ۾ طاقتور ناظم به رهيا آهن، پر مسئلا موجود آهن. حيدرآباد ۾ اڄ تائين ڪنهن به لينڊ فل سائيٽ جي نشاندهي نه ڪئي هئي، اسان جڏهن کان اعليٰ اختياري ڪميٽي بڻائي اتي صحت ۽ صفائي جا معاملا بهتر ٿيا آهن. اسان پهرين به حيدرآباد لاءِ خصوصي پيڪيج ڏنا ۽ اڄ به وزيراعليٰ سنڌ حيدرآباد لاءِ خصوصي پيڪيج ڏيڻ بابت ڪم ڪري رهيو آهي. اسان ڪراچي ۽ حيدرآباد ٻنهي شهرن کي اون ڪيو آهي. هو سومر ڏينهن سنڌ اسيمبلي جي هڪ ميمبر پاران توجهه ڏياريونوٽيس جو جواب ڏئي رهيو هو. شرجيل انعام ميمڻ چيو ته حيدرآباد سميت سموري سنڌ ۾ بلدياتي مسئلا موجود آهن ۽ حڪومت انهن مسئلن کان اکيون بند ناهن ڪيون. انهن مسئلن جو بنيادي سبب بلدياتي ادارن ۾ اوور ايمپلائمينٽ آهي، حيدرآباد جو ادارو واسا هجي يا ڊبليو ايس بي هجي ٻنهي ۾ اوور ايمپلائمينٽ جي ڪري خرچ پورا ناهن ٿيندا. سڀ کان وڌيڪ ڳڻتي جي ڳالهه اها آهي ته ملازم ڪم نٿا ڪن. سنڌ حڪومت ٻنهي ادارن جي بجلي جي بلن جي ادائيگي جي ڏس ۾ ترتيبوار 50 ڪروڙ ۽ 30 ڪروڙ رپيا هر مهيني ادا ڪندي آهي ته جيئن انهن ادارن جي بجلي نه ڪٽجي. هن چيو ته حيدرآباد ۾ پيپلز پارٽي ۽ ايم ڪيو ايم جي چونڊيل ميمبرن ۽ اعليٰ آفيسرن سان هڪ اجلاس منعقد ڪيو ويو هو. انهي ئي اجلاس ۾ هڪ اعليٰ اختياري ڪميٽي جوڙي وئي هئي. ڪميٽي کي چيو ويو هو ته هو انهن ملازمن کي برطرف ڪن جيڪي ڪم نه ٿا ڪن. آفيسرن کي به چيو ويو هو ته بلدياتي ادارن ۾ ڪابه سياسي مداخلت نه هوندي ۽ هو شهرن کي بهتر بڻائي ڏيکارين. اسين پنهنجي وسيلن کان وڌيڪ فنڊ به مهيا ڪيا آهن. هن چيو ته سنڌ حڪومت پوري صوبي ۾ قبضن جي خاتمي ۽ صفائي جي مهم شروع ڪئي. حيدرآباد ۾ جتي قبضا هئا سي ختم ڪيا جيڪي ان کان پهرين ڪڏهن به ناهن ٿيا. هن چيو ته حيدرآباد ۾ مسئلا ماضي کان هلندا پيا اچن، ڪنهن هڪ دور تي سمورو بار نه وجهڻ گهرجي. اتي مشرف دور ۾ طاقتور ناظم به رهيا آهن، پر مسئلا پوءِ به موجود آهن. حيدرآباد ۾ اڄ تائين ڪنهن به لينڊ فل سائيٽ جي نشاندهي ناهي ڪئي اسان جڏهن کان اعليٰ اختياراتي ڪميٽي بڻائي آهي اتي صحت ۽ صفائي جا معاملا بهتر ٿيا آهن. اسان حيدرآباد لاءِ پهرين به خصوصي پيڪيج ڏنا ۽ اڄ به وزيراعليٰ سنڌ ان شهر کي هڪ ٻيو خصوصي پيڪيج ڏيڻ تي ڪم ڪري رهيو آهي. اسان ڪراچي ۽ حيدرآباد ٻنهي شهرن کي اون ڪيو آهي مسئلن کي نيڪ نيتي سان حل ڪرڻ لاءِ ڪوششون ڪيون پيون وڃن. حڪومت وٽ جيڪي وسيلا موجود آهن انهن کي بهتر طريقي سان خرچ ڪرڻ لاءِ منصوبابندي ڪئي وئي آهي.

 

پاڪستان ۽ نائيجيريا کي دهشتگردي سميت مختلف گڏيل مسئلن جو منهن آهي: صدر

اسلام آباد (بيورو) صدر مملڪت ممنون حسين چيو آهي ته پاڪستان ۽ نائيجيريا کي دهشتگردي سميت مختلف گڏيل مسئلن جو منهن آهي، گڏيل ڪوششن سان جلد ئي انهن مسئلن تي ضابطو آڻي وٺنداسين، ٻئي ملڪ دفاع سميت تمام شعبن ۾ گڏيل سهڪار کي وڌائي هڪٻئي لاءِ مددگار ثابت ٿي سگهن ٿا، پاڪستان نائيجيريا جي سيڪيورٽي فورسز کي مختلف شعبن ۾ تربيت فراهم ڪري سگهي ٿو. هو پاڪستان جي دوري تي آيل نائيجيريا جي ايئر چيف ايڊي سولا ايموسو سان ايوان صدر ۾ ملاقات دوران ڳالهائي رهيو هو. دفاع سيڪريٽري ۽ دفاعي پيداوار سيڪريٽري کان علاوه پاڪستان ۾ نائيجيريا جو سفير به ملاقات ۾ موجود هو. صدر مملڪت چيو ته پاڪستان منهنجي ئي ويزن مطابق ”لُڪ آفريقا“ پاليسي تي ڪاربند آهي ۽ انهيءَ پاليسي تحت منهنجو پهريون دورو به نائيجيريا جو هو، صدر چيو ته پاڪستان ۽ نائيجيريا جا تجارتي ناتا ڪافي سٺا آهن، وڌيڪ وڌائڻ جي ضرورت آهي. نائيجيريا جي ايئر چيف صدر ممنون حسين کي نائيجيريا جي صدر جو خيرسگالي پيغام پهچايو جنهن تي صدر چيو ته هو نائيجيريا جي صدر جي پاڪستان دوري جو منتظر آهي.

 

ايم ڪيو ايم مذهب کي سياست مقصدن لاءِ استعمال نه ڪري: پ پ اڳواڻ

اسلام آباد(بيورو) پيپلزپارٽي چيو آهي ته ايم ڪيو ايم مذهب کي سياسي مقصدن لاءِ استعمال نه ڪري، کين نون صوبن جي ڳالهه آئيني طريقي سان ڪرڻ گهرجي،لنڊن ۾ بلاول ڀٽو زرداري سان جيڪو رويو اختيار ڪيو ويو ان سان پيپلزپارٽي جي ورڪرن جو صبر ختم ٿي سگهي ٿو جنهن کي ڪير به روڪي نه سگهندو، پيپلزپارٽي گذريل 5 سالن جي حڪومتي دور ۾ گهڻو ڪجهه برداشت ڪري رواداري ۽ برداشت جو مثال قائم ڪيو آهي، ايم ڪيو ايم معاملي کي اٿاري اهڙو رنگ ڀرڻ جي ڪوشش ڪري رهي آهي جنهن سان ماڻهن ۾ نفرت پئدا ٿئي، وزيراعظم نواز شريف به مهاجر آهي پر هن پاڻ کي ڪڏهن به مهاجر ناهي سڏايو. سومر شام جو پيپلزپارٽي جي سينٽرل سيڪريٽريٽ ۾ ميان رضا رباني، قمر الزمان ڪائره ۽ ٻين اڳواڻن سان گڏجي پريس ڪانفرنس کي خطاب ڪندي سينيٽر چوڌري اعتزاز احسن چيو ته اسان کي ايم ڪيو ايم مان ڪا به شڪايت ناهي ڇو ته گذريل دور ۾ اها اسان سان گڏ رهي ۽ انهيءَ عرصي دوران ڪئين معاملن تي اختلاف رهيا ۽ آهن پر هن وقت ايم ڪيو ايم سياست کي مذهب جو رنگ ڏئي معاملا پئدا ڪري رهي آهي ۽ ڪالهه به ان معاملن کي خراب ڪرڻ جي ڪوشش ڪئي ۽ اهي خورشيد شاهه کي حدف بڻائي تنقيد جو نشانو بنائيندا رهيا، انهن ۾ گهٽ ماڻهو آهن جيڪي گهٽ ذهن رکندڙ آهن جيڪي ان قسم جون ڳالهيون ڪري رهيا آهن، اسان مڪي پاڪ کان مديني شريف هجرت ڪندڙ مهاجرن جا غلام آهيون خورشيد شاهه جو ان ئي خاندان سان تعلق آهي سيدن جي مسلمان عزت ۽ احترام ڪندا آهن ڇو ته ان جي نسبت نبي پاڪ صلي الله عليه وسلم سان آهي، مهاجرن کي ان جي نسبت نه ڪرڻ گهرجي، اسان کي هندستان مان هجرت ڪري آيلن سان وڏي همدردي آهي ۽ انهن جون پاڪستان لاءِ وڏيون قربانيون ۽ خدمتون آهن اسان جو خيال هو ته ايم ڪيو ايم وارا مذهب کي سياست کي وچ ۾ نه آڻيندا، الطاف ڀائي کي اپيل ڪيان ٿو ته هو ائين نه ڪري جنهنجي ذميواري مٿس اچي، الطاف جي نون صوبن جي ٺاهڻ واري ڳالهه پنهنجي جاءِ تي صحيح آهي پر کيس ان معاملي تي آئيني رستو اختيار ڪرڻ گهرجي نڪي هڙتال ۽ بيان بازي جو. چوڌري اعتزاز اهو به چيو ته ايم ڪيو ايم سيد خورشيد شاهه جي بيان کي کڻي عوام کي ڀڙڪائڻ جي ڪوشش ڪري رهي آهي.هن چيو ته لنڊن ۾ بلاول ڀٽو زرداري جي تقرير ۾ هنگامي جي ڪوشش ڪئي وئي ۽ هڪ ننڍي گروپ اها سازش ڪئي آهي پر پارٽي جي چيئرمين سان اهڙي رويي سبب پيپلزپارٽي جي ورڪرن جو صبر ختم ٿي سگهي ٿو جنهن کي ڪير به روڪي نه سگهندو. هندستان مان هجرت ڪري پنجاب ۾ آيل پاڻ کي مهاجر نه سڏائڻ ۽ سنڌ ۾ هجرت ڪري ايندڙ پاڻ کي مهاجر سڏائڻ واري سوال جو جواب ڏيندي چوڌري اعتزاز احسن چيو ته اسان ڪنهنجي ذات ۾ نه ٿا وڃڻ چاهيون، وزيراعظم نواز شريف پاڻ به مهاجر آهي پر هن ڪڏهن به پاڻ کي مهاجر ناهي سڏاريو. هن چيو تههي وقت تلخي جو نه پر نرمي سان ڳالهائڻ جو آهي. چوڌري اعتزاز چيو ته جيڪڏهن گجراتي زبان کي بازاري زبان چيو ته بازار جي توهين هوندي پر گجرات جي جلسي ۾ بازاري زبان استعمال ڪئي وئي، پيپلزپارٽي کي بازاري زبان سان گڏ ڀت سان نه لڳايو وڃي ۽ آئينده ان قسم جي زبان استعمال نه ڪئي وڃي.

 

ٿر ۾ بک نه پر بيمارين ۽ غربت سبب فوتگيون ٿيون آهن:وڏو وزير

ڪراچي (اسٽاف رپورٽر) وڏي وزير سيد قائم علي شاهه چيو آهي ته ٿر ۾ جاني نقصان ضرور ٿيو آهي پر بک وگهي هڪ ٻار به فوت ناهي ٿيو، خوراڪ جي کوٽ ختم ڪرڻ لاءِ 2 ارب رپين جي ڪڻڪ فراهم ڪئي وئي آهي. سنڌ اسيمبلي جي اجلاس کي خطاب ڪندي وڏي وزير سيد قائم علي شاهه چيو ته ٿر ۾ بک وگهي فوت ٿيل ڪنهن شخص جو نالو ٻــُڌايو وڃي، حڪومت ڏڪار متاثرن جي مدد لاءِ لاڳيتو ڪم ڪري رهي آهي. سيد قائم علي شاهه چيو ته ٿر ۾ ڪو به ٻار بک سبب فوت ناهي ٿيو،جيڪڏهن ڪنهن وٽ تفصيل آهن ته ٻــُڌايا وڃن. وڏي وزير چيو ته ملڪ ۾ ٻارن جي فوت ٿيڻ واري شرح جو جائزو وٺڻ کانپوءِ ٿر جي معاملي تي ڳالهايو وڃي،هڪ کان پنج سال جي ٻارڙن جي فوت ٿيڻ جو سبب بک ناهي. هن چيو ته 40 ڊاڪٽرن کي ٿر ۾ مقرر ڪيو ويو آهي، مٺي اسپتال جو مقابلو سنڌ جي ڪنهن به شهر جي اسپتال سان ڪري سگهجي ٿو. سيد قائم علي شاهه چيو ته ٿر ۾ ٿيل جاني نقصان جي جاچ لاءِ ايم پي ايز تي ٻڌل ڪميٽي جوڙي وڃي،جنهن بعد کير جو کير پاڻيءَ جو پاڻي ٿي ويندو. سيد قائم علي شاهه چيو ته ٿر ۾ 80 آر او پلانٽ ڪم ڪري رهيا آهن، سيد سردار احمد تي اعتماد آهي هــُو مٺي اسپتال جو دورو ڪري، ڪا به حڪومتي ڪوتاهي ثابت ٿي ته معافي گهــُري ويندي.

 

اتر وزيرستان ۾ آپريشن، جيٽ جهازن جي بمباري، 25 دهشتگرد مارجي ويا

اُتر وزيرستان (مانيٽرنگ ڊيسڪ) اتر وزيرستان ۾ ضرب عضب آپريشن ڪاميابيءَ سان جاري آهي، جنهن دوران جيٽ جهازن جي بمباري ۾ وڌيڪ 25 دهشتگرد مارجي ويا. اتر وزيرستان جي هيڊڪوارٽر ميران شاهه کان 45 ڪلوميٽر پري اولهه طرف پاڪ افغان سرحد ڀرسان تعلقي دتا خيل ۾ جيٽ جهازن دهشتگردن جي ٺڪاڻن تي بمباري ڪئي. سڪيورٽي ذريعن موجب بمباري ۾ 25 دهشتگرد مارجي ويا ۽ سندن ڪيترائي ٺڪاڻا تباهه ٿي ويا. ٻئي طرف خيبر ايجنسي جي اَڪا خيل واري علائقي ۾ دهشتگردن گورنمينٽ پرائمري اسڪول کي ڌماڪي سان تباهه ڪري ڇڏيو. مقامي پوليٽيڪل انتظاميه موجب اسڪول بند هئڻ سبب ڪو به جاني نقصان نه ٿيو پر عمارت مڪمل طور تباهه ٿي وئي. واضح رهي ته دهشتگردن پاران ماضي ۾ به خيبر ايجنسي سميت فاٽا جي مختلف علائقن ۾ اسڪولن کي تباهه ڪيو ويو هو.

 

خورشيد شاهه جي بيان تي ايم ڪيو ايم کان معافي گهران ٿو: خواجه آصف

اسلام آباد(بيورو) پاڻي ۽ بجلي واري وفاقي وزير ۽ مسلم ليگ ن جي اڳواڻ خواجه آصف جو چوڻ آهي ته خورشيد شاهه جي معافي کانپوءِ معاملو حل ٿيڻ گهرجي ها ۽ جيڪڏهن هينئر تائين به معاملو حل ناهي ٿيو ته ان جي جڳهه تي آئون معافي گهران ٿو سياسي ۾ مذهب کي نه آندو وڃي، پنهنجي هڪ بيان ۾ وفاقي وزير چيو ته اسان ۾ برداشت جي کوٽ آهي ۽ اسان وٽ معاملا پهريان کان ئي تمام گهڻا خراب آهن ايم ڪيو ايم کي خواجه آصف درخواست ڪئي ته ان معاملي کي نه وڌايو وڃي ۽ ملڪ لاءِ اهو ئي بهتر آهي ته معاملو ختم ڪيو وڃي هن جو وڌيڪ چوڻ هو ته پارليامينٽ اظهار راءِ لاءِ بهترين فورم آهي ان ڪري قومي معاملن کي هتي بحث هيٺ آندو وڃي ياد رهي ته اپوزيشن ليڊر خورشيد شاهه لفظ مهاجر کي گار قرار ڏنو هو جنهن تي متحده قومي موومينٽ سخت احتجاج ڪيو هو.

 

ايم ڪيو ايم رتو ڇاڻ ڪرائڻ چاهي ٿي، قومي ڪارڪنن ڌيان نه ڏين: سنڌ يڪجهتي ڪانفرنس

لاڙڪاڻو (بيورو)لاڙڪاڻي ۾ سنڌ بچايو ڪاميٽيءَ جي ميزباني هيٺ سنڌ يڪجهتي ڪانفرنس ۾ مطالبو ڪيو ويو ته متحده قومي موومينٽ ٽڪراءُ واري پاليسي اختيار ڪري سنڌ ۾ رتو ڇاڻ ڪرائڻ چاهي ٿي، پر سنڌي ماڻهو ۽ قومي ڪارڪن متحده جي ٽڪراءُ واري پالسي تي ڌيان نه ڏين ۽ انهن کي اپيل ٿي ڪجي ته اهي ٽڪراءَ واري پاليسي کان پاسو ڪري سنڌ جي قومي وحدت ۽ ورهاڱي خلاف سگهارو آواز بڻجي هڪ ٿي هڪ ئي صف ۾ بيهي ڌرتي جي حفاظت ڪن ، متحده سمورن اردو ڳاهائيندڙن جي نمائنده جماعت نه آهي ۽ اردو ڳالهائيندڙ اسان جا ڀائر آهن. ٽڪراءَ واري پاليسيءَ مان ٽين قوت پنهنجا مقصد ماڻڻ چاهي ٿي. اهڙو اظهار ڪالهه لاڙڪاڻي جي عبدالطيف نظاماڻي ليبر هال ۾ سنڌ بچايو ڪاميٽي جي ميزباني هيٺ “سنڌ يڪجهتي ڪانفرنس” کي خطاب ڪندي سنڌ بچايو ڪاميٽيءَ جي ڪنوينر سيد جلال محمود شاهه چيو ته اسين سنڌ ورهائڻ جي ڳالهه ڪندڙ پارٽين کي اڪيلو ڪرڻ چاهيون ٿا ۽ ان ۾ ايم ڪيو ايم سرفهرست آهي. ڪراچيءَ ۾ ٿيل پهرين سنڌ يڪجهتي ڪانفرنس منعقد ٿيڻ کانپوءِ ايم ڪيو ايم جي اشتعال انگيزي ۾ اضافو ٿي ويو آهي. هو چاهين ٿا ته ان ماحول سان سنڌ جو ڪارڪن جذباتي ٿئي ۽ انهن وٽ بدامني جو جواز پيدا ٿئي، پر اسين اشتعال ۾ نه ٿا اچڻ چاهيون، اسين سمورن قومي ڪارڪنن ۽ سنڌ واسين کي پرامن رهڻ جي اپيل ڪيون ٿا. هن چيو ته متحده سمورن اردو ڳالهائيندڙ ماڻهن جي جماعت نه آهي. متحده پنهنجي سياسي قلابازين ڪري بيهڪ نه جوڙي سگهي آهي. هنن تي ڪا به پارٽي يقين نه ٿي رکي، هو مڪمل طور اڪيلا ٿي چڪا آهن. هو پنهنجي اردو ڳالهائيندڙ نوجوانن کي هٿيار کڻڻ لاءِ ڀڙڪائين پيا. هن چيو ته اسين پ پ پ جي پاليسين مان مطمئن نه آهيون پر سنڌ جي يڪجهتيءَ لاءِ ڪڏهن به حڪومت سڏ ڏيندي ته اسين حاضر آهيون، باقي خالي مرويسون، سنڌ نه ڏيسون واري نعري سان ڪم نه هلندو. ٽين قوت به آهي، جيڪا چوي ٿي ته هو وڙهن ۽ اسين راڄ ڪيون. هاڻ پاڪستان ۾ مسلم ليگ ۽ ڪانگريس واري سياست نه هلندي، ڪنهن کي به ملڪ ورهائڻ جي اجازت نه ڏبي. ڪانفرنس کي خطاب ڪندي جسقم جي مرڪزي وائيس چيئرمين ڊاڪٽر نياز ڪالاڻيءَ چيو ته سنڌ پنهنجي وجود لاءِ ڪنهن اسيمبليءَ جي محتاج نه آهي. پ پ سنڌ اسيمبليءَ ۾ جن ماڻهن کي دڳ ٺاهي ڏنو، اهي اڄ سنڌ کي ورهائڻ جي ڳالهه ڪن ٿا. ساڳي اسيمبليءَ ون يونٽ جي حمايت ۾ ووٽ ڏنو هو ۽ سڄي سنڌ متفق آهي ته اسين ڪنهن کي به سنڌ جا ٽڪرا ڪرڻ جي اجازت نه ڏينداسين. متحده جي قيادت اقتدار جي نشي ۾ هوش ۽ حواس وڃائي چڪي آهي. انهن اردو ڳالهائيندڙن کي امتحان ۾ وجهي ڇڏيو آهي. اسان کي بار بار ماءُ تي گار ملي ٿي پر اسين انهن کي هر ڀيري سڌرڻ جو موقعو ڏيون ٿا ۽ کين خبردار ڪيون ٿا ته هو اهڙين حرڪتن کان باز اچن. هن چيو ته سنڌ جو نوجوان هر صورتحال کي منهن ڏيڻ لاءِ جسماني طور تي مڪمل طور تي تيار رهي. پ پ پ جي اڳوڻي ايم پي اي حاجي منور علي عباسي چيو ته ايم ڪيو ايم دهشتگرد تنظيم آهي، جيڪا هڪ شهر تائين محدود آهي. آئين ۾ ڪٿي به صوبن کي ورهائڻ جي اجازت نه آهي. سنڌ اسان جي ماءُ آهي. ان لاءِ ٿيندڙ هر جدوجهد ۾ گڏ هونداسين ۽ قومي اسيمبلي ۾ پ پ جي اپوزيشن ليڊر سيد خورشيد شاهه سنڌ ورهائڻ خلاف آواز اٿاريو آهي ته مهاجر لفظ تي ايم ڪيو ايم وارا مٿس مڇرجي پيا آهن ۽ مذهبي انتهاپسندي جي آڙ ۾ مهاجر لفظ کي گار ٿا سمجهن. جيڪا غلط ڳالهه آهي. سنڌ نيشنل موومينٽ جي چيئرمين اعجاز سامٽيو چيو ته سنڌ ۾ نسلي فساد ڦهلائڻ جون سازشون ڪيون پيون وڃن. اهڙين سازشن ۾ ايم ڪيو ايم ۽ پ پ ملوث آهن. ايم ڪيو ايم ڪراچيءَ ۾ وڏي گيم کيڏڻ واري آهي ۽ جلد ڪو وڏو فساد ٿيڻ وارو آهي. اسين ڪنهن به صورت ۾ اردو ڳالهائيندڙن جي خلاف نه آهيون. جي يو آءِ سنڌ جي سيڪريٽري جنرل ڊاڪٽر خالد محمود سومرو چيو ته جيڪو سنڌ کي ٽڪرا ڪرڻ جي ڪوشش ڪندو اسين ان جا ٽڪرا ڪري ڇڏينداسين. ڪنهن ماءُ جي پٽ کي سنڌ کي ورهائڻ جي طاقت نه آهي. ڪراچي سنڌ جي سسي آهي ۽ اسين ڪراچي کي ڪنهن به صورت ۾ ڇڏي نه ٿا سگهون. ايم ڪيو ايم وارا پاڻ توهين رسالت جا مرتڪب آهن. جيڪي پنهنجي هجرت کي رسول پاڪ ضلعم جن جي هجرت سان ڀيٽا ڏين ٿا. هي غيرملڪي ايجنڊا تي عمل ڪندي سنڌ کي ورهائڻ جي ڳالهه ڪن ٿا. پ پ ۽ ايم ڪيو ايم پاران هڪ ٻئي کي ڳالهائڻ نورا ڪشتي آهي. هنن جي هڪ ٻئي کان سواءِ سري ئي نه ٿي. هن چيو ته بلاول کي سياست ۾ اچڻ تي ويلڪم چئون ٿا. پر رڳو نعري هڻڻ سان ڪجهه نه ٿيندو. بلاول کي پنهنجي پارٽي طرفان سنڌ اندر ڪيل ڀينگ جو نوٽيس وٺڻ گهرجي. پ پ پ سنڌ ين کي تباهي ۽ بربادي کانسواءِ ڪجهه نه ڏنو آهي. جيسيتائين سسيءَ ۾ ساهه آهي. باب السلام سنڌ جو تحفظ ڪنداسين. هن چيو ته جيڪڏهن ڪو سنڌ کي ٽوڙيندو ته پاڪستان به نه بچندو ۽ هن ملڪ جا ٽڪرا ٽڪرا ٿي ويندا. ڪراچي ايم ڪيو ايم وارن جي نه آهي. اردو ڳالهائيندڙ به انهن مان بيزار آهن، پر هو گن پوائنٽ آڏو مجبور آهن. ڪانفرنس کي اسلم خيرپوري، قمر ڀٽي، پريس ڪلب جي صدر ايس اقبال بابو، ڪرم وساڻ ۽ ٻين اڳواڻن به خطاب ڪيو. جڏهن ته سنڌ يڪجهتي ڪانفرنس ۾ ايس يو پي، جسقم، جسقم آريسر، سنڌ نيشنل موومينٽ، نواز ليگ، جي يو آءِ ، جي يو پي، سميت مختلف قومپرست، سياسي، سماجي ۽ مذهبي پارٽين جي اڳواڻن ۽ ڪارڪنن ايڊوڪيٽ بابو سرفراز جتوئي، ساجن ڪلهوڙو، دودو ديشي، منظور شيخ، ڊاڪٽر ممتاز شيخ، حافظ احمد علي عباسي، راشد محمود سومرو، شيبا مغل، ڊاڪٽر ذوالفقار راهوجو، احمد علي تونيو، خالد چانڊيو ۽ ٻين وڏي انگ ۾ شرڪت ڪئي

 

پ پ پنهنجن وزيرن کي لغام ڏئي: خواجه اظهار الحسن

ڪراچي(اسٽاف رپورٽر): ايم ڪيو ايم جي اڳواڻ خواجه اظهار الحسن چيو آهي ته پ پ پنهنجن وزيرن کي لغام ڏئي ۽ جيڪڏهن ايم ڪيو ايم جي شهيدن بابت ڪا ڳالهه ڪئي وئي ته پوءِ اسان به سندن لحاظ نه ڪنداسين هن چيو ته 1992ع واري آپريشن ۾ ماريل اسان جا سمورا ڪارڪن شهيد آهن ۽ اسين پنهنجن شهيدن کي خراج تحسين پيش ڪيون ٿا سنڌ اسيمبلي ٻاهران ميڊيا سان ڳالهائيندي هن چيو ته هاڻ رڳو ڪراچي نه پر سڄي سنڌ جي ڳالهه ڪنداسين ۽ اسان جي اسيمبلي ميمبر محمد حسين جيڪو بيان ڏنو آهي تنهن تي وڏي وزير کي مڇرجڻ نه گهرجي هاڻ اسين دليلن سان ڳالهائينداسين ۽ لاڙڪاڻي سوڌو هر هنڌ جي ڳالهه ڪنداسين.

 

پ پ ۽ ايم ڪيو ايم وچ ۾ معاملا حل ڪرائڻ لاءِ اسپيڪر سنڌ اسيمبلي ٽياڪڙي جي آڇ ڪري ڇڏي

ڪراچي (اسٽاف رپورٽر) اسپيڪر سنڌ اسيمبلي آغا سراج دراني چيو آهي ته پرامن احتجاج هر ڪنهن جو حق آهي پر ذاتيات تي حملا نه ٿيڻ گهرجن پيپلزپارٽي ۽ ايم ڪيو ايم وچ ۾ معاملا حل ڪرڻ لاءِ پل جو ڪردار ادا ڪرڻ لاءِ تيار آهيان سومر تي سنڌ اسيمبلي اجلاس کان اڳ ميڊيا سان ڳالهائيندي هن چيو ته پرامن احتجاج سڀني جو حق آهي ان لاءِ پارليامينٽ موجود آهي پر ذاتي حملا نه ٿيڻ گهرجن بين الاقوامي سطح تي دنيا ۾ هن جو منفي اثر پوي ٿو ان موقعي تي هن ايم ڪيو ايم ۽ پيپلزپارٽي وچ ۾ اختلاف ختم ڪرائڻ لاءِ ڳالهين واريون ڪميٽيون ٺاهڻ جي آڇ ڪندي چيو ته بهتر ٿيندو ته اسان گڏجي ويهي مسئلا حل ڪيون آغا سراج دراني چيو ته سيوهڻ شريف مان چونڊيل سنڌ اسيمبلي ميمبر عبدالنبي شاهه پنهنجي سيٽ تان استعفيٰ ڏيئي ڇڏي آهي هن سمورين قانوني گهرجن جي مڪمل ٿيڻ کان پوءِ ان جي استعيفا منظور ڪئي آهي هاڻي ان جي سيٽ تي پيپلزپارٽي سيد مراد علي شآهه کي ٽڪيٽ ڏيڻ جو فيصلو ڪيو آهي جيڪو ماضي ۾ سنڌ اسيمبلي جو حصو رهي چڪو آهي. هن چيو ته هو پاڪستان تحريڪ انصاف جي اسيمبلي ميمبرن جي استعيفائن جي تصديق لاءِ جڏهن به انهن سان رابطو ڪيون ٿا ته اهي اچن ئي نٿا ڪوئي چوي ٿو ته هو اسلام آباد ۾ ڌرڻي ۾ موجود اهي ته ڪوئي پاڻ کي خيبرپختونخواهه جي دوري جو ڄاڻائي ٿو هن چيو ته کيس تحريڪ انصاف جي انهن ووٽرن تي رحم اچي ٿو جن کيس پنهنجو آواز بڻايو هو پر هاڻي اهي استعفيٰ ڏيئي رهيا آهن.