تازيون خبرون

Daily Archives: October 26, 2014

ايم ڪيو ايم جي جائز مسئلن جي حل لاءِ تيار آهيون، پر سوديبازي نه ڪنداسين: قائم علي شاهه

مٺي (رپورٽر) سنڌ جي وڏي وزير سيد قائم علي شاهه چيو آهي ته ايم ڪيو ايم جي جائز مسئلن جي حل لاءِ تيار آهيون پر ان سلسلي ۾ ڪابه سوديبازي نه ڪئي ويندي. هن چيو ته عمران خان غريبن جي ڳالهه ڪڏهن به ناهي ڪئي سندس تقريرن ۾ ته اميرن جو ئي ذڪر ٿيندو آهي، کيس ٿرپارڪر جو نالو به نٿو اچي. هن چيو ته ايم ڪيو ايم جي 2 صلاحڪار ۽ هڪ خاص معاون جي استعيفيٰ منظور ڪري رتي آهي، وزيرن جي استعيفيٰ جو اختيار گورنر وٽ آهي. ايم ڪيو ايم پهريون ڀيرو ناهي رُٺي ان کان پهريان به ڪيترائي ڀيرا اهڙي صورتحال پيدا ٿي چڪي آهي ۽ اسين هر ڀيري پرچائيندا آيا آهيون. خورشيد جيڪو ڪجهه به چيو اُن به تي معذرت به ڪئي آهي، سياست ۾ وقت تي دوست دشمن ۽ دشمن دوست بڻجي وڃي ٿو، انهيءَ لاءِ سمجهان ٿو ته ڳالهيون جو عمل جاري رهڻ گهرجي ايم ڪيو ايم جي جائز مسئلن جي حل لاءِ تيار آهيون پر انهيءَ سلسلي ۾ ڪابه سوديبازنه ڪئي ويندي.  سيد قائم علي شاهه چيو آهي ته پيپلز پارٽي جي باني شهيد ذوالفقار علي ڀٽي ٿر جي 5 هزار اسڪوائر ڪلوميٽر زمين هندستان کان آزاد ڪرائي، جيڪا اڄ ڪوئلي جهڙو سون ڏئي رهي آهي، سنڌ حڪومت ٿر جي ڏڪار متاثرن جي مدد لاءِ 2.5 ارب رپيا خرچ ڪيا آهن، اڃا به وڌيڪ خرچ ڪرڻ لاءِ تيار آهيون، جون 2015ع تائين جيترا به آر او پلانٽ ٿر لاءِ کپندا اوترا لڳائي ڏينداسين، اهڙن خيالن جو اظهار هن آچر ڏينهن ننگر پارڪر ۾ هڪ جلسي کي خطاب ڪندي ڪيو، وڏي وزير چيو ته ٿر ۾ ڏڪار آهي پر ٻارڙا خوراڪ جي کوٽ سبب فوت نه ٿا ٿين. بيماريون پاڻي جي ڪري به پيدا ٿين ٿيون، ماروئڙن جو وڏو مسئلو پيئڻ جو صاف پاڻي آهي، ان کي حل ڪرڻ لاءِ صاف مٺو پاڻي فراهم ڪرڻ وارا 300 آر او پلانٽ ڊسمبر 2014ع تائين مڪمل ڪيا ويندا، ان کان سواءِ ٿر جي جيتري به ضرورت آهي، آر او پلانٽ اوترا ڏنا ويندا، هن چيو ته ٿر جا مسئلا تمام گهڻا آهن، انهن جي حل لاءِ وقت لڳندو، وڏي وزير چيو ته پ پ پ جو فرض آهي عوام جي خدمت ڪرڻ، پوءِ حڪومت هجي يا نه پر خدمت جاري رهندي، پ پ پ جي حڪومت کان اڳ ٿر جو ڪهڙو حل هو ۽ هاڻي 7 سالن کان پوءِ ڪيترو ڪم ٿر ۾ ٿيو آهي، جيڪو توهان سڀني جي سامهون آهي، پ پ پ جي حڪومت کان اڳ ٻهراڙين ۾ ڪا به اسپتال يا صحت جي سهولت نه هئي، هن وقت ٿر جي سمورن وڏن ڳوٺن ۾ ڊسپينسريون قائم ڪري صحت جون سهولتون ڏنيون آهن، وڏي وزير چيو ته پ پ پ جهڙا اڳواڻ ڪنهن به پارٽي وٽ نه آهن، پ پ پ هميشه عوام ۽ جمهوريت لاءِ پنهنجي اڳواڻن جون قربانيون ڏنيون آهن، اڄ به پ پ پ چيئرمين بلاول ڀٽو زرداري ڏڪار هجي يا ٻوڏ هجي اتي متاثر وٽ پهچي ٿو وڃي. اسان جو پارٽي سربراهه ڏکويلن سان گڏ ويهي سندن حال معلوم ڪري ٿو، انهن جي مدد ڪري ٿو، جڏهن ته ٻئي پاسي نئين پاڪستان جي ڳالهه ڪندڙ ڪنٽينرن وارا ڪنٽينر کان ٻاهر نه ٿا نڪرن، انهن جي خالي زبان تي به ٿر جي ڏڪار متاثر عوام جو نالو به نه ٿو اچي، هن چيو ته رسڻ ۽ پرچڻ سياست جو حصو آهي، سنڌ جي حقن تي سوديبازي نه ٿيندي، متحده وارا ٺهن ته ٺهڻ لاءِ تيار آهيون، ان کان اڳ وڏي وزير تعلقه اسپتال جو دورو ڪري مريضن جي عيادت ڪئي، اتي ڊاڪٽرن جي کوٽ جو نوٽيس وٺندي سيڪريٽري صحت کي هدايت ڪئي ته جلد ڊاڪٽر مقرر ڪيا وڃن، ان موقعي تي وڏي وزير چيو ته اسپتالن کي اپ گريڊ ڪري وڌيڪ سهولتون ڏنيون وينديون، ان کان علاوه تعليم جي بهترين سهولتن لاءِ به وڌيڪ قدم کنيا ويندا، هن چيو ته تعليم کان سواءِ ٿر ۾ ترقي نه ايندي، ان موقعي تي صوبائي وزير علي مردان شاهه، دوست علي راهمون، ايم اين اي فقير شير محمد ٻلالاڻي، ايم پي اي مڪيش ڪمار ملاڻي ۽ مخدوم نعمت الله وڏي وزير سان گڏ هئا.

 

ڪراچي ۾ دهشتگردي جو منصوبو ناڪام، 9 دهشتگرد مارجي ويا

ملير( عرفان ميمڻ) نيشنل هاءِ وي جي ڀرسان پوليس آپريشن ۽ مقابلي ۾ 9 دهشتگرد مارجي ويا آهن. ايس ايس پي ملير راؤ انوار موجب نيشنل هاءِ وي تي محمد ميان ڳوٺ ۾ دهشتگردن جي موجودگيءَ جي اطلاع تي آپريشن ڪيو ويو، ڪارروائي ۾ 200 کان وڌيڪ اهلڪارن حصو ورتو. پوليس کي ڏسندي ئي دهشتگردن فائرنگ ڪئي ۽ دستي بمن سان حملو ڪيو، پوليس جي جوابي ڪارروائي ۾ 9 دهشتگرد مارجي ويا آهن، راؤانوار جو چوڻ هو ته دهشتگردن جي قبضي مان گذريل ڏينهن قائدآباد ۾ پوليس اهلڪارن کان ڦريل سرڪاري هٿيار ۽ بارودي مواد سان ڀريل هڪ رڪشو هٿ ڪيو آهي جنهن مان اندازو ٿئي ٿو ته دهشتگرد محرم الحرام جي موقعي تي دهشتگردي جو منصوبو بڻائي رهيا هئا.

 

وزيراعظم سان شهبازشريف جي ملاقات، ملڪ جي جملي صورتحال تي ڳالهيون

لاهور (م.ڊ) وزيراعظم نوازشريف سان محمد شهباز شريف ملاقات ڪئي جنهن ۾ محرم ۾ امن امان قائم ڪرڻ لاءِ ورتل اڳواٽ اپاءُ پنجاب ۾ جاري ترقياتي منصوبن ٻوڏ متاثرن کي امداد فراهم ڪرڻ جي ٻئي مرحلي، وفاقي ۽ صوبائي ڪابينه ۾ واڌ ۽ ردوبدل سميت ملڪ جي جملي صورتحال تي خيالن جي ڏي وٺ ڪئي گذريل ڏينهن جاتي امره رائونڊ ۾ ٿيل ملاقات ۾ شهبازشريف وزيراعطم نوازشڙيف کي محرم ۾ پوليس سميت ٻين قانون لاڳو ڪندڙ ادارن پاران امن امان جي صورتحال کي ڪنٽرول رکڻ لاءِ ورتل اپائن جي حوالي سان تفصيلي بريفنگ ڏيندي آگاهه ڪيو ته پاڪ فوج ۽ رينجرز جا دستا ڪوئڪ ريسپانس فورس طور مقرر هوندا.

 

ڌرڻن تي اربين رپيا خرچ ڪرڻ باوجود ان جو ڪو مثبت نتيجو ناهي نڪتو: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته ڌرڻن تي اربين رپيا خرچ ڪرڻ باوجود ان جو ڪو مثبت نتيجو ناهي نڪتو. پاڪستان ٽيليويزن (پي ٽي وي) سان ڳالهائيندي هن چيو ته پاڪستان تحريڪ انصاف جو سربراهه عمران پارليامينٽ ۾ پنهنجو موقف پيش ڪري سگهي ٿو. هن چيو ته عمران خان جمهوري طريقن بدران طاقت جي ذريعي اشوز حل ڪرڻ چاهي ٿو جڏهن ته حڪومت ڳالهين جي لاءِ پنهنجا دروازا بند ناهن ڪيا ۽ اپوزيشن جرڳو به ان سلسلي ۾ پنهنجون ڪوششون ڪري رهيو آهي. پي ٽي آءِ جي قومي اسيمبلي ميمبرن جي استعيفائن بابت هڪ سوال جي جواب ۾ هن چيو ته قومي اسيمبلي جي اسپيڪر جو اهو فرض آهي ته ڪنهن به ميمبر پاران استعيفيٰ ڏيڻ جي تصديق کانپوءِ ان جي استعيفيٰ منظور ڪري، عمران خان پنهنجي پارٽي جي قومي اسيمبلي ميمبرن کي اسپيڪر جي چيمبر ۾ انفرادي طور تي وڃڻ کان روڪي ڇڏيو آهي جيڪي اجتماعي طور تي اسپيڪر سامهون پيش ٿيڻ چاهين ٿا. قومي اسيمبلي جي ڪنهن به ميمبر کي پنهنجي استعيفيٰ جي وضاحت پيش ڪرڻ جو آزاداڻو ماحول فراهم ڪرڻ گهرجي ته جيئن هو اهو ٻڌائي سگهي ته هو پنهنجي مرضي سان استعيفيٰ ڏئي رهيو آهي يا دٻاءُ تحت ائين ڪري رهيو آهي. ڀارت ۽ ايران پاران سرحدن تي فائرنگ جي حوالي سان هڪ سوال جي جواب ۾ هن چيو ته پاڪستان ان معاملي تي سفارتي ڪوششون ڪري رهيو آهي جڏهن ته پاڪ فوج به لائين آف ڪنٽرول ۽ ورڪنگ بائونڊري تي ڀارتي فوج کي منهن ٽوڙ جواب ڏئي رهي آهي. وفاقي وزير چيو ته ڪيترن ئي موقعن تي سمورين پارلياماني پارٽين عمران خان کي درخواست ڪئي ته موجوده حالتن ۾ قومي مفادن کي ترجيح ڏني وڃي ته جيئن ملڪي معيشت بهتر ٿي سگهي. هن چيو ته حڪومت معيشت جي استحڪام جي لاءِ داخلي استحڪام جي ڪوشش ڪري رهي آهي. هن پاڪستان جي شموليت سان ايشيائي انفراسٽرڪچر انويسٽمينٽ بئنڪ قائم ڪرڻ کي ساراهيو.

 

ايم ڪيو ايم اڳواڻن جي چڙ ڏياريندڙ بيانن ۽ تقريرن تي پ پ اڳواڻ صبر ۽ تحمل جو مظاهرو ڪري رهيا آهن: شرجيل ميمڻ

ڪراچي (اسٽاف رپورٽر/اين اين آءِ) سنڌ جي صوبائي وزير شرجيل انعام ميمڻ چيو آهي ته ايم ڪيو ايم جي اڳواڻن جي چڙ ڏياريندڙ بيانن ۽ تقريرن تي پيپلزپارٽي جي اڳواڻ صبر ۽ تحمل جو مظاهرو ڪري رهيا اهن پنهنجي بيان ۾ شرجيل چيو ته اسان دليلن سان انهن ڪوڙن ۽ بي بنياد الزامن ۽ بيانن جو جواب ڏيئي سگهون ٿا پر پارٽي جي اعلي قيادت جي هدايت تي صبر جو مظاهرو ڪري رهيا آهيون هن چيو ته پيپلزپارٽي سياسي بلوغت ۽ باشعور هجڻ جو مظاهرو ڪري رهي آهي ۽ نٿي چاهي ته ماحول خراب ٿئي سنڌ ۾ رهندڙ سمورا رهواسي پاڻ ۾ ڀائپي سان رهن ٿا پيا شرجيل ميمڻ چيو ته سياسي مفاد حاصل ڪرڻ ۽ سستي سياسي شهرت لاءِ انهن کي پاڻ ۾ ويڙهائڻ جي سازش کي ڪامياب نه ٿيڻ ڏينداسين. هن چيو ته لفظ مهاجر جيڪڏهن متحده کي ايترو پيارو آهي ته پوءِ ماضي ۾ آفاق احمد جي پارٽي ۾ جهنڊي تي لکيل لفظ مهاجر کي ساڙي ان جي تذليل ڇو ڪئي ويندي هئي.

 

سنڌ جي ورهاڱي واري سازش کي ڪنهن به صورت ۾ برداشت نه ڪنداسين:خورشيد شاهه

سکر (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته رسول الله جي شان کي سياسي مقصدن لاءِ استعمال ڪرڻ گستاخي آهي مذهب ۽ سياست ۾ فرق ڪرڻ گهرجي اردو ڳالهائيندڙ عوام اسان جو ڀاءَ آهي اسان سڀ سنڌي آهيون ڪنهن کي صوبو ٽوڙڻ جي اجازت ڪڏهن به نه ڏينداسين پيپلزپارٽي نوازشريف جي حڪومت کي سپورٽ نه پئي ڪري پاڪستان جي خودمختياري کي بچائي رهيا آهيون منهنجو ماضي منهنجن عقيدن ۽ خيالن جي عڪاسي ڪري ٿو ان بابت ڪنهن کان سرٽيفڪيٽ وٺڻ جي ضرورت نه آهي آچر تي ميڊيا سان ڳالهائيندي خورشيد شاهه چيو ته ملڪي سياست ۾ منهنجو وڏو ڪردار آهي سازشن جي باوجود مون کي عوام 8 ڀيرا چونڊرايو سنڌ اسان جي سڃاڻپ آهي ۽ نفرتن سان ملڪ کي نقصان ٿيندو سيد خورشيد شاهه چيو ته پيپلزپارٽي نوازشريف جي حڪومت کي سپورٽ نه پئي ڪري پر اسان پاڪستان جي خودمختياري کي بچائي رهيا آهيون هن چيو ته سنڌ جو عوام ڪڏهن به سنڌ ورهائڻ نه ڏيندو. هن چيو ته منهنجو تعلق حضور اڪرم صلعم جي خاندان سان آهي ۽ ڪوئي به مسلمان حضور صلعم جي گستاخي جو سوچي به نٿو سگهي مذهب ۽ سياست ۾ فرق رکڻ گهرجي حضور پاڪ جي شان کي سياسي مقصدن لاءِ استعمال ڪرڻ گستاخي آهي سيد خورشيد شاهه چيو ته ايم ڪيو ايم کي سياست اچي ٿي هو پهريان مهاجر قومي موومينٽ هئا پوءِ سمجهي ويا ته ڪراچي ۾ ويهي سياست نٿا ڪري سگهون ۽ بعد ۾ لفظ مهاجر مٽائي پارٽي جو نالو متحده قومي موومينٽ رکي ڇڏيو اپوزيشن ليڊر سيد خورشيد شاهه چيو ته سياست کي مذهب کان الڳ ڪيو وڃي ۽ ڪائي ٻي ڳالهه ڪرڻي آهي ته کلي ڪئي وڃي سيد خورشيد شاهه چيو ته مهاجر يا سنڌي ته لفظ اهن سنڌ ۾ مختلف علائقن مان آيل ماڻهو آباد آهن جيڪي هاڻي پاڻ کي سنڌي چون ٿا ۽ هاڻي سنڌ ئي انهن جي سڃاڻپ آهي خورشيد شاهه چيو ته نفرتون ڇڏيون وڃن انهن سان نقصان ٿيندو هن چيو ته ڪراچي ۾ هڪ ڪروڙ کان وڌيڪ ٻيون قومون آباد اهن هن چيو ته سنڌ هڪ تاريخ آهي ڪيترائي پنجابي بلوچ ۽ پٺاڻ سنڌ ۾ رهن ٿا سنڌ هتي رهندڙن جي سڃاڻپ آهي ڪوئي پنهنجي سڃاڻپ ختم نٿو ڪري سيد خورشيد شاهه واضح ڪيو ته مهاجر لفظ تذڪره تفسير هنڌ کان پوءِ پاڪستان ايندڙن لاءِ ورتو ويو هو ۽ ان جي بيان کي انصار مدينه ۽ مهاجرين مڪه سان ملهائڻ نامناسب آهي هن چيو ته ان جي بيان کي غلط انداز ۾ پيش ڪيو ويو ۽ ڪوئي به مسلمان اهڙي ڳالهه ڪرڻ جو سوچي به نٿو سگهي منهنجو ماضي، منهنجا عقيده منهنجن خيالن جي عڪاسي ڪن ٿا ۽ ان بابت ڪنهن سرٽيفڪيٽ وٺڻ جي ڪائي ضرورت نه آهي.

 

ايم ڪيو ايم جو ڪارو ڏينهن، ڪراچي سميت مختلف شهرن ۾ ڪاروبار بند، عوام نون صوبن جي حق ۾ فيصلو ڏئي ڇڏيو : الطاف حسين

لنڊن/ڪراچي/حيدرآباد(نمائندن وٽان) متحده قومي موومينٽ پ پ اڳواڻ ۽ قومي اسيمبليءَ ۾ اپوزيشن ليڊر خورشيد شاهه جي بيان خلاف ڪارو ڏينهن ملهائي رهي آهي، ڪراچيءَ سميت مختلف شهرن ۾ ڪاروباري زندگي مفلوج بڻيل آهي. خورشيد شاهه پاران مهاجر لفظ کي گار قرار ڏيڻ واري بيان خلاف ايم ڪيو ايم سڄي ملڪ ۾ ڪارو ڏهاڙو ملهائي رهي آهي. ڪراچي ۾ روڊن تي پبلڪ ٽرانسپورٽ نه هئڻ برابر آهي جڏهن ته ڪيترن ئي علائقن ۾ سي اين جــِي اسٽيشنز ۽ پيٽرول پمپس بند هئڻ سبب شهرين کي ڏکيائيون پيش اچي رهيون آهن. متحده جي ڪاري ڏينهن تي ڪراچي ٽرانسپورٽ اتحاد پاران پبلڪ ٽرانسپورٽ بند رکي وئي آهي جڏهن ته واپارين به پنهنجو ڪاروبار بند رکيو آهي. ايم ڪيو ايم پاران منجهند جو ٽئين وڳي شاهراهه قائدين ۽ شاهراهه فيصل کي ملائيندڙ روڊ تي احتجاجي مظاهرو به ڪيو ويندو. متحده قومي موومينٽ جي ڪاري ڏينهن تي حيدرآباد ۽ نوابشاهه ۾ جزوي طور ڪاروبار بند آهي جڏهن ته ميرپورخاص، ڊگهڙي ۽ ٽنڊي الهيار ۾ به ڪاروباري زندگي مفلوج بڻيل آهي. واضح رهي ته 17 آڪٽوبر تي خورشيد شاهه پاران مهاجر لفظ کي گار قرار ڏيڻ خلاف ايم ڪيو ايم سنڌ سرڪار توڙي آزاد ڪشمير حڪومت سان اتحاد ختم ڪري ڇڏيو آهي ۽ خورشيد شاهه کي اپوزيشن ليڊر جي عهدي تان هٽائڻ جو به مطالبو ڪري رهي آهي ايم ڪيو ايم جي سوڳ واري سڏ تي ڪراچي جي صدر مارڪيٽ، لياقت آباد، فيڊرل بي ايريا، نارٿ ناظم آباد، گوليمار، گرومندر سميت اڪثر علائقن ۾ ڪاروبار بند رکيو ويو آهي ۽ ٽرئفڪ پڻ روڊن تان غائب آهي، جڏهن ته لياري سميت ڪراچي جي مختلف يونيورنيورسٽي ۾ اڄ رٿيل پري انٽري ٽيسٽ پڻ ملتوي ڪئي وئي آهي. هڙتال سبب ڪراچي ۾ پيٽرول پمپس، سي اين جي اسٽيشنز ۽ ٽرانسپورٽ به بند آهي، جڏهن ته مختلف علائقن ۾ ٽائر ساڙي احتجاج پڻ ڪيو ويو آهي.. ايم ڪيو ايم طرفان شاهراه قائدين تي احتجاجي مظاهرو ڪري ڌرڻو هنيو ويندو.. حيدرآباد جي لطيف آباد، صدر مارڪيٽ، اسٽيشن روڊ ۽ لبرٽي چوڪ سميت مختلف علائقن ۾ ڪاروبار بند رکيو ويو آهي، جڏهن ته روڊن تي ٽرئفڪ پڻ معمول کان گھٽ آهي.. ميرپورخاص جي مختلف علائقن ۾ به ڪاروبار بند رکيو ويو، شهر جا اڪثر روڊ رستا ويران پيل آهن.. هوڏانهن، سکر، ٽنڊوالهيار، نوابشاهه، شهدادپور، ٽنڊو آدم ۽ نئون ڪوٽ جي مختلف علائقن ۾ به ڪاروبار بند رکيو ويو آهي. ٻئي طرف ايم ڪيو ايم جي سربراهه الطاف حسين حيدرآباد ۾ ايم ڪيو ايم جي زونل ڪميٽي جي ميمبرن ۽ ذميوارن سان ڳالهائيندي چيو آهي ته پيپلزپارٽي جي تعصب رکندڙ جاگيردارن وڏيرن ۽ اردو ڳالهائيندڙ مهاجرن کي ڪڏهن به تسليم ناهي ڪيو ۽ اُن تعصب ۽ نفرت جي بنياد تي 1973ع ۾ رکي. پيپلز پارٽي پنهنجو پاڻ کي قومي پارٽي چورائڻ جي دعواءِ ڪري ٿي پر تاريخ شاهد آهي ته پيپلزپارٽي هر دور ۾ پاڪستان ڪارڊ نه پر هميشه سنڌ ڪارڊ استعمال ڪيو. هن چيو ته اڄ نه رڳو ڪراچي پر حيدرآباد، سکر، ميرپورخاص،نوابشهه، سانگهڙ، ٽنڊوآدم، ٽنڊوالهيار، خيرپور، جيڪب آباد، لاڙڪاڻي ۽ ڪشمور سميت سڄي سنڌ جي سمورن سنڌين ۽ اردو ڳالهائيندڙن ايم ڪيو ايم جي اپيل تي پيپلزپارٽي جي ظلم حڪمراني، تعصب ۽ نرت خلاف ڀرپور ڪارو ڏهاڙو ملهائي فيصلو ٻڌائي ڇڏيو آهي ته هاڻي سنڌ ۽ سڄي ملڪ ۾ نوان انتظامي يونٽس ۽ صوبن جي قيام جي ضرورت آهي هن چيو ته هاڻي سنڌي ۽ اردو ڳالهائيندڙن جو اُهو متفقه فيصلو آهي ته اُهي گڏجي سنڌ صوبي مان ظلم ۽ فرسوده جاگيرداراڻي، وڏيراڻي نظام ۽ ڪرپٽ ڪلچر جو خاتمو ڪن. الطاف حسين چيو ته ڀرپور ۽ پرامن ڪارو ڏهاڙو ملهائڻ تي ڪراچي سميت سڄي سنڌ جي عوام کي خراج تحسين پيش ڪريان ٿو.

 

سنڌ امڙ آهي، اُن کي ڪير به ورهائي نٿو سگهي: تاج حيدر /قادر پٽيل

ڪراچي (اسٽاف رپورٽر) پيپلزپارٽي جي اڳواڻ عبدالقادري پٽيل چيو آهي ته لبرل چورائيندڙ پارٽي مذهبي انتهاپسندي اختيار ڪري ورتي آهي تاج حيدر چيو آهي ته ڏڦيڙ پکيڙڻ درست ناهي. ڪراچي ۾ پريس ڪانفرنس ڪندي پيپلزپارٽي جي اڳواڻ عبدالقادري پٽيل چيو آهي ته سياسي انتشار پيدا ڪرڻ جي ڪوشش ڪئي پئي وي، خورشيد شاهه دل آزاري تي پنهنجي بيان تي معذرت به ڪئي آهي. هن چيو ته ماضي ۾ ماڻهن کي قوميت جي نالي تي ويڙهايو ويندو، لبرل هئڻ جي دعويٰ ڪندڙ پارٽي مذهبي انتهاپسندي جي ڳالهه ڪري رهي آهي. هن چيو ته سنڌ امڙ آهي اُن کي ڪير به ورهائي نٿو سگهي. تاج حيدر جو چوڻ هو ته اردو سنڌي لکندڙن ۾ فرق نٿا ڪن. مهاجر سنڌ جي ملڪيت ۾ شريڪ آهن، ڪرائيدار ناهن، هوا ڏيڻ سان ڇڪتاڻ وڌندي، نفرتون نفرتن کي وڌائين ٿيون. انهيءَ موقعي تي اين ڊي ان چيو ته دهشتگردي کي هوا ڏيڻ جي ڪوشش ڪئي پئي وڃي.

 

تحريڪ انصاف ۾ شموليت بعد احساس ٿي ويو هو ته ان پارٽي جو مزاج منهنجي طبيعت سان هم آهنگ ناهي: جاويد هاشمي

اسلام آباد(بيورو) تحريڪ انصاف جي مستعفي صدر ۽ سينيئر سياستدان مخدوم جاويد هاشمي چيو آهي ته تحريڪ انصاف ۾ شامل ٿيڻ کان پوءِ پهرين ڏينهن ئي مون کي احساس ٿي ويو هو ته ان پارٽي جو مزاج منهنجي طبيعت سان ٺهڪندڙ ناهي، مان پي ٽي آءِ جون اوڻايون ختم ڪرڻ جي تمام گهڻي ڪوشش ڪئي.ڪڏهن گونگو پهلوان بڻجي نه ويٺس، عمران /ڏسوخان لنڊن مان واپس اچي مون کي ٻڌايو هو ته سندس ڊاڪٽر طاهر اقادري سان ملاقات ٿي آهي، جڏهن اسان ڌرڻو ڏينداسين ته طاهر القادري جا ڪارڪن اسان سان ملي ويندا. اهڙن خيالن جو اظهار هن پنهنجي هڪ انٽرويو ۾ ڪيو. هن چيو ته مون عمران خان کي چيو ته اسان ان طرح جون حالتون پيدا ڪيون ته مارشل لا اچي سگهي ٿو جنهن تي عمران چيو ته اول ته اسلام آباد وڃڻ جي نوبت ئي نه ايندي، نواز شريف جي حڪومت ان کان اڳ ئي ختم ٿي ويندي ۽ جيڪڏهن اسلام آباد ۾ ڌرڻو ڏيڻو به پيو ته نئون چيف جسٽس ان صورتحال جو پاڻ مرادو نوٽيس وٺندو ۽ حڪومت جي برطرفي ۽ ٽيڪنو ڪريٽس جي حڪومت قائم ڪئي ويندي، پي ٽي آءِ جي ڪنهن اجلاس ۾ نواز شريف جي استعيفيٰ جو مطالبو غور هيٺ نه آيو، اهو مطالبو عمران ڪنٽينر تي بيهي اوچتو ڪري ڇڏيو، ضمني چونڊن ۾ شڪست کان پوءِ پنهنجي ان پهرين تفصيلي انٽرويو ۾ جاويد هاشمي انڪشاف ڪيو ته ڪجهه اڳوڻا فوجي آفيسر ۽ ڳجهن ادارن جا طاقتور عنصر عمران خان جي پويان بيٺل هئا، منصوبو اهو هو ته سپريم ڪورٽ پاڻ مرادو نوٽيس وٺي سرچارج جي نالي تي حڪومت کي برطرف ڪري ڇڏيندي ۽ نين چونڊن لاءِ ٽيڪنوڪريٽس جي حڪومت قائم ڪئي ويندي، هن چيو ته وزيراعظم نواز شريف کان استعيفيٰ طلب ڪرڻ ڌرڻي جو بنيادي مقصد نه هو، عمران خان پارٽي جي اجلاس ۾ نه ان جي منظوري ورتي، نه ذڪر ڪيو ۽ نه ئي ڪو اشارو ڏنو، پارٽي جو رڳو هڪ ئي مطالبو هو ته ڌرڻي وسيلي ايندڙ چونڊن کي ڌانڌلي کان پاڪ رکڻ لاءِ اڻ ڌري اليڪشن ڪميشن جوڙائي وڃي، وزيراعظم کان استعيفيٰ جو مطالبو هڪ ڏينهن ڪنٽينر تي بيهي عمران خان اوچتو ئي ڪري ڇڏيو، پارٽي ۾ اڳ ۾ ئي اهو طئي ٿيو هو ته ڊي چوڪ ۾ جلسو ڪري واپس اچبو، جنهن بعد عمران چوڻ شروع ڪري ڇڏيو ته ٻه يا ٽي ڏينهن ڌرڻي واري هنڌ تي رهي سگهون ٿا، جنهن تي مون اعتراض ڪيو ته توهان اسلام آباد ۾ قيام کي ڊيگهه ڏئي رهيا آهيو، جڏهن ته پارٽي ان جي منظوري ناهي ڏني، جنهن تي عمران خان چيو ته آخر ڪار ماڻهن ۾ به ته جوش ۽ جذبو پيدا ڪرڻو آهي، ڌرڻي جا مقصد هر گز اهي نه هئا، جن جو اظهار اڄ پي ٽي آءِ ڪري رهي آهي، هن چيو ته ڌرڻي جا حدف ڏينهون ڏينهن تبديل ٿيندا رهيا، عمران خان پارٽي جي ڪور ڪميٽي آڏو سول نافرماني جي ڳالهه ڪئي ته سڀني ان جي مخالفت ڪئي پر عمران ڪنٽينر تي ويو ته اتي بيهي سول نافرماني تحريڪ شروع ڪرڻ جو اعلان ڪري ڇڏيو، پارٽي ۾ طئي ڪجهه هڪ ٿيندو رهيو ۽ اعلان وري ٻيا ٿيندا رهيا، هڪ ڏينهن عمران خان سمورن پارليامينٽيرينز کي سڏايو ۽ انهن کي استعيفيٰ ڏيڻ جو حڪم ڏنو، اهو ٻڌي سڀ پريشان ٿي ويا، خيبر پختونخواهه جي ايم اين ايز وڏي واڪي استعيفيٰ ڏيڻ کان انڪار ڪري ڇڏيو، مون کين سمجهايو هو ته ائين نه ڪريو ان سان بغاوت ٿي ويندي ۽ پارٽي ورهائجي ويندي، هن چيو ته وزيراعظم هائوس ڏانهن پيش قدمي نه ڪرڻ جو فيصلو اتفاق راءِ سان ڪيو ويندو پر عمران خان چيو ته پارٽي جو مان اڳواڻ آهيان ۽ ڪو به فيصلو ڪري سگهان ٿو، مون ايتري قدر چئي ڏنو ته مان پاڪستان جو آئين هڪ پاسي رکي توهان سان ساٿ ڏيڻ لاءِ تيار آهيان، توهان چوندئو ته کوهه ۾ به ٽپو ڏئي ڇڏيندس پر هي نوجوان اسان جو مستقبل آهن، خدا جي واسطي انهن کي کوهه ۾ نه اڇلايو جنهن تي عمران خان چيو ته جيڪڏهن ته توهان کي وڃڻو آهي ته وڃي سگهو ٿا، اهو ٻڌڻ بعد مان هيٺ آيس، شيرين مزاري، شفقت محمود ۽ عارف علوي مون کي چيو ته عمران خان فيصلي تي نظرثاني ڪندو توهان انتظار ڪريو، مان ڪجهه دير انتظار ڪيو پر عمران مون وٽ نه آيو ۽ هن وزيراعظم هائوس ڏانهن وڌڻ جو اعلان ڪري ڇڏيو ۽ مان واپس اچي ويس. هڪ سوال جي جواب ۾ جاويد هاشمي چيو ته ڌرڻن جو ڪو به مستقبل ناهي. هن چيو ته تحريڪ انصاف ۾ شموليت لاءِ ڳجها اشارا رڳو هڪ ئي شخص ڏيندو هو جنهن جو نالو جنرل پاشا آهي، ڪيترائي ماڻهو پاشا جي اشاري تي ئي تحريڪ انصاف ۾ شامل ٿيا، هن چيو ته جيڪڏهن هاڻي مارشل لا لڳو ته هي ملڪ ٽڪرا ٽڪرا ٿي ويندو، ان سوال جي جواب ۾ ته مسلم ليگ (ن) توهان کي پارٽي ۾ ٻيهر شامل ٿيڻ جي دعوت ڏني ته ڇا اوهان قبول ڪندا؟ جي جواب ۾ هاشمي چيو ته ان حوالي سان ڪجهه چوڻ وقت کان اڳ آهي.

 

خيبر ايجنسي ۾ جيٽ جهازن جي بمباري، 18 دهشتگرد مارجي ويا

خيبر ايجنسي (مانيٽرنگ ڊيسڪ) خيبر ايجنسي ۾ آپريشن ”خيبر ون“ ڪاميابي سان جاري آهي، جنهن دوران سڪيورٽي فورسز جي ڪاروائي ۾ 18 دهشتگرد مارجي ويا آهن. باڙا جي مختلف علائقن ملڪ دين خيل ۽ شلوبر ۾ سڪيورٽي فورسز ڪارروائي ڪئي. سڪيورٽي فورسز طرفان جيٽ جهازن ذريعي بمباري ڪئي وئي، جنهن ۾ 18 دهشتگرد مارجي ويا. آءِ ايس پي آر ڪاروائي جي تصديق ڪندي چيو آهي ته جيٽ جهازن جي بمباري ۾ دهشتگردن جا 5 ٿاڪ به تباهه ٿي ويا آهن. آءِ ايس پي آر جي جاري ڪيل بيان ۾ چيو ويو آهي ته پاڪ فوج جي هوائي ڪاروائي ۾ دهشتگردن جو بارودي مواد به ڌماڪي سان تباهه ٿي ويو.