تازيون خبرون

Daily Archives: October 22, 2014

پي ٽي آءِ ميمبرن جون استعيفائون منظور نه ڪيون وڃن:پارلياماني اڳواڻن جي وزيراعظم کي صلاح

اسلام آباد (بيورو) پارلياماني اڳواڻن، ڌرڻو ختم ڪرڻ تي طاهرالقادري کي ڀليڪار ڪندي وزيراعظم ميان نواز شريف کي مشورو ڏنو آهي ته تحريڪ انصاف جي ميمبرن جون استعيفائون منظور نه ڪيون وڃن. وزيراعظم ميان نواز شريف جي صدارت هيٺ پارلياماني اڳواڻن جو مشاورتي اجلاس ٿيو. اجلاس ۾ مخالف ڌر جي اڳواڻ سيد خورشيد شاهه، فاروق ستار، اعجاز الحق، احسن اقبال، خواجا سعد رفيق، آفتاب شيرپائو، محمود خان اچڪزئي ۽ ٻين پارلياماني اڳواڻن شرڪت ڪئي. پارلياماني اڳواڻن جي اجلاس ۾ طاهرالقادري کي ڌرڻو ختم ڪرڻ تي ڀليڪار ڪيو ويو. اجلاس دوران پارلياماني اڳواڻن وزيراعظم ميان نواز شريف کي مشورو ڏنو ته پي ٽي آءِ جي ميمبرن جون استعيفائون منظور نه ڪيون وڃن. پارلياماني اڳواڻن جي اجلاس ۾ جاويد هاشمي جي حمايت نه ڪرڻ تي جي يو آءِ سربراهه مولانا فضل الرحمان تي ڇتي تنقيد پڻ ڪئي وئي. اجلاسدوران اهو به فيصلو ڪيو ويو ته چيف اليڪشن ڪمشنر جي مقرري صلاح مشوري کانپوءِ ڪئي ويندي، اجلاس ۾ وزيراعظم محمد نوازشريف پاڪستان کي خوشحال ۽ ترقي يافته ملڪ بنائڻ لاءِ سمورين سياسي پارٽين جي ڪردار جي ضرورت تي زور ڏيندي چيو آهي ته سمورين سياسي مسئلن کي پارليامينٽ جي فورم تي بحث هيٺ آڻي حل ڪيو وڃي حڪومت اپوزيشن جماعتن جي شموليت سان مشاورتي عمل جي ذريعي گڊ گورننس يقيني بنائڻ لاءِ ڪوشان آهي ملڪ جي معيشت بهتر ۽ غريبن کي رليف فراهم ڪرڻ حڪومت جي پهرين ترجيحن ۾ شامل آهي، نوازشريف چيو ته پاڪستان خطي جي سمورن ملڪن سان ڀائراڻا لاڳاپا چاهي ٿو هن چيو ته اسان جو هٿياربند فوجون اتر وزيرستان ۾ دهشتگردن جي خلاف بهادري سان وڙهي رهيون آهن .

 

مذهب جي نالي تي دهشتگردي اسلام خلاف آهي: ضابطئه اخلاق جاري

اسلام آباد (بيورو) پاڪستان علماءِ ڪائونسل جي سپريم ڪائونسل محرم الحرام دوران ضابطئه اخلاق جاري ڪري ڇڏيو آهي جنهن ۾ چيو ويو آهي ته مذهب جي نالي تي دهشتگردي، رتوڇاڻ اسلام جي خلاف آهي ڪوئي مقرر خطيب ذاڪر يا واعظ پنهنجي تقرير ۾ نبي سڳورن، البيت پاڪ، اصحابه رسول، خلفاءَ راشدين ۽ امام مهدي جي نه توهين ڪندو نه تنقيص ڪندو اذان ۽ عربي جي خطبي کان علائقو لائونڊ اسپيڪر تي مڪمل پابندي هوندي سمورن مذهبن ۽ مڪتبه فڪر جا ماڻهو پنهنجن اجتماعن لاءِ مقامي انتظاميه کان اجازت وٺندا شر ڦهلائيندڙ ۽ دل آزاري ڪندڙ خطابن پمفليٽن تحريرن جي اشاعت تقسيم ۽ ترسيل نه ڪئي وڃي اربع تي پاڪستان علماءَ ڪائونسل جي سپريم ڪائونسل جو چيئرمين حافظ محمد طاهر محمود اشرفي جي صدارت هيٺ منعقد ٿيو علماءِ ۽ مشائخ ڪنوينشن کي حافظ محمد طاهر محمود اشرفي صاحبزاده زاهد محمود قاضمي مولانا شريف هزاروي، مولانا سيد چراغ الدين شاهه مولانا صاحبزاده سيد سعيد شاهه گجراتي حافظ حسين احمد مولانا محمد قاسم توحيدي، مولانا محمد امجد محمود علامه يونس ڪشميري، مولانا نصير احمد مروت، مولانا محمد خان لغاري ۽ ٻين خطاب ڪيو.

 

پهرين کان 12 محرم الحرام تائين صوبي جي سمورن ضلعن ۽ واٽر بورڊ ۾ ايمرجنسي لاڳو ڪئي وڃي: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ جي صدارت ۾ بلديات کاتي جي اعليٰ آفيسرن جو اجلاس اربعا تي ٿيو. اجلاس ۾ محرم الحرام جي حوالي سان صوبائي وزير کي بريفنگ ڏني وئي. ان موقعي تي صوبائي وزير شرجيل انعام ميمڻ چيو ايڊمنسٽريٽر ڪراچي سميت صوبي جي سمورن ضلعن جي ايڊمنسٽريٽرن، ميونسپل ڪمشنرن، ٽائون ميونسپل ڪمشنرن کي هدايتون ڏنيون آهن ته پهرين کان 12 محرم الحرام تائين صوبي جي سمورن ضلعن ۽ واٽر بورڊ ۾ ايمرجنسي لڳائي وڃي ۽ سموري عملي جون موڪلون رد ڪيون وڃن. شرجيل ميمڻ اجلاس دوران هدايتون ڏنيون ته محرم الحرام جي شروعات کان اڳ ئي مجلسن ۽ جلوسن جي رستن تي ڪارپيٽنگ ۽ صفائي وارن ڪمن کي مڪمل ڪيو وڃي. جڏهن ته ڪراچي سميت پوري سنڌ ۾ محرم الحرام جي مجلسن ۽ جلوسن ۾ شريڪ ٿيندڙ ماڻهن لاءِ پيئڻ جي صاف پاڻي ۽ ٻين انتظامن کي يقيني بڻايو وڃي. هن هدايتون ڏنيون ته صوبي ۾ اسٽريٽ لائيٽس، جلوسن ۽ مجلسن جي آسپاس خصوصي لائٽن جو انتظام ڪيو وڃي. سمورن امام بارگاهن ۽ مجلسن جي رستن تي روزاني جي بنياد تي صفائي کي يقيني بڻايو وڃي. شرجيل ميمڻ ايڊمنسٽريٽر ڪراچي سميت سمورن ضلعن جي ايڊمنسٽريٽرن، ميونسپل ڪمشنرن، ٽائون ميونسپل ڪمشنرن کي سختي سان هدايتون ڏنيون آهن ته سمورا آفيسر پنهنجن پنهنجن علائقن ۾ محرم الحرام کان اڳ انتظامن کي مڪمل ڪن. هن ايم ڊي واٽر بورڊ کي ڪراچي ۾ خاص ڪري مجلسن ۽ جلوسن جي رستن ۾ سيوريج جي لائنن کي فوري طور تي درست ڪري اتان پاڻي جي رواني کي بهتر بڻائڻ جون به هدايتون ڏنيون آهن. اجلاس کي خطاب ڪندي صوبائي وزير چيو ته سنڌ حڪومت ۽ خاص ڪري وڏي وزير سيد قائم علي شاهه پاران محرم الحرام دوران جتي امن امان جي صورتحال کي فول پروف بڻائڻ جي هدايت ڏني آهي اتي محرم الحرام دوران ڪراچي سميت صوبي ۾ ٿيندڙ مجلسن ۽ جلوسن کي به سمورين سهولتن جي فراهمي جي به هدايت ڪئي آهي. هن چيو ته صوبي ۾ اڳ ئي ماهوار صفائي ۽ قبضن خلاف مهم جاري آهي ۽ ان سلسلي ۾ بلديات کاتي جتي سالن جا سال پيل ڪچري کي ٺڪاڻي لڳايو آهي اتي غيرقانوني طور تي عام ڀلائي وارن  پلاٽن، راندين جي ميدانن ۽ سرڪاري زمينن تان ناجائز قبضا به ختم ڪرايا آهن. جڏهن ته واٽر بورڊ پاران شهر ۾ هلندڙ 90 غيرقانوني واٽر هائيڊرينٽ مان 84 غيرقانوني هائيڊرينٽ جو خاتمو ڪيو ويو آهي ۽ باقي ٻين خلاف آپريشن جاري آهي. هن چيو ته محرم الحرام دوران مجلسن ۽ جلوسن کي سمورين سهولتن جي فراهمي لاءِ سمورن ذميوارن کي هدايتون جاري ڪيون ويون آهن ۽ ان سلسلي ۾ سمورن آفيسرن تي واضح ڪيو ويو آهي ته محرم الحرام جي شروعات کان اڳ سمورا انتظام مڪمل ڪيا وڃن ۽ ان سلسلي ۾ ڪنهن قسم جي ڪوتاهي کي برداشت نه ڪيو ويندو.

 

لنڊن پلان حقيقت آهي، نئون نه قائداعظم جو پاڪستان گهرجي: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيداحمد شاهه چيو آهي ته اسان کي ڪوئي نئون نه پر قائداعظم جو پاڪستان گهرجي لنڊن پلان حقيقت آهي جمهوريت ۾ هڪٻئي جي مينڊيٽ جو احترام ڪرڻ گهرجي سنڌين جي آزادي جي ڳالهه ڪندڙ عمران خان پهريان خيبرپختونخواهه جي عوام کي آزاد ڪرائي پيپلزپارٽي 30 نومبر تي يوم تاسيس جي موقعي تي پنهنجي مستقبل جي لائحه عمل جو اعلان ڪندي سنڌ گهڻو پراڻو صوبو آهي ڪوئي ورهاڱو نه ٿيڻ ڏيندو مستقبل ۾ ڪنهن جي به حڪومت اچي بجلي 30 سيڪڙو مهانگي ٿيندي هڪ انٽرويو ۾ هن چيو ته جمهوريت ۾ اسان کي هڪٻئي جي مينڊيٽ جو احترام ڪرڻ گهرجي عمران خان نظام جي الهه ته ڪري ٿو جڏهن ته کيس گهرجي ته نظام کي هلڻ به ڏي هو بس هڪ خواب ڏيکاري رهيو آهي جنهن جي حقيقت ڪجهه به نه آهي گذريل 60 ڏينهن کان هڪ ئي تقرير مسلسل ورجائي پئي وڃي عمران خان سنڌين کي آزاد ڪرائڻ جي جيڪا ڳالهه ڪري رهيو آهي هو پهريان خيبرپختونخواهه جي عوام کي ته آزاد ڪرائي پوءِ سنڌين کي آزاد ڪرائڻ جي ڳالهه ڪري ڇو ته سنڌي ته پهريان ئي آزاد آهن عمران خان کي گهرجي ته ٻين تي تنقيد کان اڳ هو خيبرپختونخواهه جي ڪارڪردگي ٻڌائي. ايم ڪيو ايم سان ڇڪتاڻ جي حوالي سان سيد خورشيد شاهه چيو ته مان مهاجر لفظ کي گار ناهي ڏني ان جي باوجود جيڪڏهن ڪنهن جي دل آزاري ٿي ته ان تي مان معافي وٺي چڪو آهيان هاڻي مان هر هر معافي نٿو وٺي سگهان ڪراچي جي تازي جلسي جي حوالي سان هن چيو ته جلسو تاريخي هو ۽ ڪامياب ثابت ٿيو. ماڻهو ڀٽو خاندان سان اڄ به محبت ڪن ٿا مون کي بلاول ڀٽو جي پنهنجي ماءُ شهيد جي رهيل سفر کي ٻيهر شروع ڪرڻ تي خوشي ٿي ۽ مان پاڻ بلاول کي اسٽيج تي بيٺي ڏٺو ته بي بي شهيد يا اچي ويئي ۽ اکين مان لڙڪ ڪري پيا پاڪستان پيپلزپارٽي جو ورڪرز پنهنجي پارٽي کان ناراض ضرور آهي جڏهن ته هو اسان کي ڪڏهن به ڇڏي نٿو سگهي اڳوڻي صدر آصف علي زرداري جو ڪردار تاريخ جو حصو بڻجي چڪو آهي جنهن هڪ جمهوري نظام ٻي جمهوري حڪومت جي حوالي ڪيو سنڌ جي ورهاڱي ۽ نون صوبن جي حوالي سان هن چيو ته سنڌ هڪ پراڻو صوبو آهي جنهن کي ڪوئي به ورهائڻ نه ڏيندو اسان کي سڀ کان اڳ علائقي جي تعمير ۽ ترقي بابت سوچڻو پوندو. هن چيو ته ملڪ ۾ پن بجلي جا منصوبا شروع ڪرڻ کان سواءِ بجلي سستي نٿي ٿي سگهي هن چيو ته آئينده مستقبل ۾ ڪنهن جي به حڪومت اچي بجلي 30 سيڪڙو مهانگي ٿيندي.

 

وزيراعظم ملازمت دوران لاڏاڻو ڪندڙ سرڪاري ملازمن لاءِ امدادي پيڪيج جي منظوري ڏئي ڇڏي

اسلام آباد (بيورو) وزيراعظم نواز شريف ملازمت دوران لاڏاڻو ڪندڙ سرڪاري ملازمن لاءِ امدادي پيڪيج جي منظوري ڏئي ڇڏي، امدادي پيڪيج جو لاڳو 5 1 جون 3 1 0 2 ع کان هوندو، ملازمت دوران فوت ٿيل سينڪڙون ملازمن جي وارثن کي فائدو ملندو. تفصيل موجب ملازمت دوران لاڏاڻو ڪندڙ گريڊ 1 کان گريڊ 6 1 تائين جي ملازمن جي وارثن لاءِ 5 2 لک، گريڊ 7 1 جي ملازمن لاءِ 0 4 لک، گريڊ 8 1 ۽ 9 1 جي 0 8 لک، گريڊ 0 2 کان 2 2 جي ملازمن جي وارثن لاءِ 0 9 لک رپين جي امداديپيڪيج جي منظوري ڏني وئي، سيڪيورٽي دوران لاڏاڻو ڪندڙ گريڊ 1 کان 6 1 تائين جي ملازمن لاءِ 0 3 لک، گريڊ 7 1 لاءِ 0 5 لک، گريڊ 8 1 کان 9 1 لاءِ 0 9 لک جڏهن ته گريڊ 0 2 کان مٿي جي ملازمن لاءِ هڪ ڪروڙ رپيا امدادي پيڪيج جي منظوري ڏني وئي. سروس دوران لاڏاڻو ڪندڙ سرڪاري ملازمن جي گهروارن کي ريٽائرمينٽ جي تاريخ تائين مڪمل پگهار ۽ ٻيا الائونس سالانا ترقي ۽ انڪريمينٽ سميت وقت فوقتن اعلان ڪيون ويندڙ سهولتن سان گڏوگڏ تمام سرڪاري الائونس ڏنا ويندا. ٻنهي صورتن ۾ سرڪاري ملازمن جي گهروارن کي 5 سال يا سندن ريٽائرمينٽ جي عمر تائين سرڪاري گهر رکڻ جي اجازت هوندي يا پوءِ ڪرائي جي گهر جو ڪرايو ادا ڪيو ويندو. مرحوم سرڪاري ملازمن جي ٻارن کي اسڪول، ڪاليج ۽ يونيورسٽي ليول تائين تعليم، ٽيوشن فيس، ڪتاب ۽ رهائشي سهولتون مفت فراهم ڪيون وينديون. انتقال ڪندڙ سرڪاري ملازمن جي وارثن کي گريڊ 1 کان 8 تائين 0 2 لک رپيا، گريڊ 9 کان گريڊ 6 1 تائين 0 5 لک جڏهن ته گريڊ 7 1 کان مٿي تائين 0 7 لک رپيا رهائش طور تي پلاٽ جي خريداري لاءِ امداد جي طور تي ڪيش ڏنا ويندا. ملازمت دوران لاڏاڻو ڪري ويندڙ گريڊ هڪ کان گريڊ 5 1 تائين جي ملازمن جي پٽ يا ڌي کي نوڪري ڏني ويندي.

 

ايم ڪيو ايم پاران آزاد ڪشمير حڪومت کان به ڌار ٿيڻ جو اعلان ڪري ڇڏيو

اسلام آباد (بيورو) متحده قومي موومينٽ، سنڌ حڪومت کان عليحدگي بعد آزاد ڪشمير سرڪار کان ڌار ٿيڻ جو اعلان ڪري ڇڏيو، فاروق ستار جو چوڻ آهي ته بلاول ڀٽو زرداري طرفان الطاف حسين خلاف استعمال ڪيل ٻوليءَ کانپوءِ پ پ سان گڏ هلڻ جو ڪو به جواز ناهي، هنن جمهوريت لاءِ 7 سال غير جمهوري رويا برداشت ڪيا،پر هاڻي صبر جي انتها ٿي چڪي آهي. اسلام آباد ۾ پريس ڪانفرنس ڪندي ايم ڪيو ايم جي اڳواڻ ڊاڪٽر فاروق ستار چيو ته آزاد ڪشمير سرڪار کان ڌار ٿيڻ لاءِ ميمبرن جون استعيفائون وزيراعظم ڏانهن اماڻيون ويون آهن. هـُن چيو ته سنڌ ۽ آزاد ڪشمير حڪومتن کان ڌار ٿيڻ وارو متحده جو فيصلو قطعي آهي ۽ هاڻي واپسيءَ جو سوال ئي پيدا نٿو ٿئي. ايم ڪيو ايم اڳواڻ چيو ته بلاول ڀٽو زرداري عمر جو لحاظ پاسيرو رکي الطاف حسين خلاف اڻوڻندڙ ٻولي استعمال ڪئي، پ پ چيئرمين پنهنجي سياست جي شروعات ئي ٽڪراءَ تي رکي آهي. هن چيو ته متحده جمهوريت جي مضبوطيءَ لاءِ 7 سالن تائين پ پ جا غير جمهوري رويا برداشت ڪيا پر هاڻي گهڻو ٿي ويو. سندس چوڻ هو ته ڀٽي جو وارث ڪو زرداري نه پر ڀٽو ئي ٿي سگهي ٿو، هنن ڪيترائي ڀيرا بلاول جي بيانن کي برداشت ڪيو پاڻي صبر جواب ڏئي چڪو آهي. فاروق ستار الزام هنيو ته پ پ سرڪار لينڊ مافيا،ڪرپشن ۽ ڀتا مافيا جي سرپرستي ڪري رهي آهي، ايم ڪيو ايم اهڙي ڪنهن به عمل ۾ پيپلز پارٽيءَ جو ساٿ نه ٿي ڏئي سگهي..

 

نئون صوبو نه ٺهڻ جي ذميوار مسلم ليگ آهي: يوسف رضا گيلاني

ملتان (م.ڊ) پاڪستان جي اڳوڻي وزيراعظم يوسف رضا گيلاني چيو آهي ته نئون صوبو نه ٺهڻ جي ذميوار پاڪستان مسلم ليگ (ن) آهي هڪ انٽرويو ۾ هن چيو ته سنڌ کي متحد رکڻ جي ڳالهه صرف بلاول ڀٽو زرداري نه پيو ڪري پر هي سڄي صوبي جو آواز آهي عوام چئي رهيو آهي ته هو سنڌ جو ورهاڱو نٿو چاهي جڏهن عوامجي راءِ اها آهي ته پيپلزپارٽي جو چيئرمين ڪيئن عوام جي راءِ جي خلاف ڪم ڪري سگهي ٿو اهڙي طرح ته پبلڪ پاليسي ٺاهي ۽ هلائي ويندي آهي يوسف رضا گيلاني چيو ته بهاولپوڙ يا سرائڪي يا ڏکڻ پنجاب کي صوبي جو درجو ڏيڻ جو واعدو پيپلزپارٽي سميت سمورين سياسي پارٽين پنهنجي چونڊ منشور جو حصو بڻايو هو هن چيو ته ڏکڻ پنجاب کي صوبي جو درجو ڏيڻ جي قرارداد صوبائي اسيمبلي ۾ منظور ٿين کان پوءِ قومي اسيمبلي ۾ به پاس ٿي ويئي هئي جڏهن ته سينيٽ ٻه ڀاڱي ٽي اڪثريت سان آئين ۾ ترميم به ڪئي هئي پر قومي اسيمبلي ۾ پيپلزپارٽي وٽ ٻه ڀاڱي ٽي اڪثريت نه هئڻ سان هي قانون پاس نه ٿي سگهيو جنهن سان ڏکڻ پنجاب کي صوبي جو درجو ملي وڃي ها ان سوال تي ته صوبو نه ٺهڻ جي ذميواري ڪنهن تي لاڳو ٿئي ٿي هن چيو ته نئون صوبو نه ٺهڻ جي ذميوار پاڪستان مسلم ليگ (ن) آهي سينيٽ جي رڪارڊ تي موجود آهي ته ڪنهن نئون صوبو ٺهڻ جي حق ۾ قانونسازي جي حمايت ڪئي هئي ۽ ڪنهن ان لاءِ ووٽنگ ۾ حصو نه ورتو هو.

 

لنڊن مان ويهي سنڌ کي ورهائڻ وارو مطالبو اردو آبادي جو نه پر هڪ نسلي تنظيم جو آهي: سيد جلال محمود شاهه

ڄامشورو( ڊ ر) سنڌ هڪ تاريخي وطن آهي لنڊن مان ويهي سنڌ کي ورهائڻ وارو مطالبو اردو آبادي جو نه پر هڪ نسلي تنظيم جو آهي، ان ڪري اردو آبادي ايم ڪيو ايم کان لاتعلقي جو اظهار ڪري، هاڻي سنڌي جي سنڌي اردو آبادي ايم ڪيو ايم ۽ پ پ پ جي چالبازين کيسمجهي چڪو آهي، سنڌ جي وحدت خلاف غلط زبان استعمال ڪندڙ سياسي غلام پنهنجي زبان کي تالو ڏين، هن وقت سنڌ ۾ نسلي ۽ ٻولي بنيادن تي تضاد نه پر سنڌي اردو آبادي ۾ ايڪتا جي ضرورت آهي.  ڄامشوري ۾ سنڌ يو نائيٽيڊ پارٽي جي سربراهه ۽ سنڌ بچايو ڪميٽي جي ڪنوينر سيد جلال محمود شاهه هتي جي ايم سيد ايڊيفس ڄامشورو ۾ سنڌ بچايو ڪميٽي جي اجلاس کان پوءِ ٻين اڳواڻن سان گڏ پرهجوم پريس ڪانفرنس ڪندي وڌيڪ چيو ته سنڌي قوم پنهنجي تاريخي وطن جي بچاءُ ۽ ايڪتا جي حق ۾ آهي، هاڻ سنڌي قوم پ پ پ ۽ ايم ڪيو ايم وچ ۾ سنڌ کي ورهائڻ واري راند کي سمجهي چڪي آهي، هاڻ سنڌ جو عوام ڪنهن به مهاجر يا مها قومپرست جي نعريبازي جي چڪر ۾ نه ايندو ۽ نه ئي سنڌ جي ورهاڱي جي حق ۾ آهي، سيد جلال محمود شاهه چيو ته سنڌ بچايو ڪميٽي سنڌي ۽ اردو آبادي وچ ۾ ايڪتا قائم ڪرڻ لاءِ ڊويزنل سطح تي ڪانفرنسون ڪوٺايون ويون آهن جنهن ۾27 آڪٽوبر تي لاڙڪاڻو، 28 آڪٽوبر تي سکر، 29 آڪٽوبر تي نواب شاهه، 15 نومبر تي ميرپورخاص ۽ 17 نومبر تي حيدرآباد ۾ ٿينديون جنهن ۾ سنڌي اردو زبان جي اديبن، دانشورن، واپارين توڙي مختلف مڪتب فڪر جي ماڻهن کي سڏايو ويندو. سنڌ جلال محمود شاهه ۽ ٻين چيو ته اسان سياسي غلامن کي چتاءُ ٿا ڏيون ته سنڌ وطن خلاف گندي زبان استعمال ڪرڻ بند ڪن ڇاڪاڻ ته سنڌ جو عوام هاڻ برداشت نه ڪندو. پريس ڪانفرنس ۾ سنڌ بچايو ڪميٽي جي اڳواڻ ۽ مختلف پارٽين جا سربراهه ڊاڪٽر نياز ڪالاڻي، ابرار قاضي، ڊاڪٽر مير عالم مري، غلام مصطفيٰ چانڊيو،  ڊاڪٽر شمس الدين صديقي، روشن ٻرڙو، ادريس چانڊيو، حنيف ساگر بڙدي، قمر ڀٽي، دودوديشي ۽ ٻين شرڪت ڪئي.

 

سنڌ جي ورهاڱي خلاف هڙتال ڪامياب ڪرڻ لاءِ ٽرانسپورٽر، تاجر، ۽ سمورا طبقا پنهنجو ڀرپور ڪردار ادا ڪن: اياز لطيف پليجو

حيدرآباد (بيورو) قومي عوامي تحريڪ جي صدر اياز لطيف پليجو چيو آهي ته ايم ڪيو ايم جي سنڌ ورهائڻ جي مطالبي جي خلاف اڄ خميس 23 آڪٽوبر تي سڄي صوبي ۾ ڦيٿا روڪ ۽ شٽرڊائون هڙتال ڪامياب ڪرڻ لاءِ ٽرانسپورٽر تاجر ۽ سمورن طبقن جا پرامن ماڻهو پنهنجو ڀرپور ڪردار ادا ڪن اردو ڳالهائيندڙ سنڌ جو لازمي حصو ۽ اسان جا ڀائر آهن پر ايم ڪيو ايم عالمي ۽ گروهي مفادن جي لاءِ سنڌ ۽ پاڪستان کي ٽوڙڻ جي ناپاڪ سازش تي عمل ڪري رهي آهي سنڌ جون سموريون ٻوليون ڳالهائيندڙ 6 ڪروڙ مان جيستائين ڪوئي به هڪ زنده آهي عالمي طاقتون ۽ ان جا ايجنٽ پنهنجن ناپاڪ خواهشن ۽ ارادن ۾ ڪڏهن به ڪامياب نٿا ٿي سگهن. هو قاسم آباد ۾ پليجو هائوس ۾ پريس ڪانفرنس کي خطاب ڪري رهيو جنهن ۾ عبدالقادر وانٽو، انور سومرو ۽ ٻيا اڳواڻ پڻ موجود هئا قومي عوامي تحريڪ جي صدر اياز لطيف پليجو ٻڌايو ته سمورين قومپرست سياسي ديني جماعتن خميس جي هڙتال جي مڪمل حمايت ڪئي آهي ايتري قدر جو پيپلزپارٽي جا ڪيترائي اسيمبلي ميمبر ۽ عهديدارن به اسان سان رابطو ڪري هڙتال ۾ تعاون جي خاطري ڪرائي آهي هن چيو ته اسان ٽڪراءُ ۽ اسلحي جي سياست جي خلاف آهيون هي هڙتال مڪمل پرامن هوندي ۽ ڪٿي ڪنهن گاڏي جو شيشو به نه ٽوڙيو ويندو هن چيو ته جڏهن به پيپلزپارٽي جي حڪومت سان وزارتن اختيار ڀرتين ۽ فنڊن تي ڪوئي جهيڙو ٿيندو آهي ته ڪائي ٻي سياسي جماعت ايم ڪيو ايم جي ووٽ بئنڪ لاءِ سياسي طور تي خطرو بڻجندي آهي يا الطاف حسين جي خلاف لنڊن ۾ ڪيسن ۾ اڳڀرائي ٿيندي آهي. ڪراچي ۾ ڪي خاص ڏوهاري ماڻهو پڪڙيا وڃن ٿا ته ايم ڪيو ايم فوري سنڌ جي وحدت تي سواليه نشان بنائڻ لاءِ نئون صوبو ٺاهڻ جو مطالبو ڪندي آهي هن چيو ته اسان جي ايم ڪيو ايم جي قيادت کي اپيل آهي ته هو هن وقت جڏهن ملڪ مختلف بحرانن جو شڪار آهي سنڌ کي ورهائڻ جي ڳالهين کان پاسو ڪري هي نهايت حساس معاملو آهي ۽ سنڌ جو عوام اها ڳالهه ڪڏهن به برداشت نٿو ڪري سگهي هن چيو ته فاروق ستار حيدرعباس رضوي فيصل سبزواري ۽ ٻين اڳواڻن کي به گهرجي ته اهي ايم ڪيو ايم جي قيادت تي دٻاءُ وجهن ته هو پنهنجي ان پاليسي کي تبديل ڪري هن چيو ته حقيقت ۾ ايم ڪيو ايم جا پاڪستان ۾ عهديدار ۽ اسيمبلي ميمبر به جڏهن لنڊن مان خطاب شروع ٿيندو آهي ته مايوس ٿي ويندا آهن جيڪا مايوسي سندن منهن مان نظر ايندي آهي ته خدا نه ڪري ته کين ڪنهن نئين مصيبت ۾ ته نه وڌو ويندو هن چيو ته ايم ڪيو ايم ترقي لاءِ ننڍا يونٽ قائم ڪرڻ جي ڳالهه ڪري ٿي پر ڪراچي جي ٻه ڪروڙ جي آبادي ۾ هو ضلعا بنائڻ جي خلاف آهي ۽ هيٺين سطح تي اختيار منتقل نه ٿيڻ ڏيڻ گهري ٿي اختيارن جي مرڪزيت جي قيام لاءِ ڪراچي کي هڪ يونٽ رکڻ جو مطالبو ڪري ٿي جڏهن ته حيدراباد کي پنهنجنم فادن لاءِ هن چئن ضلعن ۾ ورهائي ڇڏيو هن چيو ته اسان مطالبو ڪيون ٿا ته صوبي ۾ بلدياتي چونڊون جلد ڪرايون وڃن ۽ اختيار چونڊيل نمائندن کي ڏنا وڃن اياز لطيف پليجو چيو ته بلوچستان ايراضي جي لحاظ کان ملڪ جو سڀ کان وڏو صوبو آهي پر اتان جي سياسي پارٽين گڏيل اختلافن جي باوجود ڪڏهن به ان جي وحدت کي ٽوڙڻ جو مطالبو ناهي ڪيو دنيا جي ڪيترن ئي ملڪن ۾ بلوچستان کان به ٻيڻي ايراضي جا صوبا قائم آهن اياز لطيف ليجو الزام هنيو ته ايم ڪيو ايم حقيقت ۾ عالمي ايجنٽي تحت سنڌ کي ٽارگيٽ ڪيو آهي پهريان هو ضلعي حڪومت جي ذريعي گرفت حاصل ڪرڻ گهري ٿي پوءِ الڳ صوبي جي ڳالهه ڪئي ويندي جنهن ۾ سنڌ ۽پاڪستان ٽوڙڻ جي قرارداد منظور ڪرائي ويندي هن چيو ته حقيقت ۾ ايم ڪيو ايم باقي تمام سياسي قوتون ۽ زبانون ڳالهائيندڙن کي پنهنجو غلام رکڻ جي ڪوشش ڪري ٿي ۽ هو نئون صوبي جو نالو جناح پور، الطاف نگر يا ڪجهه ٻيو به رکي سگهي ٿي هن چيو ته ايم ڪيو ايم کان هي به پري نه آهي ته هو پنهنجي نئين صوبي ۾ گرفت مضبوط ڪرڻ کان پوءِ قرارداد منطور ڪري اقوام متحده نيٽو ۽ آمريڪا ۽ برطانيا کي اپيل ڪري ته اهي کين تحفظ ڏيڻ لاءِ مداخلت ڪن هن چيو ته حقيقت ۾ پاڪستان کي ٽوڙي هن خطي ۾ هڪ نئون اسرائيل قائم ڪرڻ جي جنگ جاري آهي جنهن ۾ ايم ڪيو ايم کي استعمال ڪيو پيو وڃي هن چيو ته اردو ڳالهائيندڙ اسان جو حصو آهن جيئڻ مرڻ اسان سڀني جو گڏ آهي 1987 کان پهريان جي صورتحال تي غور ڪيون ته ڇا ان وقت به حالتون اهڙيون هيون ۽ ايم ڪيو ايم جي وجود ۾ اچڻ کان پوءِ ڪهڙِ تبديلي آئي آهي هن چيو ته عبدالستار افغاني پروفيسر غفور احمد مولانا شاهه احمد نوراني ۽ اردو ڳالهائيندڙ ٻين اڳواڻن جي دور سياست ۾ به ڇا ايئن ئي ٻوري ۾ بند لاش ملندا هئا جهڙوڪ گذريل 20 سالن کان ملي رهيا آهن ڇا اردو ڳالهائيندڙن مائرن جا هنج اهڙي طرح اجاڙيا ويندا هئا حڪيم محمد سعيد، مدير تڪبير محمد صلاح الدين ۽ ڊاڪٽر عمران فاروق ڇا هي سڀ مهاجر يا اردو ڳالهائيندڙ نه هئا هن چيو ته خدا جي واسطي پيپلزپارٽِ ۽ ايم ڪيو ايم ذاتي مفادن جي ٽڪراءُ ۾ سنڌ جي وحدت کي سواليه نشان نه بڻائين عالمي طاقتون سنڌ ۾ ٽڪراءُ پيدا ڪري هتي به بلوچتان جهجڙيون حالتون پيدا ڪرڻ چاهين ٿيون ته جيئن رتوچاڻ ٿئي ان لاءِ اهي مقامي ايجنٽن کي مقرر ڪري رهيون آهن هڪ سوال تي اياز لطيف پليجو چيو ته عالمي طاقتن جي ايجنڊا تي به عمل ٿي رهيو آهي ۽ ٻنهي پارٽين جي مفادن جو ٽڪراءَءُ به آهي حقيقت ۾ ڪرپشن جي ذريعي ڦرلٽ ڪري پنهنجي دولت ۽ پنهنجن خاندانن کي تحفظ ڏيڻ لاءِ به هن سازش ۾ ملوث عنصرن کي پرڏيهي طاقتن جي سرپرستي جي ضرورت آهي ته جيئن اهي کين پناهه ڏيئي سگهن ان سوال تي ته اوهان ڪهڙي بنياد تي ايم ڪيو ايم جي خلاف سنڌ ۽ پاڪستان کي ٽوڙڻ جو الزام مڙهي رهيا آهيو اياز لطيف پيلجو چيو ته مون وٽ ڪنهن پرڏيهي طاقت جي ڪائي لکيل تحريڪ ته نه آهي پر ٺوس ثبوتن مان ضرور اندازو لڳائي سگهجي ٿو ته ڪراچي ۾ نيٽو جو اسلحو کڻندڙ سوين ڪنٽينر غائب ٿي ويا اعليٰ پوليس عملدارن ۽ رينجرز به عدالت ۾ ان جي تصديق ڪئي نيٽو به پهريان ان کي تسليم ڪيو ۽ بعد ۾ انڪار ڪري ڇڏيو اهڙي طرح ڪراچي ۾ هو انڊين اسلحو وڌي مقدار ۾ هٿ ڪيو ويو جيڪو ڀارتي قانون لاڳو ڪندڙ ادارن جي استعمال هيٺ آهي. هي به ڏسي سگهجي ٿو ته ڪهڙي تنظيم جي سفارش تي آمريڪا برطانيا ۽ يورپ جي ملڪن جي ويزا بنا رنڊڪ جاري ٿي رهي آهي ۽ ان لاءِ هدايتون ڪٿان اچن ٿيون آمريڪي برطانوي ۽ يورپي سفارتڪار نائين زيرو جا ڇو چڪر ڪاٽيندا رهيا آهن الطاف حسين جي خلاف مني لانڊرنگ سميت سنگين مقدمه هئڻ جي باوجود کين 20 سالن کان برطانيا پنهنجي پناهه ۾ رکي ڇڏيو آهي.

 

ايڌي سينٽر ۾ واردات معاشري جي بي حسي جي عڪاسي ڪري ٿي: عبدالستار ايڌي

ڪراچي (اسٽاف رپورٽر) مشهور سماجي ڪارڪن عبدالستار ايڌي چيو آهي ته هو جوابدارن جو احسانمند آهي جو انهن کيس قتل نه ڪيو پر دفتر مان صرف سامان ۽ رقم کڻي ويا جڏهن ته ڌاڙو معاشري جي بي حسي جي عڪاسي ڪري ٿو هو اربع تي ايس آءِ يو ٽي ڪراچي ۾ نئين ٽرانسپلانٽ آپريشن ٿيٽر ڪمپليڪس جي افتتاهي تقريب دوران ميڊيا سان ڳالهائي رهيو هو عبدالستار ايڌي چيو ته ڪجهه ڏينهن اڳ ايڏي سينٽر تي لڳل ڌاڙي سان کيس ڏاڍو ڏک ٿيو آهي هي واردات معاشري جي بي حسي جي عڪاسي ڪري ٿي ۽ هو انهن ڏوهارين جو ٿورائتو آهي جو انهن صرف دفتر ۾ رکيل رقم ۽ ٻيو سامان کنيو ٻي صورت ۾ هو کيس قتل به ڪري سگهن پيا ان موقعي تي عبدالستار ايڌي جي گهرواري بلقيس ايڌي چيو ته ڏوهارين جيڪا رقم لٽي آهي اها سرندي وارن ڏکي انسانيت جي ڀلائي لاءِ عطيو ڪئي هئي ان لاءِ انهن کي اپيل ڪري ٿي ته رقم ۽ ٻيو ڦر ڪيل سامان واپس ڪن عبدالستار ايڌي جي پٽ فيصل ايڌي چيو ته ميٺادر ايڌي سينٽر ۾ ٿيل واقعي ۾ ڪوئي ملازم ملوث آهي يا نه ان بابت جاچ ٿي رهي آهي جڏهن ته پوليس کيس ان ڳالهه جي خاطري ڪرائي آهي ته هڪ ٻن ڏينهن ۾ ڦر ڪيل سامان کين واپس ملي ويندو.