تازيون خبرون

Daily Archives: October 21, 2014

عوام جو اعتماد مليل آهي، ڪيل واعدا پاڙينداسين: نواز شريف

اسلام آباد (بيورو) وزيراعظم نواز شريف چيو آهي ته حڪومت کي عوام جو مڪمل اعتماد حاصل آهي، عوام چند هزار ماڻهو جمع ڪري تماشو لڳائيندڙن کي مڪمل طور تي رد ڪري ڇڏيو آهي، حڪومت انهن عنصرن کي پنهنجي سياسي دڪان چمڪائڻ لاءِ ڪنهن به طرح جو ڪو موقعو نه ڏيندي، اسان جو پورو ڌيان عوام جي بهبود ۽ سندن مسئلي جي حل تي آهي، عوام سان ڪيل هڪ هڪ واعدو پاڙينداسين، تمام سياسي معاملن تي پنهنجي اتحادين کي گڏ وٺي هلنداسين. هو جي يو آءِ (ف) جي سربراهه مولانا فضل الرحمان سان وزيراعظم هائوس ۾ ملاقات ۾ ڳالهائي رهيو هو، جنهن دوران ملڪي سياسي صورتحال خاص طور تي ڌرڻن ۽ ٻنهي پارٽين طرفان حڪومت خلاف جلسن جي مهم سان پيدا حالتن تي ويچاريو ويندو. ذريعن موجب مولانا فضل الرحمان وزيراعظم تي زور ڀريو ته هاڻ حڪومت کي ڀرپور طريقي سان جواب ڏيڻ گهرجي. مولانا فضل الرحمان هڪ ڀيرو وري خيبر پختونخوا جي وڏي وزير خلاف تحريڪ عدم اعتماد کي ڪامياب بڻائڻ لاءِ گڏيل طور تي ڪوششون شروع ڪرڻ جي تجويز ڏني. ذريعن موجب مولانا فضل الرحمان چيو ته عمران خان مخالفت ۾ تمام اخلاقي حدون ٽپي ويو آهي جيڪڏهن کيس وڌيڪ موقعو ڏنو ويو ته حڪومت لاءِ تمام وڏي مشڪلات پيدا ٿيندي. ن ليگ ۽ ان جون حليف پارٽيون گڏجي پنهنجي مخالف قوتن جو ڀرپور جواب ڏئي سگهن ٿيون. وزيراعظم چيو ته پوري صورتحال تي سندس گهري نظر آهي، حڪومت طرفان تمام جلد عوام کي ريليف ڏيڻ ۽ مسئلن جي حل لاءِ گڏيل قدم کنيا ويندا. ملاقات ۾ گهرو وزير چوڌري نثار علي خان، ريلوي وزير خواجا سعد رفيق، خيبر پختونخوا گورنر سردار مهتاب ۽ وفاقي وزير اڪرم دراني به شريڪ هئا.

 

آئوٽ آف ٽرن پروموشن ۽ ڊيپوٽيشن ڪيس: سنڌ حڪومت کي توهين عدالت جو نوٽيس جاري

اسلام آباد (بيورو) سپريم ڪورٽ، آئوٽ آف ٽرن پروموشن ۽ ڊيپوٽيشن تي مقرر ڪامورن کي نه هٽائڻ تي سنڌ سرڪار کي توهين عدالت جو نوٽيس جاري ڪري ڇڏيو آهي. چيف جسٽس جي سربراهي ۾ ٽه رڪني بينچ آئوٽ آف ٽرن پروموشن ۽ ڊيپوٽيشن تي ٿيل مقررين واري ڪيس جي ٻڌڻي ڪئي. عدالتي حڪم تي عملنه ڪرڻ تي چيف سيڪريٽري سنڌ،سيڪريٽري سروسز ۽ زراعت ۾ ڪم ڪندڙ چيف انجنيئر کي نوٽيس جاري ڪيا ويا. سپريم ڪورٽ،سنڌ سرڪار کان عدالتي حڪم باوجود نه هٽائڻ وارن ڪامورن جي لسٽ طلب ڪري ورتي آهي.

 

گلگت بلتستان ۾ 0 4 هزار ميگاواٽ پن بجلي پيدا ڪرڻ جي صلاحيت موجود آهي: صدر

گلگت (م.ڊ) صدر مملڪت ممنون حسين چيو آهي ته گلگت بلتستان ۾ 0 4 هزار ميگاواٽ پن بجلي پيدا ڪرڻ جي صلاحيت موجود آهي، اسان کي آءِجي نعمت مان فائدو وٺڻ گهرجي، وفاقي حڪومت سان ڳالهائي هر ممڪن مدد فراهم ڪرڻ جي ڪوشش ڪئي ويندي، گلگت بلتستان جو عوام ڪنهن محرومي جو شڪار نه ٿئي، مسئلا جلد حل ٿي ويندا، گلگت ۾ پي آءِ اي جون فلائٽس وڌائڻ بابت حڪام سان ڳالهائي ۽ فزيبلٽي جو جائزو وٺي فيصلو ڪيو ويندو. هو گلگت بلتستان گورنر سيد پير ڪرم علي شاهه ۽ وڏي وزير گلگت بلتستان مهدي شاهه سان گلگت ۾ الڳ الڳ ملاقاتن دوران ڳالهائي رهيو هو. ان موقعي تي ڳالهائيندي صدر ممنون حسين وڌيڪ چيو ته هن خطي جي فروٽ، معدنيات سميت ٻين وسيلن مان فائدو وٺڻ لاءِ حڪمت عملي بڻائڻ جي ضرورت آهي، حڪمت عملي جوڙڻ لاءِ گلگت بلتستان جي حڪومت کي هر طرح جي ٽيڪنيڪي مدد فراهم ڪئي ويندي. صدر مملڪت چيو ته گلگت بلتستان جو عوام ڪنهن محرومي جو شڪار نه ٿئي، هتان جا ماڻهو پاڪستان جو حصو آهن ۽ اوترائي پاڪستاني آهن جيترا باقي علائقن جا آهن. هن خاطري ڏياري ته گلگت بلتستان جي عوام جا مسئلا جلد حل ٿي ويندا. گلگت بلتستان گورنر ۽ وڏي وزير صدر مملڪت سان پي آءِ اي جي فلائٽس وڌائڻ جو مطالبو ڪيو، صدر مملڪت تجويز سان اتفاق ڪيو ۽ چيو ته لاڳاپيل حڪام سان ڳالهائي ۽ فزيبلٽي جو جائزو وٺي ان معاملي تي فيصلو ڪيو ويندو. بعد ۾ صدر مملڪت شهيدن جي يادگار تي به ويو ۽ وطن عزيز لاءِ جانين جو نذرانو پيش ڪندڙن لاءِ فاتحه خواني ڪئي ۽ يادگار تي گلن جي چادر چاڙهي.

 

ويڇا وڌائڻ سان ڪجهه نه ورندو، سنڌ جي ورهاڱي تي بحث يا ڳالهيون نه ٿيديون: شرجيل ميمڻ

ڪراچي(اسٽاف رپورٽر): سنڌ جي اطلاعات ۽ بلديات واري وزير شرجيل انعام ميمڻ چيو آهي ته ماضي ۾ هميشه سنڌ سان زيادتيون ٿينديون رهيون آهن، جڏهن ته پيپلز پارٽي حڪومت ۾ اچي ان جو ازالو ڪرڻ جي ڀرپور ڪوشش ڪئي آهي. پيپلز پارٽي جو واضح موقف آهي ته اسان ڪنهن صورت سنڌ جي ورهاست کي قبول نه ڪنداسين. سنڌ ۽ خاص ڪري ڪراچي جا مسئلا ڪجهه سالن جا ناهن ۽ انهن کي هڪ رات ۾ حل نٿو ڪري سگهجي. سموريون سياسي جماعتون جيڪڏهن سنڌ ۽ پاڪستان لاءِ سنجيده آهن ته انهن لاءِ ڳالهين کان علاوه ٻيو ڪو رستو نه آهي. ملڪ کي هن وقت مختلف چئلينجز سامهون آهن ان لاءِ سمورين سياسي جماعتن کي سياسي بلوغت جو مظاهرو ڪندي مفاهمت جي سياست کي اپنائڻو پوندو. هو اڱاري تي سنڌ اسيمبلي جي اجلاس کان اڳ ميڊيا سان ڳالهائي رهيو هو. شرجيل انجام ميمڻ چيو ته پاڪستان پيپلز پارٽي چاهي ٿي ته سموريون سياسي جماعتون گڏجي ڪم ڪن. هن چيو ته 18 آڪٽوبر جي ڪراچي واري جلسي ۾ اسان جي چيئرمين ۽ شريڪ چيئرمين صاف پيغام ڏنو ته اچو ۽ ماضي جي تلخين کي وساري اڳتي وڌون. هن چيو ته اسان اميد ڪريون ٿا ته سموريون سياسي جماعتون بشمول ايم ڪيو ايم اسان جي ان آفر کي مثبت انداز ۾ ڏسندي. هڪ سوال جي جواب ۾ صوبائي وزير چيو ته عوام جي راءِ ڪنهن به سياسي جماعت لاءِ چونڊن ۾ معلوم ٿئي ٿي. هن چيو ته عوام ڪارڪردگي ڏسي ٿو. حقيقت اها آهي ته پيپلز پارٽي جي اڳوڻن 5 سالن ۽ هن هڪ سال جي دور حڪومت ۾ گراس روٽس تي ڪم ٿيا آهن. بينظير انڪم سپورٽ ذريعي لکين عورتن کي ماهوار ڪروڙين رپين جي مدد جاري آهي. صوبي ۾ رستن، اسڪولن، ڪاليجن، يونيورسٽين کان علاوه پوئتي پيل علائقن ۾ پيئڻ جي صاف پاڻي لاءِ آر او پلانٽس ۽ هاڻ ڊي سيلينيش پلاٽنس لڳايا ويا آهن ۽ انهن کي هلائڻ لاءِ بجلي بجاءِ هاڻ سولر انرجي جو استعمال ڪيو پيو وڃي. شرجيل ميمڻ چيو ته ماضي ۾ سنڌ سان زيادتيون ڪيون ويون. هن ملڪ ۾ گهڻو ڪري آمرن جي حڪومت رهي ۽ سنڌ جي حقن تي قبضو ڪيو ويو. هن چيو ته پيپلز پارٽي جي اڳوڻي حڪومتي دور ۾ صرف 3 سالن تائين ته سنڌ حڪومت ٻوڏن ۽ برساتن جي تباهڪارين جو مقابلو ڪيو ۽ ان کان متاثر ٿيندڙ لکين ماڻهن جي بحالي لاءِ ڏينهن رات ڪم ڪيو ۽ اهو ئي سبب آهي ته سنڌ ۾ عوام هڪ ڀيرو وري پيپلز پارٽي کي چونڊيو. هن چيو ته هن وقت ملڪ ڪنهن به تلخين جو متحمل نٿو ٿي سگهي. اسان جي اعليٰ قيادت پاران هميشه اسان کي مفاهمت جو درس ڏنو ويو آهي ۽ اڄ به اسان ڪنهن جي تلخ جملن جو تلخي سان جواب نه پيا ڏيون، بلڪ اسان ماضي جي تلخين کي وساري اڳتي وڌڻ ۽ ملڪ کي پيش ايندڙ چئلينجن کي منهن ڏيڻ جي ڪوشش ۾ مصروف آهيون. هن چيو ته اڄ اسان جا لکين آئي ڊي پيز ۽ پنجاب ۾ لکن جي تعداد ۾ ٻوڏ متاثر اسان جي امداد جا متنظر آهن ته اسان جي پاڪ فوج دهشتگردن سان وڙهي رهي آهي. هن چيو ته هن وقت ملڪ ۾ ڌرڻن جي سياست سياسي عدم استحڪام جهڙن چئيلينجن کي به اسان منهن ڏئي رهيا آهيون. انهن سمورن مسئلن کي ڏسندي هاڻ اسان کي سنجيده ٿي هن ملڪ لاءِ سوچڻو پوندو. سنڌ جي ورهاست ۽ نون صوبن جي سوال تي هن چيو ته پيپلز پارٽي جو ان تي چٽو موقف آهي ته پيپلز پارٽي سنڌ ۾ ڪنهن قسم جي ورهاست کي ڪنهن به صورت قبول نه ڪندي. اي آر وائي تي لڳل پابندي جي سوال تي صوبائي وزير چيو ته پيپلز پارٽي ميڊيا جي آزادي تي يقين رکي ٿي ۽ اسان اي آر وائي تي پابندي جي سخت لفظن ۾ مذمت ڪريون ٿا.

 

خورشيد شاهه پاران عمران خان جي الزامن خلاف عدالت ۾ وڃڻ جو فيصلو

اسلام آباد(بيورو) قومي اسيمبلي ۾ مخالف ڌر جي اڳواڻ خورشيد شاهه پاڪستان تحريڪ انصاف جي چيئرمين عمران خان طرفان مٿس هنيل الزامن خلاف عدالت ۾ وڃڻ جو فيصلو ڪيو آهي ميڊيا سان ڳالهائيندي هن چيو ته عمران خان ڪيترائي ڀيرا مٿس ڪرپشن جا الزام هنيا آهن پر اڃان تائين ڪوبه ثابت ڪري نه سگهيو آهي، مون کيس ان سلسلي ۾ هڪ نوٽيس به اماڻيو هو پر هن اڃان تائين ان جو جواب نه ڏنو آهي هن چيو ته نوٽيس جو مدو ختم ٿيڻ ۾ اڃان ٻه ڏينهن رهيل آهن جنهن کانپوءِ به عمران جواب نه ڏنو ته هو ان خلاف عدالت ۾ ويندو.

 

هندو برادري جي سرڪاري ملازمن کي موڪل ڏني ويندي، ۽ کين حڪومت سنڌ اڳواٽ پگهار به ادا ڪندي: سيد قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه اعلان ڪيو آهي ته سنڌ حڪومت 23 آڪٽوبر تي هندو برادري جو ڏڻ ڏياري سرڪاري طور تي ملهائيندي وڏي وزير چيو ته ڏياري جي موقعي تي هندو برادري جي سرڪاري ملازمن کي موڪل ڏني ويندي ۽ هندو برادري سرڪاري ملازمن کي حڪومت سنڌ اڳواٽ پگهار به ادا ڪندي جنهن لاءِ صوبائي سنڌ ناڻي کاتي کي حڪم جاري ڪيا ويا آهن. ٻئي طرف پاڪستان پيپلزپارٽي جو چيئرمين بلاول ڀٽو زرداري سڀاڻي نئون ديرو هائوسلاڙڪاڻو ۾ هندو برادري سان ڏياري ملهائيندو بلاول هائوس مان جاري بيان مطابق هن هندو برادري کي دعوت ڏني آهي ته هو نئون ديرو هائوس لاڙڪاڻو ۾ ان سان گڏ ڏياري جي خوشين ۾ ان سان شامل ٿين هن پيپلزپارٽي جي ضلعي صدر سميت مقامي اڳواڻن کي به هدايت ڪئي آهي ته اهي به هن ڏڻ تي هندو برادري سان گڏجي ملهائين.

 

آرمي چيف جي انڊونيشي هم منصب سان ملاقات

جڪارتا (م.ڊ) آرمي چيف جنرل راحيل شريف انڊونيشيا جي چيف آ“ آرمي اسٽاف سان ملاقات ڪئي جنهن ۾ علاقائي سلامتي سميت گڏيل دلچسپي جي معاملن تي ويچاريو ويو. پاڪ فوج جي سُڌ سماءَ واري شعبي (آءِ ايس پي آر) موجب آرمي چيف جنرل راحيل شريف جڪارتا ۾ انڊونيشين آرمي هيڊڪوارٽر جو دوروڪيو. ان موقعي تي کيس گارڊ آف آنر ڏنو ويو، بعد ۾ آرمي چيف پنهنجي انڊونيشيائي هم منصب سان ملاقات ڪئي ۽ علاقائي سلامتي سميت گڏيل دلچسپي جي معاملن تي ويچاريو، آءِ ايس پي آر موجب آرمي چيف ملاقات دوران دهشتگردي خلاف جنگ تي ڳالهايو ۽ پاڪستاني فوج جي ڪاميابين کان آگاهه ڪيو. ملاقات ۾ ٻنهي ملڪن جي فوجي ناتن تي به ڳالهايو ويو. آءِ ايس پي آر موجب آرمي چيف انڊونيشيا جي پيس اينڊ سيڪيورٽي سينٽر جو به دورو ڪيو.

 

وزيراعظم سان چوڌري نثار جي ملاقات، مقررين جو عمل شفاف طريقي سان مڪمل ڪرڻ تي اتفاق

اسلام آباد (بيورو) گهرو وزير چوڌري نثار علي خان گهرو وزارت ۽ ان جي ماتحت ادارن جي ڪارڪردگي کي بهتر بڻائڻ ۽ عدالتن ۾ ٻڌڻي هيٺ 0 0 7 2 ڪيسن جا فيصلا جلد ممڪن بڻائڻ لاءِ اسلام آباد ۾ ايڊووڪيٽ جنرل جي مقرري جي وزيراعظم کان اصولي منظوري وٺي ڇڏي، وزارت جي ماتحت وزيراعظم سان گهرو وزير چوڌري نثار جي ملاقات، گهرو وزارت جي ماتحت ادارن جي ڪارڪردگي کي بهتر بڻائڻ لاءِ فوڪل پرسن به مقرر ڪيا ويندا. تفصيل موجبگهرو وزير جي وزيراعظم نواز شريف سان وزيراعظم هائوس ۾ تفصيلي ملاقات ٿي، ملاقات ۾ وزيراعظم گهرو وزارت جي ماتحت ادارن ۾ خالي عهدن تي مقررين جو عمل جلد شفاف طريقي سان مڪمل ڪرڻ جي هدايت ڪئي، ملاقات ۾ گهرو وزير وزيراعظم کي ٻڌايو ته هن وقت گهرو وزارت ۽ ان جي ماتحت ادارن جا مختلف عدالتن ۾ 0 0 7 2 ڪيس ٻڌڻي هيٺ آهن ۽ سرڪاري وڪيلن جي ڪارڪردگي تسلي بخش نه آهي، ان مسئلي کي پڪي بنيادن تي حل ڪرڻ لاءِ اسلام آباد لاءِ ايڊووڪيٽ جنرل مقرر ڪيو وڃي. وزيراعظم نواز شريف گهرو وزير جي تجويز سان اتفاق ڪندي چيو ته ان حوالي سان هو جلد ئي قانون وزارت ۽ اٽارني جنرل کي هدايت ڪندو ته مشاورت ڪري حتمي فيصلو ڪيو وڃي. ملاقات ۾ گهرو وزير وزيراعظم کي ٻڌايو ته ايف آءِ اي، نادرا، پاسپورٽ اميگريشن ۽ ٻين ادارن جي ڪارڪردگي جي مانيٽرنگ سان گڏوگڏ ڪرپٽ عنصرن خلاف سخت ڪاروائي جاري آهي، هر اداري لاءِ وزارت جو هڪ فوڪل پرسن مقرر ڪيو ويندو. گهرو وزير وزيراعظم کي ٻڌايو ته برطانيا سميت ٻين يورپي ملڪن انساني اسمگلنگ کي روڪڻ لاءِ گهرو وزارت جي هاڻوڪي قدمن کي ساراهيو آهي پرپوءِ گذريل ڏينهن پي آءِ اي جي هڪ اڏام مان 0 1 افغان باشندن جي لنڊن وڃڻ جو واقعو پريشان ڪندڙ آهي، جنهن جو سخت نوٽيس ورتو ويو آهي ۽ ان ۾ ملوث ايف آءِ اي جي اهلڪارن کي گرفتار ڪيو ويو آهي جڏهن ته پي آءِ اي جو جيڪو عملو ان ۾ ملوث ڏٺو ويو سندن گهرن تي گرفتارين لاءِ ڇاپا هنيا ويا، انهن مان پي آءِ اي جي اعليٰ آفيسر عدالت مان عبوري ضمانت وٺي رکي هئي ۽ بعد ۾ ان ضمانت کي عدالت ڪنفرم ڪري ڇڏيو آهي، اهڙن مسئلن سان منهن ڏيڻ لاءِ سرڪاري وڪيلن جي ٽيم کي مضبوط بڻائڻ تمام ضروري آهي. ذريعن موجب ملاقات ۾ ڌرڻن جي صورتحال جو به تفصيلي جائزو ورتو ويو.

 

ڀارت جي بالادستي ڪنهن به صورت ۾ قبول ناهي: سرتاج عزيز

اسلام آباد(بيورو) پرڏيهي معاملن بابت صلاحڪار سرتاج عزيز چيو آهي ته اسنا ڀارت جي بالادستي ڪنهن به قيمت تي قبول نه ڪنداسين، پنهنجن مفادن جو هر قيمت تي تحفظ ڪيو ويندو، سرڪاري ٽي وي تي انٽرويو دوران وزيراعظم جي پرڏيهي معاملن تي صلاحڪار سرتاج عزيز چيو ته موجود صورتحال ۾ پاڪستان ۽ ڀارت وچ ۾ دوستاڻا تعلق ناهن جڏهن ته پاڪستان تعلقن کي معمول تي آڻڻ لاءِ پوري ڪوشش ڪندو، ڀارت کي جلد ئي ان ڳالهه جو احساس ٿي ويندو ته ٻنهي ملڪن وچ ۾ ڇڪتاڻسبب بين الاقوامي سطح تي ان جي ساک خراب ٿي آهي، سرتاج عزيز جو وڌيڪ چوڻ هو ته ڀارتي وزيراعظم پنهنجين شرطن تي پاڪستان سان تعلق معمول تي آڻڻ ٿو چاهي جيڪي حڪومت ۽ قوم کي قبول ناهن ۽ نه ئي اسان ڀارت جو اهو اصرار مڃڻ لاءِ تيار آهيون ته پاڪستان ڪشمير کي وساري ڇڏي، هن جو وڌيڪ چوڻ هو ته ڀارتي بالادستي قبول نه ڪنداسين ۽ پنهنجن مفادن جو هر قيمت تي تحفظ ڪنداسين پاڪستان ڪنهن به جارحيت جو مقابلو ڪرڻ جي صلاحيت رکي ٿو ۽ ڀارت کي ان سلسلي ۾ ڪنهن به شڪ ۾ نه رهڻ گهرجي.

 

چونڊن ٿيڻ ۾ دير ناهي، ٿوري وقت لاءِ مخالف اڳواڻ ٿي ڇا ڪندس: شيخ رشيد

اسلام آباد(بيورو) عوامي مسلم ليگ جي سربراهه شيخ رشيد احمد چيو آهي ته هاڻ جڏهن چونڊن ۾ ڪا دير ناهي ته پوءِ هو ٿوري عرصي لاءِ خالف ڌر جو اڳواڻ ٿي ڇا ڪندو ميڊيا سان ڳالهائيندي هن چيو ته هاڻ ٻڪرو لولو لنگڙو ٿيڻ کانپوءِ پوليو ۾ به وٺجي ويو آهي ۽ سندس وڃڻ ۾ ڪا دير ڪونهي هن چيو ته خورشيد شاهه وارو معاملو قومي ناهي ايم ڪيو ايم کي وزيراعظم جي استعيفيٰ واري معاملي ۾ ساٿ ڏيڻ گهرجي ۽ ان سلسلي ۾ جيڪڏهن اها اسان جو ساٿ ڏئي ٿي ته پوءِ ان سان ڳالهيون اڳتي وڌائي سگهجن ٿيون شيخ رشيد وڌيڪ چيو ته بابر غوري ساڻس ملاقات ۾ ڪي خاطريون ڪرايون آهن پر هو اڃان ڪنهن کي ٻڌائي نٿو سگهي.