تازيون خبرون

Daily Archives: October 20, 2014

ايم ڪيو ايم ويڇا وڌائڻ جون ڳالهيون نه ڪري، ويڙهه واري سازش ڪامياب نه ٿيندي شرجيل ميمڻ: شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته ايم ڪيو ايم وارا دوست اهڙيون ڳالهيون نه ڪن جنهن سان ويڇا وڌن. ڪراچي ۾ رهندڙ سڀ ڀائر آهن انهن کي ورهايو نه وڃي. اسان ماڻهن کي وڙهائڻ جي سازش ڪامياب ٿيڻ نه ڏينداسين. ڳالهين کي درگذر ڪري ۽ اچو ته گڏجي سنڌ صوبي جي خدمت ڪيون. سومر ڏينهن سنڌ اسيمبلي جي اجلاس ۾ ايم ڪيو ايم جي بائيڪاٽ کانپوءِ خطاب شرجيل انعام ميمڻ چيو ته سموري دنيا ڄاڻي ٿي ته ڪي ايم سي ۽ واٽر بورڊ جو ڇا حال آهي. اتي قانون خلاف ڀرتيون ڪيون ويون. اڪثر گرفتار دهشتگرد ڪي ايم سي ۽ واٽر بورڊ جا ملازم آهن، جن ٽارگيٽ ڪلنگ جو اعتراف ڪيو آهي. شرجيل انعام ميمڻ چيو ته پاڪستان پيپلز پارٽي جو شريڪ چيئرمين آصف علي زرداري ۽ چيئرمين بلاول ڀٽو زرداري 18 آڪٽوبر تي عاليشان جلسي ۾ مفاهمت جي ڳالههڪئي ۽ سمورن سياسي جماعتن کي اها دعوت ڏني ته پاڪستان جي ترقي لاءِ گڏجي ڪم ڪرڻ گهرجي. هن چيو ته هر ڪنهن کي ٻين جي پارٽي قيادت جو احترام ڪرڻ گهرجي. پاڪستان پيپلز پارٽي پنهنجي قيادت تي حملا برداشت نه ڪندي. اهو سمجهو وڃي ته ٻين لاءِ هر ڪو فرشتو آهي. هن چيو ته قومي اسيمبلي ۾ اپوزيشن ليڊر سيد خورشيد شاهه پنهنجي بيان جي ان ڏينهن وضاحت ڪري ڇڏي هئي ۽ هن اهو چيو هو ته سندس بزرگ به هجرت ڪري سنڌ ۾ آيا هئا ۽ هاڻ هو سنڌي آهي. جڏهن ته ڪجهه ماڻهن به اهي بيان ڏنا آهن ته سنڌي هندن جا جوتا چٽيندا هئا ۽ پنجاب ۾ گهر گهر مجرا ٿين ٿا. اهڙن توهين وارن بيانن تي به معافي نه ورتي وئي. پاڪ فوج خلاف به بيان ڏنا ويا. هن چيو ته اسان سڀني کي احترام جي دائري ۾ رهڻ گهرجي ۽ ناراضگين باوجود احترام ڪرڻ گهرجي. هن چيو ته ايم ڪيو ايم وارا نوڪرين تي اعتراض ڪن ٿا. پوري دنيا ڄاڻي ٿي ته ڪي ايم سي ۽ ڪراچي واٽر بورڊ جو ڪهڙو حال آهي. هو 20 سالن کان حڪومت ۾ آهن ۽ اڄ به اسان جا دروازا انهن لاءِ کليل آهن. انهن ٻن ادارن جي پوري بجيٽ پگهارن ۾ هلي وڃي ٿي. ايم ڪيو ايم ٻڌائي ته اهي ڀرتيون ڪهڙي طرح ۽ ڪنهن قانون تحت ٿيون. هنن 18 ۽ 19 گريڊ جي جاين تي سڌو سنئون ڀرتيون ڪيون اهو ڪم ته سنڌ جو وڏو وزير به نٿو ڪري سگهي. هن چيو ته ايم ڪيو ايم وارا امن امان جي ڳالهه ڪن ٿا، ڪراچي جي ٽارگيٽ آپريشن ۾ اهڙن دهشتگردن جون گرفتاريون ٿيون آهن جن پنهنجي ڏوهه جو اعتراف ڪيو آهي ۽ انهن دهشتگردن ۾ اڪثريت واٽر بورڊ ۽ ڪي ايم سي جي ملازمن جي آهي. اسان مفاهمت کي نظر ۾ رکندي ناراضگيون ختم ڪري ڇڏيون پر دهشتگردن خلاف ڪارروائي ۾ ڪابه مفاهمت نه آهي. هن چيو ته اسان کي جيترو لاڙڪاڻو ۽ ڪشمور عزيز آهي ايترو ئي ڪراچي ۽ حيدرآباد عزيز آهي، اهي سمورا شهر ۽ ڳوٺ سنڌ جو حصو آهن، هتي رهندڙ سمورا ڀائر آهن، اسان جا دوست ڪڏهن معاملي  کي لساني رنگ ڏين ٿا ته ڪڏهن ڪو ٻيو رنگ ڏين ٿا. ڪا ناراضگي ڪنهن ٻي تي ڪڍڻ مناسب نه آهي. هن چيو ته پيپلز پارٽي جي اڳواڻن جي اها پيشڪش موجود آهي ته سڀئي گڏجي ملڪ، صوبن ۽ عوام جي خدمتون ڪريون. هن چيو ته وڏي وزير سيد قائم علي شاهه جي قيادت ۾ قانون لاڳو ڪندڙ ادارن جيڪو ڪم ڪيو آهي ان جو ماضي ۾ مثال نٿو ملي، سوين پوليس وارا شهيد ٿيا آهن. اسان کي پنهنجن ادارن جي ڪارڪردگي تي فخر آهي. هنن دهشتگردي جي وڏن وڏن ڪيسن ۾ ملوث جوابدارن جو پتو لڳايو. صحافي ولي بابر ۽ تحريڪ انصاف جي عورت اڳواڻ زهره شاهد جي قاتلن کي انهي پوليس گرفتار ڪيو آهي. هن چيو ته ايم ڪيو ايم وارا اهڙي گفتگو نه ڪن جنهن سان ويڇا وڌن. حق عوام لاءِ هوندا آهن، سياسي جماعتن لاءِ ناهن هوندا. ڪراچي ۾ پشتو، بلوچي، سنڌي، پنجابي، سرائيڪي، اردو ۽ ٻيون زبانون ڳالهائيندڙ اسان جا ڀائر آهن. کين ورهايو نه وڃي ۽ نه ئي اسان ڀائرن کي ورهائڻ ڏينداسين. ايم ڪيو ايم وارا نان اشوز کي اشو ٺاهي ملڪ کي آزمائش ۾ نه وجهن. ويڙهه جي سازش ڪئي پئي وڃي پر اسان اها سازش ڪامياب ٿيڻ نه ڏينداسين. اسان ايم ڪيو ايم جي ڀائرن کي چئون ٿا ته هو ڳالهين کي درگزر ڪن ۽ اچن گڏجي صوبي جي خدمت ڪريون.

 

پاڪستان جي خوشحالي ۽ ترقي لاءِ سياسي استحڪام اڻٽر آهي: نواز شريف

لاهور (بيورو) پنجاب جي گورنر چوڌري محمد سرور لاهور ۾ وزيراعظم ميان محمد نواز شريف سان ملاقات ڪئي جنهن ۾ ٻنهي اڳواڻن ملڪ جي موجوده سياسي صورتحال سميت ڪيترن ئي اهم معاملن تي خيالن جي ڏي وٺ ڪئي ان موقعي تي وزيراعظم نواز شريف چيو ته پاڪستان جي خوشحالي ۽ ترقي لاءِ سياسي استحڪام اڻٽر آهي ياد رهي ته ان کان اڳ وزيراعظم نواز شريف اوچتو گورنر هائوس لاهور پهتو جتي هن گورنر پنجاب سان ملاقات ڪئي انهي موقعي  تي ٻنهي اڳواڻن سياسي بحران جي نبيري لاءِ مختلف تجويزن تي غور ويچار ڪيو گورنر وزيراعظم کي عوامي تحريڪ ۽ پي ٽي آءِ اڳواڻن سان ٿيل رابطن کان به واقف ڪيو.

 

ثقافتي ورثو دنيا جي ثقافتن جو بنيادي پهلو آهي، جيڪو عالمي تهذيب جي اظهار جي شڪل آهي: پرويز رشيد

روٽرڊيم (م.ڊ/اي پي پي) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته بهتر مفاهمت ۽ عالمي امن جي لاءِ علائقائي ۽ عالمي سطح تي مختلف ملڪن جي وچ ۾ وڌيڪ ثقافتي رابطن جي ضرورت آهي، پاڪستان وٽ خاص طور تي آرٽس ۽ ڪرافٽس جي شعبي ۾ ڀرپور ثقافتي ورثو آهي. ڪالهه سومر ڏينهن ڇهين ايشيا يورپ وزيرن جي ثقافتي ڪانفرنس جي پهرين ابتدائي سيشن ۾ شرڪت ڪندڙن کي خطاب ڪندي هن چيو ته ثقافتي ورثو دنيا جي ثقافتن جو بنيادي پهلو آهي، جيڪو عالمي تهذيب جي اظهار جي شڪل آهي ۽ انساني معاشري جي ترقي جو به ذريعو آهي، هن چيو ته ثقافت ذريعي ماڻهو هڪ ٻئي کي بهتر طور تي سمجهي سگهن ٿا ۽ سرحد پار ثقافتي رڪاوٽن تي ضابطو آڻي سگهن ٿا، هن چيو ته علم، ڄاڻ ۽ تخليقي صنعتن جو استعمال نه رڳو ثقافتي اثاثن جي موثر استعمال جو سبب آهي پر ثقافتي ورثو، مهارتن ۽ تخليقڪاري جي رابطن ذريعي موقعا به فراهم ڪري ٿو جيڪي صدين کان ڳوٺاڻن ۽ شهري ڪميونٽيز ۾ موجود آهن، اهي انساني وسيلن جي ترقي لاءِ صلاحيت پيدا ڪري سگهن ٿا جنهن جي نتيجي ۾ پيداوار ۾ اضافو ٿيندو. هن چيو ته پاڪستان وٽ خاص طور تي آرٽس اينڊ ڪرافٽس جي شعبي ۾ اهڙو ڀرپور ثقافتي ورثو آهي. هن چيو ته سنڌو درياءَ اتر ۾ جبلن کان ٿيندو پنجاب جي سرسبز ميدانن مان گذري سنڌ جي ريگستان ۽ بلوچستان جي علائقن کان ٿيندو عربي سمنڊ ۾ وڃي ڪري ٿو، هن چيو ته مختلف علائقن جي ثقافت ۽ روايتن ۾ فرق جي نتيجي ۾ جامع آرٽس اينڊ ڪرافٽس کي فروغ مليو جنهن جي عڪاسي مقامي مهارتن ۽ ثقافتي ماحول سان ٿئي ٿي. وفاقي وزير چيو ته حڪومت تخليقي صنعت ان جي ڀرپور اقتصادي ۽ ثقافتي اهميت کان پوري طرح آگاهه آهي جيڪا ثقافتي سڃاڻپ جي ذريعي جو سبب آهي. هن چيو ته وومين انٽرپرينيورشپ جي فروغ، ڪلسٽر فارميشن، صنعت ۽ اڪيڊمي جي وچ ۾ ويجهن رابطن جي فروغ جون ڪوششون ڪيون ويون آهن، هن چيو ته انٽرپرينيورشپ ۽ سمال اينڊ ميڊيم انٽرپرائيزس سان اٽڪل 38 سيڪڙو غيرزرعي افرادي قوت کي وڪرو ڪيو ويو، سينيٽر پرويز رشيد چيو ته ثقافتي صنعتون تخليق سازي، پيداوار ۽ تخليقي ڪمن کي واپاري بڻائيندي ان کي گڏ رکن ٿيون، اطلاعات واري وفاقي وزير تخليقي صنعت جي صلاحيت جي جائزي جو موقعو فراهم ڪرڻ تي هالينڊ جي شاهه جا ٿورا مڃيا ۽ اميد ظاهر ڪئي ته ڪانفرنس ۾ شريڪ نمائندا تخليقي صلاحيت جي شعبي ۾ اقتصادي ترقي جي امڪانن جو جائزو وٺندا، اهڙن فائديمند مشورن سان شرڪت ڪندڙ ملڪن جي وچ ۾ وڌيڪ مفاهمت ۽ دوستي پيدا ٿيندي، هن پاڪستان حڪومت پاران ڪانفرنس ۾ شرڪت ڪندڙ وفدن جي لاءِ پنهنجي نيڪ خواهشن جو اظهار ڪيو.

 

ايم ڪيو ايم جا نه پر پ پ جا به سوين ڪارڪن ماريا ويا آهن: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه سنڌ اسيمبليءَ ۾ تقرير ڪندي چيو آهي ته موجوده حڪومت پهرين حڪومت آهي جنهن مشهور قاتلن ۽ دهشتگردن کي گرفتار ڪيو آهي هن چيو ته سنڌ ۾ رڳو ايم ڪيو ايم جا نه پر پيپلز پارٽي جا سوين ڪارڪن به قتل ڪيا ويا آهن، اڄ ايم ڪيو ايم جي بائيڪاٽ کانپوءِ سنڌ اسيمبلي ۾ تقريرڪندي سيد قائم علي شاهه چيو ته اسان ايم ڪيو ايم سان وڙهڻ نه پر دوستي وڌائڻ چاهيون ٿا پر اهي پاڻ اسان کان پري ٿيڻ چاهين ته پوءِ ڇا ٿو ڪري سگهجي، هن چيو ته اسان جيڪي دهشتگرد گرفتار ڪيا آهن انهن کي چئلينج ڪيو ويندو ته اسين اهو ٻڌائي ڇڏينداسين ته انهن گرفتار ٿيل دهشتگردن جا نالا ڇا آهن ۽ انهن جو ڪهڙي پارٽي سان تعلق آهي وڏي وزير چيو ته ڪي ايم سي ۽ واٽر بورڊ ۾ 18 ۽ 19 گريڊ ۾ سڌيون ڀرتيون ڪيون ويون ۽ ٽارگيٽ ڪلنگ ۾ جيڪي ماڻهو پڪڙيا ويا آهن انهن مان ڪيترائي ڪي ايم سي جا ملازم آهن.

 

سنڌ اسيمبلي ۾ سنڌ لوڪل گورنمينٽ (ترميمي) بل 2014ع اڪثريت راءِ سان منظور

ڪراچي(اسٽاف رپورٽر)سنڌ اسيمبلي سومر ڏينهن سنڌ لوڪل گورنمينٽ (ترميمي)بل 2014ع اڪثريت راءِ سان منظور ڪري ڇڏيو آهي. سنڌ اسميبلي جو اجلاس اسپيڪر آغا سراج دراني جي صدارت هيٺ سنڌ اسيمبلي جو اجلاس ٿيو جنهن ۾ صوبائي وزير ڊاڪٽر سڪندر مينڌرو سنڌ لوڪل گورنمينٽ (ترميمي) بل پيش ڪيو ويو. جيڪوايوان اتفاق راءِ سان منظور ڪري ورتو ترميم تحت نين تڪبندين جو اختيار صوبائي حڪومت کان اليڪشن ڪميشن آف پاڪستان حوالي ڪيو ويو آهي.

 

اوٿل ويجهو ڪوچ ۽ ٽرالر ۾ ٽڪر، 11 مسافر فوت

ڪوئيٽا (بيورو) بلوچستان جــي علائقي اوٿل ويجهو مسافر ڪوچ ۽ ٽرالر وچ ۾ ٽڪر جــَي نتيجي ۾ فوتين جو انگ يارنهن ٿي ويو، جڏهن ته 25 زخمين جو اسپتال ۾ علاج هلندڙ آهي. ضلعي لسٻيلا جي تعلقي اوٿل ويجهو آر ڊي شاهراهه تي ڪوئيٽا کان ڪراچي ويندڙ مسافر ڪوچ ٽرالر سان ٽڪرائجي وئي. حادثي جي نتيجي ۾ ڪوچ ۾ سوار 8 ڄڻا ٿڏي تي فوت ٿي ويا جڏهن ته 25 کان وڌيڪ زخمي ٿي پيا. ريسڪيو اختيارين موجب زخمين کي ڊي ايچ ڪيو اسپتال اوٿل منتقل ڪيو ويو، جتان 8 زخمين کي ڳڻتي جوڳي حالت ۾ ڪراچي منتقل ڪيو ويو جتي وڌيڪ 3 ڄڻا زخمن جا سور نه سهندي فوت ٿي ويا. وڌيڪ ٽن زخمين جي فوت ٿيڻ بعد حادثي ۾ فوت ٿيلن جو انگ وڌي 11 ٿي ويو آهي. واضح رهي ته آر ڊي شاهراهه تي ٽريفڪ حادثي جو هــِي پهريون واقعو ناهي، هلندڙ سال ٽريفڪ حادثي ۾ ساڳي ئي شاهراهه تي 38 ڄڻا فوت ٿي چــُڪا آهن.

 

سنڌ ورهاڱي وارو معاملو، سنڌ اسيمبلي ۾ شرميلا فاروقي لڙڪ لاڙي ويٺي

ڪراچي (اسٽاف رپورٽر) سنڌ اسيمبلي جي اجلاس ۾ سنڌ ورهاڱي واري معاملي تي وڏي وزير جي صلاحڪار شرميلا فاروقي جي اکين ۾ ڳوڙها اچي ويا. تفصيل موجب سومر ڏينهن سنڌ اسيمبلي جي اجلاس ۾ پيپلزپارٽي ۽ ايم ڪيو ايم جي اڳواڻن دهوان دار ۽ جذباتي تقريرون ڪيون پر پيپلزپارٽي جي اڳواڻ شرميلا فاروقي ته پنهنجي تقرير دوران بيحد جذباتي ٿي وئي ۽ سنڌ جي ورهاڱي واري معاملي تي ڳوڙها ڳاڙي ويٺي، ان موقعي تي ايم ڪيو ايم کي اپيل ڪندي شرميلا فاروقي چيو ته منهنجا والدين به 0 6  سال پهريان هجرت ڪري ڪراچي آيا، اسان به مهاجرن ۾ شامل آهيون، پر خدارا مهاجر جي نالي تي سنڌ کي نه ورهايو، سنڌ اسان جي ڌرتي ماءُ آهي، جڏهن ڏسو ورهاڱي جي ڳالهه، ونڊڻ جا مطالبا، ورهاڱي واري معاملي تي اسان کي تمام گهڻو ڏک ٿئي ٿو.

 

ذوالفقار علي ڀٽو جي ڪوٽا سسٽم سنڌ کي 2 حصن ورهائي ڇڏيو هو: فيصل سبزواري

ڪراچي (اسٽاف رپورٽر) ايم ڪيو ايم جي اڳواڻ فيصل سبزواري جو چوڻ آهي ته اسان سخت بيان ناهي ڏنو ليڊرشپ تي آواز اٿارڻ تي سخت ڳالهه ڪري سگهون پيا پيپلز پارٽي کي سياست طاقت ڏيکارڻي آهي ته لياري ۾ وڃي ڏيکاري سياست ۾ انتهاپسندي نه هئڻ گهرجي، سنڌ اسيمبلي جي اجلاس کان پهريان ميڊيا سان ڳالهائيندي ايم ڪيو  ايم جي اڳواڻ فيصل سبزواري جو چوڻ هو ته اسان احتياط سان ڳالهايو ليڊرشپ تي آواز اٿارڻ تي وڌيڪ سخت ڳالهائي سگهون ٿا ڪراچي ۾ مسئلي جي حل لاءِ سنڌ حڪومت ۾ شامل ٿياسين سنڌ جي شهري علائقن ۾ ڪم نه ٿي رهيو آهي پيپلز پارٽي کي سياسي طاقت ڏيکارڻي آهي ته لياري ۾ وڃي ڏيکاري. ايم ڪيو ايم ڪراچي جي وسيلن جي حل لاءِ سنڌ حڪومت ۾ شامل ٿي هئي پر  اسان کي اُن ڳالهه تي ڳڻتي آهي ته پيپلزپارٽي ڪراچي جي مسئلن کي حل ڪرڻ ۾ سنجيده ناهي. هن چيو ته ذوالفقار علي ڀٽو جي ڪوٽا سسٽم سنڌ کي 2 حصن  ورهائي ڇڏيو انهيءَ نظام سبب صوبو شهري ۽ ٻهراڙي جي علائقن ۾  ورهائجي ويو

 

دهشتگردي پاڪستان جو وڏو مسئلو ناهي، ان معاملي جي ڪري پنهنجا منصوبا ختم نه ڪنداسينۡ: آمريڪا

لاڙڪاڻو (بيورو) آمريڪي قونصل جنرل ڪراچي برائن هيٿ چيو آهي ته دهشتگردي وڏو مسئلو نه آهي ۽ ان سبب اسان پنهنجا منصوبا ختم نه ڪنداسين. سنڌ جو مستقبل پاڪستان جي ترقي ۾ خاص حيثيت رکي ٿو. سنڌ اسان لاءِ خاص صوبو آهي. موهن جو دڙو جي پراڻي تهذيب کي ڏسڻ منهنجي لاءِ وڏو اعزاز آهي. هي تاريخي ماڳ آهي، جيڪو وڏي پلاننگ سان جڙيل هو. هن جو نڪاسي وارو نظام انتهائي منفرد آهي. اهڙو اظهار هن ڪالهه موهن جو دڙو جي دوري دوران ۽ نئون ديرو جي ڳوٺ سعيدو ديرو ۾ يو ايس ايڊ پاران سيڪنڊري اسڪول جو ايم اين اي فريال ٽالپر سان گڏ سنگ بيناد رکڻ واري تقريب کي خطاب ڪندي ڪيو. هن چيو ته موهن جي دڙي جي بچاءَ لاءِ جيڪڏهن پاڪستان حڪومت ڪو منصوبو جوڙيو ۽ اسان کان مدد گهري ته ان تي غور ڪنداسين. مان هن دوري جون تصويرون نيٽ تي رکندس ته منهنجي آمريڪي دوستن کي اهو ڏسي حسد ٿيندو ته مان موهن جو دڙو تي ويو آهيان. هن چيو ته مان 20 رپين جي نوٽ تي موهن جو دڙو ڏٺو هو ۽ اڄ اکين سان ڏسان پيو. اتان جي ماڻهن کي هي موهن جو دڙو هت اچي ڏسڻ گهرجي. هن چيو ته سنڌ اندر يو ايس اي ايڊ 155 ملين ڊالرن جي مدد سان سنڌ بيسڪ ايجوڪيشن پروگرام شروع ڪيو آهي ته جيئن اسڪول ۾ نه صرف داخلا ۾ اضافو ڪري سگهجي. ان کي برقرار پڻ رکي سگهجي. 5 سالن واري پروگرام تحت يو ايس ايڊ سنڌ صوبي ۾ 120 اسڪولن جي تعمير ۽ مرمت ڪري بحال ڪندو. اهي اسڪول 2010 واري ٻوڏ ۾ متاثر ٿيا هئا. هن پروگرام سان ساڍا 7 لک ٻار پڙهڻ جي اهل ٿيندا. هن چيو ته هي منهنجو پهريون دورو آهي ۽ هي جڏهن اسڪول تعمير ٿي ويندو ته آءُ هتي ٻيهر ايندس ته ان وقت ٻار تعليم حاصل ڪري رهيا هوندا. هن چيو ته ڇوڪرن ۽ ڇوڪرين لاءِ تعليم ڪاميابي جي ڪنجي آهي. تعليم پاڪستان جي نوجوانن کي ان قابل بڻائي ٿي ته اهي پاڪستان جي ترقي يافته ۽ جمهوري ملڪ طور اڳتي وڌائي سگهن ۽ اسان اهو چاهيون ٿا ته اهي ٻار تعليم حاصل ڪري ڪامياب شهري ٿي پنهنجي لکيل جوهر ۽ صلاحيتن جو ڀرپور استعمال ڪن. هن چيو ته هن پروگرام کي ٻنهي ملڪن جي عام ماڻهن جي مدد سان ڪامياب بڻايو ويندو. جمهوري روين کي اپنائڻ سان اهي شاگرد پنهنجو مستقبل سنوارڻ لاءِ اعليٰ تعليم حاصل ڪري سگهندا. سنڌ جو ماڻهو تعليم جي اهميت کي سمجهي ٿو. مان هتي تعليم کاتي جي ويٺل عملدارن سان گڏوگڏ انهن ماڻهن سان مخاطب آهيان ۽ مان انهن کي هن پروگرام جي اهميت سمجهائڻ جي ڪوشش ڪري رهيو آهيان ۽ انهن اسڪولن جي مالڪي توهان جي ئي ذميواري آهي. هن چيو ته انهن اسڪولن کي با اختيار بڻايو ويندو، ان سان گڏ 400 اسڪولن ۾ سنڌ ريڊنگ پروگرام ڪميونٽي پروگرام متعارف ڪرايا پيا وڃن. جنهن کي عام ماڻهو سمجهي ۽ انهن اسڪولن جي اهميت کي اجاگر ڪندا. هن چيو ته مستقبل ۾ ڇوڪرين جي تعليم آمريڪي عوام جي ڪوششن سان پروگرام شروع ڪيا ويندا. يو ايس ايڊ جي ريجنل ڊائريڪٽر ليون اسڪپ چيو ته اسان 120 اسڪولن جي تعمير وارو پروجيڪٽ سيڪريٽري تعليم سنڌ جي موجودگيءَ ۾ اهو ٽارگيٽ حاصل ڪري وٺنداسين. اهو ان کان بغير ممڪن نه آهي. هن چيو ته تعليم جي سهڪار لاءِ هي اسان جو هڪڙو حصو آهي. جيڪب آباد ۾ 133 بسترن تي ٻڌل اسپتال جو ترقياتي ڪم ڪرائي رهيا آهيون. جنهن سان جيڪب آباد ۽ بلوچستان صوبي جي ڏيڍ ڪروڙ کان وڌيڪ ماڻهن کي فائدو حاصل ٿيندو. 350 ڪروڙ ڊالرن سان سول اسپتال ۾ 60 بسترن تي مشتمل گائني وارڊ جوڙي رهيا آهيون. 6 ڪروڙ ڊالر سان جناح اسپتال ڪراچي ۾ پڻ وارڊ تعمير ڪيو پيو وڃي، ڄامشورو ۽ گڊو پاور هائوس لاءِ 39ڪروڙ ڊالر لاڳت جي پاور اسٽيشن تي ڪم ڪري رهيا آهيون، جنهن مان 270 ميگا واٽ بجلي پيدا ٿيندي ۽ ان مان 6 لک ماڻهن کي فائدو حاصل ٿيندو. 382 ڪروڙ ڊالرن سنڌ اندر صحت تي خرچ ڪري رهيا آهيون، جنهن ۾ ماءُ ۽ ان جي ٻار جي نشونما ۾ مدد ملندي. سنڌ ۾ ٻوڏ متاثرن لاءِ هڪ ارب ڊالر جي يو ايس اي ايڊ مدد ڪئي. تعليم واري سيڪريٽري فضل الله پيچوهو چيو ته 2011 ۾ يو ايس اي ايڊ ۽ سنڌ حڪومت وچ ۾ 155 ملين ڊالرن جو معاهدو ٿي رهيو هو. ان وقت ڪامورا رڪاوٽ بڻيل هئا ۽ هن پروگرام جي پي سي ون تيار ڪرڻ ۾ 9 مهينا لڳي ويا ۽ 2013 ۾ يو ايس ايڊ سان سنڌ بيسڪ ايجوڪيشن پروگرام جي نالي سان سنڌ اندر تعليم کي بهتر بڻائڻ لاءِ ڪم شروع ڪيو ويو. ان موقعي تي ٻارڙن سنڌي ثقافتي گيت تي رقص ڪري يو ايس ايڊ جي ڊپٽي مشن ڊائريڪٽر ڪيٿي مور کي جهومائڻ تي مجبور ڪري ڇڏيو. ٻارڙن ٽيبلو پيش ڪري آمريڪي قونصل جنرل تعريف ڪرڻ کان رڪي نه سگهيو. ان موقعي تي ايم اين اي فريال ٽالپر چيو ته سنڌ حڪومت تعليم جي بهتري لاءِ پنهنجا سمورا وسيلا ڪتب آڻي رهي آهي ۽ ٻوڏ ۾ متاثر علائقن ۾ تباهه ٿيل اسڪول يو ايس ايڊ جي مدد سان ٻيهر تعمير ڪرايا پيا وڃن. جنهن سان تعليمي معيار بهتر ٿيندو. سنڌ کي معياري تعليم ڏيڻ چاهيون ٿا. جيڪو پ پ جي منشور ۽ بلاول ڀٽو زرداري جو خواب آهي. ايم اين ايم محمد اياز سومرو، ايم پي اي سهيل انور سيال، ڪلچرل افيئرس جي انچارج لي پنگ لو سميت ماسترياڻيون، شاگرد وڏي انگ ۾ موجود هئا. ان موقعي تي علامت طور آمريڪي ڪانسوليٽ جنرل ۽ ايم اين اي فريال ٽالپر ٻوٽو پوکيو.

 

حڪومت جو مدو پورو ٿيندي نه پيو ڏسان: سراج الحق

سکر (بيورو) جماعت اسلامي جي امير سراج الحق چيو آهي ته وفاقي ۽ صوبائي حڪومتن جو مدو پورو ٿيندي نه پيو ڏسان. سراج الحق چيو آهيته 65 سالن ۾ سياسي اداڪارن ۽ پنڊنتن عوام کي دوکو ڏنو آهي. سنڌ بدامني جي باهه ۾ ٻري رهي آهي جنهن ۾ حڪمران پاڻ ملوث آهن. هن چيو ته الزامن جي سياست نه ڏيڻ گهرجي پر حقن جي سياست ڪئي وڃي، ايندڙ چونڊن کان پهريان چونڊ سڌارا ٿيڻ تما ضروري آهن پر فاقي ۽ چئني صوبائي حڪومتن کي مدو پورو ٿيندي نه پيو ڏسان.