تازيون خبرون

Daily Archives: October 19, 2014

حب ويجهو 11 پورهيت اغوا، 9 قتل

حب (مانيٽرنگ ڊيسڪ/اين اين آءِاي پي پي) حب ويجهو اغوا ٿي ويل 11 پورهيتن مان 9 ڄڻن جا گوليون لڳل لاش هٿ ڪيا ويا آهن، جڏهن ته وزيراعظم نواز شريف ۽ پنجاب جي وڏي وزير پاران واقعي جي مذمت ڪندي جوابدارن جي گرفتاري جو حڪم ڏئي ڇڏيو آهي. ساڪران واري علائقي جي پولٽري فارم ۾ ڪم ڪندڙ 11 پورهيتن کي گذريل رات اغوا ڪري کين قتل ڪيو ويو آهي. ساڪران واري علائقي مان اغوا ٿيل 9 پورهيتن جا لاش مليا. پوليس پهچي قتل ڪيل 9 پورهيتن جا لاش اسپتال پهچايا. ٻڌايو پيو وڃي ته مارجي ويل پورهيت مظفر ڳڙهه ۽ ڊيرا غازي خان جا رهواسي آهن. وزيراعظم نواز شريف، پنجاب جي وڏي وزير شهباز شريف واقعي جي مذمت ڪندي جوابدار گرفتار ڪرڻ جو حڪم ڏئي ڇڏيو آهي. ايف سي ۽ پوليس ساڪران واري علائقي ۾ سرچ آپريشن شروع ڪري ڇڏيو آهي. پوليس موجب اغوا ٿي ويل هڪ پورهيت کي هٿياربندن ڇڏي ڏنو آهي، جيڪو زخمي حالت ۾ مليو آهي. پوليس ٻڌايو ته اغوا ٿي ويل هڪ پورهيت اڃا تائين گم آهي.

 

ڪارساز سانحو عالمي تاريخ جو وڏو سانحو آهي: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه آچر جي شام ڪارساز شهيدن جي يادگار تي پهچي گل چاڙهيا ۽ دعا ڪئي سنڌ جي وڏي وزير جو معاون خاص وقار مهدي، راشد رباني، صديق ابوڀائي قادر پٽيل ۽ ٻيا ان سان گڏ هئا ان موقعي تي ميڊيا جي نمائندن سان ڳالهائيندي وڏي وزير چيو ته ڪارساز جو واقعو نه صرف ملڪي پر عالمي تاريخ جو به هڪ وڏو سانحو آهي جنهن جو مثال ڪٿي به نٿو ملي اڄ اسان انهن شهيدن کي سلام پيش ڪرڻ ۽ دعا لاءِ شهيدن جي يادگار تي آيآهيون هن چيو ته پاڪستان پيپلزپارٽِ جي تاريخ شهادتن قربانين ۽ جدوجهد سان رقم آهي پ پ جي قيادت ۽ ڪارڪنن لازوال ۽ بي مثال قربانيون پيش ڪيون آهن.

 

ايم ڪيو ايم پاران سنڌ حڪومت کان الڳ ٿيڻ جو اعلان، صوبن جي مطالبي تان پوئتي نه هٽنداسين: خالد مقبول

ڪراچي (اسٽاف رپورٽر) متحده قومي موومينٽ جي رابطه ڪميٽي جو ڪراچي ۽ لنڊن ۾ گڏيل اجلاس ٿيو آهي جنهن ۾ ايم ڪيو ايم ۽ الطاف حسين خلاف وڌندڙ غير مهذب ڳالهه ٻولهه ۽ جارحاڻي عمل جو جائزو ورتو ويو آهي اجلاس دوران سمورن پارليامينٽ ۽ صوبائي اسيمبلي ميمبرن کي به طلب ڪيو ويو هو، اجلاس ۾ سنجيدگي سان سنڌ حڪومت کان عليحدگي تي غور ڪيو ويو ۽ اجلاس کانپوءِ ان جو باقاعده اعلان جو به امڪان آهي، ان سلسلي ۾ 9 بجه هڪ پريس ڪانفرنسجو به اعلان ڪيو ويو آهي واضح رهي ته بلاول ڀٽو زرداري گذريل ڏينهن الطاف حسين کي تنقيد جو نشانو بڻايو هو. خالد مقبول صديقي پريس ڪانفرنس ڪندي چيو آهي ته هاڻي ڪوبه سبب ناهي ته پ پ سان گڏ هلجي. اسين ٻڌائڻ چاهيون ٿا ته اسان پنهنجي حصي جو سفر ڪري ورتو آهي. اسان جيڪوڪجهه پئي سگهياسين اُهو ڪيوسين اسان کي محبت بجاءِ نفرت ملي. ايم ڪيو ايم پيپلزپارٽيءَ جي سنڌي وزيراعظم کي ووٽ ڏئي وزيراعظم هائوس تائين پهچايو. جڏهن ايم ڪيو ايم جي قائد جي ڳالهه اچي ٿي ته ڪارڪن سمجهوتو نه ڪندا.  شهري علائقا بجيٽ جو 95 سيڪڙو ڏين ٿا. پوئين پنجن سالن ۾ پيپلزپارٽي ۽ نفرت جو مظاهرو ڪيو آهي. بلاول ڀٽو چيو هو ته اسين اوهان جو جيئڻ حرام ڪري ڇڏينداسين. اسان جڏهن سنڌ ون ۽ ٽو جي ڳالهه ڪئي ته انهن کي خراب لڳي. اسان الطاف حسين تي ڪوبه ڪمپرومائيز نه ڪنداسين. اسان صوبن جي مطالبي تان پوئتي نه هٽنداسين. بلاول ڀٽو زرداريءَ جو وارث ٿي سگهي ٿو پاڪستان پيپلزپارٽيءَ جو وارث نٿو ٿي سگهي. بلاول اسين جي قائد کي چوي ٿو ته جيئڻ حرام ڪري ڇڏينداسين. قوم پڇڻ چاهي ٿي ته بلاول ڀٽو  اڃا تائين سندس والده جي قاتلن جو جيئڻ حرام ڪيو آهي. خورشيد شاهه ٻڌي ڇڏي اوهان جي ڳار تي اسان جو صوبي جو پهريون مطالبو آهي

 

 

سماجي ترقي جو دارومدار جديد، نون تصورن ۽ اسان جي دور جي وڏن مسئلن جي حل ۾ آهي: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته وزيرن جي ڇهين ايشيا يورپ ثقافت ڪانفرنس ثقافت، تعليم، سائنس ۽ واپار جي شعبي ۾ ٿيندڙ جديد تصورن ۽ تجربن جو هڪ موقعو فراهم ڪندي. وزيرن جي ڇهين ايشيا ثقافت ڪانفرنس اڄ سومر ڏينهن هالينڊ جي شهر اوٽرڊم ۾ ٿيندي. ٻن ڏينهن واري ڪانفرنس ۾ ايشيا ۽ يورپ جي مختلف ملڪن جا اٽڪل 40 ثقات وارا وزير ۽ نمائندا شرڪت ڪندا جنهن جو افتتاح هالينڊ جو بادشاهه وليم اليگزينڊر ڪندو هن سال ڪانفرنس جو موضوع معاشري جي لاءِ تخليقي صنعتون ٽيلينٽ ٽيڪنالاجي ۽ واپار آهي. ڪانفرنس ۾ پاڪستان جي نمائندگي اطلاعات، نشريات ۽ قومي ورثي وارو وفاقي وزير سينيٽر پرويز رشيد ڪري رهيو آهي. روٽرڊم پهچڻ تي پنهنجي بيان ۾ وفاقي وزير پرويز رشيد چيو ته هو ڪانفرنس ۾ شرڪت ڪندڙ ملڪن جي نمائندن ۽ وزيرن سان تخليقي صنعتن جي چئلينجن، تجربن تي خيالن جي ڏي وٺ ڪندو. هن اميد ظاهر ڪئي ته ايس ايم اي جو فورم ثقافت، تعليم، سائنس ۽ واپار جي شعبي ۾ جديد تصورن ۽ تجربن مان فائدو حاصل ڪرڻ جو موقعو فراهم ڪندو. وفاقي وزير ڪانفرنس جي موقعي تي هالينڊ جي تعليم، ثقافت ۽ سائنس واري وزير مادام جٽ بسي ميڪر سان پڻ ملاقات ڪندو ۽ ان سان پاڪستان ۽ هالينڊ جي وچ ۾ ثقافتي بنيادن ۽ تعليم جي شعبي ۾ ٻطرفن لاڳاپن ۽ تعاون جو جائزو وٺندو. هالينڊ جي تعليم ۽ ثقافت واري وزير ڪانفرنس جي موقعي تي پنهنجي بيان ۾ چيو ته 21 هين صدي جي سماجي چئلينجن کي منهن ڏيڻ جي لاءِ حل ڳولڻ ۽ اقتصادي ترقي جي لاءِ تخليقي مهارتون لازمي آهن، سماجي ترقي جو دارومدار جديد، نون تصورن ۽ اسان جي دور جي وڏن مسئلن جي حل ۾ آهي. هن چيو ته 21 هين صدي شروع ٿيڻ تي ايشيا ۽ يورپ ۾ ثقافتي، اقتصادي، سماجي ۽ ٽيڪنالاجي ترقي جي چئلينجن کي منهن ڏيڻ جي لاءِ انساني تحقيقي صلاحيتن کي وڌائڻ جي لاءِ ترقياتي حڪمت عملي اختيار ڪرڻي پوندي. هن چيو ته تخليقي صنعت ٻنهي معاشرن جي فائدي ۽ اقتصادي هدف حاصل ڪرڻ جي لاءِ نوان تصور فراهم ڪرڻ جي سلسلي ۾ ثقافت جي استعمال جي صلاحيت رکي ٿو.

 

پ پ اڄ به ملڪ جي سڀ کان وڏي پارٽي آهي، 18 آڪٽوبر جي جلسي ۾ عوام ثابت ڪري ڇڏيو: شرجيل ميمڻ

ڪراچي(اسٽاف رپورٽر) سنڌ جي صوبائي وزير شرجيل انعام ميمڻ چيو آهي ته 18 آڪٽوبر تي عظيم الشان ۽ تاريخي جلسي ۾ شامل ٿي پاڪستاني عوام ثابت ڪري ڇڏيو آهي ته پاڪستان پيپلزپارٽي اڄ به هن ملڪ جي سڀ کان وڏي جماعت آهي عام جلسي ۾ لکن جي انگ ۾ جيالن مزدورن هارين پورهيتن شاگردن عورتن شامل ٿي نه صرف هن جلسي کي ڪاميابڪيو پر پيپلزپارٽي تي تنقيد ڪندڙن جا هواس به خطا ٿي ويا آهن. بلاول ڀٽو زرداري پاڪستان جي بهتر مستقبل جي اميد آهي آچر تي جاري پنهنجي هڪ بيان ۾ شرجيل انعام ميمڻ چيو ته 18 آڪٽوبر جو ڪراچي جو جلسو هن ملڪ جي تاريخ جو سڀ کان وڏو جلسو هو ۽ ان جي ڪاميابي جو ڪريڊٽ هن ملڪ جي غيرتمند ۽ پورهيت عوام مزدورن هارين شاگردن عورتن ۽ جيالن ڏانهن وڃي ٿو شرجيل ميمڻ چيو ته پيپلزپارٽي جا جيالا ۽ پاڪستان جو عوام بلاول ڀٽو زرداري جي اڳواڻي ۾ پاڪستان کي پيش ايندڙ سمورين چئلينجز جو مقابلو ڪرڻ لاءِ تيار آهن هن چيو ته پيپلزپارٽي جي قيادت کان علاوه پاڪستان ۾ هن وقت ڪوئي به هڪ اهڙو ليڊر نه آهي جيڪو سمورين چئلينجز تي کلي ڳالهائي سگهي. شرجيل انعام ميمڻ اليڪٽرونڪس ۽ پرنٽ ميڊيا جو به خاص طور تي شڪريو ادا ڪيو ۽ ڇيو ته ميڊيا هن تاريخي ۽ عام جلسي جي مثبت ڪوريج ڪئي.

 

سنڌ تي حڪمراني ڪندڙ پارٽي امن قائم ناهي ڪري سگهي، کيس حڪمراني جو حق ناهي: سراج الحق

لاهور (م.ڊ) امير جماعت اسلامي پاڪستان سراج الهق چيو آهي ته ملڪ ۾ حقيقي اسلامي، فلاحي ۽ معاشي انقلاب جماعت اسلامي آڻيندييپلزپارٽي سالون سال کان حڪومت ۾ اچي رهي آهي ۽ اڄ به سنڌ گلگت ۽ ڪشمير ۾ پيپلزپارٽي جي حڪومت آهي ته پوءِ بلاول ڀٽو زرداري شڪايت ڪنهن کان ڪري رهيو آهي ۽ ڇو روئي رهيو آهي ڪراچي جي جلسي ۾ بلاول ۽ زرداري غريب تي ظلم ۽ جبر ۽ سنڌ جي محرومن جو ذڪر ڪيو آهي هر مقرر ڪراچي جلسي کي شام ڪربلا بڻائڻ جي ڪوشش ڪئي پر اهو نه ٻڌايو ته مرڪز (ن) جي حڪومت رهي اڄ 40، 45 سالن کان پوءِ ايئن روئڻ ۽ مسئلا ڳڻائڻ سان ڳالهه ناهي ٺهندي موجوده صورتحال جو ذميوار عوام آهي جنهن کي سچي ۽ خراب جي فرق ڪرڻ بدران انهن حڪمرانن کي اکيون ٻوٽي ووٽ ڏي ٿو ۽ مسلسل پنهنجي سر تي ويهاري ٿو بلاول ٺيڪ چيو آهي ته آئينده عوام سوچي سمجهي ووٽ ڏي ملڪ تي غريبن، جاگيردارن، وڏيرن ۽ سرمائيدارن حڪومت ڪئي ۽ انهن ئي غريبن کي اڄ هن حال تائين پهچايو آهي سنڌي قبيلن ۾ ويڙهه ٿي رهي آهي جنهن ۾ سوين ماڻهو ماريا وڃن ٿا آصف زرداري سڀ ڪم ڇڏي قائم علي شاهه ۽ خورشيد شاهه سان ملي انهن قبيلن ۾ امن ڪرائي زرداري صاحب جيڪڏهن اوهان کان هي ڪم نه ٿي سگهيو ته اسان کي پنهنجو جرڳو وٺي اچڻو پوندو غريب ماڻهو ماريا پيا وڃن ڳوٺ برباد ۽ قبرستان آباد ٿي رهيا آهن هر طرف لاقانونيت ۽ بيچيني آهي سنڌ کي قبيلائي جهيڙن تباهه ۽ برباد ڪري ڇڏيو آهي سنڌ ۾ بدامني جي ڪري شام کان پوءِ ڪوئي ماڻهو پنهنجي گهر کان ٻاهر نٿو نڪري سگهي جيڪي حڪمران عوام کي جان ۽ مال جو تحفظ نه ڏيئي سگهن کين حڪمراني ڪرڻ جو حق نه آهي جماعت اسلامي جي مرڪزي ميڊيا سيل منصوره مان جاري ڪيل پريس رليز موجب اهڙن خيالن جو اظهار هن جيڪب آباد ۽ شڪارپور ۾ وڏي عوامي جلسن کي خطاب ڪندي ڪيو جلسو امير جماعت اسلامي سنڌ معراج الحديٰ صديقي ۽ صوبائي نائب امير محمد حسين محنتي پڻ خطاب ڪيو.

 

پاڪستان جو گڏيل قومن سان رابطو، ڀارتي جارحيت روڪرائڻ جو مطالبو

اسلام آباد(بيورو) وزيراعظم جي پرڏيهي معاملن بابت صلاحڪار سرتاج عزيز گڏيل قومن جي سيڪريٽري جنرل کي ٽيليفون ڪري لائين آف ڪنٽرول تي ڀارت جي لاڳيتي ڀڃڪڙين بابت آگاهي ڏني آهي، سرتاج عزيز چيو آهي ته ڀارت کي ايل او سي تي اڳرائي کان روڪيو وڃي، بان ڪي مون جو چوڻ آهي ته ٻئي ملڪ ڇڪتاڻ گهٽائڻ لاءِ قدم کڻن. وزيراعظم نواز شريف جي پرڏيهي معاملن بابت صلاحڪار سرتاج عزيز گڏيل قومن جي سيڪريٽري جنرل بان ڪي مون کي ٽيليفون ڪري هڪ دفعو ٻيهر لائين آف ڪنٽرول تي ڀارت جيلاڳيتي ڀڃڪڙين بابت آگاهي ڏني. سرتاج عزيز بان ڪي مون سان ڳالهائيندي چيو ته پاڪستان هر قسم جي اڳرائي کي منهن ڏيڻ جي صلاحيت رکي ٿو پر پاڪستان ذميواري جو مظاهرو ڪري رهيو آهي ڀارتي اڳرائي باوجود هو صبر ۽ تحمل جو مظاهرو ڪري رهيا آهن، ڀارت کي به ذميواري جو مشورو ڏنو وڃي. سرتاج عزيز چيو ته ڀارت کي چڙ ڏياريندڙ قدمن کان روڪيو وڃي، سرتاج عزيز ٽيليفونڪ ڳالهه ٻولهه ۾ بان ڪي مون کي ڀارت جي لائين آف ڪنٽرول ۽ ورڪنگ بائونڊري تي اڳرائين سان ٿيل جاني ۽ مالي نقصان بابت به آگاهه ڪيو. گڏيل قومن جي سيڪريٽري جنرل بان ڪي مون ايل او سي ۽ ورڪنگ بائونڊري تي ڇڪتاڻ تي ڳڻتي جو اظهار ڪيو ۽ چيو ته ٻئي ملڪ ڇڪتاڻ گهتائڻ لاءِ قدم کڻن..

 

آپريشن خيبر ون، اهم ڪمانڊرن سميت 37 دهشتگرد مارجي ويا

خيبرايجنسي (مانيٽرنگ ڊيسڪ) سرڪاري ميڊيا موجب خيبرايجنسي ۾ دهشتگردن خلاف آپريشن ضرب عضب خيبرون ٽئين ڏينهن به جاري رهيو. سيڪيورٽي فورسز موجب باڙا ۾ تيرا جي علائي ڪاخيل ۾ دهشتگردن خلاف آپريشن جاري آهي. پاڪ فوج جي ڪارروائي ۾ 37 دهشتگرد مارجي ويا آهن جڏهن ته اهم ڪمانڊر سميت 50 ويڙهاڪن سيڪيورٽي فورسز آڏو هٿيار ڦٽا ڪري ڇڏيا آهن. هوڏانهن ماڻهن کي علي مسجد ۽ اورڪزئي کان محفوظ هنڌن ڏانهن منتقل ڪيو پيو وڃي سيڪيورٽي فورسز تيرا جي ڀرسان روڪزئي ۾ داخلا مرڪز قائم ڪيو آهي. علي مسجد جي رستي 365 کان وڌيڪ خاندانن لڏ پلاڻ ڪئي آهي سيڪيورٽي فورسز دهشتگردن کي چيو آهي ته هٿيار ڦٽا ڪري حڪومت جي عملداري تسليم ڪن. سيڪيورٽي فورسز قبائلي عوام کي انهن دهشتگردن کان نجات ڏيارڻ چاهي ٿي جيڪي قبائلي عوام جي ڏکيائين ۾ اضافو ڪري رهيا آهن.

 

ڪراچي ۾ ايڌي هوم ۾ 5 ڪروڙ ڪيش ۽ 5 ڪلو سون جو ڌاڙو، ايس ايڇ او کارا در معطل، اويس مظفر جي ستار ايڌي سان ملاقات، تعاون جي خاطري

ڪراچي (اسٽاف رپورٽر) ڪراچي ۾ هٿياربندن مشهور سماجي ڪارڪن عبدالستار ايڌي ۽ ٻين ماڻهن کي يرغمال بڻائي ميٺا در واري علائقي مان ايڌي سينٽر جي لاڪرن ۾ امانت طور پيل ڪروڙين روپيا ۽ سون ڦري فرار ٿي ويا، عبدالستار ايڌي جو چوڻ آهي ته ڌاڙيل سندس سينٽر مان ڪروڙين روپين جي پرڏيهي ڪرنسي ۽ ٻيون امانتون کڻي ويا، انهن ۾ لکين آمريڪي ڊالر به شامل آهن، هن ٻڌايو ته ڦورن مان هڪ جي منهن تي ڪپڙو ويڙهيل هو ۽ اهو لڳاتار ڪنهن ٻئي شخص سان ڳالهائي هدايتون وٺي رهيو هو هن وڌيڪ ٻڌايو ته جنهن وقت ڦورو اندر گهڙيا ان وقت اهو اندر ستو پيو هو ڦورن کانئس چاٻيون گهريون پر ساڻس ڪابه بدتميزي نه ڪئي هن ٻڌايو ته ڦورو جيڪو سون ۽ پئسا کڻي ويا ان مان ڪيتريون ئي پرايون امانتون هيون جيڪي واپس ڪرڻيون هيون، هن چيو ته آئون گذريل 50 سالن کان فلاحي ڪمن ۾ رڌل آهيان ۽ اڄ تائين مون سان اهڙو ڪو وڏو واقعو نه ٿيو آهي، پوليس ميٺا در ٿاڻي تي ڪيس داخل ڪري جاچ ڪري رهي آهي، پر ايڌي سينٽر ۾ سي سي ٽي وي ڪئميرائون نه هجڻ ڪري ڌاڙيلن جي هلين بابت اکين ڏٺن شاهدن کان پڇا ڳاڇا ڪري جاچ ڪئي پئي وڃي ياد رهي ته عبدالستار ايڌي هن وقت ايڌي سينٽر ۾ رهيل آهي ۽ ڪافي بيمار آهي. بئي طرف پاڪستان پيپلزپارٽي جي چيئرمين بلاول ڀٽو زرداري جي خاص هدايت تي مرڪزي اڳواڻ ۽ اڳوڻي صوبائي وزير سيد اويس مظفر آچر تي ميٺادر ۾ ايڌي فائونڊيشن جي هيڊ آفيس ۾ عبدالستار ايڌي ۽ ان جي پٽ فيصل ايڌي سان ملاقات ڪئي ان موقعي تي فيصل ڪريم ڪنڊي ۽ اڳوڻو قومي اسيمبلي ميمبر انور خان به ان سان گڏ موجود هو سيد اويس مظفر عبدالستار ايڌي جي عيادت ڪئي ۽ ڌاڙي جو تفصيل ورتو ان کان پو3 ميڊيا سان ڳالهائيندي سيد اويس مظفر چيو ته انسانيت جي خدمت ڪندڙ عبدالستار ايڌي کي لٽيندڙ انسان چورائڻ جي لائق نه آهن عبدالستار ايڌي سڄي دنيا ۾ انسانيت جي خدمت جي حوالي سان مشهور آهي پاڪستان ۾ جيتريون سماجي خدمتون هن ڪيون آهن پوري قوم ان جي خدمتن تي کيس خراج تحسين پيش ڪري ٿي هن چيو ته هن واقعي سان مون کي دلي صدمو پهتو آهي ۽ پيپلزپارٽي جي اعليٰ قيادت به هن واقعي جو سختي سان نوٽيس ورتو آهي هن چيو ته هن واقعي ۾ ملوث جوابدارن جو تعلق ڪنهن به گروپ يا تنظيم سان هجي کين ڪنهن به صورت ڇڏيو نه ويندو هن چيو ته بلاول ڀٽو زرداري سنڌ حڪومت کي هنواقعي جي جاچ لاءِ هدايتون جاري ڪري ڇڏيون آهن ان موقعي تي سيد اويس مظفر عبدالستار ايڌي کي پنهنجي هر ممڪن تعاون جي خاطري ڪرائي عبدالستار ايڌي اويس مظفر جي آمد تي ان جو شڪريو ادا ڪيو.

 

اڄوڪو جلسو لاهور جو ريفرنڊم ثابت ٿيندو، جلسو ثابت ڪندو ته انقلاب اچي ويو آهي: طاهر القادري

لاهور(م.ڊ) پاڪستان عوامي تحريڪ جي سربراهه طاهرالقادري چيو آهي ته اڄوڪو جلسو لاهور جو ريفرنڊم ثابت ٿيندو، جلسو ثابت ڪندو ته انقلاب اچي ويو آهي، مينار پاڪستان تي اعلان ڪيو ويندو ته خون جو بدلو خون آهي، هو ماڊل ٽائون سانحي جي شهيدن جي رقم نه وٺندا، هو مري ويندو پر ڊيل نه ڪندو. اسلام آباد مان لاهور روانو ٿيڻ کان اڳ ڌرڻي کي خطاب ڪندي طاهرالقادري چيو ته حق ۽ باطل جي جنگ شروع ٿي چڪي آهي، اڄوڪو جلسو ثابت ڪندو ته لاهور ڪنهن جو آهي، لاهور واسي ڌائيندا ته هو اسٽيٽسڪو چاهن ٿا يا انقلاب چاهن ٿا. طاهرالقادري چيو ته فيصل آباد کان پوءَ ٻيو وڏو جلسو لاهور ۾ ڪيو پيو وڃي، اڄ فتح ۽ سڄي ملڪ ۾ ڪاميابي جو ڏينهن آهي، هاڻي گهڻو وقت لٽ مار ۽ ڪرپشن نه هلندي سگهندي. هن چيوته ماڊل ٽائون سانحي جي شهيدن جي خون بها نه ورتي ويندي، خون جو بدلو خون هوندو، عوامي تحريڪ جا ڪارڪن مري ته سگهن ٿا پر ڊيل نه ٿا ڪري سگهن، هو خون جو بدلو بدامني ذريعي نه پر قانوني جنگ ذريعي وٺڻ چاهن ٿا. هن چيو ته ڌرڻي لاءِ اتحادين سان صلاح مشورا جاري آهن، لاهور جي جلسي ۾ حڪمت جو اعلان ڪيو ويندو، هو 21 آڪٽوبر تي واپس ڌرڻي ۾ ايندو، ان ڏينهن فتح جو جشن ملهايو ويندو. ٻئي طرف پاڪستان عوامي تحريڪ جي لاهور واري جلسي لاءِ تياريون جاري آهن، سيڪيورٽي جا انتهائي سخت انتظام ڪيا ويا آهن، پنجاب حڪومت جلسي کي نظر ۾ رکندي ميٽرو بس سروس هڪ ڏينهن لاءِ بند ڪري ڇڏي آهي.