تازيون خبرون

Daily Archives: October 10, 2014

ورڪنگ بائونڊري تي ڀارتي اڳرائي جو پوري طاقت سان جواب ڏيڻ جو فيصلو

اسلام آباد(بيورو) حڪومت ۽ عسڪري قيادت، لائين آف ڪنٽرول ۽ ورڪنگ بائونڊري تي ڀارت طرفان جنگبندي واري معاهدي جي ڀڃڪڙي ۽ بنا جواز فائرنگ جو پوري طاقت سان ڏيڻ جو فيصلو ڪيو آهي. اسلام آباد ۾ وزيراعظم نواز شريف جي صدارت هيٺ ورڪنگ بائونڊري تي ڀارتي اڳرائي بابت حڪمت عملي جوڙڻ لاءِ قومي سلامتي ڪميٽي جو اجلاس ٿيو. اجلاس ۾ جوائنٽ چيفس آف اسٽاف ڪميٽي جي چيئرمين، آرمي چيف جنرل راحيل شريف، ڊي جــِي آءِ ايس آءِ ۽ ڊي جي ملٽري سميت وفاقي وزيرن، وزيراعظم جي صلاحڪار سرتاج عزيز ۽ طارق فاطمي به شرڪت ڪئي. اجلاس ۾ فيصلو ڪيو ويو ته پاڪستان خطي ۾ ڀارت جي هڪ هٽي ۽ ٿاڻيداري کي هر گز قبول نه ڪندو. اجلاس ۾ اهو به فيصلو ڪيو ويو ته جيڪڏهن سرحد تي ڪنهن به قسم جي ڀڃڪڙي ڪئي وئي ته ان جو جواب پوري طاقت سان ڏنو ويندو. حڪومت ۽ عسڪري قيادت اهو به فيصلو ڪيو ته ڀارت جي اڳرائي خلاف گڏيل قومن سان رابطو ڪيو ويندو ۽ ان سلسلي ۾ گڏيل قومن جي سيڪريٽري جنرل کي خط لکيو ويندو. ان کان اڳ اجلاس ۾ عسڪري عملدارن ٻڌايو ته ڀارت 2014ع ۾ هن وقت تائين 230 ڀيرا ورڪنگ بائونڊري تي سيز فائر جي ڀڃڪڙي ڪري چڪو آهي جڏهن ته گذريل ڪجهه ڏينهن دوران ڀارتي اڳرائي ۾ 12 ڄڻا شهيد ۽ 42 زخمي ٿي چڪا آهن. عسڪري اختيارين اجلاس کي ٻڌايو ته جوابي ڪارروائي ۾ پاڪ فوج ڀارتي فوج جي چيڪ پوسٽن کي نشانو بڻايو ۽ ڀارتي اڳرائي جو ڀرپور جواب ڏنو پيو وڃي. قومي سلامتي ۽ پرڏيهي معاملن بابت وزيراعظم جي صلاحڪار سرتاج عزيز اجلاس کي ٻڌايو ته پاڪستان ورڪنگ بائونڊري جي صورتحال گڏيل قومن جي فوجي مبصر آڏو به رکي آهي. وزيراعظم نواز شريف قومي سلامتي ڪميٽي جي اجلاس کي خطاب ڪندي چيو ته پاڪستان جي امن واري خواهش کي ڪمزوري نه سمجهيو وڃي. هن چيو ته سرحدي علائقي مان لڏپلاڻ ڪندڙ ماڻهن جي سار سنڀال لڌي ويندي. سندس چوڻ هو ته گذريل ڏينهن ميران شاهه جو دورو ڪيو جيڪو سندس زندگي جو خوشگوار تجربو هو. وزيراعظم چيو ته هــُو ميران شاهه ۾ آپريشن ضرب عضب بابت پاڪ فوج جي ڪاميابين تي ان کي ڀيٽا پيش ڪري ٿو. نواز شريف چيو ته آپريشن ضرب عضب ڪاميابي سان جاري آهي، پاڪ فوج جا جوان بهادري سان دشمن جو مقابلو ڪري رهيا آهن.

 

وڏي وزير غير حاضر ملازمن خلاف انڪوائري جو حڪم ڏئي ڇڏيو

ڪراچي ( اسٽاف رپورٽر ) سنڌ جي وڏي وزير سيد قائم علي شاهه عيد جي موڪلن کان پوءِ سرڪاري آفيسن ۾ ملازمن جي غير حاضري جي حوالي سان ميڊيا جي رپورٽن جو سختيءَ سان نوٽيس وٺندي جمعي جي ڏينهن صبح جو نيو سنڌ سيڪريٽريٽ، تغلق هائوس، ناڻي کاتي سميت مختلف آفيسن جا اوچتا دورا ڪري سيڪريٽريٽ جي آفيسرن ۽ عملي جي حاضري چيڪ ڪئي ۽ آفيسرن ۽ عملي جي غير حاضري تي سخت ڪاوڙ جو اظهار ڪيو، ڪجهه آفيسرن عدالتن ۾ ڪيسن جي پيروي ، ٽريننگ ۽ بيماري جو جواز پيش ڪري رکيو هو پر وڏي وزير انهن جي بهانن کي ناقابل قبول قرار ڏنو ۽ سيڪريٽري جنرل ايڊمنسٽريشن کي هدايت ڪئي ته غير حاضر ملازمن بابت انڪوائري ڪري سومر تائين رپورٽ پيش ڪئي وڃي ته جيئن غير حاضر ملازمن خلاف ڪارروائي ڪري سگهجي. ان موقعي تي وڏي وزير چيو ته آفيسرن ۽ اسٽاف جي غيري حاضري سبب نه رڳو سرڪاري ڪم متاثر ٿي رهيو آهي پر ڏورانهن علائقن مان ايندڙ عام ماڻهن کي به پريشاني کي منهن ڏسڻو پوي ٿو. هن چيو ته حتمي انڪوائري رپورٽ کان پوءِ غير حاضر رهندڙ ملازمن خلاف قائدن ۽ ضابطن تحت ڪارروائي ڪئي ويندي ۽ انهن جون پگهارون به بند ڪري سگهجن ٿيون. ان موقعي تي ڊيوٽي تي موجود سيڪريٽري ورڪس اينڊ سروسز قاضي شاهد پرويز جي وڏي وزير واکاڻ ڪئي. گهرو کاتي جي دوري دوران وڏي وزير گهرو سيڪريٽري نياز عباسي کان امن امان جي صورتحال تي بريفنگ ورتي ۽ ايڊيشنل چيف سيڪريٽري رٿابندي ۽ ترقيات کي ترقياتي منصوبن خاص طور تي رستن ، پاڻي جي نيڪال ۽ پيئڻ جي پاڻي جي منصوبن وارن ڪمن کي معياري بڻائڻ جي هدايت ڪئي بعد ۾ وڏي وزير تعليم کاتي جي آفيس جو دورو ڪيو ۽ ايڊيشنل چيف سيڪريٽري تعليم ۽ خواندگي فضل الله پيچوهو کان تعليم کاتي جي ڪارڪردگي بابت بريفنگ ورتي ۽ کيس سرڪاري اسڪولن ۾ غير حاضر استادن ۽ ٻئي عملي جي خلاف سخت ايڪشن کڻڻ جي به هدايت ڪئي . ان موقعي تي وڏي وزير جو پرنسپل سيڪريٽري علم الدين بلو ۽ سيڪريٽري انعام الله ڌاريجو به موجود هئا .

 

ڪيمرون، 0 6 هين دولت مشترڪه ڪانفرنس ۾ 3 5 ملڪن پاڪستان کي 1 6 هين اجلاس جي ميزباني لاءِ چونڊي ورتو

ڪيمرون (م.ڊ) ڪيمرون ۾ ٿيندڙ 0 6 هين دولت مشترڪه ڪانفرنس جي پڄاڻي واري اجلاس دوران 3 5 ملڪن سان تعلق رکندڙ لڳ ڀڳ 0 0 2 پارليامينٽيرين پاڪستان کي 1 6 هين اجلاس جي ميزباني لاءِ چونڊي ورتو. قومي اسيمبلي اسپيڪر سردار اياز صادق 5 1 0 2 Á4 1 0 2 ع لاءِ دولت مشترڪه پارلياماني اسيمبلي جي صدر چونڊجڻ بعد جڏهن ڪرسي صدارت سنڀالي ته ڏکڻ آفريقا، مالٽا، تنزانيا سميت آفريقا سان تعلق رکندڙ پارلياماني ميمبر پنهنجي علاقائي ۽ روايتي انداز ۾ ناچ ڪندا آجياڻي جا نغما ڳايا. ان موقعي تي قومي اسيمبلي اسپيڪر شريڪ ٿيلن جو شڪريو ادا ڪيو جن پاڪستان کي 5 1 0 2 ع جي دولت مشترڪه پارلياماني اسيمبلي جي ميزباني لاءِ چونڊيو. ان کان پهريان سردار اياز صادق پاڪستان کي بحيثيت ميزبان متعارف ڪرائڻ لاءِ شريڪ ٿيلن سامهون هڪ تجويز پيش ڪئي جنهن ۾ هڪ دستاويزي فلم جي مدد سان پاڪستان جو تعارفي خاڪو پيش ڪيو ويو. دولت مشترڪه جي پارلياماني اجلاس کي خطاب ڪندي سردار اياز صادق چيو ته اڳين سال 1 6 هين دولت مشترڪه ڪانفرنس جي ميزباني لاءِ پاڪستان جي چونڊ ڪرڻ حقيقت ۾ عالمي دنيا طرفان پاڪستان ۾ جمهوريت ۽ نظامِ حڪومت تي اعتماد ڪرڻ برابر آهي. هن چيو ته پاڪستان ۾ جمهوريت وڏي تيزيءَ سان ڦهلجي رهي آهي ۽ دنيا اهو ڏٺو ته 3 1 0 2 ع ۾ هڪ چونڊيل عوامي حڪومت ٻي چونڊيل عوامي حڪومت کي اقتدار سونپيو، اهي پاڪستاني پارلياماني تاريخ ۾ وڏا يادگار لمحا هئا. قومي اسيمبلي اسپيڪر ڪانفرنس جي شريڪ ٿيلن کي ٻڌايو ته پاڪستان جي قبائلي علائقن ۾ ملٽري آپريشن وڏي ڪاميابي سان جاري آهي جنهن جي ذريعي پاڪستان ۾ دهشتگردي جو خاتمو ڪيو پيو وڃي، ان ڪاميابي کي پوري دنيا به ڏاڍو ساراهيو آهي. هن چيو ته پاڪستان ۾ هن وقت بغير ڪنهن خوف جي سياسي سرگرميون جاري آهن جنهن ۾ وڏيون ريليون ۽ عوامي ميڙ به شامل آهن، اهو ڏينهن پري ناهي جڏهن پاڪستان وري امن جو گهوارو بڻجي ويندو.

 

وزيراعظم سان آرمي چيف ۽ ايڊمرل ذڪاءُ الله جي الڳ الڳ ملاقات

اسلام آباد (بيورو) وزيراعظم نواز شريف سان آرمي چيف جنرل راحيل شريف ۽ پاڪ نيول جي سربراهه ايڊمرل ذڪاءُ الله جمعي ڏينهن قومي سلامتي ڪائونسل جي اجلاس کان پهريان الڳ الڳ ملاقات ڪئي، ملاقات ۾ پيشيوراڻا معاملن تي ويچاريو ويو. ذريعن موجب آرمي چيف ۽ ايڊمرل ذڪاءُ الله وزيراعظم نواز شريف سان وزيراعظم هائوس ۾ ملاقاتون ڪيون، قومي سلامتي ڪميٽي جي اجلاس کان پهريان ٿيل ملاقاتن ۾ ورڪنگ بائونڊري ۽ ايل او سي تي ڇڪتاڻ واري صورتحال تي ڳالهايو ويو، آرمي چيف سان ملاقات ۾ آپريشن ضرب عضب ۽ ملڪي سيڪيورٽي سميت پيشيوراڻا معاملن تي ڳالهايو ويو. وزيراعظم نواز شريف ايڊمرل ذڪاءُ الله کي پاڪ نيوي جي چارج سنڀالڻ تي مبارڪ ڏني.

 

پاڪستان ۽ ڀارت ۾ لائين آف ڪنٽرول تي جاري ڇڪتاڻ تمام جلد ختم ٿي ويندي: اسحاق ڊار

واشنگٽن(م.ڊ) ناڻي واري وفاقي وزير اسحاق ڊار چيو آهي ته پاڪستان ۽ ڀارت ۾ لائين آف ڪنٽرول تي جاري ڇڪتاڻ تمام جلد ختم ٿي ويندي، ڪشمير مسئلو گڏيل قومن جي قراردادن مطابق حل ٿيڻ گهرجي. واشنگٽن ۾ آمريڪي ٿنڪ ٽئنڪ کي خطاب ڪندي وفاقي وزير اسحاق ڊار چيو ته ڪمشير جو مسئلو گڏيل قومن جي قراردادن جي روشني ۾ حل ٿيڻ گهرجي، ڀارت سان ڪشمير مسئلي سميت ٻيا معاملا پرامن طريقي سان حل ٿيڻ گهرجن جئين اقتصادي ۽ واپاري لاڳاپا متاثر نه ٿين. اسحاق ڊار چيو ته پاڪ ڀارت لاڳاپا مضبوط ٿيڻ سان خطي ۾ ترقي ٿيندي، بهتر لاڳاپن سبب معيشت ۾ بهتري آئي آهي.. هُن چيو ته پاڪستان به ايٽمي طاقت آهي، ڀارت کي ڀرپور جواب ڏئي سگهجي ٿو، پر هو پرامن طريقي سان سمورا معاملا حل ڪرڻ چاهين ٿا.

 

تاريخ بگاڙي نه وڃي، حقيقتون صحيح رکيون وڃن، شهيد ڀٽو ۽ بينظير ڀٽو بطور وزيراعظم ميرانشاهه جو دورو ڪري چڪا آهن: زرداري

لاهور (م.ڊ) پيپلزپارٽي جي شريڪ چيئرمين آصف علي زرداري نواز شريف جي اتر وزيرستان جو دورو ڪندڙ پهريون وزيراعظم جي دعويٰ کي غلط قرار ڏيندي چيو آهي ته تاريخ بگاڙي نه وڃي، حقيقتون صحيح رکيون وڃن ان کان پهريان ذوالفقار علي ڀٽو ۽ محترمه بينظير ڀٽو بطور وزيراعظم ميرانشاهه جو دورو ڪري چڪا آهن. بلاول هائوس ۾ سرگوڌا ڊويزن جي پيپلزپارٽي جي ڪارڪنن کي خطاب ۾ زرداري ان حڪومتي پروپئگنڊا تي سخت تنقيد ڪئي ته نواز شريف ميرانشاهه جو دورو ڪندڙ پهريون وزيراعظم آهي. آصف زرداري چيو ته 6 7 9 1 ع ۾ ذوالفقار علي ڀٽو ۽ 6 9 9 1 ع ۾ محترمه بينظير ڀٽو بطور وزيراعظم ميرانشاهه جا دورا ڪيا هئا. هن چيو ته تاريخ کي بگاڙيو نه وڃي.

 

لائين آف ڪنٽرول تي جنگبندي واري معاهدي جي ڀڃڪڙي جا ڀارتي الزام رد

اسلام آباد(بيورو) پاڪستان لائين آف ڪنٽرول تي جنگبندي جي ڀڃڪڙي ۽ بنا جواز فائرنگ جا ڀارتي الزام رد ڪري ڇڏيا، پرڏيهي ترجمان جو چوڻ آهي ته پاڪستان نه پر ڀارت لاڳيتو سيز فائر معاهدي جي ڀڃڪڙي ڪري رهيو آهي. پرڏيهي کاتي جي ترجمان تسنيم اسلم اسلام آباد ۾ هفتيوار ميڊيا بريفنگ ۾ چيو ته ڀارت طرفان ڪنٽرول لائين ۽ ورڪنگ بائونڊري تي جنگبندي جي ڀڃڪڙي ۽ بنا جواز فائرنگ جو ذميوار پاڪستان کي قرار ڏيڻ درست ناهي. هن چيو ته ڀارت لاڳيتو جنگبندي واري معاهدي جي ڀڃڪڙي رهيو آهي، پاڪستان ايل او سي تي فائرنگ شروع نه ڪئي ۽ ورڪنگ بائونڊري توڙي لائين آف ڪنٽرول تي رڳو جواب ڏئي رهيو آهي. تسنيم اسلم چيو ته عالمي برادري لائين آف ڪنٽرول جي صورتحال ڏسي رهي آهي جڏهن ته گڏيل قومن جو مبصر گروپ معاملي جي جاچ لاءِ موجود آهي ڀارت ان کي جاچ جي اجازت ڏئي. پرڏيهي ترجمان چيو ته پاڪستان ڪشميري عوام جي وڪالت ڪندو رهندو ۽ ڪنٽرول لائين تي فائرنگ ڪري پاڪستان کي ڳالهين جي ميز تي نه ٿو آڻي سگهجي. واضح رهي ته ڀارت، ڪنٽرول لائين ۽ ورڪنگ بائونڊري تي اڻ اعلانيل جنگ شروع ڪئي آهي جڏهن ته ڪيترن ئي ڏينهن کان جاري ڀارتي اڳرائي جي نتيجي ۾ 13 پاڪستاني شهيد ۽ 50 کان وڌيڪ زخمي ٿي چڪا آهن.

 

ملالا يوسف زئي امن جو نوبل انعام کٽي ورتو

لنڊن(م.ڊ) خيبر پختون خواهه ۾ طالبان دهشتگردن جي حملي ۾ زخمي ٿيل شاگردياڻي ملالا يوسف زئي امن جو نوبل انعام کٽي ورتو. خيبر پختون خواهه سان تعلق رکندڙ شاگردياڻي ملالا يوسف زئي کي ڇوڪرين جي تعليم کي هٿي وٺرائڻ ۽ ڀارت سان تعلق رکندڙ ڪيلاش ستيارٿي کي ٻارن جي حقن لاءِ جاکوڙڻ تي گڏيل طور امن جي نوبل انعام سان نوازيو ويو آهي. امن جي نوبل انعام لاءِ روس جي صدر ولادي مير پيوٽن، آمريڪي ڳجهي اداري جي اڳوڻي آفيسر ايڊورڊ اسنوڊن ۽ آمريڪي عورت فوجي سپاهي چيلسيا ماننگ کي به نامزد ڪيو ويو هو. نوبل ڪميٽي جي چيئرمين ۽ ناروي جي اڳوڻي وزيراعظم ٿورب جوئرن جاگينڊ جي اعلان بعد اهو ايوارڊ ملالا يوسزئي ۽ ڪيلاش ستيارٿي کٽڻ ۾ ڪامياب ٿيا.

 

 

ڀارت جي ٿاڻيداري ۽ ڪنهن به قسم جي اجاره داري قبول نه آهي: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته ڀارت جي ٿاڻيداري ۽ ڪنهن به قسم جي اجاره داري قبول نه آهي، امن تي يقين رکون ٿا پر ڪنهن به قسم جي خطري ۽ دراندازي جو مقابلو ڪرڻ جي ڀرپور صلاحيت رکون ٿا ۽ ان جو پوري طاقت سان جواب ڏنو ويندو، ڪو ان غلط فهمي ۾ نه رهي ته پاڪستان کي دٻائي سگهجي ٿو، پاڪستان جي موقف کان سڄي دنيا کي آگاهه ڪيو ويندو ۽ 5 اهم ترين ملڪن ۾ خصوصي نمائندا موڪليا ويندا، گڏيل قومن جي ملٽري آبزرورز کي سرحدي علائقن جو دورو ڪرايو ويندو، ڀارت پاران ڪنٽرول ۽ ورڪنگ بائونڊري تي گولاباري هڪ وسيع حڪمت عملي جو حصو آهي، ڌرڻا هڻندڙ پاڪستان جي اسٽريٽجڪ مفادن کي تماشو نه بڻائين، آمريڪا کي ڊرون حملن جو خوف آهي ته افغانستان ۾ دهشتگردن جي پنگاهن تي حملا ڪن. هو ڪالهه جمعي ڏينهن هتي وزيراعظم هائوس ۾ قومي سلامتي ڪميٽي جي اجلاس کانپوءِ صحافين کي بريفنگ ڏئي رهيو هو. ان موقعي تي اطلاعات، نشريات ۽ قومي ورثي جو وفاقي وزير سينيٽر پرويز رشيد پڻ موجود هو. گهرو وزير چيو ته قومي سلامتي ڪميٽي جي اجلاس ۾ لائين آف ڪنٽرول ۽ ورڪنگ بائونڊري تي ڀارت جي اشتعال انگيز گولاباري ۽ فاٽا ۾ ملٽري آپريشنز بحث هيٺ آيا ۽ وڌيڪ ڌيان ايل او سي ۽ ورڪنگ بائونڊري تي ڀارتي گولاباري تي رهيو. هن چيو ته پاڪستان اڳ ۾ به ۽ اڄ به امن ۽ ڳالهين کي ملڪن جي وچ ۾ لاڳاپن جو اصل رستو سمجهي ٿو. پاڪستاني حڪومت گذريل عرصي دوران ان سلسلي ۾ ڪيترائي اهم قدم کنيا. پاڪستان جي وزيراعظم جي ڀارتي وزيراعظم نريندر مودي جي حلف برداري تقريب ۾ شرڪت ڪرڻ انتهائي اهم قدم هو. ان موقعي تي ٻنهي ملڪن جي قيادت جي وچ ۾ جيڪي ڳالهيون ٿيون ان سان ٻنهي ملڪن ۾ اها اميد پيدا ٿي ته لاڳاپا بهتر ٿين. ان دوران سيڪريٽري سطح تي ڳالهين جو فيصلو ٿيو پر ڪجهه مهينن جي واقعن امن ۽ ڳالهين جي راهه ڳوليندڙن کي مايوس ڪيو ۽ ڀارت پاران سيڪريٽري سطح تي ڳالهين جو فيصلو بنا جواز طور تي واپس ورتو ويو جڏهن ته حريت اڳواڻن سان پاڪستاني هاءِ ڪمشنر جي ملاقات معمول جي ڳالهه هئي ۽ ڪا اڻ ٿيڻي نه هئي. هن چيو ته گذريل ڪجهه ڏينهن دوران ڀارت پاران لائين آف ڪنٽرول ۽ ورڪنگ بائونڊري تي اشتعال انگيز ۽ بنا جواز انڌاڌنڌ فائرنگ ۽ گولاباري ڪئي وئي، اها معمول جي فائرنگ نه هئي، ٻئي طرف کان ڀاري هٿيار استعمال ڪيا ويا جنهن سان 13 قيمتي جانين کانسواءِ ڪيترائي شهري زخمي ۽ گهر تباهه ٿيا. هن چيو ته قومي سلامتي جي اجلاس ۾ شهيد ٿيندڙن جي پونئيرن ۽ زخمين سان همدردي جو اظهار ڪيو ويو. هن چيو ته پاڪستان جي عوام، سياسي پارٽين، هٿياربند فوج ۽ سمورو معاشرو ان ڳالهه تي متفق آهي ته اسان امن ۽ ڀائيچاري جي ذريعي معاملن جو حل ڪڍڻ جي لاءِ تيار آهيون پر ڪنهن قسم جي ٿاڻيداري يا اجاره داري اسان کي قبول نه آهي پوءِ ڀلي اها سياسي هجي يا ملٽري يا اسٽريٽجڪ، هن چيو ته اسان امن تي يقين رکون ٿا، اسان جي لاءِ اها ڳالهه حيران ڪندڙ آهي ته جڏهن پوري قوم عيدالاضحيٰ ۾ مصروف هئي ته ان موقعي تي ٻئي طرف کان انڌاڌنڌ گولاباري ڇو ڪئي وئي؟ اسان ان ڳالهه تي به حيران آهيون ته اهڙي قسم جي فائرنگ جو ڪو نه ڪو مقصد هوندو آهي، پاڪستان جو سمورو ڌيان اتر ۾ ملٽري آپريشن تي آهي جنهن ۾ پاڪستاني فوج جو وڏو حصو مصروف آهي ۽ وڏي ڪاميابي سان اهو آپريشن جاري آهي، اهڙين حالتن ۾ ڀارت پاران اهڙي قسم جي مهم جو ڪهڙو مقصد آهي؟ هن چيو ته ٻئي طرف کان يقينن ڪو مقصد آهي ان لاءِ اشتعال انگيز فائرنگ ڪئي وئي، اسان جون سموريون پاليسيون خاص طور تي پاڙيسري ملڪن سان امن ۽ ڀائيچاري جي بنياد تي آهن. ان سلسلي ۾ پاڪستان جو وزيراعظم تمام گهڻو اڳيان وڌيو آهي ۽ ماضي جون تلخيون وساري امن ۽ ڀائيچاري جو پيغام ڏنو آهي پر ان جو هرگز مطلب اهو نه آهي ته اسان غيرملڪي تسلط قبول ڪنداسين. اجلاس ۾ پاڪستان فوج پاران ان يقين ۽ عزم جو اظهار ڪيو ويو ته پاڪستان جي هٿياربند فوج ڪنهن به پرڏيهي خطري ۽ دراندازي جو مقابلو ڪرڻ جي ڀرپور صلاحيت رکي ٿي ۽ هن فورم فيصلو ڪيو آهي ته ڪنهن به مهم ۽ دراندازي جو پوري طاقت سان جواب ڏنو ويندو، ڪو ان غلط فهمي ۾ نه رهي ته عسڪري طاقت يا زوربازو سان پاڪستان کي دٻائي سگهجي ٿو. هن خطي جو بنيادي مسئلو ڪشمير آهي، ڳالهين سان ئي ان مسئلي جي حل طرف وڌي سگهجي ٿو، پاڪستان ۽ ڀارت ٻئي ائٽمي طاقتون آهن ۽ ٻنهي تي وڏيون ذميواريون آهن، ڪو طاقت ذريعي هڪ ٻئي کي ختم نه ٿو ڪري سگهي، ان لاءِ فوج يمداخلت يا مهم جوئي کان پاسو ڪيو وڃي ۽ اهو سبق ٻئي طرف جي حڪمرانن کي سکڻ گهرجي. هن چيو ته هڪ طرف ايل او سي ۽ ورڪنگ بائونڊري تي گولاباري جي ماحول کي برپا ڪري رکيو آهي ته ٻئي طرف ڀارتي وزيرن جي چڙ ڏياريندڙ بيانن حالتن کي وڌيڪ خراب ڪيو آهي جنهن جو گذريل سالن ۾ مثال نه ٿو ملي. هن ان عزم جو اظهار ڪيو ته پاڪستان جي آزادي، خودمختياري ۽ علائقائي سلامتي جو هر حال ۾ تحفظ ڪيو ويندو ۽ پاڪستان جي حڪومت، فوج ۽ عوام ان جي ڀرپور صلاحيت رکي ٿي ۽ اڄ جي اجلاس جو اهو ئي پيغام آهي ته اسان اڃا به امن جي رستي تي هلي سمورا مسئلا حل ڪرڻ چاهيون ٿا اهو ئي پاڪستان، ڀارت ۽ پوري دنيا جي مفاد ۾ آهي. ڀارتي گولاباري جي جواب بابت هڪ سوال جي جواب ۾ هن چي ته ڇا گولاباري جي جواب ۾ گل نڇاور ڪيا ويندا آهن، رينجرز ۽ فوج ڀارتي گولاباري ۽ فائرنگ تي موثر جوابي ڪارروائي ڪندي ڀارتي بندوقن کي خاموش ڪرايو آهي ۽ اسان جو اهو ئي پيغام آهي ته اسان جنگ شروع ڪرڻ وارا نه آهيون پر ٻئي طرف کان ڪارروائي ڪئي وئي ته جواب ڏيڻ جي ڀرپور صلاحيت رکون ٿا. هڪ ٻئي سوال تي هن چيو ته پاڪستان حڪومت پاران وزيراعظم جي پرڏيهي معاملن بابت صلاحڪار گڏيل قومن جي سيڪريٽري جنرل کي خط لکي ڀارت پاران ڪيل خلاف ورزين کان آگاهه ڪندو ۽ ان جو ڌيان حل طلب مسئلن طرف ڇڪرائيندو جنهن سبب ٻنهي ملڪن جي وچ ۾ تلخي موجود آهي. هن چيو ته گڏيل قومن جي ذميواري آهي ته سالن کان پيل قراردادن تي عملدرآمد ڪرايو وڃي. هن چيو ته پاڪستان ڪشمير ۽ ٻين حل طلب مسئلن جي حوالي سان دنيا کي آگاهه ڪرڻ جي لاءِ 5 اهم ترين ملڪن ۾ خصوصي نمائندا موڪلن جو فيصلو ڪيو آهي، انهن ملڪن کي پاڪستان جي موقف کان آگاهه ۽ صورتحال بابت بريف ڪيو ويندو، ان کانسواءِ پرڏيهي آفيس ۾ اهم ملڪن جي سفير نکي گهرائي انهن کي به صورتحال کان آگاهه ڪيو ويندو. هن چيو ته وزيراعظم محمد نواز شريف ۽ من موهن سنگهه جي گذريل سال ملاقات ۾ اهڙا قسم جا واقعا روڪڻ جي لاءِ ڊي جي ايم اوز جي وچ ۾ ميٽنگ ۽ رابطن جي تجويز ڀارت پاران آئي هئي جن کي اسان منظور ڪيو هو. هن چيو ته قومي سلامتي ڪميٽي جي اجلاس ۾ ٻڌايو ويو ته ڀارت پاران فائرنگ ۽ گولاباري کانپوءِ جڏهن فوجي آفيسرن جي سطح تي ٻئي طرف ڳالهه ڪئي وئي ته اتان ڪا خاص ڳڻتي يا ردعمل سامهون نه آيو جيڪو ڪنهن به امن پسند ملڪ طرف کان اچڻ گهرجي. هڪ ٻئي سوال تي هن چيو ته پاڪستان گڏيل قومن جي فوجي مبصرن کي سرحدي علائقن ۾ وٺي ويندو ۽ انهن کي درخواست ڪندو ته هو جاچ ڪري پتو لڳائين ته فائرنگ ڪيئن شروع ٿي ۽ ڪير ان جو ذميوار آهي؟ جڏهن ٻنهي طرفنک ان الزام لڳي رهيا هجن ته غيرجانبدارا آبزرورز ئي فيصلو ڪري سگهن ٿا، اسان جو اهو فيصلو اسان جي ديانت ۽ سچائي جو مظهر آهي ته اسان گڏيل قومن جي ملٽري آبزرورز کي سرحد تي وٺي وڃڻ جي لاءِ بيچين آهيون، پر شايد ڀارت ڪجهه لڪائڻ چاهي ٿو. هن چيو ته فوجي سطح تي ٻنهي ملڪن جي لوڪل ڪمانڊرز جي رابطي ۾ ٻئي طرف کان ڪنهن قسم جي ڳڻتي جو اظهار نه ڪيو ويو نه ئي حالتن کي ڪنٽرول ڪرڻ جو اشارو مليو، اسان جي تصديق ٿيل اطلاع آهي ته اهو سڀ هڪ وسيع حڪمت عملي جو حصو آهي، هن چيو ته پاڪستان جي فوج دنيا جي اعليٰ ترين فوجن مان آهي، پاڪستان کي عسڪري لحاظ کان ڪنهن به طرح مرعوب نه ٿو ڪري سگهجي. ان لاءِ پاڪستان جي مفاد کي پوءِ ڀلي افغانستان جي صورتحال هجي يا ڀارتي سرحد جي آسپاس کان ڌڪ پهچائڻ جي ڪوشش ڪئي ويندي آهي. هڪ ٻئي سوال تي هن چيو ته حڪومت جو آءِ ڊي پيز جي معاملي تي پورو ڌيان آهي، بنون ۾ آءِ ڊي پيز جي ڪئمپ ۾ 15 هزار ماڻهو آهن، ايندڙ ڪجهه هفتن دوران انهن ۾ وڌيڪ اصافو ٿيندو.

 

پاڪستان کي سبق سيکاري ڇڏيو آهي، پاڪستان کي بولي نه گولي سان جواب ڏيڻ جو وقت آهي، نريندر مودي

ممبئي، ڌمنگائون (م.ڊ) ڀارتي وزيراعظم نريندر مودي پاڪستان خلاف زهر اوڳاريندي چيو آهي ته ڀارت پاڪستان کي سبق سيکاري ڇڏيو آهي ۽ آئيندهه هو سيز فائر جي ڀڃڪڙي جهڙي غلطي کي نه دهرائيندو، پاڪستان کي ٻولي نه گولي سان جواب ڏيڻ جو وقت آهي. انتخابي ريلي کي خطاب ڪندي نريندر مودي چيو ته ڀارت پاڪستان جي مبينا وحشت جو زبردست جواب ڏئي رهيو آهي ۽ اُن پاڪستان کي ٺيڪ ٺيڪ سبق سيکاري ڇڏيو آهي ۽ ان جو منهن بند ڪري ڇڏيو آهي. مودي چيو ته پاڪستان هاڻ اهڙي غلطي ٻيهر ڪرڻ جي ڪوشش نه ڪندو. هن چيو ته پاڪستان سان سرحدي علائقن ۾ رهندڙ ڳوٺاڻن جي نقصانن جو ازالو ڪيو ويندو. مودي پاڪستان کي جواب ڏيڻ تي تنقيد ڪرڻ تي آپوزيشن جماعت ڪانگريس تي ڪڙي نڪته چيني ڪئي ۽ چيو ته ڪانگريس صرف پاڪستان سان سرحد تي ٿيندڙ واقعن تي بيان جاري ڪرڻ ۾ رُڌل آهي، اهو صرف ان سان ڳالهه ڪرڻ (بولي) جو وقت نه آهي پر اهو گولي جو وقت آهي ۽ گولي سان جواب ڏنو وڃڻ گهرجي.