تازيون خبرون

Daily Archives: October 3, 2014

سٺن هدايتڪارن طرفان آڇ جو منتظر آهيان: منورشي

ممبئي (شوبز نيوز) بالي ووڊ اداڪار منورشي چيو آهي ته هو فلمن ۾ مرڪزي ڪردار ملڻ جو انتظار ڪري رهيو آهي، اداڪار منورشي جيڪو فلم ”بينڊ باجا بارات“ ۽ ساٿيا ۾ مختصر ڪردار ادا ڪري چڪو آهي، سندس ايندڙرليز ٿيندڙ فلم ”اڪيس توپون ڪي سلامي“ آهي، ان فلم ۾ سندس مختصر ڪردار آهي، ادڪار چيو ته هو وڏي بينرز جي فلم ۾ مرڪزي ڪردار ادا ڪرڻ چاهي ٿو، هن چيو ته صرف سٺن هدايتڪارن طرفان آڇ جو منتظر آهي، ته جيئن پاڻ کي مڃرائي سگهي ۽ پنهنجي فني صلاحيتن جو ڀرپور استعمال ڪري. منورشي ٻڌايو ته هو مستقبل ۾ هدايتڪاري جو ارادو پڻ رکي ٿو ۽ هن کي موقعو مليو ته اها خواهش پوري ڪندو.

 

ڀارت ۾ ٿيل چيمپئنز ليگ ٽي ٽوئنٽي ٽورنامينٽ ۾ بالنگ ايڪشن شڪي رپورٽ ٿيڻ تي مان بلڪل به پريشان ناهيان؛ محمد حفيظ

Muhammad-Hafeezلاهور (اسپورٽس نيوز) پاڪستاني آل رائونڊر ۽ اوپنر محمد حفيظ چيو آهي ته ڀارت ۾ ٿيل چيمپئنز ليگ ٽي ٽوئنٽي ٽورنامينٽ ۾ بالنگ ايڪشن شڪي رپورٽ ٿيڻ تي مان بلڪل به پريشان ناهيان، پر حيران ضرور آهيان ۽ پنهنجو ايڪشن نه بدلائيندس. گذريل مهيني آءِ سي سيءَ پهرين صف جي آف اسپنر سعيد اجمل تي پابندي مڙهي هئي ۽ ان صورتحال ۾ آسٽريليا خلاف 5 آڪٽوبر کان شروع ٿيندڙ سيريز ۾ محمد حفيظ جي پاڪستاني ٽيم ۾ موجودگي تمام اهميت واري آهي، چيمپئنز ليگ ۾ شڪي ايڪشن رپورٽ ٿيڻ جو عالمي ڪرڪيٽ سان ڪو تعلق ناهي ان ڪري آف اسپنر هاڻي عالمي سطح تي امپائرن جي نظرن ۾ اچي سگھي ٿو، واضح رهي ته گذريل ڏينهن ڪوچ وقار يونس چيو هو ته بالنگ ايڪشن شڪي رپورٽ ٿيڻ سان حفيظ جو اعتماد متاثر ٿيندو، ان سلسلي ۾ 33 ورهين جي آل رائونڊر جو چوڻ هو ته ان سان ڪو فرق نه پوندو. دبئي روانو ٿيڻ کان اڳ صحافين سان ڳالهائيندي حفيظ چيو ته اهڙي عمل تي حيراني ٿي، مان گذريل 11 سالن کان ان ئي ايڪشن سان بالنگ ڪري رهيو آهيان، هن وڌيڪ چيو ته مون ڇهن اهم عالمي سطح جي مقابلن ۾ حصو ورتو آهي پر ڪنهن به منهنجي ايڪشن تي سوال ناهي اٿاريو، حفيظ ٻه ورلڊ ڪپ، هڪ ورلڊ ٽي ٽوئنٽي ۽ چيمپيئنز ٽرافي ۾ پاڪستان جي اڳواڻي ڪري چڪو آهي.

 

ثانيه مرزا چائنا اوپن ٽينس ويمنز ڊبلز جي ڪوارٽر فائنل لاءِ ڪوليفاءِ ڪري ورتو

Sania-Mirza-8بيجنگ (اسپورٽس نيوز) ڀارتي ٽينس رانديگرياڻي ثانيه مرزا چائنا اوپن ٽينس ويمنز ڊبلز جي ڪوارٽر فائنل لاءِ ڪوليفاءِ ڪري ورتو آهي. چين ۾ هلندڙ ايونٽ ۾ ڀارت جي ثانيه مرزا ۽ سندس زمبابوي جي ساٿياڻي ڪارا بليڪ جو مقابلو ڊيلڪورا ۽ ريمينڊ سان ٿيڻو هو، مخالف جوڙيءَ جي هڪ رانديگرياڻيءَ جي ان فٽ ٿيڻ سبب ٻئين رائونڊ جو ميچ نه ٿي سگھيو، جنهن ڪري مرزا ۽ ان جي ساٿياڻي ڪارا بليڪ کي واڪ اوور ملي ويو ۽ ڀارت زمبابوين جوڙي ڪوارٽر فائنل ۾ جڳهه ٺاهڻ ۾ ڪامياب ٿي آهي

 

17هين ايشين گيمز ۾ هاڪي جي فائنل ميچ ۾ ڀارت پاڪستان کي شڪست ڏئي سونو ٻلو کٽي ورتو

Incheon_2014_Asian_Games_logo.svgانچيون (اسپورٽس نيوز) 17هين ايشين گيمز ۾ هاڪي جي فائنل ميچ ۾ ڀارت پاڪستان کي پينالٽي شوٽ آئوٽ ذريعي شڪست ڏئي سونو ٻلو کٽڻ سميت 2016ع وارن اولمپڪس رانديل لاءِ به ڪواليفاءِ ڪري ورتو آهي. ڏکڻ ڪوريا جي شهر انچيون ۾ کيڏيل ايشين گيمز جي فائنل ميچ ۾ پاڪستان ۽ ڀارت جون ٽيمون مقرر ڪيل وقت ۾ فقط هڪ هڪ گول ڪري سگهيون، تنهن بعد فائنل ميچ کي پينالٽي شوٽ آئوٽ ذريعي فيصلائتو بڻايو ويو. پينالٽي شوٽ آئوٽ ذريعي ڀارت 4 جڏهن ته پاڪستان فقط 2 گول ڪري سگهيو. جڏهن ته ميچ جي شروعات ۾ پاڪستان جي محمد رضوان پهرين هاف جي ٽئين منٽ ۾ گول ڪري پاڪستان کي ڀارت تي وقتي سرسي ڏياري جيڪا ڀارت جي رانديگر ٻئي هاف ۾ گول ڪري ختم ڪري ڇڏي. جڏهن ته ميچ جي ٽئين ۽ چوٿين هاف ۾ هڪٻئي جي گول پوسٽن تي لاڳيتو حملا ڪيا ويا پر مقرر وقت ۾ ٻئي ٽيمون فيصلائتي سرسي حاصل ڪرڻ ۾ ناڪام ويون، ان لاءِ ميچ جو فيصلو پينالٽي شوٽ آئوٽ تي ٿيو. جنهن ۾ پاڪستان فقط 2 ۽ ڀارت 4 گول ڪري فائنل کٽي ورتي ۽ ان سان گڏ 2016ع وارين اولمپڪس لاءِ ڪواليفاءِ به ڪري ورتو. جنهن کان پوءِ پاڪستان کي چانديءَ جو ٻلو ڏنو ويو. ٻئي طرف باڪسنگ ايونٽ ۾ پڻ پاڪستاني باڪسر محمد وسيم ازبڪستان جي شڪو بدين زويئر کان هارائجي ويو، سيمي فائنل هارائڻ تي محمد وسيم ڪنجھي جو ٻلو ماڻيو. ان کان اڳ ڪوڏي ڪوڏي ۾ هارائڻ تي پاڪستاني ٽيم کي به ڪنجھي جو ٻليو هو ان سميت پاڪستان هڪ وٽ سوني ٻلي سان ٻلن جو انگ 5 ٿي ويو آهي.

 

پاڪستان ۽ آسٽريليا جي ڪرڪيٽ ٽيمن وچ ۾ واحد ٽي 20 ميچ سڀاڻي کيڏي ويندي

Pakistan-vs-Australia-T20-World-Cup-2014-Match-Live-Streamingدبئي(اسپورٽس نيوز) پاڪستان ۽ آسٽريليا جي ڪرڪيٽ ٽيمن وچ ۾ واحد ٽي 20 ميچ آچر تي پاڪستاني وقت مطابق رات جو 9 وڳي کيڏي ويندي. واحد ٽي 20، 3 ون ڊي ۽ 2 ٽيسٽ ميچن تي ٻڌل سيريز لاءِ ٻئي ٽيمون يو اَي اِي ۾ پهچي ويون آهن. پهرين ٽي 20 ميچ 5 آڪٽوبر تي کيڏي ويندي. ون ڊي ميچن جي سيريز 7 آڪٽوبر کان شارجه ۾ شروع ٿيندي، ٻي ون ڊي ميچ 10 آڪٽوبر تي دبئي ۽ ٽين ون ڊي ميچ 12 آڪٽوبر تي ابوظهبي ۾ کيڏي ويندي. آسٽريليا خلاف سيريز ورلڊ ڪپ جي تياريءَ جو حصو آهي. ٻئي ٽيمون ڪاميابيءَ جي عزم سان يو اَي اِي ۾ موجود آهي. پاڪستان ڪرڪيٽ ٽيم جو پلڙو باري آهي. پاڪستان ۽ آسٽريليا وچ ۾ سال 2007ع کان 2014ع تائين مجموعي طور تي 12 ٽي 20 ميچون کيڏيون جن مان 7 ۾ پاڪستان کي ڪاميابي ملي جڏهن ته 4 ميچون آسٽريليا جي حصي ۾ آيون ۽ هڪ ميچ ڊرا ٿي. يو اي اي ۾ به ٻنهي ٽيمن وچ ۾ ٽي 20 ميچن جي ڪاميابيءَ جي حوالي سان پاڪستان ڪرڪيٽ ٽيم کي برتري حاصل آهي. پاڪستاني ٽيم مجموعي طور تي دنيا جي ٻين ٽيمن خلاف 2006ع کان 2014ع تائين 82 ٽي 20 ميچون کيڏيون جن مان 49 ۾ ڪاميابي حاصل ڪئي، جڏهن ته 31 ۾ شڪست کي منهن ڏيڻو پيو ۽ 2 ميچون ڊرا ٿيون.

 

ڇا بلاول ڀٽو زميني حقيقتن کي ترجيح ڏئي سگهندو؟ نسيم بخاري

پاڪستان پيپلزپارٽي هڪ فعو ٻيهر بحث مباحثي هيٺ آئي آهي، ائين ناهي ته اهو پهريون ڀيرو آهي. پ پ هونئن به بحث هيٺ رهندي آئي آهي پر هن ڀيري وارو حوالو پنهنجي حوالي سان جيڪا نئين نواڻ کڻي آيو آهي، ان واقعي به نوان رخ سامهون آندا آهن.اڄ هن سٽن لکڻ کان اڳ بلاول ڀٽو جي سياسي مستقل ۽ حڪمت عملين جي حوالي سان مون جڏهن سوچيو پئي ته دل ۾ اهو خيال آيو هو ته ڇا بلاول جيڪو ڪجهه چئي ۽ ڳالهائي رهيو آهي، سو ان جي پنهنجي مشاهدي جو نتيجو آهي يا ان کي ڪا آئيڊيا ڏئي ان تي عمل ڪرڻ جو چيو ٿو وڃي؟بلاول ڀٽو نوجوان آهي. محترمه جي نشاني آهي ۽ سياست جي اُفق تي حادثاتي طور تي اُڀري آيل نئين رت آهي. 27 ڊسمبر 2007ع تي جيڪڏهن محترمه بينظير ڀٽو راولپنڊي جي لياقت باغ ۾ شهيد نه ڪئي وڃي ها ته ڇا اڄ بلاول پاڪستان پيپلزپارٽي جو مک اڳواڻ هجي ها؟ يقينن نه. ان حادثي آصف علي زرداري کان سياسي اڳڀرائي ڪرائي. پارٽي جون واڳون سندس حوالي هيون ۽ آهن. هو ملڪ جو صدر بڻيو ۽ پاڪستان جي اقتداري محلاتي سازشن جون سٽون سهندو آيو. هن صبر ۽ ڌيرج سان پنهنجو وقت ٽپايو ۽ جهڙي انداز سان وقت جي للڪارن سان هن منهن ڏنو ۽ مُهاڏو اٽڪايو سو واقعي داد جوڳو آهي. اسان وٽ وفاداري ۽ اهليت ٻه هڪڙا اهڙا موضوع آهن، جيڪي سدائين بحث طلب رهيا آهن ۽ اڄ به بحث جوڳا آهن. آصف علي زرداري پنهنجي پنج ساله دور ۾ ۽ ان کانپوءِ به پنهنجي وفادار ساٿين کي اختيار ڏنا. کين مضبوط ۽ طاقتور بڻايو ۽ انهن مکيه سگهه کي جهڙي ريت ڪتب آندو ۽ ان جا جيڪي سماج تي اثر پيا سي ضرور غور طلب آهن. آصف علي زرداري اهل ماڻهن کي جيڪڏهن اختيار ڏئي ها ۽ اهي پنهنجا نتيجا به ڏين ها ته اڄ پڪ سان صورتحال تبديل هجي ها. شايد اهو ئي سبب آهي جو بلاول ڀٽو کي پنهنجي حڪومت جي ڪمزورين جو اعتراف ڪرڻو پيو آهي. هن معافي ورتي آهي پر سوال اهو آهي ته اها معافي ڪنهن کان ۽ ڪنهن جي لاءِ؟سنڌ جو عوام ته پ پ وٽ گروي ٿيل آهي، اسان خيبر پختونخواهه جي عوام جيان ناهيون جيڪو هر دفعي پنهنجو مينڊيٽ مٽيندو ٿو رهي. سنڌ جا ماڻهوءَ گذريل چاليهن سالن کان پاڪستان پيپلزپارٽي جي جهنڊي هيٺ جهمريون هڻندا آيا آهن اها الڳ ڳالهه آهي ته ڪالهه اهي ڀٽوز سان سياسي عقيدت جي احساس طور پ پ سان گڏ هئي پر اڄ اها ڏنڊي جي زور تي يرغمال آهن. ڏنڊي جو مطلب طاقت آهي. طاقت جيڪا پ پ جي ايم پي ايز ۽ ايم اين ايز وٽ آهي ۽ اهي نه ڪارڪن آهن نه غريب آهن نه انهن جون پارٽيءَ لاءِ ڪي قربانيون آهن. هنن جا پنهنجا راڄ ڀاڳ آهن. هڪ سماجي حيثيت آهي هو پنهنجي تر جا انتهائي سگهارا انسان آهن ۽ اتي ناهي ته اهڙا ماڻهو ڇڙو پ پ ۾ آهن. اسان جي سياسي پارٽين ۾ حقيقت ۾ اهڙن ماڻهن جو ئي غلبو آهي. هنن کي پارٽين جي نه پر پارٽين کي هنن جي ڪاڻ هوندي آهي. هو پارٽين جي منشور ۽ ضابطئه اخلاق نه پارٽيون هنن جي موڊ، مزاج ۽ طبيعت جي طابع آهن ۽ سڄي خرابي ٿي ئي ان صورتحال سبب ٿي.تنهن ڪري اڄ جيڪڏهن بلاول ڀٽو زرداري ڪي معافيون وٺي ٿو ته اهي اخبار جي خبر نه تلافيءَ جي  جواز به پيدا ڪن. بلاول ڀتو جي معافي ڪنهن کان ۽ ڪنهن جي لاءِ اهو هڪ اهڙو سوال آهي، جنهن جا هر ڪو پنهنجي حساب سان جواب ڏئي رهيو آهي ۽ جهڙي نوعيت جا ان حوالي سان تبصرا آڏو آيا آهن انهن مان لڳي ٿو ته بلاول ڀٽو زرداري کي گهڻ رخي وضاحت ڪرڻ جي ضرورت آهي، جيڪا اڃا تائين آڏو نه آئي آهي ۽ حيرت جهڙي ڳالهه اها آهي ته پ پ قيادت به ان حوالي سان هڪ پيج تي نه آهي اها ورهايل آهي ۽ الڳ يا متضاد بيان ڏئي رهي آهي.هڪ پاسي تعليم وارو صوبائي وزير نثار کهڙو اهو چئي ٿو ته ڪرپشن ڪن وزير، مشير، ڪمزوريون ۽ ڪوتاهيون انهن جون پر انهن جي نااهلين جي ازلي لاءِ معافيون وري بلاول ڀٽو کي وٺڻيون ٿيون پون.نثار کهڙي کي بلاول ڀٽو جي معافي ناگوار لڳي آهي پر سائين قائم علي شاهه جيڪو سنڌ حڪومت جو سرواڻ آهي، سو چوي ٿو ته جڏهن بلاول ڀٽو به معافي ٿو وٺي ته پوءِ وزير مشير ۽ چونڊيل نمائندا ڇو نه ٿا سڌرن. اهي سڌا ڇو نه ٿا ٿين ۽ ڇا سبب آهي جو انهن جي ڪارڪردگي بهتر ٿيڻ بدران برتريءَ جي طرف وڃي رهي آهي؟ سيد قائم علي شاهه جا بيان غور سان پڙهڻ کانپوءِ پتو پوي ٿو ته پ پ ۾ ڪيڏي نه وڏي پئماني تي بي پرواهه ۽ بي نياز ماڻهو ويٺل آهن، جن تي ڪنهن جي تڪ ئي نه آهي جيڪي ڪنهن کي ليکن ئي نه ٿا ۽ جن جو ڪو به ڪعبو قبلو ۽ دين ايمان ئي ناهي.ائين ناهي ته اهي ماڻهو پ پ جو هاڻ تعارف بڻيا آهن ۽ ائين به ناهي ته ڪو آصف علي زرداري جي آشيرواد سان اهڙن ماڻهن جي پ پ ۾ انٽري ٿي آهي، اهي ماڻهو ته شهيد ذوالفقار علي ڀٽو سان به گڏ هئا، اهي ئي ماڻهو محترمه بينظير ڀٽو سان به سلهاڙيل هئا. ها ايترو سو ضرور آهي ته وقت سان گڏ نسل تبديل ٿي آهي اڳ جيڪڏهن پ پ ۾ ڪو ڏاڏو ويٺل هو ته هاڻ پاڻ پوٽو ويٺو آهي جيئن آغا تيمور جو مثال ڏئي سگهجي ٿو. شڪارپور ۾ آغا غلام نبي خان ذوالفقار علي ڀٽو سان آغا طارق بينظير صاحبه سان ۽ آغا تيمور وري اڄ آصف علي زرداري جي پيپلزپارٽي ۾ ويٺو آهي پر جيستائين محترمه هئي، تيستائين اڳواڻ ڪنهن ضابطي ڪنهن پڪڙ ۽ پڇا هيٺ هوندا هئا. شهيد ڀٽو به هنن جو سبق وٺندو هو. ذوالفقار علي ڀٽو ۽ محترمه شهيد  پنهنجي دور ۾ پنهنجي ورڪرن ۽ عهديدارن کي جيڪي عزتون ۽ اهميتون ڏنيون سي تاريخ جو حصو آهن. هنن جيڪا پارٽي جي مالڪي ۽ وارثي ڪئي سا رڪارڊ جي ڳالهه آهي. شهيد ڀٽو ۽ محترمه شهيد اڳيان ڀلو خان، وڏيرو، مير، سردار ۽ ڀوتار ڳالهائي نه سگهندو هو. هنن جيڪا خاموشي ۽ عقيدت اختيار ڪئي سو اڄ خواب آهي. هنن جيئن دڙڪا ۽ داٻا سٺا ان جو ڪو به مثال ڪونهي پر هاڻ ڪارڪنن ۽ عهديدارن جي نه ٿي هلي.هاڻ پارٽي کي پارٽي ڪري هلايو ئي نه ٿو وڃي. ضلعي ۽ تعلقي سطح تائين سالن ۾ به ڪي گڏجاڻيون نه ٿيون ٿين. ڪارڪن ۽ عهديدارن جا اهنج معلوم نه ٿا ڪيا وڃن نه ڪي انهن جي ازالي لاءِ ڪي اهتمام ٿي رهيا آهن عوام جي اشوز تي عملي طور تي ڪا جدوجهد ته پنهنجي جاءِ تي پر لوڪ ميار کي آڏو رکندي لفظي وات ٽڪائي به نه ٿي ڪئي وڃي؟پيپلزپارٽي جي اڪثر اڳواڻن کي اها خبر به نه هوندي آهي ته سندن تڪ جي عوام جا ڪهڙا مسئلا آهن، هو پنهنجي تڪن ۾ مهمانن وانگر اچي مخصوص ماڻهن سان ملي وري ڪراچي يا اسلام آباد هليا ويندا آهن. هو عوام جي ڏک سک، شادين ۽ غمين ۾ فقط چونڊن جي وقت ڏسڻ ۾ ايندا آهن، جيڪا ڳالهه ڪنهن به صورت ۾ ٺيڪ ناهي.(هلندڙ

 

هانگ ڪانگ ۾ ٿيندڙ احتجاج ۽ چين جي سنجيدگي!؟ ؛ صوفيه ميمڻ

هانگ ڪانگ ۾ جمهوري اصلاح جي حق ۾ احتجاج جاري آهي ۽ قومي ڏينهن تي مظاهرو ڪندڙ گهٽين ۾ موجود آهن. انهيءَ احتجاجي سلسلي کي هفتي کان وڌيڪ وقت ٿي ويو آهي. مظاهرو ڪندڙ، جن ۾ شاگرد ۽ اوڪيوپائي سينٽرل گروپ جا ميمبر شامل آهن، سندن مطالبو آهي ته چين، هانگ ڪانگ جي عوام کي پنهنجي اڳواڻن جي چونڊ ۾ مڪمل آزادي ڏي ۽ چيني حڪومت 2017ع ۾ چيف ايگزيڪيوٽو جي عهدي جي لاءِ ٿيڻ واري چونڊ جي اميدوارن جي ڇنڊڇاڻ جو منصوبو ختم ڪري. هيستائين هانگ ڪانگ جي چيف ايگزيڪيوٽو بيجنگ نواز ڪميٽي جي طرفان چونڊيل اڳواڻن کي ئي موقعو ڏنو ويندو آهي.جيتوڻيڪ هن وقت تائين مظاهرو ڪندڙن جي خلاف بيجنگ حڪومت جو ردعمل شديد ناهي رهيو، پر چيني پرڏيهي وزير وانگ يي، انهن احتجاجن کي غير قانوني قرار ڏيندي چيو آهي ته احتجاج ڪندڙ پُرامن طريقي سان پنهنجن گهرن ڏانهن وري وڃن. امريڪا جو دورو ڪندڙ وانگ يي، واشنگٽن ۾ امريڪي وزير خارجه جان ڪيري سان ملاقات ۾ اهو به چيو ته هانگ ڪانگ ۾ هلندڙ احتجاج چين جو اندروني معاملو آهي ۽ اُن ۾ ڪنهن ٻئي مُلڪ کي دخل اندازي ڪرڻ نه گهرجي. چيني پرڏيهي وزير جي انهيءَ تنبيهه جو مقصد اصل ۾ آمريڪي صدر اوباما جي اُن ڳالهه جو جواب هو، جنهن ۾ هُن چيو هو ته واشنگٽن، جي هانگ ڪانگ جي حالتن تي گهري نظر آهي.اڳوڻي برطانوي بيٺڪيت هيٺ رهندڙ هانگ ڪانگ ۾ 2017ع ۾ پهرين جمهوري چونڊ ٿيڻ وڃي پئي، پر اُنهن چونڊن ۾ صرف اُهي ئي اُميدوار شريڪ ٿي سگهن ٿا، جن جي حتمي منظوري چين کان ملندي. جنهن تي هانگ ڪانگ جو عوام سراپا احتجاج بڻيل آهي. اُنهن مظاهرو ڪندڙن جو چوڻ آهي ته چونڊن ۾ حصو وٺڻ وارين رُڪاوٽن کي دور ڪيو وڃي، جيڪڏهن ائين نه ڪيو ويو ته چين صرف پنهنجي پسند جي ماڻهن ذريعي هانگ ڪانگ جو انتظام هلائڻ جي اجازت ڏيندو، جيڪا ڳالهه بنيادي جمهوري قدرن جي منافي آهي. مظاهرو ڪندڙن جو اهو به چوڻ آهي ته اُهي پنهنجي مستقبل جي اڳواڻ جي چونڊ ۾ کُليءَ ريت اختيار چاهين ٿا.هڪ معاهدي تحت 1997ع ۾ چين جو حصو بڻجڻ کان پوءِ هانگ ڪانگ ۾ اهو سڀ کان وڏو حڪومت مخالف احتجاج آهي. ڪيترائي تجزيو ڪندڙ اُنهن احتجاجن کي چيني حڪومت لاءِ 1989ع ۾ تيانمن اسڪوائر جي مظاهرن کان پوءِ هن وقت تائين سڀ کان وڏي بغاوت سمجهي رهيا آهن.هانگ ڪانگ ۾ انهن مظاهرن جي نتيجي ۾ زندگيءَ جو ڪاروهنوار مفلوج ٿي رهجي ويو آهي. ٽريفڪ نظام جي متاثر ٿيڻ کان علاوه ڪيترن ئي علائقن ۾ اسڪول، ڪاروباري مرڪز ۽ دُڪان بند آهن. اُن ڇڪتاڻ واري صورتحال هانگ ڪانگ جي اسٽاڪ مارڪيٽ کي به تمام گهڻو متاثر ڪيو آهي.برطانيا پنهنجي اڳوڻي بيٺڪيت هيٺ رهندڙ هانگ ڪانگ کي 1997ع ۾ چين جي حوالي ڪيو هو، تنهن هوندي اُن وقت ٿيڻ واري معاهدي مطابق اهو طئي ٿيو هو ته هانگ ڪانگ ۾ ماڻهن جي بنيادي حقن جو احترام ڪيو ويندو ۽ اُنهن کي اولهندن مُلڪن جي طرز واري سول آزادي ۽ جمهوري حق حاصل هوندا، جن کان چين محروم آهي. هاڻ جڏهن 2017ع ۾ هانگ ڪانگ ۾ چونڊون ٿيڻ وڃي رهيون آهن، انهي معاملي کي چين ڪهڙيءَ ريت سُلجهائيندو، سو ته وقت اچڻ تي معلوم ٿي ويندو، پر هانگ ڪانگ وارو معاملو چين جي حريف مُلڪن لاءِ جنجهڻي مثل ضرور آهي. ۽ خاص طور امريڪي صدر باراڪ اوباما جو اِهو چوڻ ته سندن نگاهه هانگ ڪانگ جي حالتن تي آهي، هڪ حوالي سان چين کي چتاءُ ڏيڻ آهي. پر ساڌوءَ جهڙي ماٺ اختيار ڪري ويٺل چين پنهنجي معاملن ۾ اهڙي ڪنهن به عمل دخل کي برداشت ڪرڻ نه چاهيندو ۽ هيستائين توڻي جو اُن جو ردعمل ڪو گهڻو سخت ناهي رهيو، پر اُهو وڌيڪ سخت به ٿي سگهي ٿو.اصل ۾ آمريڪا يا سندس حامي مُلڪن کي چين ۽ روس جي هڪٻئي سان ويجهڙائي نه رُڳو آئڙي ٿي، پر شام واري معاملي تي ٻنهي ملڪن طرفان ويٽو ڪرڻ تي به آمريڪا چڙيل آهي، پر جيئن ته چين ۽ روس، عراق- افغانستان ناهن، نه ئي انهن جي حالت ٻين مسُلمان مُلڪن جهڙي آهي جو هو نيٽو فورسز ساڻ ڪري هلان ڪري، تنهن ڪري هو اهڙي ڪنهن موقعي جي تلاش ۾ آهي ته جيئن انهن مُلڪن اندر ڪو انتشار پيدا ٿئي ۽ هو پنهنجي اندر جي باهه کي ٿڌو ڪرڻ جو بهانو تلاش ڪري سگهي. پر شايد هُن جي اِها تمنا ڪڏهن به پوري ٿي نه سگهي.هن وقت هزارين ماڻهو احتجاج ڪري رهيا آهن، ايستائين جو هُنن علائقي جي اڳواڻ ليونگ چُن ينگ جي آفيس جو به گهيراءُ ڪري ورتو آهي. اُن کان چيف ايگزيڪيوٽو جي عهدي تان استعيفيٰ جو مطالبو ڪري رهيا آهن. ان عوامي تحريڪ جي مرڪزي منتظم گروهه ”اوڪو پائي سينٽرل“ جي اڳواڻن ڌمڪي ڏني آهي ته جيڪڏهن سندن ڳالهين تي توجه نه ڏني وئي ته اُهي سرڪاري عمارتن تي ڪنٽرول ڪري وٺندا. ٻئي طرف ليونگ چُن ينگ جو چوڻ آهي ته ”هانگ ڪانگ ۽ مين لينڊ (چين) ترقي کي يقيني بنائڻ جي لاءِ پاڻ ۾ گڏيل آهن. اسان کي چين جي خواب کي حقيقت جو رنگ ڏيڻ جي لاءِ هٿ، هٿ ۾ ڏئي ڪم ڪرڻو پوندو.“ شهر جي مرڪزي ڪنوينشن سينٽر ۾ هڪ تقريب کي خطاب ڪندي هُن اِهو به چيو ته ”اسان کي يقين آهي ته سڀني شعبن ۾ گڏجي قانون جي دائري ۾ رهندي پُرامن ۽ عقليت پسندي سان حڪومت جو ساٿ ڏينداسين.“

بهرحال، هانگ ڪانگ جو معاملو ڀلي چين لاءِ گهڻي پريشانيءَ جو سبب نه به هجي پر اُنهيءَ کي جمهوري طريقي سان ئي سُلجهائڻ گهرجي، جو اُتي ٿيندڙ اهي احتجاج نه رُڳو معاشي مسئلن کي جنم ڏيندا پر اُتي جي ڪارهنوار متاثر ٿيڻ سان اُنهيءَ خطي جي ساک پڻ متاثر ٿيندي.

 

ايم ڪيو ايم جو داخلا پاليسي خلاف جوڙيل نئون مورچو

حيدرآباد بورڊ جي 393 مان 9 شاگردن ۽ ميرپورخاص بورڊ جي 173 مان  26 ۽ لاڙڪاڻي بورڊ جي 59 مان 9 شاگردن کي داخلا ملي سگهي آهي. جڏهن ته سکر بورڊ جي 160 اميدوارن مان ڪنهن کي به داخلا ملي نه سگهي آهي، اهڙي ريت ڪراچي بورڊ جي 13 هزار 124 اميدوارن جا فارم رد ڪيا ويا آهن. ان پاليسي خلاف ايم ڪيو ايم سنڌ اسيمبلي ۾ رٿ جمع ڪرائيندي چيو آهي ته نئين تعليمي پاليسي ”مهاجر دشمن“ پاليسي آهي۽ جيڪڏهن 24 ڪلاڪن اندر نظرثاني نه ٿي ته ڪراچي جا شاگرد ۽ عوام رستن تي ايندا. اسان کي خبر ناهي ته ايم ڪيو ايم کي اها نئين تعليمي پاليسي ”مهاجر دشمن“ پاليسي ڇو نظر اچي رهي آهي. جڏهن ته آن لائين پاليسي تحت ڪراچي کان سواءِ حيدرآباد ميرپورخاص ۽ لاڙڪاڻي جي ڪل  رڳو 97 شاگردن کي داخلا ملي آهي ۽ اهو به ضروري ناهي ته اهي 97 شاگرد رڳو سنڌي ڳالهائيندڙ ئي هجن ۽ انهن مان ڪو به شاگرد اردو ڳالهائيندڙ شاگرد نه هجي. پر جيڪڏهن اهي 97 شاگرد سنڌي ڳالهائيندڙ ئي کڻي آهن ته پوءِ جتي ڪراچي جي 77 هزار 201 شاگردن کي داخلا ملي آهي ته پوءِ اهي 97 شاگردن جو ڪراچي ۾ داخلا وٺڻ سان ڪهڙو آسمان ڪري پوندو، جنهن لاءِ ايم ڪيو ايم کي سنڌ اسيمبلي ۾ رٿ داخل ڪرائڻي پئجي وئي آهي. اسان سمجهون ٿا ته جيڪڏهن مسئلو ڪراچي جي انهن 13 هزار 124 شاگردن جو آهي جن کي داخلا ملي نه سگهي آهي ته پوءِ ان ڳالهه تي ڪا رٿ جمع ڪرائڻ کان چڱو ائين هو ته ايم ڪيو ايم پهريائين ان ڳالهه جو جائزو وٺي ها ته آخر جن شاگردن جا فارم رد ٿيا آهن، تن جو ڪهڙو سبب هو ڪٿي ائين ته ناهي ته اهي شاگرد ان لائق ئي نه هئا ته جو کين ڪنهن ڪاليج ۾ داخلا ڏيئي سگهجي. باقي ڪنهن معمولي ڳالهه کي اشو بڻائي ۽ ان کي ”مهاجر دشمني“ قرار ڏيڻ سان اهو قدم ”مهاجر دوستي“ وارو روپ ڪڏهن به اختيار ڪري نه ٿو سگهي. اسان سمجهون ٿا ته نئين تعليمي پاليسي سان سنڌ جي اندرين علائقن سان واسطو  رکندڙ نوجوانن سان ته وڌيڪ ويساهه گهاتي ٿي آهي ۽ سنڌي نوجوان هن ڀيري به ڪراچي جي تعليمي ادارن ۾ وڏي انگ ۾ داخلا وٺڻ کان محروم ٿي ويا آهن، هاڻ جيڪڏهن ڪراچي جي 77 هزار 201شاگردن کي داخلا ملڻ مهاجر دشمني آهي ته پوءِ  سنڌ جي اندرين علائقن جي رڳو 97 شاگردن کي داخلا ملڻ کي ”دشمني“ جو ڪهڙو نالو ڏجي تنهن جو فيصلو به ايم ڪيو ايم کي ضرور ڪرڻ گهرجي، اسان ڪراچي کي سنڌ جو ئي شهر سمجهون ٿا ان ڪري سنڌ جي نوجوانن کي تعليم جا هڪ جيترا حق ملڻ گهرجن پر جيڪڏهن سنڌ جي نوجوانن جي انهي حق ۾ ڪا ڌر يا پارٽي رڪاوٽ وجهي ٿي ته ان کي ياد رکڻ گهرجي ته ڪنهن جو حق غضب ڪرڻ يا ڦٻائڻ جو کڻي هت انصاف نه ٿيئي پر ڪنهن نه ڪنهن ڏينهن اهو انصاف ضرور ٿيڻو آهي ۽ اهو ئي انصاف ضرور ٿي رهندو اسان کي اميد آهي ته ايم ڪيو ايم رٿ کي مهاجر دشمني وارو چوغو پارائڻ کان پاسو ڪندي سنڌ جي نوجوانن جي حق تلفين بابت گڏيل آواز اٿاريندي، جنهن ۾ ئي سنڌ  ۽ سنڌ جي عوام جي ڀلائي آهي.

 

ٻن ڏينهن اندر 30 جانيون ڳڙڪائيندڙ ڪچو شراب

حيدرآباد ۾ شراب پيئڻ سبب وڌيڪ 5 ڄڻا فوت، فوتين جو انگ 30 ٿي ويو، حيدرآباد شهر جي پڃاري واري علائقي ۾ 2 ڄڻا 22 سالن جو وسيم، 25 سالن جو اسحاق عرف لنگا مسيح، لطيف آباد نمبر12 جو رهواسي خورشيد احمد راجپوت، لطيف آباد نمبر9 سادات ڪالوني جو رهواسي ذوالفقار انصاري ۽ لطيف آباد نمبر 4 بچاءُ بند ويجهو وڌو مسيح زهريلو شراب پيئڻ سبب فوت ٿي ويا، جنهن تحت حيدرآباد ضلعي ۾ 3 ڏينهن اندر زهريلي شراب سبب فوتين جو انگ وڌي 30تائين پهچي ويو آهي، هوڏانهن حيدرآباد پوليس ترجمان موجب ايس ايس پي حيدرآباد پير فريد جان سرهندي جي حڪم تي ايس پي هيڊڪوارٽر ڪيپٽن حيدر رضا ۽ ايس پي سٽي عمرطفيل جي سربراهي ۾ ضلعي ۾ منشيات فروشن جي خلاف ڪريڪ ڊائون جاري آهي، ڪالهه حيدرآباد پوليس شهر، لطيف آباد، ٽنڊو ڄام ۽ هوسڙي جي مختلف علائقن ۾ ڇاپا هڻي 27 کان وڌيڪ منشيات فروشن کي گرفتار ڪري 9 شراب جون بٺيون ڊاهي پٽ ڪري ڇڏيون، ٽنڊو ڄام پوليس منظور شاهه جي شراب جي اڏي تي ڇاپو هڻي منشيات فروش مراد شاهه کي 2 هزار ليٽر شراب سميت گرفتار ڪري سندس خلاف ڪيس داخل ڪري ڇڏيو آهي، سخي پير پوليس منشيات فروش سلو کي گرفتار ڪري 15 ليٽر شراب هٿ ڪري ورتو آهي، حسين آباد پوليس لطيف آباد نمبر 3 ۾ ڪارروائي ڪري ٻن منشيات فروشن علي شير حاجاڻو ۽ گل محمد لاشاري کي ڪچي شراب سميت ۽ لطيف آباد نمبر 4 مان جاويد علي ۽ هرسن ڪولهي کي گرفتار ڪري ورتو، بي سيڪشن پوليس 10 نمبر مان منشيات فروشن لالي ڪولهي ۽ عامر کي گرفتار ڪري سندن قبضي مان 15 شراب جون بوتلون هٿ ڪرڻ جي دعويٰ ڪئي آهي، جڏهن ته ٽنڊو ڄام ۽ هوسڙي پوليس مختلف ڪاررواين ۾ لاڌو ڪولهي ۽ بهادر کوسو کي گرفتار ڪري سندن قبضي مان وڏي پيماني تي شراب هٿ ڪرڻ جي دعويٰ ڪئي آهي