تازيون خبرون

Daily Archives: September 23, 2014

فلم ”خوبصورت“ پاڪستان ۾ گذريل ويڪ اينڊ تي 3 ڪروڙ رپين جو ڪاروبار ڪيو

poster2اسلام آباد (شوبز نيوز) بالي ووڊ جي فلم ”خوبصورت“ پاڪستان ۾ گذريل ڪي اينڊ تي 3 ڪروڙ رپين جو ڪاروبار ڪري ورتو آهي. فلم جيڪي انيل ڪپور جي پروڊڪشن آهي ۽ ان ۾ فواد خان سونم سان گڏ ڪم ڪيو آهي. گذريل ڏينهن تي آچر تي 3 ڪروڙ جو بزنس ڪيو آهي. فلم جي پاڪستان جي 46 سينيما هالن ۾ نمائش ٿي رهي آهي. پاڪستان ۾ فلم جي ڪاميابي جو ڪريڊٽ فواد خان ڏي وڃي رهيو آهي. جنهن کي ڏسڻ لاءِ ماڻهو اچي رهيا آهن.

 

ايشين گيمز هاڪي: روايتي مخالف پاڪستان ۽ ڀارت سڀاڻي ميچ کيڏندا

انچيون(اسپورٽس نيوز) ايشين گيمز هاڪيءَ ۾ دفاعي چيمپئن پاڪستان پنهنجي ٽئين گروپ ميچ روايتي مخالف ڀارت جي خلاف (سڀاڻي) خميس ڏينهن کيڏندو. گرين شرٽس شروعاتي ليگ ميچون کٽي گروپ بي ۾ 6 پوائنٽن سميت سڀ کان اڳيان آهي. پهرين ميچ ۾ پاڪستاني رانديگرن سريلنڪا کي 0-14 تان هاريو، جڏهن ته چين جي خلاف ٻي ميچ 0-2 تان کٽي. پاڪستان چوٿين ۽ آخري گروپ ميچ 27 سيپٽمبر تي اومان جي خلاف کيڏندو.

 

چيمپيئنز ليگ ٽي-20 ۾ (اڄ) هڪ ميچ کيڏي ويندي

حيدرآباد دکن (اسپورٽس نيوز) چيمپيئنز ليگ ٽي-20 ۾ اڄ اربع تي هڪ ميچ کيڏي ويندي. ان سلسلي ۾ گروپ اي ۾ ڪلڪته نائٽ رائيڊرز ۽ پرٿ اسڪارچرز وچ م ميچ حيدرآباد دکن ۾ کيڏي ويندي. تفصيل موجب سي ايل ٽي-20 جا دلچسپ مقابلا ڀارت ۾ جاري آهن. ايونٽ ۾ سڀاڻي (خميس) تي پڻ هڪ ميچ کيڏي ويندي جنهن ۾ گروپ اي ۾ شامل چنائي سپر ڪنگز ۽ لاهور لائنز جي ٽيمن وچ ۾ ميچ بنگلور ۾ کيڏي ويندي

 

ايشين گيمز ۾ پاڪستان پهريون تمغو کٽي ورتو

انچيون (اسپورٽس نيوز) ايشين گيمز ۾ پاڪستان دستي پنهنجو پهريون تمغو کٽي ورتو آهي. تفصيل موجب ڪوريا ۾ جاري ايشين گيمز ۾ پاڪستان جي مراتب علي 70 ڪلوگرام ڪيٽيگري ۾ ڪانسي جو تمغو کٽي ورتو آهي، هو سيمي فائنل ۾ چين جي رانديگر ڪن ڙينگ کان هارائي ويو جنهن تي ڪانسي جي تمغي جو حقدار ٿيو.

 

چيمپئنز ليگ ٽي 20: لاهور لائينز ۽ چنائي سپر ڪنگز جي ٽيمن وچ ۾ سڀاڻي مقابلو ٿيندو

نئين دهلي(اسپورٽس نيوز) چيمپئنز ليگ ٽي 20 ۾ پاڪستاني قومي چيمپئن لاهور لائينز پنهنجو ٻيو گروپ ميچ (سڀاڻي) خميس ڏينهن آءِ پي ايل جي فرنچائز چنائي سپر ڪنگز جي خلاف کيڏي ويندي. لاهور لائينز پهرئين ميچ ۾ ڪولڪتا نائيٽ رائيڊر هٿان چئن وڪيٽن تان هارائجي وئي. لاهور جي ٽيم محمد حفيظ جي اڳواڻيءَ ۾ ميدان ۾ لهندي، جڏهن ته چنائي جي ڪپتاني مهندرا سنگهه ڌوني ڪندو ۽ ٻنهي ٽيمن لاءِ اها ميچ تمام گهڻي اهميت رکي ٿو، ڇو ته ٻئي ٽيمون پهرئين ميچ هارائي چڪيون آهن. لاهور لائينز ٽئين گروپ ميچ 27 سيپٽمبر تي ڏکڻ آفريڪا جي ڊولفنز جڏهن ته چوٿين ۽ آخري گروپ ميچ 30 سيپٽمبر تي آسٽريليا جي پرٿ اسڪارچرز جي خلاف کيڏندي.

 

سڌائتي سڀ ڪا بک نه ڀاسي ڪا : سرواڻ چانڊيو

خير سان نون سنڌين، سنڌ ڌرتي کي هاڻي هڪ ٻن ٽڪرن نه پر چئن ٽڪرن ۾ ورهائڻ جي تجويز پيش ڪندي چيو آهي ته اسين سنڌ دشمن نه آهيون ۽ اسان کان وڌيڪ ته ڪو سنڌ جو گهڻ گهرو آهي ئي نه. جڏهن ته هاڻي اها مهم ٻين عام ديوارن کان ٿيندي حيدرآباد جي پريس ڪلب جي مکيه دروازي تي پهتي آهي، جتي وڏن ڪارن اکرن ۾ سنڌ ۾ وڌيڪ صوبا ٺاهڻ جو مطالبو ڪيو ويو آهي. شايد اهو نعرو دروازي تي ان لاءِ لکيو ويو آهي، جيئن ايندڙ ويندڙ ڏسن ۽ صحافين کي به خبر پوي ته مهم ڪيتري زور شور سان جاري آهي.ڪجهه وقت اڳ ۾ هڪ نام نهاد تنظيم، مهاجر صوبا تحريڪ پاران اهڙي قسم جي ناپاڪ حرڪت شروع ڪئي وئي هئي ۽ سنڌ جي عوام جي سخت احتجاج کانپوءِ ان تحريڪ پنهنجون سرگرميون وقتي طور تي ته بند ڪري ڇڏيون پر اندر ئي اندر ان مهم تي ڌام ڌوم سان ڪم جاري رهيو ۽ ان کي وڌيڪ سرگرمي سان جاري رکڻ جي لاءِ ڪيتريون ئي حڪمت عمليون جوڙيون ويون.الطاف حسين جيڪو نه ته پاڪستان جو شهري آهي ۽ نه ئي وري سندس ڪا ملڪيت آهي. پاڻ برطانيا جو شهري آهي ۽ شايد اڃا تائين برطانيا جو راڄ گهٽ ۾ گهٽ سنڌ تي جاري آهي جو برطانيا مان جيڪو سڏ اچي ٿو، ان تي لبيڪ چوندي ايستائين جو رت جون نديون به وهايون وڃن ٿيون ۽ پوءِ به سدائين ان کي پرامن احتجاج جو ئي نالو ڏنو وڃي ٿو. سنڌ کي ورهائڻ جي لاءِ جيڪو جواز پيش ڪيو ويو آهي. ان تي جيڪڏهن سنجيدگي سان غور ڪجي ته احساس محرومي ته سنڌ جي حقيقي رهواسين ۾ آهي، پهريون جواز جيڪو نون سنڌين پاران سنڌ ورهائڻ جي لاءِ ڏنو ويو آهي، اهو آهي ته کين حق نه ٿا ملن، نوڪرين ۾ ڪوٽا ڏني ٿي وڃي ۽ هو اها خيرات وٺڻ جي لاءِ تيار آهن. هاڻي سڄي سنڌ بلڪه پوري ملڪ کي خبر آهي ته ڪراچي ۾ سنڌ جي ٻين ضلعن جو ڊوميسائيل رکندڙ ڪا به سرڪاري نوڪري نه ٿا ڪري سگهن. شهري حڪومت جي ماتحت ادارن ۾ انهن کي نوڪرين جو حق نه آهي، ايستائين جو تعليمي ادارن ۾ سنڌ جي ٻين ضلعن جو ڊوميسائيل رکندڙ شاگردن کي داخلا جو حق نه آهي. هاڻي عوام ئي فيصلو ڪري ته حق کان محروم ڪير آهن؟ نوان سنڌي يا پراڻا سنڌي؟نون سنڌين پاران سنڌ ورهائڻ جو هڪ ٻيو جواز ڏنو ويو آهي ته انهن کي روزگار ڪرڻ نه ٿو ڏنو وڃي، روزگار جا وسيلا نه هجڻ جي ڪري هو بکون ڪاٽي رهيا آهن. هاڻي ڪير ٻڌائي ته ڪراچي ۾ رتوڇاڻ سڀ کان وڌيڪ ڪنهن جو ٿيو آهي؟ نون سنڌين جو يا انهن پراڻن سنڌين جو؟ جيڪي بک جي باهه وسائڻ جي لاءِ ڪراچي جو منهن ڪن ٿا ۽ موٽ ۾ گهرڀاتين کي پئسن بدران گولين سان پروڻ ٿيل لاش ملي ٿو. ڇا اڃا به احساس محرومي ۽ لاچاري نون سنڌين ۾ آهي؟ جيڪي هر هيلي بهاني سان سنڌ جي وحدانيت تي وار ڪرڻ ۾ پورا آهن ۽ جڏهن به اندر ۾ هورا کورا اٿن ٿا ته انهن کي سنڌ جي ورهاڱي کانسواءِ ٻي ڪا ڳالهه سجهي ئي نه ٿي.سنڌ جي انهن نون سنڌين کان صرف ايترو پڇيو وڃي ته پاڪستان ۾ شامل ٿيڻ وقت ڇا انهن قائداعظم يا پاڪستان جي رياست سان ڪو اهڙو معاهدو ڪيو هو ته هو ڀارت مان پنهنجي هڪ رياست ڇڏيو پيا اچن ۽ انهن کي پاڪستان ۾ هڪ صوبو قائم ڪري ڏنو ويندو؟ جيستائين عوام کي ياد ٿو اچي ته انهن وٽ ته هلڻ جي لاءِ گاڏي به نه هئي. هزارين ميل پنڌ ڪري، هي انهن امير هندوئن جي گهرن تي قابض ٿيا هئا، جيڪي پنهنجا اجها ڇڏي ڀارت لڏي ويا هئا ۽ جيڪي اتي فوٽ پاٿ تي رهندا هئا. اهي پاڪستان ۾ محلن جا ڌڻي ٿي ويهي رهيا. ڪير ٻڌائي ته سنڌ جو اصل ڪهڙو رهاڪو آهي؟ جنهن کي اهي محل ڏنا ويا، سنڌ جي اصل رهاڪن ته انهن نون سنڌين جي لاءِ پنهنجي گهرن جا دروازا کوليا ۽ پوءِ آخر ۾ پاڻ ئي ننڌڻڪا ٿي ڌڪجي پنهنجي گهرن مان نڪتا پر اڃا به احساس محرومي ۽ لاوارثي نون سنڌين ۾ آهي. خبر نه ٿي پوي ته انهن وٽ احساس محرومي ۽ لاوارثي جي وصف ڪهڙي آهي، گهٽ ۾ گهٽ جيڪا اسان کي پڙهائي وئي آهي ان وصف موجب لاوارث ۽ احساس محرومي ۾ وڪوڙيل ته سنڌ جا اصل رهاڪو آهن.انهن نون سنڌين پاران ۽ سنڌ جي ورهاڱي جي مطالبي کان اڳ ۾ پنهنجي ان رياست جي باري ۾ پڻ ٻڌايو وڃي، جنهن کي هي ڇڏي رضاخوشي سان پاڪستان ۾ شامل ٿيا هئا. سڄي دنيا ڀلي ڀت ڄاڻي ٿي ته هي وڻ وڻ جي ڪاٺي آهن ۽ انهن ۾ ڪي به پاڻ ۾ رشتيدار به نه آهن، انهن جي مٽي مائٽي ته هتي اچڻ کانپوءِ ٿي آهي. هنن کي پنهنجي اصل بڻ بنياد جو به پتو نه آهي ته انهن جا ابا ڏاڏا ڪٿان جا آهن. هي ته ڪيڏي مهل بنگالين ڪيڏي مهل بهارين ۽ ڪيڏي مهل افغانين جو پاسو کڻي بيهي رهن ٿا ۽ انهن کي پاڪستان جي شهريت ڏيڻ جو مطالبو ڪن ٿا. بنگلاديش ۾ موجود بهارين کي آڻي انهن کي سمورا حق ڏيارڻ جي مهم هلائين ٿا. پهرين فيصلو ڪن ته اهي پاڻ ڪٿان جا آهن؟ جيڪڏهن پاڻ احساس محرومي جو شڪار آهن ته پوءِ وڌيڪ ماڻهن کي آڻڻ جو مطالبو ڇا جي لاءِ ڪيو وڃي ٿو؟ جيڪڏهن ايڏي بک آهي ته پوءِ ٻين جو پيٽ پالي ڪيئن سگهبو.متحده جي سنڌ کي چار ٽڪر ڪرڻ جي مطالبي لاءِ هڪ ٻيو سبب اهو آهي ته ڪراچي سڄي ملڪ کي کارائي رهي آهي، ان لاءِ اسان کي اهو ڌار صوبو ڪري ڏنو وڃي. هاڻي هڪ طرف احساس محرومي ۽ لاوارثي جي ڳالهه ڪئي وڃي ٿي ۽ ٻئي طرف ساڳئي مطالبي ۾ جيڪو جواز پيش ڪيو پيو وڃي اهو ته سندن ئي خلاف آهي ته جيڪڏهن ڪراچي 75 سيڪڙو روينيو ڏي ٿو ته اتي جي رهواسين ۾ احساس محرومي ڪيئن پيدا ٿي؟ ڇو ته جڏهن روزگار وڌيڪ هوندو ته روينيو به تڏهن ئي پيدا ٿيندو. هاڻي اها ڳالهه به واضح ٿي وئي ته انهن ۾ نه ته احساس محرومي آهي ۽ نه ئي وري لاوارثي پر پيٽ ۾ سور آهي ته صرف سنڌ جي ورهاڱي جو. ڇو ته انهن جو شروع کان ئي مقصد پهرين هڪ جدا صوبو ۽ پوءِ بنگالين وانگر جدا ملڪ آهي، جنهن جي ايجنڊا تي هي ڪيتري ئي وقت کان عمل ڪري رهيا آهن.هاڻي صرف تصور ڪجي ته ڪراچي سنڌ کان ڌار ٿي ويو آهي ۽ اهو هڪ جدا صوبو آهي ته اتي جون حالتون ڪهڙيون هونديون؟ ڇا لنڊن ۾ ويٺل برطانوي شهري ان صوبي جو وڏو وزير ٿيندو ۽ قاتلن جي هڪ فوج اتان جي ڪابينا ۾ شامل هوندي؟ ۽ اهو وقت ايندو جو ملڪ جو وزيراعظم به اتان جي وڏي وزير جي اجازت کانسواءِ وڃي نه سگهندو ۽ پوليس ۾ ڏکڻ آفريقا جي جهنگلن مان سکيا ورتل دهشتگردن جي هڪ کيپ هوندي ۽ اهي صوبي جي سرحدن جا نگران هوندا؟ ڪو به اچي وڃي نه سگهندو، هر طرف دهشت جو راڄ هوندو. ڇا اهو هن ملڪ ۾ ممڪن آهي؟ اهو هڪ اهڙو سوال آهي، جنهن جي ڳولا سڀني کي ڪرڻي آهي پر جيڪا مهم شروع ٿي آهي، اها ٻيو ڪجهه حاصل ڪري سگهي نه سگهي پر هڪ رت جي راند ضرور شروع ٿي ويندي، جنهن جو انجام شايد 80ع جي ڏهاڪي جي حالتن کان به برو هجي پر شايد ان جو وقت به نه اچي. ڇو ته ان وقت ميڊيا آزاد ۽ فعال نه هئي جو ڪيترن ئي مائرن ۽ ڀينرن جي ارهن تي لڳل ٺپا ماڻهن جي اکين کان اوجهل ٿي ويا پر هاڻي ائين نه آهي. (جاري)

ٿي سگهي ٿو ته ان دکايل باهه ۾ هاڻي اهي پنهنجو ايندڙ نسل به ساڙي ويهي رهن.

سنڌ جا قومپرست جيڪي اڃا تائين اکيون بند ڪري ان ڳالهه جو ورد ڪرڻ ۾ پورا آهن ته سنڌ جا اردو ڳالهائيندڙ سنڌي، سنڌ جا سچا سپوت آهن ۽ اهي ڪڏهن به سنڌ کي نه ورهائيندا. انهن کي به هاڻي پنهنجون اکيون کولڻ گهرجن ۽ ڏسڻ گهرجي ته سنڌ جي وحدانيت تي ٿيندڙ وار جو گهاءُ ڪٿي انهن کي ايترو زخمي نه ڪري ڇڏي جو هو ڪنهن کي ڀاڪر پائيندي به پنهنجا هٿ اڳيان نه ڪري سگهن ۽ سدائين جي لاءِ پاسا ورائيندا رهن.

 

ڪراچي ۾ عمران خان ۽ آڪٽوبر جو انتظار : عاجز جمالي

ڪراچي ۾ آچر ڏينهن قائداعظم جي مزار جي سامهون عمران خان هڪ وڏي جلسي کي خطاب ڪري ويو. هي جلسو تحريڪ انصاف جي اڳواڻن جي اميدن کان وڏو جلسو هو. ڇو ته جلسي کان صرف هڪڙو ڏينهن اڳ ايم ڪيو ايم جي حامين سول سوسائٽي جي نالي تي تحريڪ انصاف جي خلاف ڪلفٽن ۾ مظاهرو ڪيو هو. اُهو مظاهرو ان ٿيندڙ ڳالهه تي ڪيو ويو هو جو تحريڪ انصاف سنڌ جي صدر سنڌي ڳالهائيندڙ نادر اڪمل لغاريءَ رڳو ايترو چيو هو ته ايم ڪيو ايم کي سنڌ جي ورهاڱي جي ڳالهه ڪرڻ نه ڏينداسين ۽ جيڪو سنڌ ورهائڻ جي ڳالهه ڪندو، ان جي ڀرپور مخالفت ڪبي، پر آخر اهڙو ڪهڙو ڪمال ٿي ويو جو آچر ڏينهن صبح جو ئي ايم ڪيو ايم جي سربراهه الطاف حسين پنهنجي بيان ۾ عمران خان کي ڪراچي اچڻ تي ڀليڪار چئي ڇڏيو، جنهن سبب ڪراچيءَ جي اردو ڳالهائيندڙ آبادين مان وڏي انگ ۾ ماڻهو نڪري عمران خان جي جلسي ۾ پهتا. ائين 25 ڊسمبر 2011ع تي جڏهن عمران خان ڪراچيءَ ۾ جلسو ڪيو هو ته ”شهري پارٽيءَ“ ان جي ڀرپور مدد ڪئي هئي، پر هن ڀيري ته ايم ڪيو ايم ۽ تحريڪ انصاف ۾ ٽڪراءُ ٿي چُڪو آهي. اليڪشن ۾ هڪ ٻئي خلاف مقابلا ڪري چُڪيون آهن. تحريڪ انصاف جي اميدوارن ايم ڪيو ايم جي ڳڙهه ۾ وڏا ووٽ کنيا ۽ گذريل سڄي مهيني کان ڌرڻا به هڻن پيا، پر ايم ڪيو ايم کليل نموني ڪڏهن به اعتراض نه ڪيو. اڃا به هڪ ٻي وڏي ڳالهه ڪندو هلان ته 2013ع جي اليڪشن کان اڳ ڪراچيءَ ۾ تحريڪ انصاف جي اهم خاتون اڳواڻ باني ڪارڪن زهره شاهد قتل ٿي وئي هئي ۽ عمران خان سڌي ريت زهره شاهد جي قتل جو الزام ايم ڪيو ايم تي هنيو هو. ڪراچي ۾ زهره شاهد جي قتل خلاف احتجاجي مظاهرا ڪيا ويا، عام چونڊن ۾ ان قتل کي ووٽ بئنڪ لاءِ استعمال ڪيو ويو. عمران خان لنڊن تائين اهو ڪيس کڻي ويو، انساني حقن جي تنظيمن آواز اٿاريو، جنهن سبب انهن ڏهاڙن ۾ الطاف حسين تقريرن ۾ ميڊيا ۽ صحافين کي به ڊيڄاريو هو، ”ڪوئي ٺوڪ دي گا“ وارو جملو ڏاڍو مشهور آيو هو، پر عمران خان پنهنجي هاڻوڪي جلسي ۾ زهره شاهد جو ڪيس وساري ڇڏيو. هُن هڪ لفظ به نه ڳالهايو. ڪراچي ۾ چونڊن کانپوءِ عمران خان جو پهريون جلسو هو، اليڪشن وڙهندڙ تحريڪ انصاف جي اميدوارن جو وڏو انگ جلسي ۾ موجود هو، کين اميد هئي ته عمران خان اليڪشن ۾ ساڻن ٿيندڙ جٺين ۽ ڌانڌلين جو ذڪر ڪندو، پر آزادي ۽ انقلاب جا نعرا هڻندڙ عمران خان هڪ لفظ به نه ڳالهايو. عمران خان پنهنجي جلسي ۾ پيپلز پارٽيءَ تي هنن لفظن ۾ تنقيد ڪئي ته ڀٽو جي نالي تي سنڌي عوام کان ووٽ وٺي غائب ٿي ويندا آهن. سنڌيو مان توهان کي وڏيرن کان نجات ڏياريندس. ان وقت سندس ساڄي پاسي کان بيٺل مخدوم شاهه محمود قريشي مسڪرائي رهيو هو، جيڪو وڏو گادي نشين آهي. سنڌ ۾ سندس هزارين مريد آهن. عمران خان جلسي ۾ پيپلز پارٽي ۽ مسلم ليگ (ن) کي ته نشانو بڻايو پر ايم ڪيو ايم تي هڪ لفظ نه ڳالهايو. هُو پاڻ کي هر وقت عوام جو سچو ليڊر ظاهر ڪندو آهي. مزيدار ڳالهه ته عمران خان ڪراچي ۾ تقرير ڪري رهيو هو، هُن نون صوبن ۽ سنڌ جي ورهاڱي خلاف پڻ هڪ اکر ڪونه ڳالهايو، نه ته عمران خان جي جلسي ۾ سنڌي ماڻهن جي ڪابه شرڪت نه هئي، اها ڳالهه ته اڳي به ڪيترائي ڀيرا لکي چُڪو آهيان ته اسٽيبلشمينٽ جي هن سڄي راند ۾ سنڌي عوام شامل ناهي، اهو جمهوريت جي ڪمزور ٻيڙيءَ کي به ٻڏڻ کان هميشه بچائيندي آهي. نئين پاڪستان ۾ سنڌ ڪٿي به ناهي نه ڪي سنڌي ماڻهو آهن. سياست ۾ هاڻي ڪجهه پارٽيون صوبن ۽ قومن جي ڪري سُڃاپجڻ لڳيون آهن. جڏهن پنجاب تي تنقيد ڪرڻي هوندي آهي ته مسلم ليگ (ن) جو نالو ورتو ويندو آهي. جڏهن پيپلز پارٽيءَ جو نالو ورتو ويندو ته اها تنقيد سنڌين تي ٿئي ٿي ۽ عمران خان به پنهنجي تقرير ۾ باقاعده پڪاريو ته ”سنڌيو“ ۽ جڏهن مُهاجرن تي تنقيد ٿيندي ته اها ايم ڪيو ايم ڏانهن سمجهي ويندي. سو عمران خان مسلم ليگ (ن) ۽ پيپلز پارٽيءَ تي ته تنقيد ڪئي پر ايم ڪيو ايم جو نالو ڪو نه ورتو، سندس ان رمز کي ڇا چئجي؟

بلاول ڀٽو چوي ٿو ته اسٽيبلشمينٽ جي ٽيسٽ ٽيوب ليڊرن کي هُو آڪٽوبر ۾ جواب ڏيندو ۽ عمران خان جو خيال آهي ته هاڻي آڪٽوبر ۾ تبديلي ايندي. نجم سيٺيءَ چواڻي اسٽيبلشمينٽ اسلام آباد ۾ ڦاٿل عمران خان کي ڪراچيءَ ۾ سهارو ڏياريو ۽ عمران خان به روايتي سياستدانن وانگر ايم ڪيو ايم جي باري ۾ نه ڳالهائي ثابت ڪيو ته هُو نه اسٽيٽڪو جي خلاف آهي، نه سندس چيل ڳالهيون درست آهن. وفاقي وزير پرويز رشيد چوي ٿو ته عمران جو ڪراچي ۾ جلسو عمران خان ۽ ايم ڪيو ايم وچ ۾ ڏي وٺ (مُڪ مڪا) جو نتيجو هو. هِن جلسي واري ڏينهن تي جنرل اسلم بيگ جو اُهو خطرناڪ بيان به سامهون آيو، جنهن ۾ هُن لنڊن پلان جي تصديق ڪئي ۽ هن چيو ته جنرل راحيل شريف ان سازش کي ناڪام بڻايو آهي. هن سازش مطابق عمران خان کي وزيراعظم بڻائڻ جو آسرو هو. اسلم بيگ مطابق هي عالمي سازش هُئي، جنهن ۾ آمريڪا، برطانيا، ڪئنيڊا ۽ ايران به شامل هُئا. جيڪڏهن اهڙي سازش هوندي ته اها وري ڇهن مهينن کانپوءِ ڪر کڻي بيهندي. شايد نئين منظرنامي ۾ ڇهه مهينا کن وڌيڪ لڳندا، پر جنگ سڄي وري به پنجاب ۾ وڙهي ويندي. بلاول ڀٽو زرداري به شايد پنجاب مان سياست جي شروعات ڪندو. عمران خان ۽ قادري به اتان شروعات ڪئي پر ڪراچي به غير اهم ناهي. ڪراچيءَ ۾ عمران خان جو اسلام آباد کان به وڏو جلسو اِهو ٻڌائي ٿو ته ڪراچيءَ تي به اسٽيبلشمينٽ جو هٿ آهي. ملڪي سياست ۾ ايم ڪيو ايم جو ڪردار اڃا به اهم رهيو آهي. قيادت جي تبديليءَ جون هوائون، اندريان بحران، وفاقي سرڪار ۾ عدم شرڪت ۽ ٻيا به کوڙ مسئلا آهن. ان کان به وڏي ڳالهه عمران فاروق ڪيس ۾ گرفتار ڪيل ٻه ملزم (ڇوڪرا) هي سڀ ڪجهه اڄ به پاڪستان جي اسٽيبلشمينٽ جي هٿ ۾ ئي آهن. ان ڪري شهري ڌر اسٽيبلشمينٽ جي ٽيسٽ ٽيوب ليڊر هُجي يا علامه ٽائيپ ليڊر هُجي، انهن جي حمايت لاءِ ميدان سجائڻو پوندو. کيس ان جي قيمت ملندي، پر جڏهن به مسئلو هوندو سنڌ جي ورهاڱي جي ڳالهه ڪبي، نون صوبن جي ڳالهه ڪبي، اهڙي ڪا ڳالهه ڪبي، جنهن جو وقت ۽ حالتن جي سياست سان ڪو واسطو ته نه هوندو پر سنڌي عوام جي ڦٽن تي لوڻ ٻرڪي ڪو تڪرار ضرور پيدا ڪبو. خميس ڏينهن سنڌ اسيمبليءَ جو اجلاس آهي، هاڻي ڏسون ٿا ته جيڪڏهن ايم ڪيو ايم پنهنجي مطالبي سان سنجيده آهي ته اسيمبليءَ ۾ ڪيتري سنجيدگيءَ سان ان کي کڻي ٿي اچي، جيڪڏهن پيپلز پارٽي ۽ ٻيون جماعتون اسيمبليءَ ۾ سندس مطالبي کي نه ٿيون مڃن ته پوءِ به اُها سرڪار ۾ رهي ٿي يا نه ٿي رهي، پر عمران خان جي خاموش حمايت جاري آهي ۽ طاهرالقادريءَ جي کُليل حمايت پڻ ڪبي، ڇو ته لنڊن پلان ۾ گهڻيون ڌريون شامل هيون، جيڪي بعد ۾ نڪري ويون. پلان جي پٺڀرائي ڪندڙ اداري جو سربراهه به هي سٽون لکجڻ وقت تبديل ٿي ويو. سنڌ ۾ رينجرز جو ڊي جي رهندڙ جنرل رضوان اختر آءِ ايس آءِ جو نئون چيف بڻجي ويو. ڏسجي ته آڪٽوبر ۾ حالتون ڪهڙو رخ اختيار ڪن ٿيون.

 

وزيراعظم جو آمريڪي دورو…!

وزيراعظم ميان نواز شريف آمريڪا جي دوري تي روانو ٿي ويو آهي، هو ڪجهه ڏينهن لنڊن ۾ رهڻ کانپوءِ آمريڪا پهچندو، جتي هو ٻين مصروفيتن ۽ آمريڪي قيادت سان ملاقات کان علاوه گڏيل قومن جي جنرل اسيمبلي کي پڻ خطاب ڪندو. وزيراعظم ميان نواز شريف جو آمريڪي دورو هڪ اهڙي موقعي تي ٿي رهيو آهي، جڏهن ميان نواز شريف نه رڳو اندروني پر ٻاهرين سياسي ۽ عسڪري دٻائن جو شڪار آهي. جنرل اسلم بيگ جي چواڻي موجب ته پاڪستان ۾ ڪجهه سياستدان رٽائرڊ فوجين کي پاڻ سان ملائي ملڪ ۾ تبديلي آڻڻ چاهين ٿا. جڏهن ته عسڪري قيادت کي ان سازش جي خبر هئي ۽ آرمي چيف  جنرل راحيل شريف عمران خان ۽ طاهرالقادري جي انهي سازش کي ناڪام بڻائي ڇڏيو آ هي. هن اهو به انڪشاف ڪيو آهي ته عمران خان ۽ طاهرالقادري کي اسان جا ماڻهو ايران جي قم شهر وٺي ويا هئا، جتي انهن جي سينيئر آيت الله سان ملاقات ڪرائي وئي، اهڙي ريت  ٻنهي اڳواڻن جي عيسائين جي روحاني اڳواڻ پوپ سان ويٽي ڪن، سٽي ۾ ملاقات ڪرائي وئي هئي. اڳوڻو آرمي چيف اسلم بيگ هڪ ذميوار عهدي تي پنهنجا فرض سرانجام ڏيئي چڪو آهي، ان ڪري سندس بيان کي ڪنهن به طرح نظرانداز ڪري نه ٿو سگهجي. اهڙي صورتحال ۾ جڏهن عوام به ڏسي رهيو آهي ته اسلام آباد ۾ جيڪي ڌرڻا لڳا آهن، تن جو اڄ چاليهو ٿيڻ وارو آهي، انهن ڌرڻن تي خرچ جو اندازو ان ڳالهه مان لڳائي سگهجي ٿو ته عمران خان جي ڪنٽينر وٽ جيڪي لائوڊ اسپيڪر لڳل آهن، تنهنجو ٺيڪو جنهن شخص کي ڏنو ويو آهي، ان انهي جا 4 ڪروڙ رپيا ورتا آهن. جڏهن ته ڪنٽينر کي لگزري بڻائڻ لاءِ هڪ ڪروڙ رپيا وڌيڪ خرچ ڪري ان کي عمران خان جي رهائش گاهه واڌو آفيس طور بڻايو ويو آهي. جڏهن ته اهي به اطلاع آهن ته ڌرڻي وارن لاءِ روزانو 200 ديڳيون ڀت جون چاڙهيون وڃن ٿيون، جڏهن ته ٻيا خرچ ان کان علاوه آهن، اهي سڀيئي خرچ ڪير ڀري رهيو آهي ۽ اها رقم ڪهڙين قوتن پاران فراهم ڪئي پئي وڃي، تنهن بابت اڃا ڪنهن ڦاٽ ڪو نه کاڌو آهي. ليڪن جڏهن اهي ڦاٽ ڦاٽندا تيستائين ٿي سگهي ٿو ته پلين هيٺان ڪيترو ئي پاڻي وهي چڪو هجي، هڪ طرف اسلام آباد ۾ ڌرڻا لڳا پيا آهن ته ٻئي طرف عام چونڊن وارو ماحول جڙندونظر اچي رهيو آهي. جماعت اسلامي پنهنجن ڪارڪنن کي سرگرم ڪندي جلسن جي شروعات ڪري چڪي آهي، پيپلز پارٽي به سرگرم ٿيڻ جون تياريون ڪري رهي آهي، جڏهن ته بلاول ڀٽو 18 آڪٽوبر کان سياسي سرگرميون شروع ڪرڻ جو اعلان ڪري ڇڏيو آهي. متحدا قومي موومينٽ ته پنهنجن ڪارڪنن کي موبائيل جي هڪ فون يا ايس ايم ايس ذريعي ڪنهن وقت ۽ ڪٿي به گڏ ٿيڻ وارا انتظام هڪ ڊگهي عرصي کان شروع ڪري رکيا آهن ۽ اهو ڏينهن خالي نه هوندو آهي، جڏهن متحدا پنهنجن ڪارڪنن کان ڪو امتحان نه ورتو هجي جيڪو امتحان سندن پاران جلسي ۾ حاضر ٿيڻ جي شڪل  ۾ ورتو وڃي ٿو. هن وقت اي اين پي ۽ جي يو آءِ اڃا ڪي وڌيڪ سرگرم نه ٿيون آهن، پر جهڙي ريت عمران خان مولانا فضل الرحمان لاءِ گٿا لفظ ڳالهائيندو رهي ٿو، تنهن مان لڳي ٿو ته جي يو آءِ به  جلد سرگرم ٿيندي نظر ايندي. جڏهن ته عمران خان سڄي ملڪ ۾ عام جلسن جي شروعات ڪري ڇڏي آهي، اهڙي ڳنڀير سياسي صورتحال ۾ ميان نواز شريف آمريڪا جي دوري تي نڪتو آهي، جتي هن کي آمريڪي قيادت کي ڪيترن ئي اهم سوالن تي مطمئن ڪرڻو پوندو، جيڪو سندس لاءِ هڪ وڏو امتحان هوندو ڇاڪاڻ ته آمريڪا افغانستان مان نڪرڻ لاءِ پنهنجيون تياريون شروع ڪري ڇڏيون آهن پر آمريڪا اها خاطري به ڪرڻ گهري ٿو ته  ميان نواز شريف آمريڪا کي خاطري ڪرائي ته ان جي فوجين جي واپسي کانپوءِ پاڪستان سرڪار طالبانن جي پٺڀرائي نه ڪندي يا انهن کي پاڪستان جي سرزمين استعمال ڪرڻ نه ڏيندي. ميان نواز شريف جيڪڏهن اها خاطري ڪرائڻ ۾ ڪامياب ويو ته امڪان آهن ته پاڪستان ۾ سندس حڪومت ايندڙ ڪجهه سالن تائين سڪون سان هلڻ شروع ٿي وڃي  پر جيڪڏهن آمريڪا کي ڪو مطمئن ٿيندڙ جواب نه ملي سگهيو ته پوءِ ان ڳالهه جا وڌيڪ امڪان آهن ته ميان نواز شريف جي جاءِ تي عدالتي مارشل  لا ذريعي ڪو نئون سيٽ اپ جوڙيو وڃي، جيڪو هڪ ڊگهي عرصي تائين ڪم ڪندو رهي، جنهن لاءِ افغانستان ۾ جهڙي ريت قومي حڪومت قائم ڪئي وئي آهي، اهڙي قسم جي قومي حڪومت جو تجربو پاڪستان ۾ به شروع ڪيو وڃي جنهن جو اشارو اسلم بيگ به ڏيئي چڪو آهي ته هن وقت طاهرالقادري ۽ عمران خان جيڪو ڪجهه ڪري رهياآهن اهو آمريڪا، برطانيا ڪئناڊا ۽ ايران جي سرپرستي  هيٺ ڪري رهيا آهن  ۽ آمريڪا جي ئي اشارن تي اسلام آباد ۾ لڳايل ڌرڻي جي ڪري چين جي صدر جو دورو ملتوي ٿيو آهي. جنهن سان چين جا پاڪستان ۾ وڌندڙ ڪاروباري قدم وقتي طور تي رڪجي ويا آهن، هن وقت وزيراعظم کي جيتوڻيڪ پارليامينٽ جي گڏيل اجلاس هڪ وڏي سگهه فراهم ڪئي آهي، ليڪن کيس اڄوڪين حالتن ۾ ملڪ جي اندران ايترو خطرو نظر نه ٿو اچي جيترو ٻاهرين قوتن وٽان نظر اچي رهيو آهي. يعني هن وقت 4 وڏا ملڪ پاڪستان ۾ پنهنجي مرضي جي حڪومت قائم ڪرڻ لاءِ ڪوششون ڪري رهيا آهن، جڏهن ته سعودي عرب جيڪو اڻ سڌي طرح ان ڪري به نواز شريف جي حمايت ڪري رهيو آهي ڇاڪاڻ ته جيڪي چار ملڪ ميان نواز شريف  جي  حڪومت کي هٽائڻ گهرن ٿا تن ۾ ايران به شامل آهي ۽ سعودي عرب ڪڏهن به نه چاهيندو ته ايران کي ايتري ڇوٽ ملي وڃي جو اهو پاڪستان ۾ پنهنجي مرضي جو سيٽ اپ آڻڻ ۾ ڪامياب ٿي سگهي. هن وقت ميان نواز شريف سعودي عرب جي مدد سان آمريڪا آڏو پنهنجي پوزيشن مضبوط ڪري سگهي ٿو، پر جيڪڏهن چئن ملڪن جي اتحاد مان ايران کي ڪڍي سعودي عرب کي شامل ڪيو ويو ته پوءِ صورتحال وزيراعظم خلاف وڃي سگهي ٿي ۽ وزيراعظم ميان نواز شريف لاءِ هن  وقت سفارتڪاري جو به وڏو امتحان آهي. جيتوڻيڪ سرتاج  عزيز، وزيراعظم ميان نواز شريف جو پرڏيهي معاملن بابت صلاحڪار آهي ۽ اهو گذريل ڪيترن ئي مهينن کان عوام جي نظرن کان  به غائب آهي، ڪجهه حلقن جوخيال آهي ته اهو پرڏيهي معاملن جي سلسلي۾ ميان نواز شريف ۽ ان جي حڪومت تي جيڪي پرڏيهي دٻاءََ وڌي رهيا آهن، تن کي گهٽائڻ لاءِ ڪوششون ڪري رهيو آهي، سندس اهي  ڪوششون ڪيتري حد تائين ڪامياب ٿيون آهن، تنهن جي خبر وزيراعظم جي آمريڪا جي دوري کانپوءِ ئي سامهون اچي سگهندي،هاڻ رڳو اهو ڏسڻو آهي ته  عالمي ايمپائر آمريڪا اسان لاءِ ڪهڙو فيصلو ٿو ڪري جيڪو وزيراعظم جي دوري جي نتيجي کانپوءِ واضح طريقي سان سامهون اچي ويندو