تازيون خبرون

Daily Archives: September 19, 2014

ميڪا سنگهه ۽ شان جي فلم بلوندر سنگهه فيمس هوگيا جي نئين گاني جي وڊيو جاري

ممبئي(شوبز نيوز) ڀارتي گلوڪار balwinder-singh-famous-ho-gayaميڪا سنگهه ۽ شان جي فلم بلوندر سنگهه فيمس هوگيا جي نئين گاني جي وڊيو جاري ڪئي وئي اهي، بالي ووڊ جي ڳائڻي ميڪا سنگهه ۽ سان گاني سان گڏ ايڪٽنگ جي دنيا ۾ به قدم رکي ڇڏيو آهي.

 

ڪراچي: بالي ووڊ جي نئي لو اسٽوري فلم دعوت عشق پاڪستان ۾ رليز ٿيندي

ڪراچي(شوبز نيوز) بالي ووڊ جي نئي لو اسٽوري فلم دعوت عشق پاڪستان ۾ اڄ  رليز ٿيندي، نئين فلم جو سڄي ملڪ جي سئنيما گهرن ۾ شاندار افتتاح ٿيندو، فلم جيو فلمز جي نئي رليز آهي، يش راج بينر جي هن هلڪي ڦلڪي مزاحيه رومينس فلم ۾ عاشقي فين جو اديتيه راءِ ڪپور پريانڪا چوپڙا جي سئوٽ پرينيتي چوپڙا ليڊ ڪردار ۾ نظر ايندا، فلم جي ڪهاڻي حبيب فيصل لکي آهي، فلم ۾ پرينيتي هڪ حيدرآبادي ڇوڪري جو رول نڀائي رهي آهي جيڪا جوتن جي دوڪان تي سيلز گرلز آهي.

 

معذور ماڻهن جي عالمي ڏينهن جي موقعي تي 4 ملڪي انٽرنيشنل ڪرڪيٽ ٽورنامينٽ اسلام آباد ۾ کيڏيو ويندو

اسلام آباد(اسپورٽس نيوز) انٽرنيشنل ڪرڪيٽ ڪائونسل فار فزيڪلي چئلينج ۽ پاڪستان ڪرڪيٽ ايسوسيئيشن فار فزيڪلي هينڊي ڪيپ جي چيئرمين راجا عمران حسين چيو آهي ته پاڪستان ڪرڪيٽ ايسوسيئيشن فار فزيڪلي هينڊي ڪيپ جي انتظام هيٺ 3 ڊسمبر تي معذور ماڻهن جي عالمي ڏينهن جي موقعي تي 4 ملڪي انٽرنيشنل ڪرڪيٽ ٽورنامينٽ اسلام آباد ۾ کيڏيو ويندو. جنهن ۾ پاڪستان سميت ڀارت، افغانستان ۽ بنگلاديش جون ٽيمون حصو وٺنديون. هن چيو ته ٽورنامينٽ ۾ شرڪت ڪندڙ پرڏيهي ٽيسٽ ۾ باقاعده دعوت موڪلي وئي آهي ۽ پرڏيهي ٽيمون نومبر جي آخري هفتي تائين پنهنجي شرڪت بابت جواب ڏينديون. ٽورنامينٽ جو فائنل ميچ پنڊي ڪرڪيٽ اسٽيڊيم ۾ کيڏيو ويندو

683pak-football-app2608

پاڪستان پريميئر فٽ بال ليگ اڄ شروع ٿيندي

اسلام آباد(اسپورٽس نيوز) 11هين پاڪستان پريميئر فٽ بال ليگ (اڄ) ڇنڇر ڏينهن کان مختلف هنڌن تي گڏ شروع ٿيندي. خان ريسرچ ليبارٽريز، راولپنڊي جي ٽيم ٽائيٽل جو دفاع ڪندي. ليگ جون ميچون اسلام آباد، لاهور ۽ ڪراچيءَ ۾ کيڏيون وينديون. پاڪستان فٽ بال فيڊريشن جي سيڪريٽري جنرل (ر) احمد يار لوڌي ٻُڌايو ته ليگ ۾ سموري ملڪ مان 12 ٽيمون حصو وٺنديون، جن ۾ دفاعي چيمپئن ڪي آر ايل، ڪراچي اليڪٽرڪ پاڪستان، واپڊا، چمن، ڪي پي ٽي، نيشنل بئنڪ آف پاڪستان، چمن، افغان ايف سي، پاڪستان ريلوي ۽ بلوچ ڪوئيٽه شامل آهن. فٽ بال ليگ 10 جنوري تائين جاري رهندي. جناح اسٽيڊيم اسلام آباد 132 مئچن مان 26 جي ميزباني ڪندو، جڏهن ته 69 مئچون ڪراچي ۽ 37 مئچون لاهور ۾ کيڏيون وينديون.

 

قومي جمناسٽڪ چيمپئن شپ 27 سيپٽمبر کان شروع ٿيندي؛روبينه فاروق

اسلام آباد(اسپورٽس نيوز) پاڪستان جمناسٽڪ فيڊريشن جي انتظام هيٺ 2 ڏينهن واري قومي جمناسٽڪ چيمپئن شپ 27 سيپٽمبر کان  لاهور ۾ شروع ٿيندي. پاڪستان جمناسٽڪ فيڊريشن جي چيئرپرسن روبينه فاروق ٻُڌايو ته چيمپئن شپ ۾ پنجاب، خيبر پختونخواه، بلوچستان، سنڌ، پاڪستان آرمي، پاڪستان پوليس، پوليس ريلوي، هائر ايجوڪيشن ڪميشن، پاڪستان واپڊا ۽ اسلام آباد جون ٽيمون حصو وٺنديون.

 

قومي ڪراٽي ٽيم ايشين گيمز ۾ شاندار ڪارڪردگيءَ جو مظاهرو ڪندي: ڪوچ

اسلام آباد(اسپورٽس نيوز) قومي ڪراٽي ٽيم جي ڪوچ خالد نور چيو آهي ته قومي ڪراٽي ٽيم ايشين گيمز ۾ شاندار ڪارڪردگيءَ جو مظاهرو ڪندي. گذريل ڏينهن پاڪستان اسپورٽس ڪامپليڪس ۾ سکيا ڪيمپ دوران ”اي پي پي “ سان ڳالهائيندي هن چيو ته 6 رڪني ٽيم ايشين گيمز ۾ 4 مرد ۽ 2 عورتون شامل آهن. هن چيو ته ايشين گيمز ۾ شرڪت لاءِ رانديگر ڀرپور محنت ڪري رهيا آهن. اميد آهي ته اسان جا رانديگر جذبي سان کيڏي ملڪ ۽ قوم جو نالو روشن ڪندا. هن چيو ته رانديگر ايشين گيمز ۾ شرڪت لاءِ 28 سيپٽمبر تي ڪوريا روانا ٿيندا. پهرين آڪٽوبر تي ايونٽ جا ڊراز، جڏهن ته 2 کان 4 آڪٽوبر تائين مقابلا منعقد ٿيندا.

683pak-football-app2608

مير انسانيت جو علمبردار هو: ساٿي محمد صالح ڪاتيار

دنيا ۾ مقصدي جنگيون وڙهي قومن کي غلامي ۽ ظلم مان نجات ڏياري تاريخ جي ورقن تي پنهنجو نالو روشن ڪيو، اهڙا بهادر انسان هميشه دلين تي راڄ ڪن ٿا  ۽ سندس ڇڏيل مشن جو دڳ هر نسل لاءِ راهه مثل اڄ به آهي، سندس ڇڏيل رستو تبديلي آڻي ظلم مان ڇوٽڪارو ۽ هر نسل جي خوشحالي جي ضمانت آهي. سورهيه اڳواڻ خدمت جي جذبي سان ظالماڻي نظام جو خاتمو ۽ تعليمي سجاڳي جو سڏ جا خواها هوندا آهن انهن جي مقصدي جدوجهدآخري دم تائين جاري رهي آهي، پاڻ ڪنهن به قرباني کان نه ڪيٻائيندا آهن اهي منزل تي پهچڻ لاءِ وڏي کان وڏي جان جي قرباني ڏيئي هڪ دنيا آڏو مثال ٿي ويندا آهن، اهڙن بهادرن جي سچائي ويڙهه جي ڪري قومن ۾ هڪ گڏيل طاقت جو جذبو پيدا ٿي ويندو آهي ان بعد ظالماڻي نطام جو خاتمو آڻي فتح حاصل ڪئي ويندي آهي، سورهيه هميشه ٻين جي زندگي بهتر خاطر قرباني ڏيڻ ٿا ۽ سرمائيندارن ۽ جاگيردارن کي مات ڏئي ملڪ کي خوشحال ڪري اڳڀرو ڪندا آهن آيا آهن . سندن جدوجهد رنگ لاتو ته نسلن جو مستقبل سنوارجي ويندو آهي، جن قومن تعليم حاصل ڪري سورهيه اڳواڻن جي رهبري ۾ اڳتي قدم رکيا آهن، اهي اڄ دنيا ۾ قومون ترقي يافته ملڪن ۾ شمار آهن جيڪي بهادر سر جو سانگهو لاهي مقصدي جنگ ۾ سچائي سان اڳتي قدم رکن ٿا، انهن جي فتح يقيني آهي جيڪي جنگجو راهه ۾ ماريا به وڃن ٿا، اهي ڪڏهن به موت کان نه ڊڄندا آهن اهي شهادت ماڻي سرخرو ٿين ٿا، اهڙي پوئتي موٽڻ کي مهڻو سمجهندا آهن، انهن کي پنهنجي زندگي جو فڪر نه هوندو آهي ۽ اهي ٻين لاءِ قرباني ڏيئي دڳ ڇڏي ويندا آهن.

سورهيه مري سوڀ کي دل جا وهم وسار

هڻ ڀالا وڙهه ڀاڪرين آڏي ڍال ۾ ڍار

متان تيخ ترار، مار ته متارو ٿئين. (شاهه)

اسان جي سنڌ ۾ اهرا بهادر پيدا ٿيا آهن، جن موت قبولي شهادت ماڻي آهي، ظالم جي اڳيان ڪنڌ نه جهڪايو ۽ ڪنڌ ڪپايو آهي، انهن جا نالا دنيا جي بهادرن سان تاريخي مثال بڻيا آهن، فخر ايشيا ذوالفقار علي ڀٽو دنيا جو بهادر انسان جنهن اسلامي ڪاز لاءِ جدوجهد ڪئي ۽ ملڪ کي شعوري طور اڀاري نالو روشن ڪيو، اهڙي بهادر انسان جا ٻه فرزند شهيد مير مرتضيٰ ڀٽو ۽ سندس ساٿي ڀاءُ شهيد شاهنواز ڀٽو به شهادت ماڻي نوجوانن جي دلين ۾ سمايل آهن، اڄ اهي کڻي جسماني طور تي اسان سان ناهن پر روحاني طور تي گڏ آهن . ميرمرتضيٰ ڀٽو 5 هزار سال موهن جي دڙي تهذيب جي شاهڪار علائقي لاڙڪاڻي ۾ جنم وٺندڙ سنڌ ڌرتي جو املهه ماڻڪ 20 سيپٽمبر تي پوليس هٿان شهيد ٿي ويو، سندس ڀاءُ شاهنواز ڀٽي کي پئرس ۾ سندس پيءُ ذلفي جي خون جي پياسي آمر ضياءُ سازش طور زهر ڏياري مارائي ڇڏيو ان بعد شهيد مرتضيٰ ڀٽو ساٿين سميت جيڪا قرباني ڏيئي هڪ تاريخي مثال ڇڏيو آهي، اهڙا سورهيه مرڻ کان پوءِ زنده هوندا آهن، سندس ڇڏيل دڳ هر ظلم ڪندڙ لاءِ موت هوندو آهي، اڄ مير مرتضيٰ موجود نه آهي، پر سندس تبديلي مشن جو ڏهڪاءُ هر ظلم ڪندڙ جي دماغ ۾ ڪو ڪو لڳل آهي. مير انسانيت جو علمبردار غريب پرور، مظلومن جو ساٿي، ساٿين جو ساٿي هو، اڄ به ملڪ جا مظلوم طبقا کيس مثالي قرباني تي سرخ سلام پيش ڪن ٿا، نوجوان سندس جدوجهد واري مشن تي فخر ڪري سندس دڳ تي هلندي ظالماڻي نظام جي خاتمي ۾ شامل عمل آهن. سنڌس پيءُ کي آمر ضياءُ الحق قيد ڪري تشدد ڪرائي مارائي ڦاسي جو ڊرامو رچايو، پاڻ پنهنجي پيءُ جي چوڻ تي ٻاهرين دنيا روانا ٿيا ۽ جلاوطني قبول ڪئي، ٻاهر رهي اسلامي ڪاز لاءِ ٻين تنظيمن سان جنگ ۾ حصو وٺي دنيا جي ليڊرن وٽ پاڻ مڃرايو، انهي ڪري سڀني ملڪن جي سربراهن سندس جدوجهد تي کين مان ڏنو ۽ عزت جي نگاهه سان ڏسي کين شاباس ڏني، مير پنهنجي پيءُ کي قيد ۾ ۽ مظلوم ماڻهن تي آمر ظلم جي انتها تي هن للڪار ڪندي تنظيم ٺاهي، اعلان ڪيو ته تشدد جو جواب تشدد سان ڏنو ويندو، آمر جي اڳيان مصلحت نه ڪبي، هر ظلم ڪندڙ کان پلاند ورتو ويندو، جي ماريا وياسين پوءِ به ڪردار وارو مثال هميشه زنده رهندو، اسان جو رستو ظلم مان نجات، عذار ۽ ظلم ڪندڙ لاءِ موت هوندو، مقصدي جنگ :طم خلاف فتح حق ۽ سچ جي ٿيندي، نيٺ ته صبح ٿيندو، انڌيري رات هميشه رهڻي ناهي.

سوڀون سر گهرن ٿيون، سر ڏيڻ بهادرن جو رتبو آهي، پتنگ باهه ڏسي نه موٽندا آهن، مير جي مثالي جدوجهد نوجوانن لاءِ راهه مثل بڻيل آهي. مير بابا ملڪ ۾ وڏي تبديلي ٿي چاهي، جيڪا غريبن جي سوچن جي تعبير هئي، ان ۾ انصاف يقيني هو، پاڻ غريبن جو همدرد رهيا پنهنجي پيءُ جي فڪر جيڪو غريبن جي جيئڻ جو پورائو ۽ زندگي هو، ان جي پاسداري ۽ اسلام جي سربلندي لاءِ جاکوڙ سنڌ جي هيري جو وڌيڪ دنيا ۾ نالو روشن ڪيو هن مساوات ٿي چاهي، پاڻ اهڙا مثال غريبن وٽ وڃي اختيار ڪيا، غريبن جي دل جي چاهت ٿي ويو، انقلابي جدوجهد ۾ وقت درڪار هوندو آهي پوءِ جيڪا تبديلي ايندي آهي جيڪا معاشري کي سنواري، ظلمت جو خاتمو آڻي انصاف مهيا ڪندي آهي

**********

 

جمهوريت جو نوجوان سپاهي،بلاول ڀٽو زرداري: پروفيسر ڊاڪٽر محمد مشتاق ڪلوٽا

21 سيپٽمبر 2014 بلاول ڀٽو زرداري جي سالگرهه جي موقعي تي

پاڪستان پيپلز پارٽي جمهوري قدرن جي امين آهي. قائد عوام شهيد ذوالفقار علي ڀٽو اسلامي جمهوريه پاڪستان ۾ جمهوريت ۽ عوامي امنگن جو ترجمان هو. هن ملڪ کي 1973ع جو هڪ متفقه آئين ۽ قوم کي سچو ۽ حقيقي شعور ڏنو. شهيد جمهوريت راڻي محترمه بينظير ڀٽو پنهنجي والد جي سوچ ان جي فڪر ۽ فلسفي ۽ جمهوري رويي جي امين هئي. هن ملڪ ۽ قوم ۾ جمهوريت جي فروغ لاءِ جدوجهد ڪئي، هو جمهوريت جي علامت هئي. هن پاڪستان پيپلز پارٽي جي ڪارڪنن کي اهڙي طرح سکيا ڏني جو هو جمهوريت جا سپاهي ٿيا ۽ آمريت خلاف هميشه اڳيان رهيا. قائد عوام ۽ اوڀر جي نياڻي جي ويزن مطابق پاڪستاني عوام جي قيادت ان نوجوانن جي هٿن ۾ هجي جيڪي پاڪستان جي تقدير بدلڻ جو عزم رکندا هجن ۽ مستقبل جي سمورن مسئلن ۽ چئلينجن کي منهن ڏئي، پاڪستان کي حقيقي معنيٰ ۾ ترقي جي راهه تي گامزن ڪري سگهن. ترقي جون منزلون ۽ قوم کي ترقي جي راهه تي گامزن اهو ئي ڪري سگهي ٿو جنهن جي اندر سرواڻي جون صلاحيتون ۽ خوبيون موجود هجن.

خدا ڪري ڪه ميري ارض پاڪ په اتري- وه فصل گل جسي انديشه زوال نه هو

نوجوان قائد بلاول ڀٽو زرداري، قائد عوام شهيد ذوالفقار علي ڀٽو ۽ شهيد محترمه بينظير ڀٽو جي فڪر ۽ فلسفي، نظريي ۽ امانتن جو وارث آهي. هن سياسي شعور، جمهوريت جي بقاء  ۽ تسلسل، جمهوري قدرن جي فروغ، آمريت جي خاتمي ۽ مفاهمتي سياست جو سبق پنهنجي والده کان حاصل ڪيو ۽ شهيد محترمه بينظير ڀٽو اها تربيت قائد عوام شهيد ذوالفقار علي ڀٽو کان اخذ ڪئي هئي. هن جي سياست ۾ عملي قدم رکڻ ملڪ ۾ تبديلي جي نڪتي جي شروعات جي نويد آهي، جيڪا قائد عوام ۽ ملير جي ماروي جي پراڻي خواهش هئي.

ڪروڙين ماڻهن جون نظرون بلاول ڀٽو زرداري تي آهن، جيڪو ملڪ ۾ جمهوريت جو اڀرندڙ هڪ روشن ستارو آهي، ملڪي سياست ۾ ان جي عملي ڪردار کي سڀني ساراهيو. هن تمام ٿورڙي عرصي ۾ جنهن تدبر، فهم ۽ فراست، بالغ نظريي، سياسي بصيرت، جمهوريت، رواداري ۽ مفاهمتي فڪر ۽ فلسفي جي ترجماني ڪئي، ان کيس جمهوري قوتن جو نمائندو بڻائي پيش ڪيو آهي. ان حقيقت کان ڪير به انڪار نٿو ڪري سگهي ته پاڪستان پيپلز پارٽي جمهوريت ۽ وفاق جي علامت آهي. هي واحد پارٽي آهي جنهن جمهوريت ۽ جمهوري قدرن جي فروغ لاءِ وڏي کان وڏي قرباني ڏيڻ کان ڪڏهن ڪين ڪيٻايو. ڇا اڄ دنيا ۾ ڪا اهڙي پارٽي موجود آهي جنهن جي خاندان صرف ۽ صرف جمهوريت جي بقا، جمهوري جدوجهد جي حصول ۽ عوامي حقن خاطر پنهنجين جانين جا نذرانا پيش ڪيا هجن؟ قائد عوام شهيد ذوالفقار علي ڀٽو ۽ شهيد محترمه بينظير ڀٽو جون شهادتون ان حقيقت جي ترجماني ڪن ٿيون.

ملڪ جي آبادي جو سڀ کان وڏو طبقو نوجوانن تي مشتمل آهي ۽ هي اهي نوجوان آهن جن کي اڳتي اچي ملڪ جي قيادت سنڀالڻي آهي، ملڪ ۾ چونڊ عمل جو فيصلو نوجوانن جي ووٽ تي ٿيندو آهي. ان ۾ ڪوبه شڪ نه آهي ته ڪنهن به جمهوري ملڪ ۽ جمهوري سوچ رکندڙ قوم جا نوجوان بذات خود ۽ نوجوان قيادت فعال ۽ هر اول دستي جو ڪردار ادا ڪندي آهي. جمهوريت تي يقين رکندڙ ان ڳالهه کان چڱي ريت واقف آهن ته قوم ۾ جمهوريت جي فروغ ۽ حقيقي جمهوريت جي قيام ۾ نوجوان مرڪزي ڪردار ادا ڪن ٿا. پاڪستان پيپلز پارٽي جو نوجوان قائد ۽ چيئرمين بلاول ڀٽو زرداري ملڪ ۽ قوم جو قيمتي اثاثو آهي. هن ٿوري عرصي ۾ ملڪ ۽ عالمي سياست ۾ وڏو نالو ڪمايو آهي. هن جي قابليت ۽ لياقت هن جي عظيم سياسي ۽ جمهوري پس منظر جي ڪري آهي. پاڪستان جي سياست، پاڪستان جي قيادت، جمهوري جدوجهد، ملڪ جو جمهوري مستقبل هن جهڙن نمائنده ماڻهن سان وابسته آهي. هو جنهن جرئت سان پارٽي جي اڳواڻي سنڀالي رهيو آهي ۽ جنهن جمهوري انداز ۽ سياسي شعور سان پاڪستان پيپلز پارٽي جي اڳواڻ ڪري رهيو آهي اهو ان ڳالهه جو هڪ روشن اشارو آهي ته هو ملڪ ۽ قوم ۾ هڪ مقبول ۽ متحرڪ اڳواڻ طور اڀري رهيو آهي.

پاڪستان پيپلز پارٽي هن جي قيادت ۾ متحرڪ به آهي ته فعال به آهي. هو پنهنجي سياست ۽ فراست سان شهيد محترمه بينظير ڀٽو جي منشور ۽ پارٽي کي منظم ۽ فعال رکڻ ۾ ڏينهن رات مصروف آهي. هو نه صرف ايشيا بلڪ اولهه جي دنيا ۽ ٻين سمورن جمهوري قومن ۾ هڪ بالغ نظر ۽ سياسي شعور رکندڙ اڳواڻ طور سامهون آيو آهي. پنهنجي عمر جي مختصر عرصي ۾ هن جيڪا مقبوليت ۽ سڃاڻپ حاصل ڪئي آهي ان مان اندازو ڪري سگهجي ٿو ته ان جو جمهوري سفر ان جو مستقبل ڪيترو روشن آهي. ان لاءِ چيو ويو آهي ته:

محبت مجهي ان جوانون سي هي ستارون پر جو ڊالتي هين ڪمند

بلاول ڀٽو زرداري جديد تعليم يافته نوجوانن جي صف ۾ تمام گهڻو اڳتي آهي. هن جمهوريت جي نرسري برطانيه ۾ تعليم حاصل ڪئي اتي جي جمهوري ۽ سياسي ڪلچر کي انتهائي ويجهو سان ڏٺو ۽ گڏوگڏ پاڪستان ۾ جمهوريت ۽ سياسي نظام تي به مڪمل گهري نظر رکي ٿو. دنيا ۾ اڄوڪي ۽ ايندڙ حالتن ۾ جنهن قيادت جي ضرورت ملڪ ۽ قوم محسوس ڪري رهيو آهي، نوجوان قائد بلاول ڀٽو زرداري ان تي هر لحاذ سان پورو لهي ٿو. اڄ ۽ ايندڙ حالتن ۾ ملڪ کي جيڪي مسئلا ۽ چئلينج آڏو هوندا ان ۾ ملڪ ۽ قوم کي اهڙي قيادت ۽ اهڙي اڳواڻ جي ضرورت آهي جيڪو عوام جي حقيقي معنيٰ ۾ ترجماني ڪري سگهي ۽ ان ۾ ڪوبه شڪ نه آهي ته اها قيادت سامهون اچي چڪي آهي. جيڪڏهن دنيا جي تاريخ تي نظر ڦيرائجي ته اها ڳالهه واضح ٿي ويندي ته جنهن قوم جي نوجوانن پنهنجي رياست جي ترقي ۾ پنهنجو مثبت ڪردار ادا ڪيو. اهي قومون ترقي جي مينار کي وڃي رسيون ۽ اهي قومون هميشه هميشه لاءِ امر ٿي ويون، انهن قومن جي نوجوانن پنهنجون سموريون صلاحيتون ملڪ جي ترقي ۽ تعمير تي صرف ڪري ڇڏيون.

نهين تيرا نشيمن قصر سلطاني ڪي گنبد پر

تو شاهين هي بسيرا ڪر پهاڙون کي چٽانون پر

قائد عوام شهيد ذوالفقار علي ڀٽو عوامي ۽ قومي ليڊر هو، شهيد محترمه بينظير ڀٽو پنهنجي والد جي فڪر ۽ فلسفي جي امين، جمهوري دور جي علامت ۽ قومي ۽ بين الاقوامي اڳواڻ هئي، هن پاڪستان کي هڪ جمهوري ملڪ طور دنيا ۾ متعارف ڪرائڻ ۽ ان جي مسئلن جي حل لاءِ مخلصاڻو ڪردار ادا ڪيو جنهن کي تاريخ جي هڪ روشن حقيقت طور هميشه ياد رکيو ويندو. پاڪستان پيپلز پارٽي جي چيئرمين بلاول ڀٽو زرداري انهي سوچ ۽ فڪر جو علمبردار آهي. هو ملڪ ۾ حقيقي جمهوريت جي فروغ لاءِ بي مثال ڪردار ادا ڪري رهيو آهي. هن جي سوچ جمهوريت جي علامت ۽ ان جو فلسفو ملڪ ۽ قوم جي ترقي ۽ ملڪ جي مستقبل سان وابسته آهي. هو ملڪ ۾ جمهوريت، مفاهمت، تحمل ۽ برداشت، رواداري امن ۽ سلامتي، عوام جي حقن جي تحفظ ، اقليتن جي مڪمل مذهبي آزادي، غريب ۽ پسمانده، مظلومن جو ترجمان آهي. هن جي سياست ۽ گفتگو جو مرڪز عوام ۽ عوامي مسئلا آهن. هو ملڪ جي تعمير ۽ ترقي، آئين ۽ قانون جي بالادستي، جمهوري قدرن ۽ پارلياماني نظام جي تسلسل تي يقين رکي ٿو. هن جي هڪ جملي “جمهوريت بهترين انتقام آهي” سياسي دنيا ۾ هلچل مچائي ڇڏي.

هن دهشتگردي خلاف واضح موقف اختيار ڪري عوام جي دليون کٽي ورتيون ۽ پنهنجي امڙ شهيد محترمه بينظير ڀٽو جي مفاهمت واري نظريي کي نظر ۾ رکندي مفاهمتي پاليسي کي عملي جامو پهرائي رهيو آهي، جنهن جو هڪ نهايت شاندار مظاهرو ان وقت ڏسڻ ۾ آيو، جڏهن مارچ 2014 ۾ پنهنجي سياسي مخالف ميان محمد نواز شريف کي ان جي سنڌ جي دوري جي موقعي تي ذاتي طورتي خوش آمديد چيو. بلاول ڀٽو زرداري سنڌ جي ثقافت کي بين الاقوامي طور تي اجاگر ڪرڻ لاءِ مثالي خدمتون انجام ڏئي رهيو آهي جنهن جي شاندار مثال سنڌ فيسٽيول جو ڪامياب انعقاد آهي.

موجوده مسئلن ۽ چئلينجن ۾ اسان کي اهڙي ئي اڳواڻ ۽ سياسي مفڪر جي ضرورت آهي جيڪو ملڪ جي ترقي لاءِ مخلص هجي، جمهوريت جي تسلسل ۽ آئين جي بالادستي تي يقين رکندو هجي ۽ جيڪو ملڪ ۽ قوم جي بهتري، معاشي ترقي جو خواب سجائي مسلسل مصروف عمل هجي، جيڪو پاڻ به مخلص هجي ۽ ملڪ ۽ قوم سان به مخلص هجي. اسان کي اهڙي نوجوان، باصلاحيت، باڪردار اڳواڻ ۽ قيادت جي ضرورت آهي جيڪو ملڪ جي تعمير ۽ ترقي ۾ پنهنجو ڀرپور ڪردار ادا ڪري سگهي. اقبال ڇا خوب چيو آهي:

نگاهه بلند، سخن دل نواز جان پُرسوز يهي رختِ سفر مير ڪاروان ڪي لئي

 

 

ٻوڏ جا وڏا وهڪرا سنڌ ۾ داخل ٿي ويا

گهوٽڪي ۽ ڪشمور ضلعن ۾ بندن تي پاڻي جو دٻاءُ وڌي ويو، گڊو بئراج تي وچولي ۽ سکر تي هيٺين درجي جي ٻوڏ آهي، لاڙڪاڻي ضلعي ۾ درياهه پائڻ لڳو، ڪيترائي ڳوٺ ختم ٿيڻ جو خطرو آهي. مليل اطلاعن موجب سنڌو درياهه ۾ آيل ٻوڏ سنڌ ۾ داخل ٿي وئي آهي. پنجاب کان ايندڙ پاڻي جو وڏو وهڪرو سنڌو درياهه ۾ گهوٽڪي وٽان گذري رهيو آهي، آبپاشي کاتي جي انگن اکرن موجب گڊو تي پاڻي جو مٿانهون وهڪرو 3 لک 52 هزار 186 ۽ هيٺانهون وهڪرو 3 لک 27 هزار 274 رڪارڊ ڪيو ويو،  درياهه جي پاڻي ۾ چاڙهه سبب ڪچي جي وڌيڪ ڪيترائي ڳوٺ پاڻي هيٺ اچي ويا آهن، درياهه جي پيٽ ۾ واقع 100 سالا قديمي ميهار چاچڙ مڪمل طور مٽي جو ڍير بڻجي ويو آهي، 2 ماڙ اسڪول ۽ مسجد سميت ڳوٺ جا سمورا گهر درياهه حوالي ٿي ويا آهن، گهوٽڪي ۾ پاڻي جي چاڙهه بعد وچولي ٻوڏ ڊڪليئرڪئي وئي آهي، پر ان وچولي ٻوڏ به ڪامورن جا ٺٺ ڪرائي ڇڏيا آهن، وڏين وڏين گاڏين ۾ گهمندڙ ڪامورن پاران اين ڊي ايم اي ۽ پي ڊي ايم اي کان ملندڙ تنبو ۽ راشن جي ٿيلهن ورهائڻ ۾ به وڏي ڪرپشن ڪئي وئي آهي، جنهن ڪري متاثر دانهون ڪري رهيا آهن، رليف ڪيمپن ۾ ترسايل متاثرن پاران کاڌ خوراڪ جو سامان نه ملڻ، طبي سهولتن جي اڻهوند ۽ ٻين سهولتن جون اڃا تائين دانهون ڪيون پيون وڃن،پر انهن دانهن جو ازالو نه ٿي سگهيو آهي. هوڏانهن گڊو بيراج تي پاڻي وڌي رهيو آهي. ڪشمور ڪنڌڪوٽ ضلعي ۾ به پاڻي جي سطح وڌيل آهي ۽ بندن تي دٻاءُ وڌي رهيو آهي. خاص طور تي ٽوڙي بند جيڪو 2010ع جي ٻوڏ ۾ به ٽٽي پيو هو، ان جي حوالي سان ماڻهن ۾ اڃا به خوف آهي. سکر ضلعي جي ڪچي ۾ پنوعاقل ۾ به پاڻي وڌي رهيو آهي. الف ڪچي ۽ شاهه ٻيلي ۾ 10 ڳوٺن ۾ پاڻي داخل ٿي ويو آهي. پر ماڻهن گهرن مان نڪرڻ کان انڪار ڪري ڇڏيو آهي. نوشهري فيروز ضلعي جي حدن ۾ 100 کان وڌيڪ ڳوٺن ۾ پاڻي داخل ٿي ويو آهي. خيرپور ضلعي جي ڪچي ۾ به سوين ڳوٺ پاڻي هيٺ اچي ويا آهن. نواب شاهه، ڄامشوري، حيدرآباد ضلعن جي ڪچي مان به ماڻهن کي محفوظ هنڌن تي منتقل ٿيڻ جو چيو ويو آهي. ذريعن موجب پاڻي ۾ واڌ کانپوءِ گڊو بئراج تي ننڍي ٻوڏ وچولي درجي ۾ ۽ سکر تي ننڍي کان ننڍي ٻوڏ ننڍي ٻوڏ ۾ تبديل ٿي وئي آهي. نئون ديرو لڳ ڳوٺ واحد بخش آگاڻي سامهون سنڌو درياءَ کاڌ ڪري بند طرف تيزيءَ سان اڳتي وڌي رهيو آهي جنهن ڪري بند جي ڀر ۾ قائم ڳوٺن واحد بخش آگاڻي، پارو ڀٽو، سڄڻ جي وانڍ، ور وارا ڀٽا سميت ڀرپاسي ۾ قائم ڪيترن ئي ڳوٺن جي ڳوٺاڻن جو ساهه مٺ ۾ اچي ويو آهي، جڏهن ته سندن سوين ايڪڙن تي بيٺل ترن جو فصل به درياهه ڳڙڪائي تباهه ڪري ڇڏيو آهي. هوڏانهن ڳوٺ واحد بخش آگاڻي وٽ سنڌو درياءَ جي ايل ايس بند وٽ کاڌ ڪري اڳتي وڌي وڃڻ واريون خبرون شايع ٿيڻ بعد ڊي سي لاڙڪاڻو ۽ آبپاشي کاتي پاران نوٽيس وٺڻ کان پوءِ ڄاڻايل هنڌ کي حساس قرار ڏنو ويو آهي. آبپاشي کاتي پاران ڳاڙهيون جهنڊيون ۽ بند جي ڪنهن هنگامي صورتحال کي منهن ڏيڻ لاءِ وڏي مقدار ۾ پٿر گهرائي بند تي لاٿا پيا وڃن. ٻئي پاسي ڳوٺاڻن جو چوڻ آهي ته 150 جريب ايراضيءَ تي بيٺل ترن جو فصل مان 15 جريب زمين مس بچيو آهي جنهن تي به درياءَ کاڌ ڪري رهيو آهي. سوا سئو جريب ترن جو فصل درياءَ کاڌ ڪري کائي ويو آهي. پنجاب ۾ اڃا ٻوڏ برقرار آهي، مظفر ڳڙهه، رحيم يار خان ۽ اچ شريف جي سوين ڳوٺن ۾ اڃا پاڻي بيٺل آهي. پنجاب ۾ پنجند هيڊ ورڪس تي هن وقت وڏي ٻوڏ آهي جيڪا آهستي آهستي سنڌو درياهه ۾ گڊو بئراج طرف وڌي رهي آهي. اين ڊي ايم اي جي ترجمان مطابق متاثر علائقن ۾ ٻوڏ سبب ٿيل نقصان ۽ امدادي سرگرمين بابت صوبائي ۽ وفاقي حڪومت طرفان اين ڊي ايم اي جي چيئرمين کي تفصيلي طور بريفنگ ڏني وئي. سنڌو درياهه جي گڊو ۽ سکر بئراج تي وڏي درجي جي ٻوڏ جي اڳڪٿي جيڪا موسميات کاتي طرفان 15 سيپٽمبر تي ڏني وئي هئي سا گهٽجي وئي آهي، چناب درياهه تي قادر آباد ۽ پنجند هيڊ ورڪس وچ ۾ بند ٽوڙڻ جي ڪري هاڻي گڊو ۽ سکر بئراج تي وڏي درجي جي ٻوڏ جو خطرو گهٽجي ويو آهي. سنڌو درياهه ۾ گڊو ۽ سکر بئراج وٽان 4 کان 5 لک ڪيوسڪ پاڻيءَ جو وهڪرو گذري سگهي ٿو جنهن سان سنڌو درياهه جي ڪچي جا علائقا متاثر ٿي سگهن ٿا. ان سلسلي ۾ سنڌ حڪومت ڪچي جي علائقي مان ماڻهن کي محفوظ هنڌن منتقل ڪري رهي آهي. اين ڊي ايم اي چيئرمين صوبائي ڊزاسٽر مئنجمينٽ اٿارٽي سنڌ سان مسلسل رابطي ۾ آهي ته جيئن ڪنهن به اڻوڻندڙ صورتحال کي مُنهن ڏيڻ لاءِ وقت سر ضروري قدم کڻي سگهجن