تازيون خبرون

Daily Archives: September 8, 2014

شنگهائي ڪوآپريشن آرگنائيزيشن: ملڪي ترقيءَ لاءِ هڪ موقعو

آمريڪا جي ترقي جو راز ئي ان ۾ لڪل آهي ته مختلف ملڪن اندر مداخلت ذريعي پنهنجو اثر رسوخ وڌائي پنهنجا قومي مفاد حاصل ڪجن ۽ ٻيو ته اها حقيقت آهي ته آمريڪا طاقت جي اُن عروج تي پهچي چڪو آهي، جتي هو اهو سڀ ڪجهه ڪري به سگهي ٿو.پر اهڙي قسم جي راءِ جيڪر پاڪستان لاءِ ڏجي ته اهو ملڪ لاءِ بهتر ٿي ئي نه ٿو سگهي. ڇو ته پاڪستان هن وقت اندروني مختلف منڌل معاملن ۾ ڦاٿل آهي، جنهن مان نڪرڻ لاءِ کيس گهڻ طرفي منصوبابندي ٺاهڻ جي اشد ضرورت آهي. ان صورتحال ۾ قطعي طور تي ملڪ اهڙي ڪنهن پوزيشن ۾ به ناهي جو اهو ٻاهرين ملڪن جي معاملن ۾ مداخلت ڪري سگهي. هن وقت ملڪي سطح جي پاليسي ٺاهيندڙن لاءِ اهو نه صرف سوچڻ جو مقام آهي پر انهن لاءِ اهو به لازم بڻجي چڪو آهي ته اُهي عملي پاليسيون ٺاهي انهن تي بنا ڪنهن ڪمپرومائيز جي ڪم ڪرائڻ شروع ڪن. نه صرف اندروني طور تي ڪي جٽادار پاليسيون ٺاهجن پر هي اهم وقت آهي جو پرڏيهي پاليسيءَ تي ٻيهر نظرثاني ڪجي ۽ اهڙن موزون ملڪن جي چونڊ ڪجي، جيڪي پاڪستان جي معيشت کي هڪ ڀيرو ٻيهر ترقيءَ جي راهه ڏانهن گامزن به ڪن. ان لاءِ ملڪي پرڏيهي پاليسي جوڙيندڙن کي منافقيءَ کي ترڪ ڪرڻو پوندو ۽ ڪي غيرمعمولي فيصلا ڪرڻا پوندا. جيڪڏهن هڪ مضبوط پارٽنر چونڊڻ جي ڳالهه ڪجي ته پاڪستان کي هيل سنجيدگيءَ سان شنگهائي ڪوآپريشن آرگنائيزيشن ڏانهن ويجهو ٿيڻ تي غور ڪرڻ جي ضرورت آهي جنهن ۾ پاڪستان کي آبزرور اسٽيٽس ڏنل آهي.شنگهائي ڪوآپريشن آرگنائيزيشن (ايس سي او) 26 اپريل 1996 تي ٺاهي وئي ۽ ان علائقائي تنظيم ٺاهيندڙ ملڪن جن ۾ چين، رشيا، ڪازڪستان، ڪرجستان ۽ تاجڪستان شامل آهن، انهن جو بنيادي مقصد صرف اهو هو ته پنهنجا سرحدي معاملا حل ڪجن ۽ سرحدن تي جنگي حالتون پيدا ٿيڻ کان روڪجن ته جيئن سرحدن تي ڪشيدگيءَ واري صورتحال کي نرم بڻائجي ۽ اتي فوجن جي نفري گهٽائجي. جون 2002 کانپوءِ ان تنظيم پنهنجي ڪم جو دائرو وسيح ڪيو ۽ ان ۾ نئين پيش رفت 2007 ۾ تڏهن آئي جڏهن ان ۾ 20 نون وڏن پروجيڪٽن تي ٺاهه ٿيا، جنهن ۾ معاشي، توانائي، آمدرفت، سيڪيورٽي، دفاع، ملٽري، بينڪنگ ۽ پرڏيهي معاملن کان وٺي ثقافتي لاڳاپن تي ٺاهه شامل آهن. اهو پهريون ڀيرو هو جو ايس سي او جي 2005 واري گڏجاڻي ۾ پاڪستان، ايران، افغانستان، منگوليا ۽ انڊيا به موجود هئا، جن کي ايس سي او ۾ بحيثيت آبزرور رياستن وارو درجو ڪري شامل ٿيا. اهو به هرگز نه وسارڻ گهرجي ته ايس سي او جي بنياد وجهندڙ ملڪن ۾ وڏو هٿ چين جو هو، جيڪو هميشه جيان پنهنجي پراڻي پاليسيءَ تي بيٺل نظر ايندو رهيو آهي ته دنيا اندر امن کي مڪمل هٿي وٺرائجي ته جيئن واپاري ۽ ڪاروباري رابطا ملڪن وچ ۾ وڌي سگهن ۽ ملڪ معاشي طور ترقي ڪري ڀرجهلا ٿي سگهن. اهو سڀ ڪجهه تڏهن ئي ممڪن ٿي سگهي ٿو، جڏهن مختلف خطن اندر امن هجي ۽ خاص ڪري وچ ايشيا ۾ ته امن لازمن هجڻ گهرجي ڇو ته هي خطو اسٽريٽيجيڪلي وڏي اهميت رکي ٿو. اڃان به جي ائين چئجي ته پوري دنيا اندر امن قائم هجڻ لاءِ اهو ضروري آهي ته وچ ايشيا ۾ امن قائم ڪرائجي ته ڪو وڌاءُ نه ٿيندو.پاڪستان هن وقت معاشي تنزليءَ مان گذري رهيو آهي، جتي ملڪ ٻاهرين ناڻي جي بيساکين جي سهاري تي بيٺل آهي ۽ معاشي طور تي بلڪل ئي ڪمزور بڻجي چڪو آهي. هتي هر صوبائي توڻي وفاقي ادارو ٻاهرين امداد تي ئي هلي رهيو آهي. وڏي شرمناڪ حقيقت اِها آهي جو تعليم جهڙي بنيادي ضرورت به هتان جي شهرين کي ان ڪري ملي رهي آهي جو ان سرڪاري سيڪٽر کي اڃان تائين ٻاهرين امداد ملي رهي آهي جنهن ۾ سڌي مداخلت ورلڊ بينڪ جي آهي. امداد ته ملي رهي آهي ۽ مستقبل ۾ به ملندي رهندي پر ان کان قطعي طور تي انڪار به نه ٿو ڪري سگهجي ته ڪو به ٻاهريون ادارو امداد بغير ڪنهن شرطن جي هلي نه ٿو تنهن ڪري زوري ئي اهڙيون شرطون لاڳو ڪيون وڃن ٿيون جو عام عوام جي چيلهه ئي چٻي ٿيو وڃي. پاڻ اڳ کان وڌيڪ عوام جو حالت بگڙيو وڃي ۽ ايندڙ نسلن تائين قوم قرضي بڻجيو وڃي ۽ ان قرض جي مد ۾ قوم غلامي جي ڳٽ ۾ جڪڙجيو وڃي. اها ويڌن صرف پاڪستان سان ئي نه آهي پر دنيا جي ٻين کوڙ انهن ملڪن سان به آهي، جيڪي آمريڪا يا اتان جي بينڪن ۽ ناڻي وارن ادارن جي قرضي بڻيل آهن. مقصد ته آمريڪا جي پاليسي ئي اها رهي آهي ته ملڪن کي قرضن جي ور وڪڙن ۾ ڦاسائي انهن کي ڪنهن نه ڪنهن ريت غلام بڻائي رکجي ته جيئن پنهنجا جائز يا ناجائز مفاد حاصل پيا ڪجن.کوڙ سارا اهڙا ملڪ آهن، جيڪي ترقي يافته نه هئڻ باوجود به اهڙي قسم جي ڄار مان آزادي حاصل ڪري چڪا آهن. اهي ڪافي اڳ ئي اهو سمجهي چڪا ته بهتر اهو ئي رهندو ته سڀئي ساڳي معاشي حالتن وارا ملڪ پاڻ ۾ ويهي ڪنهن معنيٰ خيز ڊائلاگ ذريعي سرحدي يا اهڙن قسمن جا مسئلا حل ڪري معاشي ترقي لاءِ ڪي اُپاءُ وٺي ڪري اڳتي وڌجي ۽ هميشه هميشه لاءِ استحصالي قوتن مان جند آجي ڪرائجي. نيٺ اُهي ملڪ هاڻ معاشي طور تي ڀرجهلا به ٿي چڪا آهن. انهن ۾ آسيان جا ۽ ايس سي او ملڪ اچيو وڃن ٿا. ايس سي او ۾ سواءِ رشيا ۽ چين کي ڇڏي ڪري باقي سڀئي ملڪ ترقي پذير آهن. انهن ملڪن علائقائي تنظيمن مان ڀرپور فائدو ورتو آهي ۽ معاشي مد ۾ ڪافي اڳتي به اچي چڪا آهن.پاڪستان جيئن ته ايس سي او جو آبزرور اسٽيٽس رکندڙ ملڪ آهي، جنهن جي اڄ صورتحال اُها ئي آهي جيڪا ڪجهه وقت اڳ انهن ملڪن جي هئي،

جن جو ذڪر ڪري چڪا آهيون. پاڪستان پنهنجن ٻين انيڪ اندروني مسئلن سان گڏوگڏ ٻاهرين مسئلن جو شڪار آهي. پر جي ڏسجي ته انهن اندروني مسئلن جا سبب به ٻاهرين مسئلن ۾ لڪل آهن. جي پاڪستان جا پاليسي ٺاهڻ وارا شروع کان وٺي پنهنجو مڪمل لاڙو آمريڪا طرف نه رکن ها ته اڄ اهڙي نوبت ملڪ مٿان نه آيل هجي ها. مڃون ٿا ته ان وقت ملڪ آڏو اها مجبوري هئي ته انڊيا جهڙي رياست کي منهه ڏيڻ لاءِ ڪنهن طاقتور پارٽنر جي چونڊ ڪرڻ لازم هو ۽ ان ڪري آمريڪي ڪيمپ ڏانهن ئي جهڪاءُ رکيو ويو پر اها مجبوري ڪو هميشه لاءِ ٿوري هئي. اڄڪلهه جون حالتون ماضيءُ کان ڪافي مختلف آهن، هي ڪو ماضي وارو اهو د‎ؤ‍‍ر ناهي جو مجبوري تحت ڪنهن به هڪ طاقتور ڪيمپ ڏانهن ئي جهڪيل رهجي پر اڄوڪو دؤر انٽرڊپينڊنس (هڪٻئي تي دارومدار رکڻ) وارو آهي ۽ ترقي يافته توڙي ترقي پذير ملڪن وٽ آپشنز تقريبن ساڳيا ئي آهن. علائقائي تنظيمن وسيلي مفادن جي آڙ ۾ هڪٻئي کي هڪٻئي تي دارومدار ڪرائي هر ملڪ پنهنجو دفاع ڪري سگهي ٿو ته معاشي طور ڀرجهلو به ٿي سگهي ٿو.

عوامي رنگ ۾ رڱجي ويل پارليامينٽ

ملڪي تاريخ جي ڊگهي ڌرڻي ۽ آزادي مارچ جو انجام ڇا ٿيندو؟ ان جو ته فيصلو وقت ئي ڪندو پر پارليامينٽ هائوس هينئر غريبن جي جهوپڙين سان سٿجي ويو آهي ۽ عورتون پنهنجي ٻارن کي لوڏن ۾ لوڏي مارگلا جي جبلن جو خوبصورت نظارو ڏسي رهيون آهن ۽ منهنجي ٻارڙي کي لوڏو ڏيو، آئون ڌرڻي ۾ پئي وڃان، جا آلاپ آلاپي شاهراهه جمهوريت تي پَسار ڪرڻ ۾ پوريون آهن ۽ ملڪي تاريخ ۾ اهو به پهريون ڀيرو ٿيو آهي جو پارليامينٽ واقعي عوامي پارليامينٽ جي روپ ۾ نظر اچي رهي آهي. هرطرف هوڪرا آهن ڄڻ ته سارين تان جهار هڪلجي رهيو آهي، هونئن به هن وقت سنڌ جي مختلف علائقن ۾ سارين ۾ لابارو شروع ٿي ويو آهي ۽ هر طرف خوشيون ئي خوشيون آهن ۽ هتي اسلام آباد جي پارليامينٽ هائوس ۾ ويٺلن جي چهرن تي به مرڪون ئي مرڪون آهن، نه ڪا مٽي آهي، جيڪا اڏري اکين ۾ پوي ٿي ۽ نه ئي وري لڪ آهي، جيڪا جسم کي ساڙي ٿي، هر طرف سرسبز نظارا آهن ۽ انقلاب جا پانڌيئڙا خوشين ۾ مشغول آهن.

سياسي بحران جنهن جيترو شدت سان ڪر کنيو هو، عوام جي ذهن ۾ هو ته شايد سونامي اسلام آباد سان ٽڪرائجي هر طرف تباهي مچائي ڇڏيندو ۽ وزيراعظم جي استعيفيٰ ڪپتان جي هٿ ۾ هوندي ۽ تخت سونامي جي لهرن ۾ لڙندو، يا ته راول ڊيم ۾ غرق ٿي ويندو يا وري اسلام آباد جي جبلن تان ايندڙ برساتي نالن ۾ گم ٿي ويندو پر اڃا تائين ائين ناهي ٿيو، وزيراعظم نواز شريف پنهنجي عهدي تي برقرار آهي ۽ صرف سوچڻ ۾ پورو آهي ته هن عذاب مان جان ڇڏائجي ته ڪيئن ڇڏائجي.

مخالف ڌر جون پارٽيون جيڪي پارليامينٽ ۾ ڪجهه ڪلاڪن تائين حڪومت جي ساٿ ڏيڻ جو وچن ڪن ٿيون ۽ حمايت سان گڏوگڏ اهڙي تنقيد ڪن ٿيون جو وزيراعظم نواز شريف دل ئي دل ۾ ڪڙهندو هوندو ته ان کان ته استعيفيٰ ڏئي ڇڏيان ته بهتر آهي، حمايت به ڪن ٿا ۽ هي ذليل به ڪن ٿا، اها ڪهڙي شرافت آهي، اعتزاز احسن جي تقرير کانپوءِ نواز شريف ضرور ان حوالي سان سنجيدگي سان غور ڪيو هوندو ته ان کان ته احتجاجي ڀلا آهن، جيڪي گهٽ ۾ گهٽ کلي مخالفت ته ڪري رهيا آهن ۽ هتي پارليامينٽ ۾ ويٺل حامين جي شڪل ۾ اهڙا ته ڪلور ڪري رهيا آهن، جو دل چوي ٿي ته منهن تي چئي ڏيان ته اهڙي حمايت نه کپي، جيڪا ذليل ڪري پر اهو شايد نواز شريف جي وس ۾ نه آهي. هڪ طرف اقتدار جي ڪرسيءَ آهي ۽ ٻئي طرف جده جي جلاوطني. ٻنهي ۾ وڏو فرق آهي جده ۾ ڀلي بادشاهي ملي پر اها پنهنجي گهر تائين محدود هوندي ۽ هي ته سڄو ملڪ ئي پنهنجو آهي، جيئن وڻي ٿو تيئن ڪجي ٿو، سڄو گهر حڪومت ڪري ٿو، اڳيان پويان هلندڙ سڄو ڏينهن تعظيم ڪن ٿا، سلامن جو سلسلو نه کٽڻ جو هوندو آهي، هتي ته بادشاهي بادشاهي آهي، جيستائين اقتدار آهي، تيستائين ته ڪو پڇاڻو به نه آهي.

تاريخ جي هن ڊگهي ڊرامي جو خالق جنهن وقت هي ڊرامو لکي رهيو هو، ان شايد اهو سوچيو هو ته هڪ هڪ قسط لکندو ان جي رڪارڊنگ ڪرائيندو ويندو ۽ جيستائين ڊرامو پورو ٿيڻ جي ويجهو ايندو، تيستائين آخري قسط به لکي وٺندو پر اسلام آباد جو ماحول عجيب آهي! لڳي ٿو ته اهو ليکڪ پنهنجي آخري قسط لکڻ ۽ ڊرامي کي ڪلائيميڪس تي پهچائڻ کان اڳ ۾ ئي پنهنجي راهه رباني وٺي چڪو آهي ۽ پٺيان سياسي بحران جي ناوَ اڻ تجربيڪار ناکوئن عمران خان ۽ طاهرالقادري جي حوالي ڪري چڪو آهي، جن کي نه هوا جي رخ جو پتو آهي ۽ نه ئي وري ونجهه هلائڻ جي ڪا ڄاڻ آهي. اهي ته آڏا ابتا ونجهه هلائي هاڻي ته ٻيڙي جا ئي ترا ڪڍي ڇڏيا اٿن، جنهن کي ڪيڏي مهل شيخ رشيد چتي هڻڻ جي ڪوشش ڪري ٿو ته ڪيڏي مهل چوڌري ڀائر پنهنجي لباس کي ان ٻيڙي جي سوراخن ۾ رکي ڪجهه وقت جي لاءِ ڀرجهلو بڻجڻ جي ڪوشش ڪن ٿا ۽ ان اسڪرپٽ رائيٽر کي ڳولڻ جي ڪوشش ڪن ٿا جيڪو اسلام آباد جي جهنگ ۾ ڪٿي گم ٿي ويو آهي ۽ ڳولڻ جي باوجود هٿ نه ٿو اچي.

آزادي ۽ انقلاب مارچ جي ناڪامي ان وقت ئي شروع ٿي وئي هئي، جڏهن عمران خان پنهنجي جذبات ۾ اهو چيو هو ته هي چونڊون ڌانڌلي واريون آهن. ان لاءِ وزيراعظم آرمي چيف کي هڪ بي ايم ڊبليو به تحفي ۾ ڏني هئي ۽ عمران خان جي ان بيان جي ستت ئي پوءِ آءِ ايس پي آر بيان جاري ڪندي چيو هو ته موجوده آرمي چيف کي ڪا به بي ايم ڊبليو ناهي ملي، عمران خان جو بيان ڪوڙو آهي ۽ گهڻن ان وقت ئي اندازو لڳائي ڇڏيو هو ته هاڻي ڪجهه ٿيڻ وارو نه آهي، جيڪو شخص ڳالهه دل ۾ سانڍي نه سگهي، ان کان اعليٰ اختياريون ڪڏهن به اهڙو ڪم نه ڪرائينديون، جيڪو اڳتي هلي ڳچي ۾ پوي ۽ دنيا ڏٺو ته ان کانپوءِ عمران خان امپائر جي آڱر کڄڻ جي ڳالهه ڪئي ۽ وڌيڪ تابوت ۾ ڪوڪو ته تحريڪ انصاف جي ٻيڙي جي سوار مخدوم جاويد هاشمي هنيو، جنهن ته چيف جسٽس به پنهنجو هجڻ جي ڳالهه ڪري، سڄي ڪاڄ جو ٻيڙو ٻوڙي ڇڏيو ۽ هاڻي عمران خان نه هيڏانهن جو رهيو آهي نه هوڏانهن جو، طاهرالقادري کي ڪا به پرواهه نه آهي، سندس پيروڪار تمام گهڻا آهن ۽ اهي ڪنهن به صورت ۾ سندس ساٿ نه ڇڏيندا ۽ طاهرالقادري کي به ماڻهن کي پاڻ سان رکڻ جو هنر اچي ٿو ۽ هو واقعي ان ڪم ۾ ماهر آهي، کلڻ کان ويندي روئارڻ، سندس کاٻي هٿ جو کيل آهي، طاهرالقادري کي ڪو به لهر لوڏو نه آهي، اها ڳالهه طاهرالقادري به سمجهي ٿو، باقي حال نه آهي عمران خان جو، جيڪو شيخ رشيد سميت ڪجهه ٻين جي مشورن تي عمل ڪري اهڙو ڦاٿو آهي، جتان نڪرڻ سندس وس جي ڳالهه نه آهي.

عمران خان جيڪو هاڻي اعليٰ اختيارين جي حمايت وڃائي ويٺو آهي، هاڻي کيس پڪ ٿي وئي آهي ته اتان کان ڪجهه به ناهي ورڻو. جڏهن ته آمريڪا به جيستائين اعليٰ اختياريون مداخلت نه ٿيون ڪن، تيستائين ڪنهن جو به ساٿي ٿيڻ لاءِ تيار ناهي هوندو، اهو به في الحال پري بيٺل آهي، ان صورتحال کانپوءِ آزادي ۽ انقلاب مارچ پنهنجي ئي گپ ۾ اهڙا ڦاٿا آهن، جتان نڪرڻ لاءِ واقعي معجزو کپي، نواز شريف جي استعيفيٰ ته اڳ ۾ به اچڻي نه هئي پر شهباز شريف جي استعيفيٰ جا ڪجهه چانس هئا پر موجوده صورتحال کانپوءِ هاڻي اهي چانس به گهٽ ٿي ويا آهن، سنڌي ۾ پهاڪو آهي ته آئي هئي سون کڻڻ، ڪن ڪپائي وئي. واقعي هن صورتحال تي ٺهڪي اچي ٿو. ڇو ته جيڪي استعيفائون وٺڻ آيا هئا، اهي ئي استعيفائون ڏئي وڃي رهيا آهن ۽ موٽ ۾ سواءِ تاريخي ذلالت جي ڪجهه به حاصل ناهي ٿيو، جيڪڏهن اهو ئي ڪرڻو هو ته پوءِ عمران خان ۽ طاهرالقادري پنهنجي ئي هٿن سان ڪنهن هڪ ٻه ڪارڪن جي قرباني ڏئي، پنهنجي هانءَ تي ڇنڊو وجهن ها. ايڏو پنڌ ڪرڻ کانپوءِ موٽ ۾ ڪجهه به نه ملڻ، شايد عمران خان ۽ طاهرالقادري جي لاءِ اهو سبق آهي، جيڪو هو پڙهندا ويندا ۽ کين تاريخ ياد رکندي ويندي.

لاڙڪاڻي جي پاپوليشن کاتي جي ملازمن مطالبن جي مڃتا لاءِ آفيس ۾ ڪم ڇڏ هڙتال

ميونسپل ڪارپوريشن جي ملازمن طرفان ٽن مهينن کان رهيل پگهارن ۽ مختلف ماڻهن طرفان پنهنجي مسئلن جي حل لاءِ پريس ڪلب اڳيان احتجاج

ڳوٺ گلاب ڀٽو جي رهواسي ضمير حسين ڀٽو طرفان نوڪري نه ملڻ خلاف ڪالهه به پريس ڪلب اڳيان علامتي بک هڙتال ڪئي

لاڙڪاڻو (بيورو) لاڙڪاڻي جي پاپوليشن کاتي جي ملازمن مطالبن جي مڃتا لاءِ آفيس ۾ ڪم ڇڏ هڙتال ڪري احتجاج ڪيو. ان موقعي تي پيرل دايو، صفدر سومرو، عبدالوهاب مغيري ۽ ٻين چيو ته جيستائين ٻين صوبن جيان سنڌ جي ملازمن جا به گريڊ هڪ جهڙا ۽ اپگريڊ ڪري ٽائيم اسڪيل ۽ سوشل ميل موبلائيزرن کي اسڪيل ڏئي ريگيولر نه ڪيو ويندو تيستائين احتجاج جاري رهندو.هوڏانهن مختلف ماڻهن طرفان پنهنجي مسئلن جي حل لاءِ پريس ڪلب اڳيان احتجاج جاري آهي. ان ڏس ۾ ميونسپل ڪارپوريشن جي ملازمن طرفان ٽن مهينن کان رهيل پگهارون نه ملڻ خلاف پنجين ڏينهن به پريس ڪلب اڳيان احتجاج ڪيو ويو. ان موقعي تي راحب عباسي، نعيم اختر ڪلهوڙو، بدرالدين سولنگي، صابر حسين ابڙو ۽ ٻين چيو ته جيستائين اسان جا مطالبا نه مڃيا ويندا تيستائين احتجاج جاري رهندو. ڳوٺ گلاب ڀٽو جي رهواسي ضمير حسين ڀٽو طرفان نوڪري نه ملڻ خلاف ڪالهه به پريس ڪلب اڳيان علامتي بک هڙتال ڪئي.هن چيو ته جيستائين نوڪري نه ڏني ويندي تيستائين احتجاج جاري رهندو.

هوڏانهن صديق آباد جي رهواسي حبيب الله شيخ پڻ نوڪري نه ملڻ خلاف پريس ڪلب اڳيان احتجاج جاري رکندي نوڪري ڏيڻ جو مطالبو ڪيو. ٻئي طرف نئون ديرو چوڪ جي رهواسي معذور ڪرم علي سيال طرفان مالي مدد لاءِ پريس ڪلب اڳيان احتجاج ڪندي ٻڌايو ته معذور آهيان ۽ مون کي ٻه ڀينر ۽ هڪ ماءُ آهي. ڀينرن جي شاديءَ لاءِ ڏاج جا پئسا ڪونه آهن. خدارا مدد ڪئي وڃي ته جيئن پنهنجي ڀينرن جي شادي ڪرائي سگهان.

بينظيرانڪم سپورٽ پروگرام جي قسط پھچڻ شرط بينڪن پاران اي ٽي ايم مشيون بند ڪري ڇڏيو

پري پري جي علائقن مان آيل مصتحق عورتون پريشان ٿيڻ لڳويون، عورتون پاران بينڪ عملي خلاف نعريبازي
بينڪ عملي پنھنجا ايجينٽ مقرر ڪرائي ڇڏيا آھن اھي اسان کان ڳري رشوت گھري رھياآھن: عورتن جو الزام

نصيرآباد(رپورٽر )بينظيرانڪم سپورٽ پروگرام جي قسط پھچڻ شرط بينڪن پاران اي ٽي ايم مشيون بند ڪري ڇڏيو خبرموجب؛بينظير انڪم سپورٽ پروگرام جي قسط پھچڻ شرط نصيرآباد جي بينڪن پاران اي ٽي ايم مشيون بند ڪري ڇڏيوجنھن جي ڪري پري پري جي علائقن مان آيل مصتحقن عورتون پريشان ٿيڻ لڳويون عورتون بينڪ عملي خلاف نعريبازي ڪئي ان موقعي تي مائي شريفان، خانزادي، ارباب خاتون۽ ٻين چيو ته بينڪ عملو رشوت گھري رھيو آھي نه ڏيڻ ته اي ٽي ايم مشيون بند ڪري ڇڏيون آھن ۽ اسان جي تذليل ڪئي پئي وڃي ھنن بينڪ عملو خلاف اعليٰ اختيارين کان جاچ ڪرڻ جو مطالبو ڪيو آخر اي ٽي ايم مشينن ڇو بند ڪرائيون ٿيو وڃن ھنن وڌيڪ چيو ته بينڪ عملو پنھنجا ايجينٽ مقرر ڪرائي ڇڏيا آھن اھي اسان کان ڳري رشوت گھري رھياآھن

ريڊيو پاڪستان لاڙڪاڻو جي 19 هين سالگرهه هلندڙ مهيني جي 24 تاريخ تي ملهائڻ لاءِ تياريون شروع

لاڙڪاڻو(اي پي پي) ريڊيو پاڪستان لاڙڪاڻو جي 19 هين سالگرهه هلندڙ مهيني جي 24 تاريخ تي ملهائڻ لاءِ radio-pakistan-larkanaتياريون شروع ڪيون ويون آهن. ريڊيو پاڪستان لاڙڪاڻي جي ترجمان ۽ پروڊيوسر مشتاق تونيو ميڊيا کي ٻڌايو ته 24 سيپٽمبر تي ريڊيو پاڪستان لاڙڪاڻي جي 19 هين سالگرهه جي سلسلي ۾ اسٽيشن ڊائڪريٽر مختيار ملڪ جي هدايتن تي تياريون شروع ڪيون ويون آهن. سالگرهه جي موقعي تي ريڊيو پاڪستان لاڙڪاڻي ۾ هڪ ميوزيڪل شو منعقد ڪيو ويندو،

جڏهن ته آرٽس ڪائونسل، عبدالطيف نظاماڻي ليبر هال ۾ پڻ ادبي پروگرام سان گڏ ايوارڊ، فنڪارن کي تعريفي سرٽيفڪيٽ واري تقريب پڻ منعقد ٿيندي. ياد رهي ته 24 سيپٽمبر 1994ع ۾ ان وقت جي وزير اعظم شهيد محترمه بينظير ڀٽو ريڊيو پاڪستان لاڙڪاڻو جو افتتاح ڪيو هو ۽ اڄ ريڊيو پاڪستان 19 سال مڪمل ڪري 20 هين سال ۾ قدم رکندو. هن وڌيڪ چيو ته سالگرهه جي مک تقريب ريڊيو پاڪستان لاڙڪاڻي ۾ ٿيندي، جنهن ۾ سنڌ جا مختلف فنڪار پنهنجي فن جو مظاهرو ڪندا.

نصيرآباد تعلقي جي زڪوات چيئرمين زڪوات جي فنڊ مان ست لک ٻاونجاھ ھزارروپيه ڪڊرائي حضم ڪري ڇڏيا: پپلز هاري ڪاميٽي ،غبن

نصيرآباد(رپورٽر )نصيرآباد تعلقي جي زڪوات چيئرمين زڪوات جي فنڊ مان ست لک ٻاونجاھ ھزارروپيه ڪڊرائي حضم ڪري ڇڏيا،غبن ٿيل زڪوات جي رقم چيئرمين کان واپس نه ڪرايا ويا ته احتجاجي تحريڪ شروع ڪئي ويندي خبر موجب:پيپلزھاري ڪاميٽي تعلقي نصيرآباد جي صدرڪامريڊ ارباب علي شيخ،جنرل سيڪريٽري محمد حسن ابڙو،ڊپٽي جنرل سيڪريٽري ڪامريڊ عبدالواحد دايو،يوسي ڏيرا جوموسي جت،ديھ بٺ ڏيرا جوچيئرمين پياس علي لاشاري،ديھ واسوڪلھوڙاجوچيئرمين ديدارعلي ڪلھوڙو۽ ٻين سچل پريس ڪلب نصيرآباد تي گڏيل پريس بيان ڏيندي چيو ته ضلعي قمبرشھدادڪوٽ جي تعلقه نصيرآباد جو چيئرمين زڪوات جي فنڊ مان غريبن مريضن جي علاج لاءِ آيل 7 لک ٻيانوي ھزارمختلف ڪوڙن نالن سان پرچو ڪڍي مريضن جي علاج واري رقم نصيرآٻاد جي ميڊيڪل اسٽورمالڪ گلزارعلي شيخ کان ڪيش جي صورت ۾وٺي وڏوغبن ڪيو آھي.ھنن وڌيڪ چيوته نصيرآباد جي زڪوات چيئرمين ارباب علي جھتيال جعلي اسڪول ڏيکاري جعلي شاگردن جي نالن سان 2 لک 34 ھزار نيشنل بيئنڪ نصيرآباد مان ڪڍرائي فراڊ ڪيو آھي ھنن وڌيڪ ٽن ڪوڙن نالن سان ڏاج فارم ڀري ضلع زڪوات چيئرمين کان 30 ھزار وٺي پاڻ حضم ڪيا آھن.
ھنن وڌيڪ چيو ته دوائن جي فنڊ۽ شاگردن جي اسڪالرجي رقم ۽ ڏاج فارم واري ورتل رقمن ۾ تعلقي چيئرمين اسان کي اعتماد ۾ نه ورتو ھيو ۽ نه وري اھڙن پرچن تي اسان جون صحيون ٿيل آھن ھنن اعلي اختيارين کان توڙي اينٽي ڪرپشن ضلعي قمبر شھدادڪوٽجي سرڪل آفيسر کان گھر ڪئي آھي ته ان جي مڪمل تور تي انڪواري ڪرائي وڃي ته جيئن غرابن مستحقن مريضن جي رقم تعلقي چيئرمين کان واپس ڪرائي وڃي

سنڌ سرڪار پاران ڪميٽي جوڙڻ جو فيصلو

وڏي وزير سيد قائم علي شاهه جي صدارت هيٺ سنڌ ڪابينا جي اجلاس ۾ صوبائي توانائي کاتي طرفان توانائي جي پيداوار لاءِ کنيل قدمن جي واکاڻ ڪندي نوري آباد ۾ هڪ سئو ميگاواٽ پاور پراجيڪٽ لاءِ مالي مدد جي منظوري ڏئي ڇڏي آهي، جنهن تي 13 ارب 65 ڪروڙ 40 لک رپيا لاڳت ايندي. صوبائي ڪابينا جي اجلاس ۾ ووئڻن ۽ ساريالي فصلن جي پيداوار لاءِ سنڌ سرڪار طرفان امدادي قيمت مقرر ڪرڻ لاءِ زراعت کاتي جي صوبائي وزير علي نواز مهر جي سربراهيءَ ۾ ڪميٽي جوڙڻ جو پڻ فيصلو ڪيو ويو آهي، جنهن ۾ ڪابينا جا 2 ميمبر، ايوان زراعت سنڌ، سنڌ ايگريڪلچر بورڊ، خانگي ۽ سرڪاري شعبي جا ٻيا اسٽيڪ هولڊر ڪميٽي جا ميمبر هوندا. ڪميٽي کي ڄاڻايل فصلن لاءِ امدادي قيمت مقرر ڪرڻ جي طريقيڪار جو تعين ڪرڻ جي ذميواري ڏني ويئي آهي. صوبائي ڪابينا ڪراچي شهر ۾ غير قانوني واٽر هائيڊرينٽس جو سختي سان نوٽيس ورتو ۽ ڪراچي واٽر ايند سيوريج بورڊ کي غير قانوني واٽر هائيڊرنٽس کي بنا دير ڊاهڻ ۽ انهن جي مالڪن خلاف قانوني ڪارروائي جي هدايت ڏني وئي آهي، غير قانوني هائيڊرينٽس لاءِ سنڌ پوليس نفري فراهم ڪرڻ سان گڏوگڏ ٻي گهربل مدد به ڪندي. سنڌ ڪابينا ٿرپارڪر ضلعي ۾ سوڪهڙي جي صورتحال جو جائزو ورتو ۽ اتان جي متاثر ماڻهن ۾ ڪڻڪ جي مفت فراهمي واري عمل تي اطمينان جو اظهار ڪيو، لاڳاپيل صوبائي وزيرن کي ٿرپارڪر جي صورتحال بابت هر وقت باخبر رهڻ ۽ ماڻهن کي پيش ايندڙ ڏکائين جو فوري ازالي لاءِ تيار رهڻ جي هدايت ڪئي وئي آهي. صوبائي ڪابينا چيف سيڪريٽري سجاد سليم هوتيانه ۽ خوراڪ کاتي جي صوبائي سيڪريٽري کي خوراڪ کاتي تي مالي اثرن جو جائزو وٺڻ ۽ فلور ملن کي گذريل سال جي 12 سئو رپين جي ڀيٽ ۾ ساڍا 12 سئو رپيا في مڻ ڪڻڪ جي فراهمي جو جائزو وٺڻ جي به هدايت ڪئي. اجلاس کي بريفنگ ڏيندي ناڻي ۽ توانائي کاتي بابت صوبائي صلاحڪار سيد مراد علي شاهه ٻڌايو ته سنڌ اڳ ۾ ئي توانائي جي بحران کي منهن ڏيڻ لاءِ پاڻ توانائي پيدا ڪري رهيو آهي. نوري آباد ۾ گئس تي هلندڙ 100 ميگاپاور منصوبا قائم ڪيا پيا وڃن، جنهن لاءِ اڪنامڪ ڪوآرڊينيشن ڪميٽي گئس فراهمي واري معاهدي تحت سوئي سدرن گئس ڪمپني کان 20 ايم ايم سي ايف ڊي حاصل ڪئي ويئي آهي. هن ٻڌايو ته ان پراجيڪٽ کي هلائڻ لاءِ ”سنڌ نوري آباد پاور ڪمپني“ (ايس اين پي سي) قائم ڪئي ويئي آهي، جنهن ۾ هڪ خانگي ڪمپني ٽيڪنومين ڪانٽيڪس جو 51 سيڪڙو ۽ سنڌ سرڪار جو 49 سيڪڙو شيئر هوندو. ان رٿا لاءِ ايل سي کولي ويئي آهي ۽ مشينري 9 مهينن ۾ موجود هوندي، جڏهن ته سائيٽ تي سول ورڪ شروع ڪيو ويو آهي. هن ٻڌايو ته نيپرا کان توانائي جي پيداوار خاطر لائسنس لاءِ درخواست ڏني وئي آهي، اميد آهي ته بنا ڪنهن ڏکيائي جي لائسنس جاري ڪيو ويندو ۽ گئس جي فراهمي ۽ ايل او آءِ جاري ڪرڻ لاءِ وفاقي بيورو ڪريسي ۽ لاڳاپيل طرفان ٻيهر رڪاوٽون نه ڪيون وينديون. زراعت کاتي جي صوبائي وزير علي نواز مهر اجلاس ۾ آبادگارن کي ووئڻن ۽ ساريالي فصل لاءِ رعايتن ۽ امدادي اگهه ڏيڻ بابت تجويز پيش ڪئي، جنهن تي ڪابينا جي سڀني ميمبرن غور ويچار ڪيو ۽ ان حوالي سان سنڌ سرڪار تي مالي اثرن ۽ خريد ڪيل فصل جي نيڪالي ۾ مشڪلاتن جي نشاندهي ڪئي. سنڌ ڪابينا جي ميمبرن آبادگار ڪميونٽي تي بهتر سماجي ۽ اقتصادي اثرن تي غور ڪندي آبادگارن کي پيش ايندڙ مشڪلاتن جو تدارڪ ڪرڻ ۽ انهن کي سپورٽ فراهم ڪرڻ لاءِ صوبائي وزير علي نواز مهر جي سربراهيءَ ۾ هڪ ڪميٽي قائم ڪئي ويئي. بلديات ۽ اطلاعات واري صوبائي وزير شرجيل انعام ميمڻ اجلاس ۾ غير قانوني واٽر هائيڊرنٽس جو مسئلو اٿاريو، جنهنڪري ڪراچي جا شهري پاڻي جي کوٽ جو شڪار آهن. ڪابينا ڪراچي واٽر بورڊ کي پوليس نفري فراهم ڪرڻ جو فيصلو ڪيو ته جيئن غير قانوني واٽر هائيڊرينٽس کي ڊاهي سگهجي ۽ انهن جي مالڪن خلاف ڪيس داخل ڪيا وڃن. خوراڪ واري صوبائي وزير ڄام مهتاب ڏهر اجلاس کي ٻڌايو ته هن سال 50 رپين کان وڌيڪ سبسڊي سان گڏ ساڍا 12 سئو رپيا في مڻ ڪڻڪ خريد ڪئي ويئي، ڪڻڪ فلور ملن کي فراهم ڪرڻ لاءِ قيمتن جو تعين ڪيو وڃي، جنهن تي بحث ڪندي صوبائي ڪابينا چيف سيڪريٽري ۽ صوبائي سيڪريٽري خوراڪ تي ٻڌل ڪميٽيءَ کي چيو ته اهي اهڙي حڪمت عملي طئه ڪن جنهن ذريعي وڌندڙ اگهه جا اثر صارفين تي نه پون. اجلاس کي خطاب ڪندي وڏي وزير سيد قائم علي شاهه چيو ته سنڌ ۾ ڪوئلي، گئس ۽ شمسي توانائي جا وڏا وسيلا موجود آهن، جنهن سان ملڪ کي انرجي بحران مان ڪڍي سگهجي ٿو. تازو چين جي دوري دوران چيني حڪومت پاڪستان ۾ توانائي جي 5 رٿائن جي معاهدن تي صحيحون ڪرڻ لاءِ راضي ٿي آهي، جن مان 3 رٿائون سنڌ ۾ هونديون. هن چيو ته آبادگارن کي اڪيلو نه ڇڏينداسين ۽ انهن کي امدادي قيمتون فراهم ڪرڻ لاءِ طريقيڪار ۽ مڪينزم جو تعين ڪنداسين.

فلم ”ڪريئيچر ٿري ڊي“ 12 سيپٽمبر تي سڄي دنيا ۾ سينيما گهرن جي زينت بڻجندي

ممبئي(شوبز نيوز) بالي ووڊ فلم ”ڪريئيچر ٿري ڊي“ 12 سيپٽمبر تي سڄي دنيا ۾ سينيما گهرن جي زينت بڻجندي. ڀارتي سڌ سماءَ

وارن ذريعن مطابق ان فلم ۾ پاڪستاني اداڪار عمران عباس، بپاشا باسو سان نظر ايندو. فلم جي ٽريلر کان پوءِ نئين گاني ”اڪ پل سهي“ جي ٻولن تي ٻڌل ان گاني کي پلي بيڪ سنگر سائم ڀٽ جي آواز ۾ رڪارڊ ڪيو ويو آهي. ان گاني جي وڊيو ۾ عمران عباس ۽ بپاشا باسو کي غمگين موڊ ۾ ڏيکاريو ويو آهي.

آمريڪي گلوڪاره برٽني اسپيئر پنهنجن پاليل ڪُتن تي 30 هزار ڊالر خرچ ڪري ڇڏيا

گلوڪاره ڪتن جي خريداريءَ لاءِ 13 هزار ڊالر ادا ڪيا ۽ جنوريءَ ۾ انهن ڪتن لاءِ 5568 ڊالر ۽ جولاءِ ۾ 8212 ڊالر خرچ ڪيا

گلوڪار بريٽني ڪتن لاءِ 1585 ڊالرن جا ڪپڙا ورتا ۽ سندس سارسنڀال لاءِ 5205 ڊالرن جو معاوضو ادا ڪيو

لاس اينجلس(شوبز نيوز) آمريڪي گلوڪاره برٽني اسپيئر پنهنجن پاليل ڪُتن تي 30 هزار ڊالر خرچ ڪري ڇڏيا. آمريڪي ميڊيا موجب برٽني اسپيئر گذريل سال 2 ڪتا پالڻ لاءِ ورتا. هن انهن جي خريداريءَ لاءِ 13 هزار ڊالر ادا ڪيا ۽ جنوريءَ/ڏسو صفحو 3 بقايا نمبر 31

۾ انهن ڪتن لاءِ 5568 ڊالر ۽ جولاءِ ۾ 8212 ڊالر خرچ ڪيا. گلوڪار بريٽني ڪتن لاءِ 1585 ڊالرن جا ڪپڙا ورتا ۽ سندس سارسنڀال لاءِ 5205 ڊالرن جو معاوضو ادا ڪيو. هن مجموعي طور انهن ڪتن مٿان 31234 ڊالر خرچ ڪيا

۾ انهن ڪتن لاءِ 5568 ڊالر ۽ جولاءِ ۾ 8212 ڊالر خرچ ڪيا. گلوڪار بريٽني ڪتن لاءِ 1585 ڊالرن جا ڪپڙا ورتا ۽ سندس سارسنڀال لاءِ 5205 ڊالرن جو معاوضو ادا ڪيو. هن مجموعي طور انهن ڪتن مٿان 31234 ڊالر خرچ ڪيا